ਹੈਮਿਲਟਨ, 10 ਨਵੰਬਰ, 2026 (ਸ਼ਹੀਦ-ਏ-ਆਜ਼ਮ ਬਿਊਰੋ): ਭਾਰਤ ਅਤੇ ਨਿਊਜ਼ੀਲੈਂਡ ਵਿਚਾਲੇ ਤੀਜੇ ਵਨਡੇ ਮੁਕਾਬਲੇ ‘ਤੇ ਮੀਂਹ ਨੇ ਪਾਣੀ ਫੇਰ ਦਿੱਤਾ। ਹੈਮਿਲਟਨ ਦੇ ਸੈਡਨ ਪਾਰਕ ਵਿੱਚ ਟਾਸ ਹੋਣ ਤੋਂ ਬਾਅਦ ਵੀ ਲਗਾਤਾਰ ਮੀਂਹ ਕਾਰਨ ਇੱਕ ਵੀ ਗੇਂਦ ਨਹੀਂ ਸੁੱਟੀ ਜਾ ਸਕੀ ਅਤੇ ਆਖਰਕਾਰ ਮੈਚ ਰੱਦ ਕਰਨਾ ਪਿਆ। ਭਾਰਤੀ ਕਪਤਾਨ ਸ਼ੁਭਮਨ ਗਿੱਲ ਨੇ ਲਗਾਤਾਰ ਤੀਜੀ ਵਾਰ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਚੁਣੀ ਸੀ। ਭਾਰਤ ਨੇ ਆਪਣੀ ਪਿਛਲੀ ਪਲੇਇੰਗ ਇਲੈਵਨ ਵਿੱਚ ਕੋਈ ਤਬਦੀਲੀ ਨਹੀਂ ਕੀਤੀ। ਹਾਲਾਂਕਿ ਮੌਸਮ ਨੇ ਖੇਡ ਸ਼ੁਰੂ ਹੋਣ ਦਾ ਮੌਕਾ ਹੀ ਨਹੀਂ ਦਿੱਤਾ। ਇਸ ਦੇ ਬਾਵਜੂਦ ਭਾਰਤ ਪੰਜ ਮੈਚਾਂ ਦੀ ਸੀਰੀਜ਼ ਵਿੱਚ 2-0 ਨਾਲ ਅੱਗੇ ਹੈ। ਹੁਣ ਦੋਵੇਂ ਟੀਮਾਂ ਬਾਕੀ ਦੋ ਮੁਕਾਬਲਿਆਂ ਲਈ ਟੌਰੰਗਾ ਰਵਾਨਾ ਹੋਣਗੀਆਂ, ਜਿੱਥੇ 13 ਅਤੇ 15 ਨਵੰਬਰ ਨੂੰ ਮੈਚ ਖੇਡੇ ਜਾਣਗੇ। ਸ਼ੁਭਮਨ ਗਿੱਲ ਅਤੇ ਕੇ.ਐੱਲ. ਰਾਹੁਲ ਇਸ ਤੋਂ ਬਾਅਦ ਵੈਲਿੰਗਟਨ ਵਿੱਚ ਟੈਸਟ ਟੀਮ ਨਾਲ ਜੁੜਨਗੇ। ਗਿੱਲ ਦੀ ਗੈਰ-ਮੌਜੂਦਗੀ ਵਿੱਚ ਬਾਕੀ ਦੋ ਵਨਡੇ ਮੈਚਾਂ ਲਈ ਸ਼੍ਰੇਅਸ ਅਈਅਰ ਭਾਰਤੀ ਟੀਮ ਦੀ ਕਪਤਾਨੀ ਕਰਨਗੇ। ਰੁਤੁਰਾਜ ਗਾਇਕਵਾੜ ਅਤੇ ਈਸ਼ਾਨ ਕਿਸ਼ਨ ਨੂੰ ਵੀ ਆਖਰੀ ਦੋ ਮੁਕਾਬਲਿਆਂ ਦੀ ਪਲੇਇੰਗ ਇਲੈਵਨ ਵਿੱਚ ਮੌਕਾ ਮਿਲਣ ਦੀ ਸੰਭਾਵਨਾ ਹੈ।
