ਔਕਲੈਂਡ | 03 ਜਨਵਰੀ 2026: 2026 ਦੇ ਪਹਿਲੇ ‘ਸੁਪਰਮੂਨ’ ਨੇ ਅੱਜ ਰਾਤ ਨਿਊਜ਼ੀਲੈਂਡ ਦੇ ਅਸਮਾਨ ਨੂੰ ਅਦਭੁੱਤ ਰੌਸ਼ਨੀ ਨਾਲ ਭਰ ਦਿੱਤਾ। ਸਾਫ਼ ਅਸਮਾਨ ਹੋਣ ਕਾਰਨ ਲੋਕਾਂ ਨੂੰ ਇਹ ਦੁਰਲੱਭ ਨਜ਼ਾਰਾ ਪੂਰੀ ਸ਼ਾਨ ਨਾਲ ਵੇਖਣ ਨੂੰ ਮਿਲਿਆ। ਆਮ ਪੂਰਨਮਾਸ਼ੀ ਦੇ ਮੁਕਾਬਲੇ ਚੰਦਰਮਾ ਲਗਭਗ 10 ਫੀਸਦੀ ਵੱਡਾ ਅਤੇ ਕਰੀਬ 30 ਫੀਸਦੀ ਵੱਧ ਚਮਕਦਾਰ ਨਜ਼ਰ ਆਇਆ, ਜਿਸ ਕਾਰਨ ਅਸਮਾਨ ਚਮਕਦਾ ਹੋਇਆ ਦਿੱਸਿਆ।
ਅਸਮਾਨੀ ਨਜ਼ਾਰਿਆਂ ਵਿੱਚ ਦਿਲਚਸਪੀ ਰੱਖਣ ਵਾਲੇ ਲੋਕਾਂ ਨੇ ਸਵਾ ਨੌ ਵਜੇ ਦੇ ਆਸ-ਪਾਸ ਹੀ ਸੁਪਰਮੂਨ ਨੂੰ ਵੇਖਣਾ ਸ਼ੁਰੂ ਕਰ ਦਿੱਤਾ ਸੀ, ਹਾਲਾਂਕਿ ਇਸ ਦਾ ਮੁੱਖ ਸਮਾਂ 9:40 ਵਜੇ ਦੱਸਿਆ ਗਿਆ ਸੀ। ਕਈ ਲੋਕਾਂ ਨੇ ਇਸ ਪਲ ਨੂੰ ਕੈਮਰਿਆਂ ਵਿੱਚ ਕੈਦ ਕੀਤਾ ਅਤੇ ਸੋਸ਼ਲ ਮੀਡੀਆ ’ਤੇ ਤਸਵੀਰਾਂ ਸਾਂਝੀਆਂ ਕੀਤੀਆਂ।
ਸੁਪਰਮੂਨ ਕੀ ਹੁੰਦਾ ਹੈ?
ਕੈਂਟਰਬਰੀ ਯੂਨੀਵਰਸਿਟੀ ਦੇ ਖਗੋਲ ਵਿਗਿਆਨੀ ਡਾ. ਰਿਆਨ ਰਿਡਨ ਅਨੁਸਾਰ, ਸੁਪਰਮੂਨ ਉਹ ਸਮਾਂ ਹੁੰਦਾ ਹੈ ਜਦੋਂ ਪੂਰਨਮਾਸ਼ੀ ਦਾ ਚੰਦਰਮਾ ਆਪਣੀ ਕੱਖ (orbit) ਵਿੱਚ ਧਰਤੀ ਦੇ ਸਭ ਤੋਂ ਨੇੜਲੇ ਬਿੰਦੂ ’ਤੇ ਪਹੁੰਚਦਾ ਹੈ। ਇਸ ਨੇੜਤਾ ਕਾਰਨ ਚੰਦਰਮਾ ਆਮ ਦਿਨਾਂ ਨਾਲੋਂ ਵੱਡਾ ਅਤੇ ਕਾਫੀ ਵੱਧ ਚਮਕਦਾਰ ਦਿਖਾਈ ਦਿੰਦਾ ਹੈ।
ਬ੍ਰਹਸਪਤੀ ਦੇ ਨੇੜੇ ਚੰਦਰਮਾ
ਇਸ ਦੌਰਾਨ ਚੰਦਰਮਾ ਬ੍ਰਹਸਪਤੀ ਗ੍ਰਹਿ ਦੇ ਵੀ ਕਾਫੀ ਨੇੜੇ ਨਜ਼ਰ ਆਇਆ। ਜੇਕਰ ਕੋਈ ਸੁਪਰਮੂਨ ਵੱਲ ਦੇਖਦਾ, ਤਾਂ ਉਸ ਦੇ ਦੱਖਣ ਵੱਲ ਚਮਕਦਾ ਹੋਇਆ ਜੋ “ਤਾਰਾ” ਦਿੱਸ ਰਿਹਾ ਸੀ, ਉਹ ਦਰਅਸਲ ਬ੍ਰਹਸਪਤੀ ਗ੍ਰਹਿ ਸੀ।
2026 ਦਾ ਇਹ ਪਹਿਲਾ ਸੁਪਰਮੂਨ ਨਿਊਜ਼ੀਲੈਂਡ ਵਾਸੀਆਂ ਲਈ ਯਾਦਗਾਰ ਅਨੁਭਵ ਬਣ ਗਿਆ, ਜਿਸ ਨੇ ਕੁਦਰਤ ਦੀ ਖੂਬਸੂਰਤੀ ਨੂੰ ਇਕ ਵਾਰ ਫਿਰ ਉਜਾਗਰ ਕੀਤਾ।
