ਗ੍ਰੀਸ ਵਿੱਚ ਵੀ ਸ਼ੁਰੂ ਹੋਈ UPI ਸੇਵਾ, ਭਾਰਤੀ ਡਿਜ਼ੀਟਲ ਭੁਗਤਾਨ ਨੂੰ ਮਿਲੀ ਨਵੀਂ ਉਡਾਣ

ਗ੍ਰੀਸ:30ਜੂਨ (ਛਤਰਪਾਲ ਸਿੰਘ):ਇੰਟਰਫੇਸ (UPI) ਹੁਣ ਗ੍ਰੀਸ ਵਿੱਚ ਵੀ ਸ਼ੁਰੂ ਹੋ ਗਿਆ ਹੈ। ਇਸ ਨਾਲ ਯੋਗ ਗਾਹਕ ਹੁਣ ਤੁਰੰਤ, ਸੁਰੱਖਿਅਤ ਅਤੇ ਸੁਵਿਧਾਜਨਕ ਢੰਗ ਨਾਲ ਪੈਸੇ ਦਾ ਲੈਣ-ਦੇਣ ਕਰ ਸਕਣਗੇ। ਇਹ ਪ੍ਰਣਾਲੀ ਰਵਾਇਤੀ ਅਤੇ ਮਹਿੰਗੇ ਭੁਗਤਾਨ ਤਰੀਕਿਆਂ ਦਾ ਇੱਕ ਸਸਤਾ ਅਤੇ ਪ੍ਰਭਾਵਸ਼ਾਲੀ ਵਿਕਲਪ ਸਾਬਤ ਹੋਵੇਗੀ।

ਆਪਣੇ ਗ੍ਰੀਸ ਦੌਰੇ ਦੌਰਾਨ ਪਿਊਸ਼ ਗੋਇਲ ਨੇ ਯੂਰੋਬੈਂਕ (Eurobank) ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (CEO) ਫੋਕਿਓਨ ਕਰਾਵਿਆਸ (Fokion Karavias) ਨਾਲ ਮੁਲਾਕਾਤ ਕੀਤੀ। ਇਸ ਦੌਰਾਨ ਦੋਵਾਂ ਨੇ ਭਾਰਤ-ਗ੍ਰੀਸ ਆਰਥਿਕ ਸਾਂਝ ਨੂੰ ਹੋਰ ਮਜ਼ਬੂਤ ਕਰਨ ਬਾਰੇ ਵਿਚਾਰ-ਵਟਾਂਦਰਾ ਕੀਤਾ। ਗੋਇਲ ਨੇ ਗ੍ਰੀਸ ਦੀਆਂ ਕੰਪਨੀਆਂ ਨੂੰ ਭਾਰਤ ਦੇ ਨਿਰਮਾਣ (Manufacturing) ਅਤੇ ਬੁਨਿਆਦੀ ਢਾਂਚਾ (Infrastructure) ਖੇਤਰਾਂ ਵਿੱਚ ਨਿਵੇਸ਼ ਕਰਨ ਦਾ ਸੱਦਾ ਦਿੱਤਾ। ਉਨ੍ਹਾਂ ਕਿਹਾ ਕਿ ਭਾਰਤ ਦੀ ਮਜ਼ਬੂਤ ਆਰਥਿਕ ਤਰੱਕੀ ਇਸ ਨੂੰ ਵਿਦੇਸ਼ੀ ਨਿਵੇਸ਼ ਲਈ ਇੱਕ ਆਕਰਸ਼ਕ ਮੰਜ਼ਿਲ ਬਣਾਉਂਦੀ ਹੈ।

ਪਿਊਸ਼ ਗੋਇਲ ਨੇ ਭਾਰਤ-ਯੂਰਪੀ ਸੰਘ (India-European Union) ਮੁਕਤ ਵਪਾਰ ਸਮਝੌਤੇ (Free Trade Agreement – FTA) ਦੀ ਮਹੱਤਤਾ ਉੱਤੇ ਵੀ ਜ਼ੋਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਦੋਵੇਂ ਪੱਖਾਂ ਨੂੰ ਮਿਲ ਕੇ ਉਤਪਾਦਨ (Co-manufacturing) ਅਤੇ ਨਵੀਨਤਮ ਵਿਕਾਸ (Co-creating) ਦੀ ਰਣਨੀਤੀ ਅਪਣਾਉਣੀ ਚਾਹੀਦੀ ਹੈ। ਇਸ ਨਾਲ ਵਪਾਰਕ ਸਬੰਧ ਹੋਰ ਮਜ਼ਬੂਤ ਹੋਣਗੇ, ਨਵੇਂ ਬਾਜ਼ਾਰ ਖੁੱਲ੍ਹਣਗੇ ਅਤੇ ਨਿਵੇਸ਼ ਨੂੰ ਉਤਸ਼ਾਹ ਮਿਲੇਗਾ, ਜਿਸ ਨਾਲ ਦੋਵੇਂ ਦੇਸ਼ਾਂ ਨੂੰ ਸਾਂਝੀ ਖੁਸ਼ਹਾਲੀ ਦਾ ਲਾਭ ਮਿਲੇਗਾ।

