ਮੁੰਬਈ, 18 ਅਗਸਤ, 2026 (ਹਰਸ਼ਪ੍ਰੀਤ ਕੌਰ) : ਇਮਰਾਨ ਹਾਸ਼ਮੀ ਦੀ ਫ਼ਿਲਮ ‘ਆਵਾਰਾਪਨ 2’ ਬਾਕਸ ਆਫਿਸ ’ਤੇ ਆਪਣੀ ਮਜ਼ਬੂਤ ਪਕੜ ਬਣਾਈ ਹੋਈ ਹੈ। ਫ਼ਿਲਮ ਨੇ ਸੋਮਵਾਰ ਨੂੰ ਕਰੀਬ 9 ਕਰੋੜ ਰੁਪਏ ਨੈੱਟ ਦੀ ਕਮਾਈ ਕੀਤੀ, ਜਿਸ ਨਾਲ ਇਸ ਦਾ ਚਾਰ ਦਿਨਾਂ ਦਾ ਕੁੱਲ ਕਲੈਕਸ਼ਨ ਲਗਭਗ 90 ਕਰੋੜ ਰੁਪਏ ਹੋ ਗਿਆ ਹੈ। ਸੋਮਵਾਰ ਦੀ ਕਮਾਈ ਪਹਿਲੇ ਦਿਨ ਦੇ ਮੁਕਾਬਲੇ ਕਰੀਬ 60 ਫ਼ੀਸਦੀ ਘੱਟ ਰਹੀ, ਪਰ ਫ਼ਿਲਮ ਦੇ ਸ਼ੁਰੂਆਤੀ ਕਾਰੋਬਾਰ ਨੂੰ ਦੇਖਦਿਆਂ ਇਸਨੂੰ ਚੰਗਾ ਹੋਲਡ ਮੰਨਿਆ ਜਾ ਰਿਹਾ ਹੈ। ਅੱਜ ਡਿਸਕਾਊਂਟ ਡੇਅ ਹੋਣ ਕਾਰਨ ਫ਼ਿਲਮ ਦੀ ਕਮਾਈ ਵਿੱਚ ਹੋਰ ਉਛਾਲ ਆਉਣ ਦੀ ਉਮੀਦ ਹੈ ਅਤੇ ਇਹ ਜਲਦ ਹੀ 100 ਕਰੋੜ ਰੁਪਏ ਨੈੱਟ ਦਾ ਅੰਕੜਾ ਪਾਰ ਕਰ ਸਕਦੀ ਹੈ। ਬਾਕਸ ਆਫਿਸ ਅਨੁਮਾਨਾਂ ਮੁਤਾਬਕ ਪਹਿਲੇ ਹਫ਼ਤੇ ਵਿੱਚ ਫ਼ਿਲਮ ਦੀ ਕਮਾਈ ਕਰੀਬ 115 ਕਰੋੜ ਰੁਪਏ ਤੱਕ ਪਹੁੰਚ ਸਕਦੀ ਹੈ। ਮੌਜੂਦਾ ਪ੍ਰਦਰਸ਼ਨ ਦੇ ਆਧਾਰ ’ਤੇ ‘ਆਵਾਰਾਪਨ 2’ ਨੂੰ ਸੁਪਰਹਿੱਟ ਕਰਾਰ ਦਿੱਤਾ ਜਾ ਰਿਹਾ ਹੈ, ਜਦਕਿ ਦੂਜੇ ਹਫ਼ਤੇ ਵੀ ਫ਼ਿਲਮ ਨੇ ਮਜ਼ਬੂਤੀ ਬਣਾਈ ਰੱਖੀ ਤਾਂ ਇਸ ਦੇ ਬਲਾਕਬਸਟਰ ਬਣਨ ਦੀ ਸੰਭਾਵਨਾ ਹੈ। ਹਾਲਾਂਕਿ ਅਗਲੇ ਹਫ਼ਤੇ ‘ਟੌਕਸਿਕ’ ਦੀ ਰਿਲੀਜ਼ ਫ਼ਿਲਮ ਦੇ ਕਾਰੋਬਾਰ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ। ਇਸ ਲਈ ‘ਆਵਾਰਾਪਨ 2’ ਦੀ ਅਗਲੀ ਕਮਾਈ ਇਸ ਗੱਲ ’ਤੇ ਨਿਰਭਰ ਕਰੇਗੀ ਕਿ ਇਹ ਮੁਕਾਬਲੇ ਦੇ ਬਾਵਜੂਦ ਸਿਨੇਮਾਘਰਾਂ ਵਿੱਚ ਕਿੰਨੀ ਮਜ਼ਬੂਤੀ ਨਾਲ ਟਿਕਦੀ ਹੈ।
2007 ਦੀ ਫ਼ਿਲਮ ਦਾ ਸੀਕਵਲ ਬਣਿਆ ਵੱਡੀ ਕਾਮਯਾਬੀ
‘ਆਵਾਰਾਪਨ 2’ ਸਾਲ 2007 ਵਿੱਚ ਰਿਲੀਜ਼ ਹੋਈ ‘ਆਵਾਰਾਪਨ’ ਦਾ ਸੀਕਵਲ ਹੈ। ਪਹਿਲੀ ਫ਼ਿਲਮ ਆਪਣੇ ਸਮੇਂ ਵਿੱਚ ਬਾਕਸ ਆਫਿਸ ’ਤੇ ਉਮੀਦ ਮੁਤਾਬਕ ਪ੍ਰਦਰਸ਼ਨ ਨਹੀਂ ਕਰ ਸਕੀ ਸੀ, ਪਰ ਬਾਅਦ ਵਿੱਚ ਇਸ ਨੇ ਇੱਕ ਕਲਟ ਫਾਲੋਇੰਗ ਬਣਾਈ। ਇਮਰਾਨ ਹਾਸ਼ਮੀ ਨੇ 2000 ਅਤੇ 2010 ਦੇ ਦਹਾਕੇ ਵਿੱਚ ‘ਮਰਡਰ 2’, ‘ਰਾਜ਼ 3’, ‘ਜੰਨਤ 2’ ਅਤੇ ‘ਵਨਸ ਅਪੌਨ ਏ ਟਾਈਮ ਇਨ ਮੁੰਬਈ’ ਵਰਗੀਆਂ ਫ਼ਿਲਮਾਂ ਰਾਹੀਂ ਰੋਮਾਂਟਿਕ ਅਤੇ ਇੰਟੈਂਸ ਲਵ ਸਟੋਰੀਜ਼ ਵਿੱਚ ਆਪਣੀ ਵੱਖਰੀ ਪਛਾਣ ਬਣਾਈ ਸੀ। ਹੁਣ ‘ਆਵਾਰਾਪਨ 2’ ਦੀ ਸਫਲਤਾ ਨੇ ਨਾ ਸਿਰਫ਼ ਇਮਰਾਨ ਹਾਸ਼ਮੀ ਦੀ ਵਾਪਸੀ ਨੂੰ ਮਜ਼ਬੂਤ ਕੀਤਾ ਹੈ, ਸਗੋਂ ਇੱਕ ਅਜਿਹੀ ਫ਼ਿਲਮ ਦੇ ਸੀਕਵਲ ਨੂੰ ਵੀ ਵੱਡੀ ਕਾਮਯਾਬੀ ਦਿੱਤੀ ਹੈ ਜਿਸ ਦੀ ਪਹਿਲੀ ਕਿਸ਼ਤ ਬਾਕਸ ਆਫਿਸ ’ਤੇ ਅਸਫਲ ਰਹੀ ਸੀ।
