ਇੰਦੌਰ, 10 ਅਕਤੂਬਰ, 2026 (ਗੁਰਮੀਤ ਸਿੰਘ ਤੁੰਗ) : ਉਮਰ ਦੇ 80ਵੇਂ ਪੜਾਅ ’ਤੇ ਪਹੁੰਚਣ ਦੇ ਬਾਵਜੂਦ ਨਰਿੰਦਰ ਮੈਨਨ ਦਾ ਕ੍ਰਿਕਟ ਪ੍ਰਤੀ ਜਨੂੰਨ ਅੱਜ ਵੀ ਬਰਕਰਾਰ ਹੈ। ਭਾਰਤੀ ਕ੍ਰਿਕਟ ਅੰਪਾਇਰ ਨਿਤਿਨ ਮੈਨਨ ਦੇ ਪਿਤਾ ਨਰਿੰਦਰ ਮੈਨਨ ਇੰਦੌਰ ਦੇ ਸੈਂਟਰਲ ਜਿਮਖਾਨਾ ਮੈਦਾਨ ਵਿੱਚ ਜੂਨੀਅਰ ਕ੍ਰਿਕਟ ਮੈਚਾਂ ਵਿੱਚ ਅੰਪਾਇਰਿੰਗ ਕਰਦੇ ਹਨ ਅਤੇ ਨੌਜਵਾਨ ਖਿਡਾਰੀਆਂ ਨੂੰ ਖੇਡ ਦੇ ਨਿਯਮਾਂ ਦੀ ਜਾਣਕਾਰੀ ਦਿੰਦੇ ਹਨ। ਨਰਿੰਦਰ ਮੈਨਨ ਨੇ 1998 ਵਿੱਚ ਆਪਣਾ ਆਖ਼ਰੀ ਅੰਤਰਰਾਸ਼ਟਰੀ ਮੈਚ ਬਤੌਰ ਅੰਪਾਇਰ ਕਰਵਾਇਆ ਸੀ, ਜਦਕਿ ਉਨ੍ਹਾਂ ਦੇ ਪੁੱਤਰ ਨਿਤਿਨ ਮੈਨਨ ਅੱਜ ਅੰਤਰਰਾਸ਼ਟਰੀ ਪੱਧਰ ’ਤੇ ਅੰਪਾਇਰਿੰਗ ਕਰ ਰਹੇ ਹਨ।
ਨਰਿੰਦਰ ਮੈਨਨ 1960 ਦੇ ਦਹਾਕੇ ਤੋਂ ਮਹਾਰਾਜਾ ਯਸ਼ਵੰਤ ਰਾਓ ਕ੍ਰਿਕਟ ਕਲੱਬ (MYCC) ਨਾਲ ਜੁੜੇ ਹੋਏ ਹਨ। ਉਹ 12 ਤੋਂ 15 ਸਾਲ ਦੀ ਉਮਰ ਦੇ ਬੱਚਿਆਂ ਦੇ ਮੈਚਾਂ ਵਿੱਚ ਅੰਪਾਇਰਿੰਗ ਕਰਦੇ ਹਨ ਅਤੇ ਉਨ੍ਹਾਂ ਨੂੰ ਕ੍ਰਿਕਟ ਦੇ ਨਿਯਮ ਸਮਝਾਉਂਦੇ ਹਨ। ਇੰਦੌਰ ਦੇ ਸੈਂਟਰਲ ਜਿਮਖਾਨਾ ਮੈਦਾਨ ਵਿੱਚ ਉਨ੍ਹਾਂ ਦੇ ਕਲੱਬ ਤੋਂ ਇਲਾਵਾ ਸੰਜੇ ਜਗਦਾਲੇ ਵੱਲੋਂ ਚਲਾਇਆ ਜਾਂਦਾ ਕ੍ਰਿਕਟ ਕਲੱਬ ਆਫ਼ ਇੰਦੌਰ ਅਤੇ ਇੰਦੌਰ ਡਿਵੀਜ਼ਨਲ ਕ੍ਰਿਕਟ ਐਸੋਸੀਏਸ਼ਨ ਵੀ ਸਰਗਰਮ ਹਨ। ਮੈਦਾਨ ਵਿੱਚ ਆਉਣ ਵਾਲੇ ਬੱਚੇ ਅਤੇ ਕੋਚ ਉਨ੍ਹਾਂ ਦੇ ਪੈਰ ਛੂਹ ਕੇ ਸਤਿਕਾਰ ਪ੍ਰਗਟਾਉਂਦੇ ਹਨ ਅਤੇ ‘ਜੈ ਹਿੰਦ’ ਕਹਿ ਕੇ ਉਨ੍ਹਾਂ ਦਾ ਸਵਾਗਤ ਕਰਦੇ ਹਨ। ਨਰਿੰਦਰ ਮੈਨਨ ਦਾ ਕ੍ਰਿਕਟ ਨਾਲ ਲੰਮਾ ਨਾਤਾ ਅਤੇ ਨੌਜਵਾਨ ਖਿਡਾਰੀਆਂ ਨੂੰ ਸਿਖਲਾਈ ਦੇਣ ਦਾ ਜਜ਼ਬਾ ਖੇਡ ਪ੍ਰਤੀ ਉਨ੍ਹਾਂ ਦੇ ਸਮਰਪਣ ਨੂੰ ਦਰਸਾਉਂਦਾ ਹੈ।
