ਨਵੀਂ ਦਿੱਲੀ, 27 ਅਕਤੂਬਰ (ਗੁਰਮੀਤ ਸਿੰਘ ਤੁੰਗ): ਦਿੱਲੀ ਦੇ ਸ਼ਿਵਾਜੀ ਸਟੇਡੀਅਮ ਮੈਟਰੋ ਸਟੇਸ਼ਨ ’ਤੇ ਕਥਿਤ ਤੌਰ ’ਤੇ ਪੋਸਟਰ ਚਿਪਕਾਉਣ ਅਤੇ ਕੰਧਾਂ ’ਤੇ ਕਾਲੀ ਸਿਆਹੀ ਨਾਲ ਲਿਖਣ ਦੇ ਮਾਮਲੇ ਵਿੱਚ ਪੁਲਿਸ ਨੇ ਇੱਕ ਹੋਰ ਕੇਸ ਦਰਜ ਕੀਤਾ ਹੈ। ਇਹ ਸਟੇਸ਼ਨ ਏਅਰਪੋਰਟ ਐਕਸਪ੍ਰੈੱਸ ਲਾਈਨ ’ਤੇ ਸਥਿਤ ਹੈ। ਪੁਲਿਸ ਸੂਤਰਾਂ ਅਨੁਸਾਰ, ਇਸ ਘਟਨਾ ਵਿੱਚ ਸ਼ਾਮਲ ਵਿਅਕਤੀ ਦੀ ਪਛਾਣ ਹਾਲੇ ਨਹੀਂ ਹੋ ਸਕੀ। ਸੂਤਰਾਂ ਮੁਤਾਬਕ, ਇਹ ਘਟਨਾ 24 ਅਕਤੂਬਰ ਨੂੰ ਵਾਪਰੀ ਸੀ। ਸਟੇਸ਼ਨ ਦੇ ਐਮਰਜੈਂਸੀ ਗੇਟ ਨੰਬਰ 5 ਦੇ ਨੇੜੇ ਕੰਧ ’ਤੇ ਪੋਸਟਰ ਲੱਗੇ ਹੋਏ ਮਿਲੇ, ਜਦਕਿ ਗੇਟ ਨੰਬਰ 7 ਦੇ ਨੇੜੇ ਇੱਕ ਸ਼ਾਫਟ ਦੀ ਕੰਧ ’ਤੇ ਕਾਲੀ ਸਿਆਹੀ ਨਾਲ ਲਿਖਿਆ ਹੋਇਆ ਵੀ ਦੇਖਿਆ ਗਿਆ। ਇਸ ਮਾਮਲੇ ਵਿੱਚ ਆਈਜੀਆਈ ਏਅਰਪੋਰਟ ਮੈਟਰੋ ਪੁਲਿਸ ਨੇ ਅਣਪਛਾਤੇ ਵਿਅਕਤੀ ਵਿਰੁੱਧ ਦਿੱਲੀ ਪ੍ਰੀਵੈਂਸ਼ਨ ਆਫ਼ ਡਿਫੇਸਮੈਂਟ ਆਫ਼ ਪ੍ਰਾਪਰਟੀ ਐਕਟ ਅਤੇ ਮੈਟਰੋ ਰੇਲਵੇਜ਼ ਐਕਟ ਤਹਿਤ ਕੇਸ ਦਰਜ ਕੀਤਾ ਹੈ।
ਮੈਟਰੋ ਟ੍ਰੇਨ ਵਿੱਚ ਵੀ ਮਿਲੇ ਸਨ ਸਰਕਾਰ ਦੀ ਕਾਰਗੁਜ਼ਾਰੀ ’ਤੇ ਸਵਾਲ ਚੁੱਕਣ ਵਾਲੇ ਪੋਸਟਰ
ਇਹ ਤਾਜ਼ਾ ਮਾਮਲਾ ਉਸ ਘਟਨਾ ਤੋਂ ਕੁਝ ਦਿਨ ਬਾਅਦ ਸਾਹਮਣੇ ਆਇਆ ਹੈ, ਜਦੋਂ ਏਅਰਪੋਰਟ ਐਕਸਪ੍ਰੈੱਸ ਲਾਈਨ ਦੀ ਇੱਕ ਟ੍ਰੇਨ ਵਿੱਚ ਕੇਂਦਰ ਸਰਕਾਰ ਦੀ ਪਿਛਲੇ ਕੁਝ ਸਾਲਾਂ ਦੀ ਕਾਰਗੁਜ਼ਾਰੀ ’ਤੇ ਸਵਾਲ ਉਠਾਉਂਦੇ ਦੋ ਪੋਸਟਰ ਮਿਲੇ ਸਨ। ਪੁਲਿਸ ਸ਼ਿਕਾਇਤ ਅਨੁਸਾਰ, 20 ਅਕਤੂਬਰ ਨੂੰ ਨਵੀਂ ਦਿੱਲੀ ਤੋਂ ਯਸ਼ੋਭੂਮੀ ਸਟੇਸ਼ਨ ਪਹੁੰਚੀ ਟ੍ਰੇਨ ਦੀ ਜਾਂਚ ਦੌਰਾਨ ਇੱਕ ਆਪਰੇਟਰ ਨੂੰ ਸੀਟ ’ਤੇ ਇਹ ਪੋਸਟਰ ਮਿਲੇ ਸਨ। ਦੋਵੇਂ ਪੋਸਟਰ ਏ4 ਆਕਾਰ ਦੇ ਕਾਲੇ-ਚਿੱਟੇ ਕਾਗਜ਼ਾਂ ’ਤੇ ਛਪੇ ਹੋਏ ਸਨ ਅਤੇ ਇਨ੍ਹਾਂ ਵਿੱਚ ਦੇਸ਼ ਵਿੱਚ ਪਿਛਲੇ ਕੁਝ ਸਾਲਾਂ ਦੌਰਾਨ ਹੋਏ ਬਦਲਾਵਾਂ ਬਾਰੇ ਕਈ ਦਾਅਵੇ ਕੀਤੇ ਗਏ ਸਨ।
ਇੱਕ ਪੋਸਟਰ ’ਤੇ “Dissatisfied? You Are Not Alone” ਲਿਖਿਆ ਹੋਇਆ ਸੀ ਅਤੇ ਇਸ ਵਿੱਚ ਨੌਂ ਮੁੱਦਿਆਂ ਦਾ ਜ਼ਿਕਰ ਸੀ। ਦੂਜੇ ਪੋਸਟਰ ਵਿੱਚ ਲੋਕਾਂ ਨੂੰ ਸਮੂਹਿਕ ਤੌਰ ’ਤੇ ਜੁੜਨ ਅਤੇ ਭਾਈਚਾਰਕ ਗਤੀਵਿਧੀਆਂ ਵਿੱਚ ਹਿੱਸਾ ਲੈਣ ਦਾ ਸੱਦਾ ਦਿੱਤਾ ਗਿਆ ਸੀ। ਪੋਸਟਰਾਂ ’ਤੇ ਇੱਕ ਕਿਊਆਰ ਕੋਡ ਵੀ ਸੀ, ਜਿਸ ਰਾਹੀਂ ਲੋਕਾਂ ਨੂੰ ਇੱਕ ਆਨਲਾਈਨ ਗਰੁੱਪ ਨਾਲ ਜੁੜਨ ਲਈ ਸੱਦਾ ਦਿੱਤਾ ਗਿਆ ਸੀ। ਪੁਲਿਸ ਨੇ ਪਹਿਲਾਂ ਮਿਲੇ ਪੋਸਟਰਾਂ ਨੂੰ ਹਟਾ ਕੇ ਅਣਪਛਾਤੇ ਵਿਅਕਤੀਆਂ ਵਿਰੁੱਧ ਕੇਸ ਦਰਜ ਕੀਤਾ ਸੀ। ਸੂਤਰਾਂ ਨੇ ਇਹ ਵੀ ਦੱਸਿਆ ਸੀ ਕਿ ਇਸ ਮਾਮਲੇ ਦੀ ਜਾਂਚ ਵਿੱਚ ਸਪੈਸ਼ਲ ਸੈੱਲ ਵੀ ਸ਼ਾਮਲ ਸੀ। ਦੋਵਾਂ ਘਟਨਾਵਾਂ ਦੀ ਜਾਂਚ ਦੌਰਾਨ ਪੁਲਿਸ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਕਿ ਪੋਸਟਰ ਕਿਸ ਨੇ ਲਗਾਏ ਅਤੇ ਕੰਧਾਂ ’ਤੇ ਲਿਖਤ ਕਿਸ ਵੱਲੋਂ ਕੀਤੀ ਗਈ ਸੀ।
