ਮੁੰਬਈ, 11 ਅਕਤੂਬਰ, 2026 (ਜਗਜੀਤ ਸਿੰਘ): ਹਿੰਦੀ ਸਿਨੇਮਾ ਦੇ ਮਹਾਨਾਇਕ ਅਮਿਤਾਭ ਬੱਚਨ ਨੇ ਐਤਵਾਰ ਨੂੰ ਆਪਣੇ 84ਵੇਂ ਜਨਮਦਿਨ ਮੌਕੇ ਮੁੰਬਈ ਦੇ ਜੁਹੂ ਸਥਿਤ ਆਪਣੇ ਨਿਵਾਸ ‘ਜਲਸਾ’ ਦੇ ਬਾਹਰ ਇਕੱਠੇ ਹੋਏ ਵੱਡੀ ਗਿਣਤੀ ਵਿੱਚ ਪ੍ਰਸ਼ੰਸਕਾਂ ਦਾ ਸਵਾਗਤ ਕੀਤਾ। ਇਸ ਤਰ੍ਹਾਂ ਉਨ੍ਹਾਂ ਨੇ ਹਰ ਸਾਲ ਆਪਣੇ ਜਨਮਦਿਨ ’ਤੇ ਪ੍ਰਸ਼ੰਸਕਾਂ ਨੂੰ ਮਿਲਣ ਦੀ ਪੁਰਾਣੀ ਪਰੰਪਰਾ ਨੂੰ ਕਾਇਮ ਰੱਖਿਆ। ਅਮਿਤਾਭ ਬੱਚਨ ਇੱਕ ਉੱਚੇ ਮੰਚ ’ਤੇ ਆ ਕੇ ਪ੍ਰਸ਼ੰਸਕਾਂ ਵੱਲ ਹੱਥ ਹਿਲਾ ਕੇ ਉਨ੍ਹਾਂ ਦਾ ਸਵਾਗਤ ਕਰਦੇ ਨਜ਼ਰ ਆਏ। ਇਸ ਮੰਚ ਨੂੰ ਲਾਲ ਫੁੱਲਾਂ ਦੀ ਵੱਡੀ ਮਾਲਾ ਨਾਲ ਸਜਾਇਆ ਗਿਆ ਸੀ। ਉੱਥੇ ਮੌਜੂਦ ਕਈ ਪ੍ਰਸ਼ੰਸਕਾਂ ਨੇ ਇਸ ਖ਼ਾਸ ਪਲ ਨੂੰ ਆਪਣੇ ਮੋਬਾਈਲ ਫ਼ੋਨਾਂ ਵਿੱਚ ਕੈਦ ਕੀਤਾ। ਇਸ ਦੌਰਾਨ ਸੁਰੱਖਿਆ ਕਰਮਚਾਰੀ ਅਤੇ ਉਨ੍ਹਾਂ ਦੇ ਨਾਲ ਆਏ ਹੋਰ ਲੋਕ ਮੰਚ ਦੇ ਆਲੇ-ਦੁਆਲੇ ਮੌਜੂਦ ਰਹੇ। ਇਸ ਮੌਕੇ ਅਮਿਤਾਭ ਬੱਚਨ ਨੇ ਗੂੜ੍ਹੇ ਮਰੂਨ ਰੰਗ ਦਾ ਕੁੜਤਾ ਪਹਿਨਿਆ ਹੋਇਆ ਸੀ ਅਤੇ ਮੋਢੇ ’ਤੇ ਭੂਰੇ ਰੰਗ ਦੇ ਆਧਾਰ ਵਾਲੀ ਕਸ਼ਮੀਰੀ ਕਨੀ ਪਸ਼ਮੀਨਾ ਸ਼ਾਲ ਪਾਈ ਹੋਈ ਸੀ, ਜਿਸ ’ਤੇ ਬਾਰੀਕ ਤੇ ਖ਼ੂਬਸੂਰਤ ਕਢਾਈ ਕੀਤੀ ਗਈ ਸੀ।
ਇਸ ਸਾਲ ਉਨ੍ਹਾਂ ਦਾ ਜਨਮਦਿਨ ਐਤਵਾਰ ਨੂੰ ਆਇਆ, ਜਿਸ ਕਾਰਨ ਇਹ ਮੌਕਾ ਉਨ੍ਹਾਂ ਦੇ ਰਵਾਇਤੀ ਐਤਵਾਰੀ ਦਰਸ਼ਨ ਨਾਲ ਵੀ ਜੁੜ ਗਿਆ। ਇਹ ਉਹ ਪੁਰਾਣੀ ਰਸਮ ਹੈ, ਜਿਸ ਤਹਿਤ ਅਮਿਤਾਭ ਬੱਚਨ ਆਪਣੇ ਘਰ ਦੇ ਬਾਹਰ ਇਕੱਠੇ ਹੋਣ ਵਾਲੇ ਪ੍ਰਸ਼ੰਸਕਾਂ ਅਤੇ ਸ਼ੁਭਚਿੰਤਕਾਂ ਨੂੰ ਮਿਲਣ ਲਈ ਬਾਹਰ ਆਉਂਦੇ ਹਨ। ਇਸ ਮੌਕੇ ਕੁਝ ਪ੍ਰਸ਼ੰਸਕ ਉਨ੍ਹਾਂ ਦੀਆਂ ਮਸ਼ਹੂਰ ਫ਼ਿਲਮੀ ਭੂਮਿਕਾਵਾਂ ਦੇ ਕਿਰਦਾਰਾਂ ਵਾਲੇ ਪਹਿਰਾਵਿਆਂ ਵਿੱਚ ਪਹੁੰਚੇ, ਜਦਕਿ ਹੋਰਨਾਂ ਨੇ ਜਨਮਦਿਨ ਦੀਆਂ ਵਧਾਈਆਂ ਵਾਲੀਆਂ ਤਖ਼ਤੀਆਂ ਫੜੀਆਂ ਹੋਈਆਂ ਸਨ।
ਦਿਨ ਦੀ ਸ਼ੁਰੂਆਤ ਵਿੱਚ ਅਮਿਤਾਭ ਬੱਚਨ ਨੇ ਆਪਣੇ ਬਲੌਗ ’ਤੇ ਇੱਕ ਸੰਦੇਸ਼ ਸਾਂਝਾ ਕਰਦਿਆਂ ਲੋਕਾਂ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਨੇ ਲਿਖਿਆ ਕਿ ਲੋਕਾਂ ਦੇ ਪਿਆਰ, ਨਿੱਘ ਅਤੇ ਸੋਚ-ਸਮਝ ਕੇ ਕੀਤੇ ਗਏ ਖ਼ਾਸ ਇਸ਼ਾਰਿਆਂ ਨੇ ਇਸ ਮੌਕੇ ਨੂੰ ਯਾਦਗਾਰ ਬਣਾ ਦਿੱਤਾ। ਉਨ੍ਹਾਂ ਨੇ ਸ਼ਾਮ ਅਤੇ ਸਵੇਰ ਦੌਰਾਨ ਮਿਲੇ ਪਿਆਰ ਅਤੇ ਅਪਣੱਤ ਦਾ ਜ਼ਿਕਰ ਵੀ ਕੀਤਾ। ਜਸ਼ਨ ਤੋਂ ਬਾਅਦ ਇਕਾਂਤ ਵਿੱਚ ਬਿਤਾਏ ਪਲਾਂ ਬਾਰੇ ਗੱਲ ਕਰਦਿਆਂ ਉਨ੍ਹਾਂ ਨੇ ਲਿਖਿਆ ਕਿ ਇਕਾਂਤ ਮਨ ਵਿੱਚ ਕਈ ਵਿਚਾਰ ਲਿਆਉਂਦਾ ਹੈ। ਉਨ੍ਹਾਂ ਮੁਤਾਬਕ, ਸ਼ਾਮ ਦੌਰਾਨ ਉੱਭਰੇ ਵਿਚਾਰ ਹੁਣ ਇਕਾਂਤ ਵਿੱਚ ਉਨ੍ਹਾਂ ਦੇ ਮਨ ਵਿੱਚ ਸਮਾਏ ਹੋਏ ਹਨ ਅਤੇ ਹਮੇਸ਼ਾ ਯਾਦਗਾਰ ਰਹਿਣਗੇ।
