ਟਰੰਪ ਦੀ ਇਰਾਨ ਨੂੰ ਵੱਡੀ ਧਮਕੀ: ਕਿਹਾ— 1,000 ਮਿਜ਼ਾਈਲਾਂ ‘ਲਾਕਡ ਐਂਡ ਲੋਡਿਡ’

ਅਮਰੀਕਾ, 11 ਜੁਲਾਈ (ਵਿਸ਼ਾਲ ਗੁਪਤਾ): ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸ਼ੁੱਕਰਵਾਰ (ਸਥਾਨਕ ਸਮੇਂ) ਨੂੰ ਇਰਾਨ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰਨ ਦੀ ਧਮਕੀ ਦਿੰਦਿਆਂ ਕਿਹਾ ਹੈ ਕਿ ਅਮਰੀਕੀ ਫੌਜ ਬਿਲਕੁਲ ਤਿਆਰ ਹੈ। ਟਰੰਪ ਨੇ ਦਾਅਵਾ ਕੀਤਾ ਕਿ 1,000 ਮਿਜ਼ਾਈਲਾਂ ‘ਲਾਕਡ ਐਂਡ ਲੋਡਿਡ’ (ਨਿਸ਼ਾਨੇ ‘ਤੇ ਤਿਆਰ) ਹਨ, ਜਿਨ੍ਹਾਂ ਦਾ ਰੁਖ ਇਰਾਨ ਵੱਲ ਹੈ।

ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਟਰੂਥ ਸੋਸ਼ਲ’ (Truth Social) ‘ਤੇ ਇੱਕ ਪੋਸਟ ਵਿੱਚ ਉਨ੍ਹਾਂ ਲਿਖਿਆ:

“1,000 ਮਿਜ਼ਾਈਲਾਂ ਲਾਕਡ ਐਂਡ ਲੋਡਿਡ ਹਨ ਅਤੇ ਇਰਾਨ ਦੇ ਇਸਲਾਮੀ ਗਣਰਾਜ ਵੱਲ ਸੇਧਿਤ ਹਨ, ਅਤੇ ਹਜ਼ਾਰਾਂ ਹੋਰ ਮਿਜ਼ਾਈਲਾਂ ਤੁਰੰਤ ਇਸ ਦੇ ਪਿੱਛੇ ਚੱਲਣਗੀਆਂ, ਜੇਕਰ ਇਰਾਨ ਦੀ ਸਰਕਾਰ ਨੇ ਦੁਨੀਆ ਦੇ ਕਿਸੇ ਵੀ ਕੋਨੇ ਤੋਂ ਅਮਰੀਕਾ ਦੇ ਮੌਜੂਦਾ ਰਾਸ਼ਟਰਪਤੀ—ਜੋ ਕਿ ਇਸ ਮਾਮਲੇ ਵਿੱਚ ਮੈਂ ਖ਼ੁਦ ਹਾਂ—ਨੂੰ ਜਾਨੋਂ ਮਾਰਨ ਦੀ ਜਾਂ ਅਜਿਹੀ ਕੋਈ ਕੋਸ਼ਿਸ਼ ਕਰਨ ਦੀ ਧਮਕੀ ‘ਤੇ ਅਮਲ ਕੀਤਾ! ਹੁਕਮ ਪਹਿਲਾਂ ਹੀ ਦਿੱਤੇ ਜਾ ਚੁੱਕੇ ਹਨ, ਅਤੇ ਅਮਰੀਕੀ ਫੌਜ ਇੱਕ ਸਾਲ ਦੀ ਮਿਆਦ (ਜਿਸ ਨੂੰ ਵਧਾਇਆ ਵੀ ਜਾ ਸਕਦਾ ਹੈ) ਲਈ ਇਰਾਨ ਦੇ ਸਾਰੇ ਖੇਤਰਾਂ ਨੂੰ ਪੂਰੀ ਤਰ੍ਹਾਂ ਤਬਾਹ ਅਤੇ ਨੇਸਤਨਾਬੂਦ ਕਰਨ ਲਈ ਤਿਆਰ, ਰਜ਼ਾਮੰਦ ਅਤੇ ਸਮਰੱਥ ਹੈ – ਅੱਲ੍ਹਾ ਦਾ ਸ਼ੁਕਰ ਹੈ! ਰਾਸ਼ਟਰਪਤੀ ਡੋਨਾਲਡ ਜੇ. ਟਰੰਪ।”

