“ਨਮੋ ਮੈਰਾਥਨ ਵਿੱਚ ਫਰੀਦਾਬਾਦ ਦੀ ਧਰਤੀ ਤੋਂ ਨਸ਼ਿਆਂ ਖਿਲਾਫ਼ ਅੱਜ ਹਰਿਆਣਾ ਦੀ ਬੁਲੰਦ ਆਵਾਜ਼ ਉੱਠੀ ਹੈ” – ਮੁੱਖ ਮੰਤਰੀ ਸ਼੍ਰੀ ਨਾਇਬ ਸਿੰਘ ਸੈਣੀ

21, 10 ਅਤੇ 5 ਕਿਲੋਮੀਟਰ ਦੀ ਦੌੜ ਵਿੱਚ ਦਿਖਿਆ ਅਨੁਸ਼ਾਸਨ, ਉਤਸ਼ਾਹ, ਫਿਟਨੈਸ ਅਤੇ ਸਮਾਜਿਕ ਸਰੋਕਾਰ ਦਾ ਅਦਭੁਤ ਸੰਗਮ

ਚੰਡੀਗੜ੍ਹ, 27 ਸਤੰਬਰ, 2026 (ਸੰਜੀਵ ਸ਼ਰਮਾ) : “ਨਮੋ ਮੈਰਾਥਨ ਵਿੱਚ ਫਰੀਦਾਬਾਦ ਦੀ ਧਰਤੀ ਤੋਂ ਨਸ਼ਿਆਂ ਖਿਲਾਫ਼ ਅੱਜ ਹਰਿਆਣਾ ਦੀ ਬੁਲੰਦ ਆਵਾਜ਼ ਉੱਠੀ ਹੈ।” ਮੁੱਖ ਮੰਤਰੀ ਸ਼੍ਰੀ ਨਾਇਬ ਸਿੰਘ ਸੈਣੀ ਨੇ ਐਤਵਾਰ ਨੂੰ ਸੂਰਜਕੁੰਡ ਦੀ ਇਤਿਹਾਸਕ ਧਰਤੀ ਤੋਂ ‘ਨਸ਼ਾ-ਮੁਕਤ ਹਰਿਆਣਾ ਫਰੀਦਾਬਾਦ ਨਮੋ ਮੈਰਾਥਨ-2026’ ਨੂੰ ਹਰੀ ਝੰਡੀ ਦਿਖਾਉਂਦੇ ਹੋਏ ਇਹ ਗੱਲ ਕਹੀ। ਉਨ੍ਹਾਂ ਨੇ ਕਿਹਾ ਕਿ ਮੈਰਾਥਨ ਵਿੱਚ ਅੱਗੇ ਵੱਧ ਰਹੇ ਇਹ ਕਦਮ ਸਿਰਫ ਸੜਕ ‘ਤੇ ਦੌੜ ਨਹੀਂ ਰਹੇ, ਸਗੋਂ ਨਸ਼ਿਆਂ ਖਿਲਾਫ਼ ਸੂਬੇ ਦੀ ਸਮੂਹਿਕ ਚੇਤਨਾ ਅਤੇ ਸੰਕਲਪ ਨੂੰ ਅੱਗੇ ਲੈ ਕੇ ਜਾ ਰਹੇ ਹਨ। ਫਰੀਦਾਬਾਦ ਵਿੱਚ ਆਯੋਜਿਤ ਇਸ ਮੈਰਾਥਨ ਵਿੱਚ 1 ਲੱਖ 35 ਹਜ਼ਾਰ ਤੋਂ ਵੱਧ ਲੋਕਾਂ ਨੇ ਰਜਿਸਟ੍ਰੇਸ਼ਨ ਕਰਵਾਈ ਅਤੇ ਲਗਭਗ ਸਾਰੇ ਰਜਿਸਟਰਡ ਭਾਗੀਦਾਰ ਮੈਰਾਥਨ ਵਿੱਚ ਹਿੱਸਾ ਲੈਣ ਲਈ ਪਹੁੰਚੇ। ਇੰਨੀ ਵੱਡੀ ਗਿਣਤੀ ਵਿੱਚ ਲੋਕਾਂ ਦੀ ਭਾਗੀਦਾਰੀ ਨੇ ਸੂਰਜਕੁੰਡ ਨੂੰ ਨਸ਼ਾਮੁਕਤੀ ਦੇ ਸਮੂਹਿਕ ਸੰਕਲਪ ਦੀ ਵਿਰਾਟ ਤਸਵੀਰ ਵਿੱਚ ਬਦਲ ਦਿੱਤਾ। ਸਵੇਰ ਤੋਂ ਹੀ ਆਯੋਜਨ ਸਥਾਨ ‘ਤੇ ਨੌਜਵਾਨਾਂ, ਮਹਿਲਾਵਾਂ, ਬਜ਼ੁਰਗਾਂ, ਖਿਡਾਰੀਆਂ, ਵਿਦਿਆਰਥੀਆਂ ਅਤੇ ਸਮਾਜ ਦੇ ਵੱਖ-ਵੱਖ ਵਰਗਾਂ ਦੇ ਲੋਕਾਂ ਦਾ ਉਤਸ਼ਾਹ ਦੇਖਦਿਆਂ ਹੀ ਬਣਦਾ ਸੀ। ਇਹ ਆਯੋਜਨ ਸਿਰਫ ਇੱਕ ਦੌੜ ਤੱਕ ਸੀਮਤ ਨਹੀਂ ਰਿਹਾ, ਸਗੋਂ ਨਸ਼ਾਮੁਕਤੀ, ਫਿਟਨੈਸ, ਸਿਹਤਮੰਦ ਜੀਵਨ ਸ਼ੈਲੀ, ਯੁਵਾ ਸ਼ਕਤੀ, ਸਮਾਜਿਕ ਇੱਕਜੁੱਟਤਾ ਅਤੇ ਰਾਸ਼ਟਰ ਨਿਰਮਾਣ ਦਾ ਵਿਆਪਕ ਜਨ-ਸੰਦੇਸ਼ ਬਣ ਕੇ ਸਾਹਮਣੇ ਆਇਆ। ਵੱਡੀ ਗਿਣਤੀ ਵਿੱਚ ਨੌਜਵਾਨਾਂ ਨੇ ਪੂਰੇ ਜੋਸ਼ ਨਾਲ ਮੈਰਾਥਨ ਵਿੱਚ ਹਿੱਸਾ ਲੈ ਕੇ ਨਸ਼ਿਆਂ ਤੋਂ ਦੂਰ ਰਹਿਣ ਅਤੇ ਆਪਣੀ ਊਰਜਾ ਨੂੰ ਸਕਾਰਾਤਮਕ ਦਿਸ਼ਾ ਵਿੱਚ ਲਗਾਉਣ ਦਾ ਸੰਦੇਸ਼ ਦਿੱਤਾ। ਮਹਿਲਾਵਾਂ ਅਤੇ ਬਜ਼ੁਰਗਾਂ ਦੀ ਸ਼ਲਾਘਾਯੋਗ ਭਾਗੀਦਾਰੀ ਨੇ ਵੀ ਇਹ ਸਪੱਸ਼ਟ ਕੀਤਾ ਕਿ ਨਸ਼ਿਆਂ ਖਿਲਾਫ਼ ਮੁਹਿੰਮ ਕਿਸੇ ਇੱਕ ਵਰਗ ਦੀ ਨਹੀਂ, ਸਗੋਂ ਪੂਰੇ ਸਮਾਜ ਦਾ ਸਾਂਝਾ ਸੰਕਲਪ ਹੈ।

ਦੂਰੀ ਵੱਖ-ਵੱਖ, ਪਰ ਮੰਜ਼ਿਲ ਇੱਕ—

ਨਸ਼ਾਮੁਕਤ ਹਰਿਆਣਾ ਮੈਰਾਥਨ ਵਿੱਚ 21 ਕਿਲੋਮੀਟਰ, 10 ਕਿਲੋਮੀਟਰ ਅਤੇ 5 ਕਿਲੋਮੀਟਰ ਦੀਆਂ ਵੱਖ-ਵੱਖ ਸ਼੍ਰੇਣੀਆਂ ਵਿੱਚ ਭਾਗੀਦਾਰਾਂ ਨੇ ਹਿੱਸਾ ਲਿਆ। ਕਿਸੇ ਦੀ ਦੂਰੀ ਵੱਖਰੀ ਸੀ, ਕਿਸੇ ਦੀ ਗਤੀ ਵੱਖਰੀ ਸੀ ਅਤੇ ਉਮਰ ਵੀ ਵੱਖ-ਵੱਖ ਸੀ, ਪਰ ਸਾਰਿਆਂ ਦੀ ਮੰਜ਼ਿਲ ਇੱਕ ਸੀ—ਨਸ਼ਾਮੁਕਤ ਹਰਿਆਣਾ। ਮੁੱਖ ਮੰਤਰੀ ਸ਼੍ਰੀ ਨਾਇਬ ਸਿੰਘ ਸੈਣੀ ਨੇ ਮੈਰਾਥਨ ਵਿੱਚ ਸ਼ਾਮਲ ਭਾਗੀਦਾਰਾਂ ‘ਤੇ ਫੁੱਲਾਂ ਦੀ ਵਰਖਾ ਕਰਕੇ ਉਨ੍ਹਾਂ ਦਾ ਉਤਸ਼ਾਹ ਵਧਾਇਆ। ਉਨ੍ਹਾਂ ਨੇ ਕਿਹਾ ਕਿ ਹਰਿਆਣਾ ਦੀ ਪਛਾਣ ਪਸੀਨਾ, ਮੈਡਲ ਅਤੇ ਪਰਾਕ੍ਰਮ ਹੈ। ਹਰਿਆਣਾ ਦਾ ਨੌਜਵਾਨ ਨਸ਼ੇ ਨਾਲ ਨਹੀਂ, ਸਗੋਂ ਮਿਹਨਤ, ਪ੍ਰਤਿਭਾ ਅਤੇ ਆਪਣੇ ਟੀਚੇ ਪ੍ਰਤੀ ਸਮਰਪਣ ਨਾਲ ਪਛਾਣਿਆ ਜਾਂਦਾ ਹੈ। ਉਨ੍ਹਾਂ ਨੇ ਨੌਜਵਾਨਾਂ ਨੂੰ ਨਸ਼ਿਆਂ ਨੂੰ ਦ੍ਰਿੜ੍ਹਤਾ ਨਾਲ ‘ਨਾ’ ਕਹਿਣ ਦੀ ਅਪੀਲ ਕੀਤੀ। ਮੁੱਖ ਮੰਤਰੀ ਨੇ ਕਿਹਾ ਕਿ ਨਸ਼ਾ ਸਰੀਰ ਨੂੰ ਕਮਜ਼ੋਰ ਕਰਨ ਦੇ ਨਾਲ-ਨਾਲ ਸੁਪਨਿਆਂ ਨੂੰ ਖੋਹਂਦਾ ਹੈ, ਪਰਿਵਾਰ ਨੂੰ ਪ੍ਰਭਾਵਿਤ ਕਰਦਾ ਹੈ ਅਤੇ ਸਮਾਜ ਨੂੰ ਖੋਖਲਾ ਕਰਦਾ ਹੈ। ਉਨ੍ਹਾਂ ਨੇ ਨੌਜਵਾਨਾਂ ਨੂੰ ਆਪਣੀ ਊਰਜਾ ਅਤੇ ਪ੍ਰਤਿਭਾ ਨੂੰ ਨਸ਼ੇ ਵਿੱਚ ਨਹੀਂ, ਸਗੋਂ ਖੇਡਾਂ, ਸਿੱਖਿਆ, ਹੁਨਰ, ਰੋਜ਼ਗਾਰ, ਨਵਾਚਾਰ ਅਤੇ ਰਾਸ਼ਟਰ ਨਿਰਮਾਣ ਵਿੱਚ ਲਗਾਉਣ ਦੀ ਅਪੀਲ ਕੀਤੀ।