ਅਮਿਤਾਭ ਬੱਚਨ ਨੇ ਆਪਣੇ ਪ੍ਰਸ਼ੰਸਕਾਂ ਤੋਂ ਮੁਆਫ਼ੀ ਵੀ ਮੰਗੀ। ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਨੂੰ ਅਕਸਰ ਉਨ੍ਹਾਂ ਦਾ ਵਿਸਤ੍ਰਿਤ ਪਰਿਵਾਰ ਜਾਂ ‘ਈਐੱਫ਼ ਫੈਮਿਲੀ’ ਕਿਹਾ ਜਾਂਦਾ ਹੈ। ਅਦਾਕਾਰ ਨੇ ਅਫ਼ਸੋਸ ਜਤਾਇਆ ਕਿ ਉਹ ਦੇਰ ਰਾਤ ਤੱਕ ‘ਜਲਸਾ’ ਦੇ ਗੇਟ ’ਤੇ ਉਡੀਕ ਕਰਦੇ ਰਹੇ, ਪਰ ਉਹ ਉਨ੍ਹਾਂ ਨੂੰ ਮਿਲਣ ਲਈ ਬਾਹਰ ਨਹੀਂ ਆ ਸਕੇ। ਉਨ੍ਹਾਂ ਨੇ ਆਪਣੇ ਸੰਦੇਸ਼ ਵਿੱਚ ਕਿਹਾ ਕਿ ਉਹ ਐਤਵਾਰ ਦੀ ਮੁਲਾਕਾਤ ਦੌਰਾਨ ਕੁਝ ਦੇਰ ਬਾਅਦ ਬਾਹਰ ਆ ਕੇ ਉਨ੍ਹਾਂ ਨੂੰ ਮਿਲਣਗੇ ਅਤੇ ਇਸ ਦੇਰੀ ਲਈ ਮੁਆਫ਼ੀ ਮੰਗਣਗੇ। ਭਾਰਤੀ ਸਿਨੇਮਾ ਦੇ ਸਭ ਤੋਂ ਪ੍ਰਸਿੱਧ ਅਦਾਕਾਰਾਂ ਵਿੱਚ ਸ਼ਾਮਲ ਅਮਿਤਾਭ ਬੱਚਨ ਦਾ ਫ਼ਿਲਮੀ ਕਰੀਅਰ ਪੰਜ ਦਹਾਕਿਆਂ ਤੋਂ ਵੀ ਵੱਧ ਸਮੇਂ ਵਿੱਚ ਫੈਲਿਆ ਹੋਇਆ ਹੈ। ‘ਦੀਵਾਰ’, ‘ਸ਼ੋਲੇ’, ‘ਅਗਨੀਪਥ’, ‘ਬਲੈਕ’ ਅਤੇ ‘ਪੀਕੂ’ ਵਰਗੀਆਂ ਫ਼ਿਲਮਾਂ ਵਿੱਚ ਉਨ੍ਹਾਂ ਦੀ ਅਦਾਕਾਰੀ ਨੂੰ ਖ਼ਾਸ ਪਛਾਣ ਮਿਲੀ। ਇਸ ਤੋਂ ਇਲਾਵਾ, ਉਹ ਲੰਬੇ ਸਮੇਂ ਤੋਂ ਚੱਲ ਰਹੇ ਟੈਲੀਵਿਜ਼ਨ ਕੁਇਜ਼ ਸ਼ੋਅ ‘ਕੌਣ ਬਣੇਗਾ ਕਰੋੜਪਤੀ’ ਦੇ ਮੇਜ਼ਬਾਨ ਵਜੋਂ ਵੀ ਦਰਸ਼ਕਾਂ ਵਿੱਚ ਬੇਹੱਦ ਲੋਕਪ੍ਰਿਯ ਹਨ।
