ਅਮਰੀਕਾ ਨੇ ਦੁਸ਼ਮਣ ਦੇ ਹੱਥ ਲੱਗਣ ਤੋਂ ਰੋਕਣ ਲਈ ਖ਼ੁਦ ਹੀ ਤਬਾਹ ਕੀਤੇ ਆਪਣੇ 2 ਜਹਾਜ਼; IRGC ਅਤੇ ਅਮਰੀਕੀ ਕਮਾਂਡੋਆਂ ਵਿਚਕਾਰ ਹੋਈ ਸਿੱਧੀ ਗੋਲੀਬਾਰੀ
ਤਹਿਰਾਨ/ਵਾਸ਼ਿੰਗਟਨ, 5 ਅਪ੍ਰੈਲ: ਈਰਾਨ ਦੀ ਧਰਤੀ ‘ਤੇ ਅਮਰੀਕੀ ਫੌਜ ਨੇ ਇਤਿਹਾਸ ਦੇ ਸਭ ਤੋਂ ਖ਼ਤਰਨਾਕ ਅਤੇ ਦਲੇਰਾਨਾ ਬਚਾਅ ਕਾਰਜਾਂ (Rescue Operations) ਵਿੱਚੋਂ ਇੱਕ ਨੂੰ ਅੰਜਾਮ ਦਿੰਦੇ ਹੋਏ ਆਪਣੇ ਲਾਪਤਾ F-15E ਲੜਾਕੂ ਜਹਾਜ਼ ਦੇ ਪਾਇਲਟ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਹੈ। ਇਸ ਘਾਤਕ ਮਿਸ਼ਨ ਦੌਰਾਨ ਅਮਰੀਕੀ ਸਪੈਸ਼ਲ ਫੋਰਸਿਜ਼ ਅਤੇ ਈਰਾਨੀ ਫੌਜ (IRGC) ਵਿਚਕਾਰ ਸਿੱਧੀ ਗੋਲੀਬਾਰੀ ਹੋਣ ਦੀ ਵੀ ਖ਼ਬਰ ਹੈ।
ਘਰ ਵਿੱਚ ਲੁਕਿਆ ਹੋਇਆ ਸੀ ਪਾਇਲਟ
ਸੂਤਰਾਂ ਅਨੁਸਾਰ, ਅਮਰੀਕੀ ਪਾਇਲਟ ਜਹਾਜ਼ ਕ੍ਰੈਸ਼ ਹੋਣ ਤੋਂ ਬਾਅਦ ਈਰਾਨ ਦੇ ਇੱਕ ਦੂਰ-ਦੁਰਾਡੇ ਇਲਾਕੇ ਵਿੱਚ ਇੱਕ ਘਰ ਅੰਦਰ ਲੁਕਿਆ ਹੋਇਆ ਸੀ। ਈਰਾਨੀ ਫੌਜ ਦੇ ਉੱਥੇ ਪਹੁੰਚਣ ਤੋਂ ਪਹਿਲਾਂ ਹੀ ਅਮਰੀਕੀ ਕਮਾਂਡੋਆਂ ਨੇ ਤੇਜ਼ੀ ਨਾਲ ਕਾਰਵਾਈ ਕਰਦੇ ਹੋਏ ਪਾਇਲਟ ਨੂੰ ਆਪਣੀ ਹਿਰਾਸਤ ਵਿੱਚ ਲੈ ਲਿਆ ਅਤੇ ਸੁਰੱਖਿਅਤ ਬਾਹਰ ਕੱਢਣ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ।
ਅਮਰੀਕਾ ਨੂੰ ਚੁੱਕਣੀ ਪਈ ਵੱਡੀ ਕੀਮਤ
