ਹਰਿਆਣਾ ਨੂੰ ਹੜ੍ਹਾਂ ਤੋਂ ਮਿਲੇਗੀ ਰਾਹਤ; ਰਾਜਸਥਾਨ ਕਰੇਗਾ ਬਰਸਾਤੀ ਪਾਣੀ ਦੀ ਵਰਤੋਂ

ਸਿਰਸਾ, 23ਜੂਨ (ਹਰਸ਼ਪ੍ਰੀਤ ਕੌਰ): ਰਾਜਸਥਾਨ ਸਰਕਾਰ ਹੁਣ ਹਰਿਆਣਾ ਦੇ ਹਿਸਾਰ ਘੱਗਰ ਮਲਟੀਪਰਪਜ਼ ਡਰੇਨ (ਸੇਮਨਾਲਾ) ਦੇ ਬਰਸਾਤੀ ਪਾਣੀ ਦੀ ਵਰਤੋਂ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਰਾਜਸਥਾਨ ਦੇ ਸਿੰਚਾਈ ਵਿਭਾਗ ਨੇ ਸਿਰਸਾ-ਫਤਿਹਾਬਾਦ ਸਰਹੱਦ ਨਾਲ ਲੱਗਦੇ ਪਿੰਡ ਰਾਮਸਰਾ-ਮਹਿਰਾਣਾ ਨੇੜੇ ਨਵਾਂ ਡਰੇਨ ਬਣਾ ਕੇ 700 ਕਿਊਸਿਕ ਬਰਸਾਤੀ ਪਾਣੀ ਭਾਦਰਾ ਤਹਿਸੀਲ ਤੱਕ ਪਹੁੰਚਾਉਣ ਦਾ ਪ੍ਰਸਤਾਵ ਹਰਿਆਣਾ ਨੂੰ ਭੇਜਿਆ ਹੈ। ਹਰਿਆਣਾ ਨੇ ਇਸ ਲਈ ਮੁੱਢਲੀ ਸਹਿਮਤੀ ਦੇ ਦਿੱਤੀ ਹੈ। ਰਾਜਸਥਾਨ ਵੱਲੋਂ ਡਰੇਨ ਦਾ ਸਰਵੇ ਕੀਤਾ ਜਾ ਰਿਹਾ ਹੈ।

ਕਰੀਬ 1710.81 ਕਰੋੜ ਰੁਪਏ ਦੇ ਮੈਗਾ ਪ੍ਰੋਜੈਕਟ ਤਹਿਤ ਹਿਸਾਰ ਘੱਗਰ ਬਹੁਮੰਤਵੀ ਡਰੇਨ ਦੀ ਨਿਕਾਸੀ ਸਮਰੱਥਾ ਮੌਜੂਦਾ 500 ਕਿਊਸਿਕ ਤੋਂ ਵਧਾ ਕੇ 1600 ਤੋਂ 2750 ਕਿਊਸਿਕ ਕੀਤੀ ਜਾਵੇਗੀ। ਸਰਕਾਰ ਦਾ ਦਾਅਵਾ ਹੈ ਕਿ ਇਸ ਨਾਲ ਸਿਰਸਾ, ਫਤਿਹਾਬਾਦ ਅਤੇ ਹਿਸਾਰ ਦੇ ਹੜ੍ਹ ਅਤੇ ਸੇਮ ਪ੍ਰਭਾਵਿਤ ਇਲਾਕਿਆਂ ਨੂੰ ਵੱਡੀ ਰਾਹਤ ਮਿਲੇਗੀ। ਪ੍ਰੋਜੈਕਟ ਦੇ ਤਹਿਤ ਹਿਸਾਰ ਘੱਗਰ ਬਹੁਮੰਤਵੀ ਡਰੇਨ ਨੂੰ ਚੌੜਾ ਅਤੇ ਆਧੁਨਿਕ ਬਣਾਇਆ ਜਾਵੇਗਾ।

ਇਸ ਸਮੇਂ ਕਈ ਹਿੱਸਿਆਂ ਵਿੱਚ ਇਸਦੀ ਸਮਰੱਥਾ 500 ਕਿਊਸਿਕ ਦੇ ਕਰੀਬ ਹੈ। ਇਸ ਨੂੰ ਵਧਾ ਕੇ 2750 ਕਿਊਸਿਕ ਕੀਤਾ ਜਾਵੇਗਾ। ਭਾਰੀ ਬਰਸਾਤ ਹੋਣ ਜਾਂ ਘੱਗਰ ਦਰਿਆ ਵਿੱਚ ਪਾਣੀ ਦਾ ਪੱਧਰ ਵਧਣ ਦੀ ਸੂਰਤ ਵਿੱਚ ਵਾਧੂ ਪਾਣੀ ਦਾ ਨਿਕਾਸ ਤੇਜ਼ੀ ਨਾਲ ਹੋ ਜਾਵੇਗਾ। ਓਟੂ ਨੇੜੇ ਘੱਗਰ ਵਿੱਚ ਪਾਣੀ ਦੀ ਨਿਕਾਸੀ ਲਈ 1000 ਕਿਊਸਿਕ ਸਮਰੱਥਾ ਦਾ ਪੰਪ ਵੀ ਲਗਾਇਆ ਜਾਵੇਗਾ। ਇਹ ਪ੍ਰੋਜੈਕਟ ਭਾਖੜਾ ਜਲ ਸੇਵਾ ਸਰਕਲ ਅਧੀਨ ਲਾਗੂ ਕੀਤਾ ਜਾਵੇਗਾ।