ਮੰਤਰੀ ਨੇ ਭਾਰਤ-ਗ੍ਰੀਸ ਬਿਜ਼ਨਸ ਫੋਰਮ ਵਿੱਚ ਗ੍ਰੀਸ ਦੇ ਉਪ ਵਿਦੇਸ਼ ਮੰਤਰੀ ਹੈਰੀ ਥਿਓਹੈਰਿਸ (Harry Theoharis) ਨਾਲ ਵੀ ਸ਼ਿਰਕਤ ਕੀਤੀ। ਇਸ ਮੌਕੇ ਉਨ੍ਹਾਂ ਨੇ ਉੱਥੇ ਰਹਿੰਦੇ ਭਾਰਤੀ ਭਾਈਚਾਰੇ ਨਾਲ ਵੀ ਮੁਲਾਕਾਤ ਕੀਤੀ। ਉਨ੍ਹਾਂ ਭਾਰਤ ਦੀ ਲਗਾਤਾਰ ਮਜ਼ਬੂਤ ਹੋ ਰਹੀ ਆਰਥਿਕ ਤਰੱਕੀ ਨੂੰ ਉਜਾਗਰ ਕਰਦਿਆਂ ਕਿਹਾ ਕਿ ਦੇਸ਼ ਵਿਸ਼ਵ ਭਰ ਦੇ ਨਿਵੇਸ਼ਕਾਂ ਲਈ ਬੇਮਿਸਾਲ ਮੌਕੇ ਪ੍ਰਦਾਨ ਕਰਦਾ ਹੈ। ਇਸ ਦੌਰੇ ਨੇ ਭਾਰਤ ਅਤੇ ਗ੍ਰੀਸ ਦਰਮਿਆਨ ਕੂਟਨੀਤਿਕ ਅਤੇ ਆਰਥਿਕ ਸਬੰਧਾਂ ਨੂੰ ਹੋਰ ਮਜ਼ਬੂਤੀ ਦਿੱਤੀ ਹੈ।

ਅੰਤ ਵਿੱਚ ਪਿਊਸ਼ ਗੋਇਲ ਨੇ ਐਥਨਜ਼ ਸਥਿਤ ਯੂਰੋਬੈਂਕ ਦੇ ਮੁੱਖ ਦਫ਼ਤਰ ਵਿੱਚ ਯੂਰੋਬੈਂਕ ਅਤੇ NIPL (NPCI International Payments Limited) ਦੀ ਭਾਈਵਾਲੀ ਦਾ ਲਾਈਵ ਪ੍ਰਦਰਸ਼ਨ ਵੀ ਦੇਖਿਆ। ਇਹ ਉਪਲਬਧੀ ਭਾਰਤ ਦੇ ਡਿਜ਼ੀਟਲ ਭੁਗਤਾਨ ਢਾਂਚੇ ਦੇ ਵਿਸ਼ਵ ਪੱਧਰੀ ਵਿਸਤਾਰ ਦਾ ਮਹੱਤਵਪੂਰਨ ਮੀਲ ਪੱਥਰ ਹੈ ਅਤੇ ਇਹ ਦਰਸਾਉਂਦੀ ਹੈ ਕਿ ਭਾਰਤੀ ਡਿਜ਼ੀਟਲ ਤਕਨਾਲੋਜੀ ਕਿਵੇਂ ਅੰਤਰਰਾਸ਼ਟਰੀ ਵਿੱਤੀ ਪ੍ਰਣਾਲੀਆਂ ਨੂੰ ਆਪਸ ਵਿੱਚ ਜੋੜਨ ਵਿੱਚ ਅਹਿਮ ਭੂਮਿਕਾ ਨਿਭਾ ਰਹੀ ਹੈ।