‘ਭਾਰਤ ਮਾਤਾ ਕੀ ਜੈ’ ਦੇ ਜੈਕਾਰਿਆਂ ਨਾਲ ਗੂੰਜਿਆ ਸੂਰਜਕੁੰਡ

ਮੈਰਾਥਨ ਦੌਰਾਨ ਸੂਰਜਕੁੰਡ ਪਰਿਸਰ ਦੇਸ਼ ਭਗਤੀ ਅਤੇ ਸਮਾਜਿਕ ਸੰਕਲਪ ਦੀ ਭਾਵਨਾ ਨਾਲ ਓਤ-ਪ੍ਰੋਤ ਨਜ਼ਰ ਆਇਆ। ‘ਭਾਰਤ ਮਾਤਾ ਕੀ ਜੈ’ ਦੇ ਜੈਕਾਰਿਆਂ ਨਾਲ ਪੂਰਾ ਵਾਤਾਵਰਣ ਗੂੰਜ ਉੱਠਿਆ। ਹਜ਼ਾਰਾਂ-ਲੱਖਾਂ ਕਦਮ ਇੱਕ ਨਾਲ ਅੱਗੇ ਵਧਦੇ ਹੋਏ ਸਿਹਤਮੰਦ ਸਮਾਜ, ਨਸ਼ਾਮੁਕਤ ਯੁਵਾ ਅਤੇ ਸ਼ਕਤੀਸ਼ਾਲੀ ਰਾਸ਼ਟਰ ਦਾ ਸੰਦੇਸ਼ ਦੇ ਰਹੇ ਸਨ। ਮੁੱਖ ਮੰਤਰੀ ਨੇ ਕਿਹਾ ਕਿ ਅੱਜ ਦੀ ਇਹ ਦੌੜ ਸਿਰਫ ਸੜਕ ‘ਤੇ ਅੱਗੇ ਵਧਣ ਦੀ ਦੌੜ ਨਹੀਂ ਹੈ, ਸਗੋਂ ਇਹ ਨਸ਼ਿਆਂ ਖਿਲਾਫ਼ ਸਮਾਜਿਕ ਚੇਤਨਾ ਨੂੰ ਅੱਗੇ ਵਧਾਉਣ ਦੀ ਦੌੜ ਹੈ। ਉਨ੍ਹਾਂ ਨੇ ਹਰੇਕ ਧਾਵਕ, ਖਿਡਾਰੀ, ਵਿਦਿਆਰਥੀ, ਧੀ ਅਤੇ ਵਲੰਟੀਅਰ ਦਾ ਸਵਾਗਤ ਕੀਤਾ।

