ਸ਼ੈਨਨ (ਆਇਰਲੈਂਡ), 14 ਸਤੰਬਰ, 2026 (ਪ੍ਰਭਜੀਤ ਸਿੰਘ ਚੌਧਰੀ) : ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ 2028 ਦੀ ਰਾਸ਼ਟਰਪਤੀ ਚੋਣ ਲਈ ਉਪ ਰਾਸ਼ਟਰਪਤੀ ਜੇ.ਡੀ. ਵੈਂਸ ਦੀ ਸੰਭਾਵਿਤ ਉਮੀਦਵਾਰੀ ਨੂੰ ਲੈ ਕੇ ਫਿਲਹਾਲ ਖੁੱਲ੍ਹਾ ਸਮਰਥਨ ਦੇਣ ਤੋਂ ਗੁਰੇਜ਼ ਕੀਤਾ ਹੈ। ਟਰੰਪ ਨੇ ਕਿਹਾ ਕਿ ਇਸ ਸਬੰਧੀ ਕੋਈ ਫ਼ੈਸਲਾ ਕਰਨ ਲਈ ਅਜੇ ਸਮਾਂ ਹੈ ਅਤੇ ਇਹ “ਬਹੁਤ ਜਲਦੀ” ਹੋਵੇਗਾ। ਇਹ ਬਿਆਨ ਟਰੰਪ ਨੇ ਆਇਰਲੈਂਡ ਦੇ ਸ਼ੈਨਨ ਵਿੱਚ ਏਅਰ ਫੋਰਸ ਵਨ ’ਤੇ ਸਵਾਰ ਹੋਣ ਤੋਂ ਪਹਿਲਾਂ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਦਿੱਤਾ। ਜਦੋਂ ਉਨ੍ਹਾਂ ਤੋਂ ਪੁੱਛਿਆ ਗਿਆ ਕਿ ਕੀ ਉਹ 2028 ਦੀ ਰਾਸ਼ਟਰਪਤੀ ਦੌੜ ਲਈ ਜੇ.ਡੀ. ਵੈਂਸ ਦੇ ਹੱਕ ਵਿੱਚ ਆਪਣਾ ਸਮਰਥਨ ਦੇਣ ਲਈ ਤਿਆਰ ਹਨ ਤਾਂ ਟਰੰਪ ਨੇ ਕਿਹਾ ਕਿ “ਇਹ ਹਾਲੇ ਬਹੁਤ ਜਲਦੀ ਹੈ।” ਹਾਲਾਂਕਿ ਟਰੰਪ ਨੇ ਵੈਂਸ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਉਹ “ਬਹੁਤ ਵਧੀਆ” ਹਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਰਿਪਬਲਿਕਨ ਪਾਰਟੀ ਕੋਲ ਕਈ ਮਜ਼ਬੂਤ ਆਗੂ ਹਨ ਅਤੇ ਉਨ੍ਹਾਂ ਕੋਲ, ਜਿਵੇਂ ਕਿ ਕਿਹਾ ਜਾਂਦਾ ਹੈ, “ਬਹੁਤ ਡੂੰਘੀ ਬੈਂਚ” ਹੈ। ਪੱਤਰਕਾਰਾਂ ਵੱਲੋਂ ਜਦੋਂ ਇਹ ਜਾਣਨ ਦੀ ਕੋਸ਼ਿਸ਼ ਕੀਤੀ ਗਈ ਕਿ ਵੈਂਸ ਦੇ ਮੁਕਾਬਲੇ ਕੌਣ ਸਭ ਤੋਂ ਮਜ਼ਬੂਤ ਦਾਅਵੇਦਾਰ ਹੋ ਸਕਦਾ ਹੈ ਤਾਂ ਟਰੰਪ ਨੇ ਕਿਸੇ ਇੱਕ ਨਾਮ ਨੂੰ ਅੱਗੇ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਸਾਰੇ ਹੀ ਚੰਗੇ ਹਨ ਅਤੇ ਜੇ.ਡੀ. ਵੈਂਸ ਨੇ ਵੀ ਬਹੁਤ ਵਧੀਆ ਕੰਮ ਕੀਤਾ ਹੈ।
ਵੈਂਸ ਨੂੰ ਲੈ ਕੇ ਟਰੰਪ ਦੇ ਪੁਰਾਣੇ ਬਿਆਨ ਵੀ ਚਰਚਾ ’ਚ : ਟਰੰਪ ਦਾ ਤਾਜ਼ਾ ਸਾਵਧਾਨ ਰੁਖ਼ ਇਸ ਲਈ ਵੀ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਅਗਸਤ ਵਿੱਚ ਵਾਸ਼ਿੰਗਟਨ ਪੋਸਟ ਦੀ ਇੱਕ ਰਿਪੋਰਟ ਵਿੱਚ ਦਾਅਵਾ ਕੀਤਾ ਗਿਆ ਸੀ ਕਿ ਓਵਲ ਆਫਿਸ ਵਿੱਚ ਦਾਨਦਾਤਾਵਾਂ ਨਾਲ ਇੱਕ ਨਿੱਜੀ ਮੀਟਿੰਗ ਦੌਰਾਨ ਟਰੰਪ ਨੇ ਵੈਂਸ ਦੀ ਸੰਭਾਵਿਤ ਉਮੀਦਵਾਰੀ ਬਾਰੇ ਵਧੇਰੇ ਸਿੱਧੀ ਟਿੱਪਣੀ ਕੀਤੀ ਸੀ। ਰਿਪੋਰਟ ਮੁਤਾਬਕ ਟਰੰਪ ਨੇ ਕਥਿਤ ਤੌਰ ’ਤੇ ਕਿਹਾ ਸੀ ਕਿ ਆਖ਼ਰਕਾਰ ਜੇ.ਡੀ. ਵੈਂਸ ਨੂੰ ਚੁਣਿਆ ਜਾਣਾ ਚਾਹੀਦਾ ਹੈ। ਹਾਲਾਂਕਿ ਉਸ ਸਮੇਂ ਟਰੰਪ ਦੇ ਸਲਾਹਕਾਰਾਂ ਨੇ ਇਹ ਸੰਕੇਤ ਦਿੱਤਾ ਸੀ ਕਿ ਰਾਸ਼ਟਰਪਤੀ ਨੇ 2028 ਲਈ ਕਿਸੇ ਇੱਕ ਉਤਰਾਧਿਕਾਰੀ ਬਾਰੇ ਅੰਤਿਮ ਫ਼ੈਸਲਾ ਨਹੀਂ ਕੀਤਾ।
ਮਾਰਕੋ ਰੂਬਿਓ ਦਾ ਨਾਮ ਵੀ ਚਰਚਾ ਵਿੱਚ : ਰਿਪਬਲਿਕਨ ਪਾਰਟੀ ਵਿੱਚ 2028 ਦੀ ਦੌੜ ਨੂੰ ਲੈ ਕੇ ਵਿਦੇਸ਼ ਮੰਤਰੀ ਮਾਰਕੋ ਰੂਬਿਓ ਦਾ ਨਾਮ ਵੀ ਚਰਚਾ ਵਿੱਚ ਹੈ। ਰਿਪੋਰਟਾਂ ਅਨੁਸਾਰ ਟਰੰਪ ਦੇ ਕਰੀਬੀ ਘੇਰੇ ਵਿੱਚ ਵੈਂਸ ਅਤੇ ਰੂਬਿਓ ਦੋਵਾਂ ਦੀ ਸੰਭਾਵਨਾ ’ਤੇ ਵਿਚਾਰ ਹੋਇਆ ਹੈ। ਟਰੰਪ ਵੱਲੋਂ ਦੋਵਾਂ ਆਗੂਆਂ ਬਾਰੇ ਉੱਚੀ ਰਾਏ ਰੱਖਣ ਦੀ ਗੱਲ ਵੀ ਸਾਹਮਣੇ ਆਉਂਦੀ ਰਹੀ ਹੈ। ਕੁਝ ਅੰਦਰੂਨੀ ਚਰਚਾਵਾਂ ਵਿੱਚ ਟਰੰਪ ਵੱਲੋਂ ਵੈਂਸ ਅਤੇ ਰੂਬਿਓ ਦੀ ਤੁਲਨਾ ਕੀਤੇ ਜਾਣ ਦਾ ਵੀ ਜ਼ਿਕਰ ਕੀਤਾ ਗਿਆ ਹੈ। ਇਸ ਕਾਰਨ ਰਿਪਬਲਿਕਨ ਪਾਰਟੀ ਵਿੱਚ 2028 ਲਈ ਸੰਭਾਵਿਤ ਉਤਰਾਧਿਕਾਰੀ ਨੂੰ ਲੈ ਕੇ ਚਰਚਾ ਤੇਜ਼ ਹੋ ਰਹੀ ਹੈ।
ਮਿਡਟਰਮ ਚੋਣਾਂ ਤੋਂ ਬਾਅਦ ਸਪੱਸ਼ਟ ਹੋ ਸਕਦੀ ਹੈ ਤਸਵੀਰ : ਜੇ.ਡੀ. ਵੈਂਸ ਨੇ ਵੀ 2028 ਦੀ ਰਾਸ਼ਟਰਪਤੀ ਦੌੜ ਬਾਰੇ ਆਪਣਾ ਰੁਖ਼ ਪੂਰੀ ਤਰ੍ਹਾਂ ਸਪੱਸ਼ਟ ਨਹੀਂ ਕੀਤਾ ਹੈ। ਉਨ੍ਹਾਂ ਦੇ ਸੰਕੇਤਾਂ ਮੁਤਾਬਕ ਇਸ ਸਬੰਧੀ ਕੋਈ ਵੱਡਾ ਫ਼ੈਸਲਾ ਨਵੰਬਰ ਵਿੱਚ ਹੋਣ ਵਾਲੀਆਂ ਅਮਰੀਕੀ ਕਾਂਗਰਸ ਦੀਆਂ ਮਿਡਟਰਮ ਚੋਣਾਂ ਤੋਂ ਬਾਅਦ ਲਿਆ ਜਾ ਸਕਦਾ ਹੈ। ਇਸ ਦੌਰਾਨ ਰਿਪਬਲਿਕਨ ਪਾਰਟੀ ਦੇ ਦਾਨਦਾਤਾਵਾਂ ਅਤੇ ਕਾਰਕੁਨਾਂ ਵਿੱਚ ਵੱਖ-ਵੱਖ ਸੰਭਾਵਿਤ ਉਮੀਦਵਾਰਾਂ ਨੂੰ ਲੈ ਕੇ ਸਮਰਥਨ ਦੀਆਂ ਲਾਈਨਾਂ ਬਣਨੀਆਂ ਸ਼ੁਰੂ ਹੋ ਗਈਆਂ ਹਨ। ਮੌਜੂਦਾ ਹਾਲਾਤਾਂ ਵਿੱਚ ਵੈਂਸ ਸਭ ਤੋਂ ਚਰਚਿਤ ਨਾਮਾਂ ਵਿੱਚੋਂ ਇੱਕ ਹਨ, ਪਰ ਟਰੰਪ ਦੇ ਤਾਜ਼ਾ ਬਿਆਨ ਤੋਂ ਸਪੱਸ਼ਟ ਹੈ ਕਿ 2028 ਦੀ ਰਾਸ਼ਟਰਪਤੀ ਦੌੜ ਨੂੰ ਲੈ ਕੇ ਅਜੇ ਅੰਤਿਮ ਤਸਵੀਰ ਸਾਹਮਣੇ ਨਹੀਂ ਆਈ ਹੈ।
