ਨਵੀਂ ਦਿੱਲੀ, 17 ਸਤੰਬਰ 2026 (ਹਰਸ਼ਪ੍ਰੀਤ ਕੌਰ): ਕੇਂਦਰੀ ਜਾਂਚ ਬਿਊਰੋ (CBI) ਨੇ ਵਿਦੇਸ਼ੀ ਫੰਡਾਂ ਨਾਲ ਜੁੜੇ ਕਥਿਤ ਨਿਯਮਾਂ ਦੀ ਉਲੰਘਣਾ ਦੇ ਮਾਮਲੇ ਵਿੱਚ ਅਮਰੀਕਾ ਆਧਾਰਿਤ ਸੰਸਥਾ ‘ਦ ਟਿਮੋਥੀ ਇਨੀਸ਼ੀਏਟਿਵ’ (TTI) ਸਮੇਤ ਸੱਤ ਮੁਲਜ਼ਮਾਂ ਖ਼ਿਲਾਫ਼ FIR ਦਰਜ ਕੀਤੀ ਹੈ। ਮਾਮਲੇ ਵਿੱਚ ਲਗਭਗ 92.55 ਕਰੋੜ ਰੁਪਏ ਦੇ ਵਿਦੇਸ਼ੀ ਫੰਡਾਂ ਦੀ ਕਥਿਤ ਤੌਰ ’ਤੇ ਗੈਰ–ਕਾਨੂੰਨੀ ਵਰਤੋਂ ਦਾ ਦੋਸ਼ ਲਾਇਆ ਗਿਆ ਹੈ।
CBI ਦੇ ਆਰਥਿਕ ਅਪਰਾਧ-II (EO-II), ਦਿੱਲੀ ਵੱਲੋਂ ਦਰਜ FIR ਮੁਤਾਬਕ ਇਹ ਮਾਮਲਾ 27 ਅਗਸਤ 2026 ਨੂੰ ਦਰਜ ਕੀਤਾ ਗਿਆ। ਜਾਂਚ ਏਜੰਸੀ ਨੇ ਵਿਦੇਸ਼ੀ ਯੋਗਦਾਨ (ਰੈਗੂਲੇਸ਼ਨ) ਐਕਟ (FCRA), 2010 ਦੀਆਂ ਧਾਰਾਵਾਂ 8, 11, 17 ਅਤੇ 35 ਸਮੇਤ ਭਾਰਤੀ ਨਿਆਂ ਸੰਹਿਤਾ (BNS), 2023 ਅਤੇ ਸੂਚਨਾ ਤਕਨਾਲੋਜੀ ਐਕਟ ਦੀਆਂ ਸੰਬੰਧਿਤ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਹੈ। FIR ਵਿੱਚ Jonathan S Rajan, Micah Mark, Ajit Verghese Mathal, Bablu Kurmi, Supreme Joy, Varghese Chacko ਅਤੇ ਅਮਰੀਕਾ ਸਥਿਤ The Timothy Initiative ਨੂੰ ਮੁਲਜ਼ਮ ਬਣਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਕੁਝ ਅਣਪਛਾਤੇ ਵਿਅਕਤੀਆਂ ਦਾ ਵੀ ਜ਼ਿਕਰ ਕੀਤਾ ਗਿਆ ਹੈ। CBI ਦੀ FIR ਵਿੱਚ ਦੋਸ਼ ਹੈ ਕਿ ਮੁਲਜ਼ਮਾਂ ਨੇ TTI ਨਾਲ ਕਥਿਤ ਸਾਜ਼ਿਸ਼ ਰਚ ਕੇ ਵਿਦੇਸ਼ੀ ਡੈਬਿਟ ਕਾਰਡਾਂ ਰਾਹੀਂ ਭਾਰਤ ਦੇ ਵੱਖ–ਵੱਖ ATM ਤੋਂ ਵਿਦੇਸ਼ੀ ਫੰਡਾਂ ਦੀ ਨਿਕਾਸੀ ਕੀਤੀ। ਇਹ ਡੈਬਿਟ ਕਾਰਡ ਅਮਰੀਕਾ ਦੇ Truist Bank ਵੱਲੋਂ ਜਾਰੀ ਕੀਤੇ ਗਏ ਦੱਸੇ ਗਏ ਹਨ।