ਮੁੱਖ ਮੰਤਰੀ ਨੇ ਦਿਵਾਈ ਨਸ਼ਾਮੁਕਤੀ ਦੀ ਸਹੁੰ

ਪ੍ਰੋਗਰਾਮ ਦੌਰਾਨ ਮੁੱਖ ਮੰਤਰੀ ਸ਼੍ਰੀ ਨਾਇਬ ਸਿੰਘ ਸੈਣੀ ਨੇ ਵੱਡੀ ਗਿਣਤੀ ਵਿੱਚ ਮੌਜੂਦ ਭਾਗੀਦਾਰਾਂ ਨੂੰ ਨਸ਼ਿਆਂ ਤੋਂ ਦੂਰ ਰਹਿਣ ਅਤੇ ਨਸ਼ਾਮੁਕਤ ਸਮਾਜ ਦੇ ਨਿਰਮਾਣ ਵਿੱਚ ਆਪਣੀ ਭੂਮਿਕਾ ਨਿਭਾਉਣ ਦੀ ਸਹੁੰ ਦਿਵਾਈ। ਭਾਗੀਦਾਰਾਂ ਨੇ ਸੰਕਲਪ ਲਿਆ ਕਿ ਉਹ ਖੁਦ ਨਸ਼ਿਆਂ ਤੋਂ ਦੂਰ ਰਹਿਣਗੇ ਅਤੇ ਆਪਣੇ ਪਰਿਵਾਰ, ਦੋਸਤਾਂ ਅਤੇ ਸਮਾਜ ਦੇ ਹੋਰ ਲੋਕਾਂ ਨੂੰ ਵੀ ਨਸ਼ਿਆਂ ਤੋਂ ਦੂਰ ਰਹਿਣ ਲਈ ਪ੍ਰੇਰਿਤ ਕਰਨਗੇ। ਇਸ ਸਮੂਹਿਕ ਸਹੁੰ ਨੇ ਨਮੋ ਮੈਰਾਥਨ ਨੂੰ ਮਹਿਜ਼ ਇੱਕ ਖੇਡ ਆਯੋਜਨ ਤੋਂ ਅੱਗੇ ਵਧਾ ਕੇ ਸਮਾਜਿਕ ਪਰਿਵਰਤਨ ਅਤੇ ਜਨ-ਜਾਗਰੂਕਤਾ ਦੇ ਵੱਡੇ ਅਭਿਆਨ ਦਾ ਰੂਪ ਪ੍ਰਦਾਨ ਕੀਤਾ। ਮੁੱਖ ਮੰਤਰੀ ਨੇ ਕਿਹਾ ਕਿ ਨਸ਼ਿਆਂ ਖਿਲਾਫ਼ ਲੜਾਈ ਸਿਰਫ ਸਰਕਾਰ ਜਾਂ ਪੁਲਿਸ ਦੀ ਜ਼ਿੰਮੇਵਾਰੀ ਨਹੀਂ ਹੈ। ਇਹ ਹਰ ਘਰ, ਹਰ ਸਕੂਲ ਅਤੇ ਹਰ ਪਿੰਡ ਦੀ ਸਾਂਝੀ ਲੜਾਈ ਹੈ। ਉਨ੍ਹਾਂ ਨੇ ਮਾਤਾ-ਪਿਤਾ ਅਤੇ ਅਧਿਆਪਕਾਂ ਨੂੰ ਬੱਚਿਆਂ ਨਾਲ ਖੁੱਲ੍ਹ ਕੇ ਗੱਲਬਾਤ ਕਰਨ ਦੀ ਅਪੀਲ ਕੀਤੀ।