ਇਰਾਨ ਦੀ ਪ੍ਰਤੀਕਿਰਿਆ: ਅਮਰੀਕਾ ‘ਤੇ ਸਮਝੌਤਾ ਤੋੜਨ ਦੇ ਦੋਸ਼

ਦੂਜੇ ਪਾਸੇ, ਇਰਾਨ ਦੇ ਵਿਦੇਸ਼ ਮੰਤਰੀ ਸੱਯਦ ਅੱਬਾਸ ਅਰਾਗਚੀ ਨੇ ਦੋਸ਼ ਲਾਇਆ ਹੈ ਕਿ ਅਮਰੀਕਾ ਨੇ ਸਹਿਮਤੀ ਪੱਤਰ (MoU) ਦੀ ਉਲੰਘਣਾ ਕੀਤੀ ਹੈ। ਐਕਸ (X) ‘ਤੇ ਇੱਕ ਪੋਸਟ ਵਿੱਚ ਉਨ੍ਹਾਂ ਕਿਹਾ, “ਇਰਾਨ ਨੇ ਹੁਣ ਤੱਕ ਆਪਣਾ ਵਾਅਦਾ ਨਿਭਾਇਆ ਹੈ, ਪਰ ਅਮਰੀਕੀ ਵਿੱਤ ਸਕੱਤਰ MoU ਦੀ ਧਾਰਾ 9 ਦੀ ਉਲੰਘਣਾ ਕਰ ਰਹੇ ਹਨ। ਇਹ ਉਲੰਘਣਾ ਅਮਰੀਕਾ ਵੱਲੋਂ ਕੀਤੀਆਂ ਗਈਆਂ ਹੋਰ ਉਲੰਘਣਾਵਾਂ ਅਤੇ ਗਲਤੀਆਂ ਦੀ ਇੱਕ ਕੜੀ ਹੈ। ਅਸਲੀਅਤ ਇਹ ਹੈ ਕਿ ਨਿਯਮਾਂ ਦੀ ਪਾਲਣਾ ਦੋਵਾਂ ਪਾਸਿਆਂ ਤੋਂ ਹੀ ਹੋਣੀ ਚਾਹੀਦੀ ਹੈ।”

ਇਰਾਨੀ ਸੰਸਦ ਦੇ ਸਪੀਕਰ ਮੁਹੰਮਦ ਬਾਕਰ ਕਾਲੀਬਾਫ ਨੇ ‘ਅਲ ਜਜ਼ੀਰਾ’ ਦੇ ਹਵਾਲੇ ਨਾਲ ਕਿਹਾ ਕਿ ਤਹਿਰਾਨ ਕਦੇ ਵੀ ਅਮਰੀਕਾ ਅੱਗੇ ਗੋਡੇ ਨਹੀਂ ਟੇਕੇਗਾ ਅਤੇ ਜੇਕਰ ਅਮਰੀਕਾ ਸਮਝੌਤੇ ਦੀ ਉਲੰਘਣਾ ਕਰਦਾ ਹੈ ਤਾਂ ਉਹ ਆਪਣੀ ਰੱਖਿਆ ਲਈ ਪੂਰੀ ਤਰ੍ਹਾਂ ਤਿਆਰ ਹੈ।

ਇਰਾਨ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਇਸਮਾਈਲ ਬਕਾਈ ਨੇ ਕਿਹਾ ਕਿ ਦੇਸ਼ ਦੇ ਰੱਖਿਅਕ ਦੁਸ਼ਮਣ ਦੀਆਂ ਹਰ ਹਰਕਤਾਂ ‘ਤੇ ਤਿੱਖੀ ਨਜ਼ਰ ਰੱਖ ਰਹੇ ਹਨ। ਉਨ੍ਹਾਂ ਐਕਸ (X) ‘ਤੇ ਲਿਖਿਆ ਕਿ ਇਨ੍ਹਾਂ ਗਰਮੀਆਂ ਦੇ ਦਿਨਾਂ ਵਿੱਚ ਦੇਸ਼ ਦੀਆਂ ਸਰਹੱਦਾਂ, ਟਾਪੂਆਂ ਅਤੇ ਸੰਵੇਦਨਸ਼ੀਲ ਥਾਵਾਂ ‘ਤੇ ਤਾਇਨਾਤ ਹਥਿਆਰਬੰਦ ਬਲ ਬਿਨਾਂ ਕਿਸੇ ਰੌਲੇ-ਰੱਪੇ ਦੇ ਦੇਸ਼ ਦੀ ਸੁਰੱਖਿਆ ਦੀ ਭਾਰੀ ਜ਼ਿੰਮੇਵਾਰੀ ਨਿਭਾ ਰਹੇ ਹਨ ਅਤੇ ਪੂਰਾ ਦੇਸ਼ ਉਨ੍ਹਾਂ ਦੀ ਕੁਰਬਾਨੀ ‘ਤੇ ਮਾਣ ਕਰਦਾ ਹੈ।

ਗੱਲਬਾਤ ਸਕਾਰਾਤਮਕ, ਪਰ ਸ਼ਰਤਾਂ ਬਰਕਰਾਰ

‘ਅਲ ਜਜ਼ੀਰਾ’ ਦੀ ਰਿਪੋਰਟ ਮੁਤਾਬਕ, ਸੀਨੀਅਰ ਅਮਰੀਕੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਅਮਰੀਕਾ ਅਤੇ ਇਰਾਨ ਵਿਚਾਲੇ ਹੋਈ ਗੱਲਬਾਤ ਸਕਾਰਾਤਮਕ ਰਹੀ ਹੈ। ਹਾਲਾਂਕਿ, ਅਮਰੀਕਾ ਨੇ ਸਪੱਸ਼ਟ ਕੀਤਾ ਹੈ ਕਿ ਇਰਾਨ ਨਾਲ ਕਿਸੇ ਵੀ ਸਮਝੌਤੇ ਲਈ ਕੁਝ ਸ਼ਰਤਾਂ ਪੂਰੀਆਂ ਹੋਣੀਆਂ ਲਾਜ਼ਮੀ ਹਨ, ਜਿਸ ਵਿੱਚ ਸਭ ਤੋਂ ਪਹਿਲੀ ਸ਼ਰਤ ਇਹ ਹੈ ਕਿ ਇਰਾਨ ਪ੍ਰਮਾਣੂ ਹੱਦਾਂ (Nuclear Limits) ਨੂੰ ਮੰਨੇ ਅਤੇ ਪ੍ਰਮਾਣੂ ਸਮੱਗਰੀ ਨੂੰ ਸੌਂਪੇ।