FIR ਅਨੁਸਾਰ ਨਵੰਬਰ 2025 ਤੋਂ ਅਪ੍ਰੈਲ 2026 ਦੇ ਦਰਮਿਆਨ ਲਗਭਗ 92.55 ਕਰੋੜ ਰੁਪਏ (9,995,240 ਅਮਰੀਕੀ ਡਾਲਰ) ਕਥਿਤ ਤੌਰ ’ਤੇ ਕਢਵਾਏ ਗਏ। ਇਸ ਤੋਂ ਇਲਾਵਾ ਜਨਵਰੀ 2024 ਤੋਂ ਮਾਰਚ 2026 ਤੱਕ ਕਰਨਾਟਕ, ਛੱਤੀਸਗੜ੍ਹ ਅਤੇ ਅਸਾਮ ਸਮੇਤ ਕਈ ਰਾਜਾਂ ਵਿੱਚ ਇਨ੍ਹਾਂ ਵਿਦੇਸ਼ੀ ਡੈਬਿਟ ਕਾਰਡਾਂ ਰਾਹੀਂ ਲਗਭਗ 44 ਕਰੋੜ ਰੁਪਏ ਕਢਵਾਉਣ ਦਾ ਵੀ ਦੋਸ਼ ਹੈ। FIR ਵਿੱਚ ਅੱਗੇ ਦੱਸਿਆ ਗਿਆ ਹੈ ਕਿ 18 ਅਪ੍ਰੈਲ 2026 ਨੂੰ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਨੇ ਬੈਂਗਲੁਰੂ ਦੇ ਕੇਮਪੇਗੌੜਾ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ Micah Mark ਨੂੰ ਰੋਕਿਆ ਸੀ। ਜਾਂਚ ਏਜੰਸੀ ਦੇ ਦੋਸ਼ ਮੁਤਾਬਕ ਉਸ ਕੋਲ Truist Bank ਵੱਲੋਂ ਜਾਰੀ 24 ਵਿਦੇਸ਼ੀ ਡੈਬਿਟ ਕਾਰਡ ਮਿਲੇ ਸਨ। FIR ਅਨੁਸਾਰ ਇਨ੍ਹਾਂ ਕਾਰਡਾਂ ’ਤੇ “Santosh Kumar” ਦਾ ਨਾਮ ਦਰਜ ਸੀ ਅਤੇ ਦੋਸ਼ ਹੈ ਕਿ ਇਹ ਨਾਮ Ajit Verghese Mathal ਦੀਆਂ ਹਦਾਇਤਾਂ ’ਤੇ ਵਰਤਿਆ ਗਿਆ, ਤਾਂ ਜੋ ਅਸਲ ਵਰਤੋਂਕਾਰਾਂ ਦੀ ਪਛਾਣ ਲੁਕਾਈ ਜਾ ਸਕੇ।
