ਮੋਹਾਲੀ, 5 ਜੂਨ (ਛਤਰਪਾਲ ਸਿੰਘ): ਮੋਹਾਲੀ ਦੇ ਫੇਜ਼ 11 ਵਿੱਚ ਸਥਿਤ ਇੱਕ ਨਿੱਜੀ ਕੰਪਨੀ ਦੇ ਦਫ਼ਤਰ ਅੰਦਰ ਵੀਰਵਾਰ ਸ਼ਾਮ ਨੂੰ ਇੱਕ ਬੇਹੱਦ ਖ਼ੌਫ਼ਨਾਕ ਅਤੇ ਦਰਦਨਾਕ ਵਾਰਦਾਤ ਸਾਹਮਣੇ ਆਈ ਹੈ। ਇੱਥੇ ਇੱਕ ਨੌਜਵਾਨ ਨੇ ਆਪਣੇ ਨਾਲ ਕੰਮ ਕਰਨ ਵਾਲੀ 29 ਸਾਲਾ ਲੜਕੀ ‘ਤੇ ਦਫ਼ਤਰ ਦੇ ਅੰਦਰ ਹੀ ਚਾਕੂਆਂ ਨਾਲ ਤਾਬੜਤੋੜ ਹਮਲਾ ਕਰਕੇ ਉਸ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ। ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਮੁਲਜ਼ਮ ਨੇ ਦੂਜੇ ਚਾਕੂ ਨਾਲ ਆਪਣੀ ਹੀ ਗਰਦਨ ‘ਤੇ ਵਾਰ ਕਰਕੇ ਖੁਦਕੁਸ਼ੀ ਕਰਨ ਦੀ ਕੋਸ਼ਿਸ਼ ਵੀ ਕੀਤੀ।
ਦੋਵਾਂ ਨੂੰ ਲਹੂ-ਲੁਹਾਨ ਹਾਲਤ ਵਿੱਚ ਤੁਰੰਤ ਫੋਰਟਿਸ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਲੜਕੀ ਨੂੰ ਮ੍ਰਿਤਕ ਐਲਾਨ ਦਿੱਤਾ, ਜਦੋਂ ਕਿ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋਏ ਮੁਲਜ਼ਮ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ। ਇਹ ਸਾਰੀ ਖ਼ੌਫ਼ਨਾਕ ਘਟਨਾ ਦਫ਼ਤਰ ਵਿੱਚ ਲੱਗੇ ਸੀਸੀਟੀਵੀ (CCTV) ਕੈਮਰੇ ਵਿੱਚ ਕੈਦ ਹੋ ਗਈ ਹੈ।
ਵਰਕਸਟੇਸ਼ਨ ‘ਤੇ ਕੰਮ ਕਰ ਰਹੀ ਸੀ ਲੜਕੀ, ਪਿੱਛੋਂ ਆ ਕੇ ਕੀਤਾ ਹਮਲਾ
ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਹ ਘਟਨਾ ਵੀਰਵਾਰ ਸ਼ਾਮ ਲਗਭਗ 7:30 ਵਜੇ ਫੇਜ਼ 11 ਸਥਿਤ ‘ਐਸਆਰਪੀ ਯੂਐਸ ਲੌਜਿਸਟਿਕਸ’ (SRP US Logistics) ਕੰਪਨੀ ਦੇ ਦਫ਼ਤਰ ਵਿੱਚ ਵਾਪਰੀ। ਮ੍ਰਿਤਕ ਔਰਤ ਦੀ ਪਛਾਣ ਡਿੰਪਲ (29) ਵਜੋਂ ਹੋਈ ਹੈ, ਜੋ ਕੰਪਨੀ ਦੀ ਡਿਸਪੈਚ ਟੀਮ ਵਿੱਚ ਕੰਮ ਕਰਦੀ ਸੀ। ਮੁਲਜ਼ਮ ਦੀ ਪਛਾਣ ਹਰਜਿੰਦਰ (34) ਵਜੋਂ ਹੋਈ ਹੈ, ਜੋ ਉਸੇ ਕੰਪਨੀ ਵਿੱਚ ਤਾਇਨਾਤ ਸੀ ਅਤੇ ਦੋਵਾਂ ਦੇ ਵਰਕਸਟੇਸ਼ਨ (ਬੈਠਣ ਦੀ ਜਗ੍ਹਾ) ਬਿਲਕੁਲ ਨਾਲ-ਨਾਲ ਸਨ।
ਸੀਸੀਟੀਵੀ ਫੁਟੇਜ ਮੁਤਾਬਕ, ਡਿੰਪਲ ਆਪਣੇ ਡੈਸਕ ‘ਤੇ ਬੈਠ ਕੇ ਰੋਜ਼ਾਨਾ ਵਾਂਗ ਕੰਮ ਕਰ ਰਹੀ ਸੀ। ਇਸੇ ਦੌਰਾਨ ਉਸ ਦੀ ਟੀਮ ਦਾ ਸਾਥੀ ਹਰਜਿੰਦਰ ਅਚਾਨਕ ਪਿੱਛੇ ਤੋਂ ਆਇਆ ਅਤੇ ਉਸ ਨੇ ਡਿੰਪਲ ਦੀ ਗਰਦਨ ‘ਤੇ ਚਾਕੂ ਨਾਲ ਲਗਾਤਾਰ 5 ਤੋਂ 6 ਵਾਰ ਹਮਲਾ ਕਰ ਦਿੱਤਾ। ਅਚਾਨਕ ਹੋਏ ਇਸ ਹਮਲੇ ਤੋਂ ਬਚਣ ਲਈ ਜ਼ਖਮੀ ਡਿੰਪਲ ਨੇ ਦਫ਼ਤਰ ਦੇ ਮੁੱਖ ਗੇਟ ਵੱਲ ਭੱਜਣ ਦੀ ਕੋਸ਼ਿਸ਼ ਕੀਤੀ, ਪਰ ਹਮਲਾਵਰ ਨੇ ਪਿੱਛੇ ਭੱਜ ਕੇ ਉਸ ਨੂੰ ਗੇਟ ਕੋਲ ਦਬੋਚ ਲਿਆ ਅਤੇ ਦੁਬਾਰਾ ਚਾਕੂ ਨਾਲ ਦਸ ਤੋਂ ਵੱਧ ਵਾਰ ਗਰਦਨ ‘ਤੇ ਵਾਰ ਕੀਤੇ।
ਸਾਥੀ ਕਰਮਚਾਰੀਆਂ ਨੇ ਦਿਖਾਈ ਬਹਾਦਰੀ, ਮੁਲਜ਼ਮ ਨੇ ਖੁਦ ‘ਤੇ ਵੀ ਚਲਾਇਆ ਚਾਕੂ
ਦਫ਼ਤਰ ਵਿੱਚ ਚੱਲ ਰਹੇ ਇਸ ਖ਼ੂਨੀ ਖੇਡ ਨੂੰ ਦੇਖ ਕੇ ਉੱਥੇ ਮੌਜੂਦ ਬਾਕੀ ਕਰਮਚਾਰੀਆਂ ਵਿੱਚ ਹਫੜਾ-ਦਫੜੀ ਮਚ ਗਈ। ਕਈ ਸਾਥੀ ਕਰਮਚਾਰੀਆਂ ਨੇ ਹਿੰਮਤ ਦਿਖਾਉਂਦਿਆਂ ਹਰਜਿੰਦਰ ਨੂੰ ਪਿੱਛੇ ਹਟਾਉਣ ਅਤੇ ਡਿੰਪਲ ਨੂੰ ਬਚਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਮੁਲਜ਼ਮ ਨੇ ਉਨ੍ਹਾਂ ਨੂੰ ਵੀ ਚਾਕੂ ਦਿਖਾ ਕੇ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ, ਜਿਸ ਕਾਰਨ ਕੁਝ ਕਰਮਚਾਰੀ ਪਿੱਛੇ ਹਟ ਗਏ। ਇਸੇ ਦੌਰਾਨ ਇੱਕ ਹੋਰ ਨੌਜਵਾਨ ਕਰਮਚਾਰੀ ਨੇ ਬਹਾਦਰੀ ਦਿਖਾਉਂਦੇ ਹੋਏ ਅੱਗੇ ਵਧ ਕੇ ਮੁਲਜ਼ਮ ਦੇ ਹੱਥੋਂ ਚਾਕੂ ਖੋਹ ਲਿਆ।