ਇਸ ਮਿਸ਼ਨ ਦੀ ਸਫ਼ਲਤਾ ਲਈ ਅਮਰੀਕਾ ਨੂੰ ਆਪਣੇ ਦੋ ਜਹਾਜ਼ਾਂ ਦੀ ਕੁਰਬਾਨੀ ਦੇਣੀ ਪਈ। ਬਚਾਅ ਕਾਰਜ ਵਿੱਚ ਵਰਤੇ ਗਏ ਦੋ ਅਮਰੀਕੀ ਜਹਾਜ਼, ਜਿਨ੍ਹਾਂ ਵਿੱਚ ਇੱਕ ਵਿਸ਼ਾਲ C-130 ਹਰਕਿਊਲਿਸ (Hercules) ਵੀ ਸ਼ਾਮਲ ਸੀ, ਦੁਸ਼ਮਣ ਦੇ ਘੇਰੇ ਵਿੱਚ ਫਸ ਗਏ ਸਨ। ਜਦੋਂ ਇਹ ਸਪੱਸ਼ਟ ਹੋ ਗਿਆ ਕਿ ਇਨ੍ਹਾਂ ਜਹਾਜ਼ਾਂ ਨੂੰ ਵਾਪਸ ਲਿਆਉਣਾ ਅਸੰਭਵ ਹੈ, ਤਾਂ ਅਮਰੀਕੀ ਫੌਜ ਨੇ ਆਪਣੀ ਗੁਪਤ ਤਕਨਾਲੋਜੀ (Technology) ਨੂੰ ਈਰਾਨ ਦੇ ਹੱਥ ਲੱਗਣ ਤੋਂ ਰੋਕਣ ਲਈ ਦੋਵਾਂ ਜਹਾਜ਼ਾਂ ਨੂੰ ਧਮਾਕੇ ਨਾਲ ਖ਼ੁਦ ਹੀ ਤਬਾਹ ਕਰ ਦਿੱਤਾ।
ਰਾਸ਼ਟਰਪਤੀ ਟਰੰਪ ਦਾ ਬਿਆਨ
ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਸ ਮਿਸ਼ਨ ਦੀ ਸਫ਼ਲਤਾ ‘ਤੇ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ, “ਅਸੀਂ ਉਸਨੂੰ ਲੱਭ ਲਿਆ।” ਉਨ੍ਹਾਂ ਨੇ ਇਸ ਨੂੰ ਅਮਰੀਕੀ ਫੌਜੀ ਇਤਿਹਾਸ ਦੇ ਸਭ ਤੋਂ ਬਹਾਦਰੀ ਭਰੇ ਕਾਰਨਾਮਿਆਂ ਵਿੱਚੋਂ ਇੱਕ ਦੱਸਿਆ। ਹਾਲਾਂਕਿ ਦੋ ਜਹਾਜ਼ਾਂ ਦਾ ਨੁਕਸਾਨ ਅਮਰੀਕਾ ਲਈ ਇੱਕ ਝਟਕਾ ਹੈ, ਪਰ ਪਾਇਲਟ ਦੀ ਜਾਨ ਬਚਾਉਣਾ ਇਸ ਮਿਸ਼ਨ ਦੀ ਸਭ ਤੋਂ ਵੱਡੀ ਜਿੱਤ ਮੰਨੀ ਜਾ ਰਹੀ ਹੈ।
ਅਖੀਰ ਵਿੱਚ, ਤਿੰਨ ਹੋਰ ਲੜਾਕੂ ਜਹਾਜ਼ਾਂ ਦੀ ਮਦਦ ਨਾਲ ਕਮਾਂਡੋ ਅਤੇ ਬਚਾਏ ਗਏ ਪਾਇਲਟ ਨੂੰ ਸੁਰੱਖਿਅਤ ਖੇਤਰ ਵਿੱਚ ਪਹੁੰਚਾਇਆ ਗਿਆ। ਇਸ ਘਟਨਾ ਤੋਂ ਬਾਅਦ ਖਾੜੀ ਦੇਸ਼ਾਂ ਵਿੱਚ ਤਣਾਅ ਚਰਮ ‘ਤੇ ਪਹੁੰਚ ਗਿਆ ਹੈ ਅਤੇ ਦੋਵਾਂ ਦੇਸ਼ਾਂ ਵਿਚਾਲੇ ਸਿੱਧੀ ਜੰਗ ਦਾ ਖਤਰਾ ਹੋਰ ਗੰਭੀਰ ਹੋ ਗਿਆ ਹੈ।