ਨੌਜਵਾਨਾਂ ਦੀ ਊਰਜਾ ਨੂੰ ਰਾਸ਼ਟਰ ਨਿਰਮਾਣ ਦੀ ਸ਼ਕਤੀ ਬਣਾਉਣ ਦੀ ਅਪੀਲ

ਮੁੱਖ ਮੰਤਰੀ ਨੇ ਕਿਹਾ ਕਿ ਨੌਜਵਾਨ ਕਿਸੇ ਵੀ ਰਾਸ਼ਟਰ ਦੀ ਸਭ ਤੋਂ ਵੱਡੀ ਤਾਕਤ ਹੁੰਦੇ ਹਨ। ਇਸ ਲਈ ਯੁਵਾ ਸ਼ਕਤੀ ਨੂੰ ਨਸ਼ਿਆਂ ਦੀ ਗ੍ਰਿਫ਼ਤ ਤੋਂ ਬਚਾ ਕੇ ਉਸ ਦੀ ਊਰਜਾ ਨੂੰ ਰਾਸ਼ਟਰ ਨਿਰਮਾਣ ਦੀ ਦਿਸ਼ਾ ਵਿੱਚ ਲਗਾਉਣਾ ਜ਼ਰੂਰੀ ਹੈ। ਉਨ੍ਹਾਂ ਨੇ ਨੌਜਵਾਨਾਂ ਨੂੰ ਖੇਡਾਂ ਨਾਲ ਜੁੜਨ, ਸਿਹਤਮੰਦ ਜੀਵਨ ਸ਼ੈਲੀ ਅਪਣਾਉਣ ਅਤੇ ਆਪਣੇ ਟੀਚਿਆਂ ਨੂੰ ਪ੍ਰਾਪਤ ਕਰਨ ਲਈ ਮਿਹਨਤ ਕਰਨ ਦੀ ਅਪੀਲ ਕੀਤੀ। ਉਨ੍ਹਾਂ ਨੇ ਕਿਹਾ ਕਿ ਹਰਿਆਣਾ ਦੇ ਨੌਜਵਾਨ ਨੇ ਹਮੇਸ਼ਾ ਖੇਡ ਦੇ ਮੈਦਾਨ ਵਿੱਚ ਸੂਬੇ ਅਤੇ ਦੇਸ਼ ਦਾ ਨਾਂ ਰੋਸ਼ਨ ਕੀਤਾ ਹੈ। ਸੂਬੇ ਦੀ ਯੁਵਾ ਸ਼ਕਤੀ ਜੇਕਰ ਨਸ਼ਿਆਂ ਤੋਂ ਦੂਰ ਰਹਿ ਕੇ ਆਪਣੀ ਊਰਜਾ ਸਕਾਰਾਤਮਕ ਕੰਮਾਂ ਵਿੱਚ ਲਗਾਏਗੀ ਤਾਂ ਹਰਿਆਣਾ ਵਿਕਾਸ ਦੀਆਂ ਨਵੀਆਂ ਬੁਲੰਦੀਆਂ ਨੂੰ ਪ੍ਰਾਪਤ ਕਰੇਗਾ।

ਫਿਟਨੈਸ ਅਤੇ ਸਿਹਤਮੰਦ ਜੀਵਨ ਸ਼ੈਲੀ ਦਾ ਵੀ ਦਿੱਤਾ ਸੰਦੇਸ਼

ਫਰੀਦਾਬਾਦ ਨਮੋ ਮੈਰਾਥਨ ਨੇ ਨਸ਼ਾਮੁਕਤੀ ਦੇ ਨਾਲ-ਨਾਲ ਫਿਟਨੈਸ ਅਤੇ ਸਿਹਤਮੰਦ ਜੀਵਨ ਸ਼ੈਲੀ ਦਾ ਵੀ ਪ੍ਰਭਾਵਸ਼ਾਲੀ ਸੰਦੇਸ਼ ਦਿੱਤਾ। ਵੱਖ-ਵੱਖ ਉਮਰ ਵਰਗ ਦੇ ਲੋਕਾਂ ਦੀ ਭਾਗੀਦਾਰੀ ਨੇ ਇਹ ਸਾਬਤ ਕੀਤਾ ਕਿ ਸਿਹਤਮੰਦ ਜੀਵਨ ਲਈ ਉਮਰ ਰੁਕਾਵਟ ਨਹੀਂ ਹੈ। ਨੌਜਵਾਨਾਂ ਦਾ ਜੋਸ਼, ਮਹਿਲਾਵਾਂ ਦਾ ਉਤਸ਼ਾਹ ਅਤੇ ਬਜ਼ੁਰਗਾਂ ਦੀ ਸਰਗਰਮ ਭਾਗੀਦਾਰੀ ਆਯੋਜਨ ਦੀ ਵਿਸ਼ੇਸ਼ ਪਛਾਣ ਬਣੀ। ਮੈਰਾਥਨ ਰਾਹੀਂ ਲੋਕਾਂ ਨੇ ਨਿਯਮਿਤ ਕਸਰਤ, ਸਰੀਰਕ ਸਰਗਰਮੀ ਅਤੇ ਸਕਾਰਾਤਮਕ ਜੀਵਨ ਸ਼ੈਲੀ ਅਪਣਾਉਣ ਦਾ ਸੰਦੇਸ਼ ਦਿੱਤਾ।