CBI ਨੇ FIR ਵਿੱਚ ਇਹ ਵੀ ਦੋਸ਼ ਲਾਇਆ ਹੈ ਕਿ ਪਿਛਲੇ ਕੁਝ ਸਾਲਾਂ ਦੌਰਾਨ ਇਸ ਤਰ੍ਹਾਂ ਦੇ 1,000 ਤੋਂ ਵੱਧ ਡੈਬਿਟ ਕਾਰਡ ਭਾਰਤ ਵਿੱਚ ਵੰਡੇ ਗਏ। ਜਾਂਚ ਦੌਰਾਨ ਤਲਾਸ਼ੀ ਕਾਰਵਾਈ ਤੋਂ ਬਾਅਦ TTI ਦਾ ਗਲੋਬਲ ਪੋਰਟਲ ਭਾਰਤ ਵਿੱਚ ਕਥਿਤ ਤੌਰ ’ਤੇ ਪਹੁੰਚ ਤੋਂ ਬਾਹਰ ਹੋ ਗਿਆ। ਇਸ ਤੋਂ ਇਲਾਵਾ ਕਲਾਊਡ ’ਤੇ ਮੌਜੂਦ ਡਾਟਾ ਅਤੇ ਜ਼ਬਤ ਕੀਤੇ ਗਏ ਲੈਪਟਾਪ ਵਿੱਚੋਂ ਡਾਟਾ ਰਿਮੋਟ ਤਰੀਕੇ ਨਾਲ ਮਿਟਾਏ ਜਾਣ ਦਾ ਵੀ FIR ਵਿੱਚ ਦੋਸ਼ ਹੈ। FIR ਮੁਤਾਬਕ Jonathan S Rajan ਨੂੰ ਭਾਰਤ ਵਿੱਚ TTI ਦੇ ਸਮੁੱਚੇ ਆਪਰੇਸ਼ਨਾਂ ਦਾ ਇੰਚਾਰਜ ਦੱਸਿਆ ਗਿਆ ਹੈ। ਉਸ ’ਤੇ ATM ਰਾਹੀਂ ਕਢਵਾਏ ਗਏ ਫੰਡਾਂ ਨੂੰ TTI ਦੀਆਂ ਗਤੀਵਿਧੀਆਂ, ਜਿਨ੍ਹਾਂ ਵਿੱਚ ਸਿਖਲਾਈ ਅਤੇ ਪ੍ਰਚਾਰ ਨਾਲ ਸਬੰਧਤ ਕੰਮ ਸ਼ਾਮਲ ਹਨ, ਲਈ ਵਰਤਣ ਦੀ ਕਥਿਤ ਤੌਰ ’ਤੇ ਤਾਲਮੇਲ ਕਰਨ ਦਾ ਦੋਸ਼ ਹੈ।
ਇਸੇ ਤਰ੍ਹਾਂ Ajit Verghese Mathal ’ਤੇ ਕਥਿਤ ਵਿੱਤੀ ਕਾਰਵਾਈਆਂ ਵਿੱਚ ਸ਼ਾਮਲ ਹੋਣ ਦਾ ਦੋਸ਼ ਲਾਇਆ ਗਿਆ ਹੈ, ਜਦਕਿ Varghese Chacko, Supreme Joy ਅਤੇ Bablu Kurmi ਬਾਰੇ FIR ਵਿੱਚ ਕਿਹਾ ਗਿਆ ਹੈ ਕਿ ਉਹ ਕਥਿਤ ਤੌਰ ’ਤੇ ਜ਼ਮੀਨੀ ਪੱਧਰ ’ਤੇ ਕੰਮ ਕਰਦੇ ਸਨ ਅਤੇ ਵਿਦੇਸ਼ੀ ਡੈਬਿਟ ਕਾਰਡਾਂ ਰਾਹੀਂ ਨਕਦੀ ਕਢਵਾਉਂਦੇ ਸਨ। CBI ਦੀ FIR ਮੁਤਾਬਕ ਸਾਹਮਣੇ ਆਏ ਕਥਿਤ ਤੱਥ FCRA, BNS ਅਤੇ ਸੂਚਨਾ ਤਕਨਾਲੋਜੀ ਐਕਟ ਅਧੀਨ ਅਪਰਾਧਾਂ ਵੱਲ ਪਹਿਲੀ ਨਜ਼ਰ ਵਿੱਚ ਇਸ਼ਾਰਾ ਕਰਦੇ ਹਨ। ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ FIR ਵਿੱਚ ਲਗਾਏ ਗਏ ਦੋਸ਼ਾਂ ਦੀ ਕਾਨੂੰਨੀ ਜਾਂਚ ਅਜੇ ਹੋਣੀ ਬਾਕੀ ਹੈ।