ਜਿਵੇਂ ਹੀ ਸਾਥੀ ਮੁਲਾਜ਼ਮਾਂ ਨੇ ਹਰਜਿੰਦਰ ਤੋਂ ਚਾਕੂ ਖੋਹਿਆ, ਤਾਂ ਉਸ ਨੇ ਤੁਰੰਤ ਆਪਣੀ ਜੇਬ੍ਹ ਵਿੱਚੋਂ ਇੱਕ ਹੋਰ ਦੂਜਾ ਚਾਕੂ ਕੱਢ ਲਿਆ ਅਤੇ ਖੁਦ ਦੀ ਗਰਦਨ ‘ਤੇ ਤੇਜ਼ੀ ਨਾਲ ਕਈ ਵਾਰ ਕਰਕੇ ਖੁਦਕੁਸ਼ੀ ਦੀ ਕੋਸ਼ਿਸ਼ ਕੀਤੀ, ਜਿਸ ਕਾਰਨ ਉਹ ਵੀ ਉੱਥੇ ਹੀ ਢੇਰ ਹੋ ਗਿਆ।
ਫੋਰੈਂਸਿਕ ਟੀਮ ਵੱਲੋਂ ਜਾਂਚ ਸ਼ੁਰੂ; ਪੋਸਟਮਾਰਟਮ ਅੱਜ
ਘਟਨਾ ਤੋਂ ਤੁਰੰਤ ਬਾਅਦ ਦਫ਼ਤਰ ਦੇ ਸਟਾਫ਼ ਨੇ ਪੁਲਿਸ ਅਤੇ ਐਂਬੂਲੈਂਸ ਨੂੰ ਸੂਚਿਤ ਕੀਤਾ। ਸੂਚਨਾ ਮਿਲਦੇ ਹੀ ਫੇਜ਼ 11 ਥਾਣੇ ਦੀ ਪੁਲਿਸ ਅਤੇ ਫੋਰੈਂਸਿਕ ਮਾਹਿਰਾਂ ਦੀ ਟੀਮ ਨੇ ਮੌਕੇ ‘ਤੇ ਪਹੁੰਚ ਕੇ ਸਬੂਤ ਇਕੱਠੇ ਕੀਤੇ। ਪੁਲਿਸ ਨੇ ਦਫ਼ਤਰ ਦੀ ਸੀਸੀਟੀਵੀ ਫੁਟੇਜ ਨੂੰ ਆਪਣੇ ਕਬਜ਼ੇ ਵਿੱਚ ਲੈ ਲਿਆ ਹੈ ਅਤੇ ਮ੍ਰਿਤਕਾ ਦੀ ਲਾਸ਼ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ, ਜੋ ਕਿ ਅੱਜ (ਸ਼ੁੱਕਰਵਾਰ) ਕੀਤਾ ਜਾਵੇਗਾ।
ਪੁਲਿਸ ਬਿਆਨ: ਫੇਜ਼ 11 ਥਾਣੇ ਦੇ ਐਸਐਚਓ (SHO) ਅਮਨ ਬੈਦਵਾਨ ਨੇ ਦੱਸਿਆ ਕਿ ਮ੍ਰਿਤਕ ਲੜਕੀ ਦੇ ਪਰਿਵਾਰਕ ਮੈਂਬਰਾਂ ਦੇ ਬਿਆਨ ਦਰਜ ਕੀਤੇ ਜਾ ਰਹੇ ਹਨ ਅਤੇ ਮਾਮਲੇ ਵਿੱਚ ਅਗਲੇਰੀ ਕਾਨੂੰਨੀ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾ ਰਹੀ ਹੈ। ਪੁਲਿਸ ਵੱਲੋਂ ਕਤਲ ਦੇ ਅਸਲ ਕਾਰਨਾਂ ਅਤੇ ਦੋਵਾਂ ਵਿਚਕਾਰ ਸਬੰਧਾਂ ਦੇ ਪਹਿਲੂਆਂ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।