ਸੇਵਾ ਸੰਕਲਪ ਅਭਿਆਨ ਨਾਲ ਜੁੜਿਆ ਨਸ਼ਾਮੁਕਤੀ ਦਾ ਸੰਦੇਸ਼

ਮੁੱਖ ਮੰਤਰੀ ਸ਼੍ਰੀ ਨਾਇਬ ਸਿੰਘ ਸੈਣੀ ਨੇ ਕਿਹਾ ਕਿ ਸੰਕਲਪ ਅਤੇ ਸੇਵਾ ਦੀ ਪ੍ਰੇਰਨਾ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਤੋਂ ਮਿਲਦੀ ਹੈ। ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਦੀ ਜਨ-ਸੇਵਾ ਦੇ 25 ਸਾਲ ਪੂਰੇ ਹੋਣ ਦੇ ਮੌਕੇ ਵਿੱਚ 17 ਸਤੰਬਰ ਤੋਂ 17 ਅਕਤੂਬਰ ਤੱਕ ‘ਸੇਵਾ ਸੰਕਲਪ ਅਭਿਆਨ’ ਚਲਾਇਆ ਜਾ ਰਹਾ ਹੈ। ਇਸੇ ਲੜੀ ਵਿੱਚ ‘ਨਸ਼ਾ ਮੁਕਤ ਯੁਵਾ–ਵਿਕਸਿਤ ਭਾਰਤ ਸੰਕਲਪ ਅਭਿਆਨ’ ਦੇ ਸੰਦੇਸ਼ ਨੂੰ ਜਨ-ਜਨ ਤੱਕ ਪਹੁੰਚਾਇਆ ਜਾ ਰਿਹਾ ਹੈ। ਫਰੀਦਾਬਾਦ ਦੀ ਇਹ ਨਮੋ ਮੈਰਾਥਨ ਇਸੇ ਸੇਵਾ, ਸੰਕਲਪ ਅਤੇ ਸਮਾਜਿਕ ਜਾਗਰੂਕਤਾ ਦੀ ਮਜ਼ਬੂਤ ਲੜੀ ਹੈ। ਉਨ੍ਹਾਂ ਨੇ ਕਿਹਾ ਕਿ ‘ਹਰਿਆਣਾ ਉਦੇ’ ਰਾਹੀਂ ਨਸ਼ਾਮੁਕਤੀ ਦਾ ਸੰਦੇਸ਼ ਸੂਬੇ ਦੇ ਹਰ ਜ਼ਿਲ੍ਹੇ ਅਤੇ ਪਿੰਡ ਤੱਕ ਪਹੁੰਚਾਇਆ ਜਾ ਰਿਹਾ ਹੈ। ਜੇਕਰ ਕਿਸੇ ਪਰਿਵਾਰ ਨੂੰ ਨਸ਼ੇ ਨਾਲ ਸਬੰਧਤ ਸਹਾਇਤਾ ਦੀ ਲੋੜ ਹੈ ਤਾਂ ਉਸ ਨੂੰ ਝਿਜਕਣਾ ਨਹੀਂ ਚਾਹੀਦਾ। ਮਦਦ ਮੰਗਣਾ ਕਮਜ਼ੋਰੀ ਨਹੀਂ, ਸਗੋਂ ਹਿੰਮਤ ਦੀ ਨਿਸ਼ਾਨੀ ਹੈ।

1.35 ਲੱਖ ਤੋਂ ਵੱਧ ਲੋਕਾਂ ਦੀ ਭਾਗੀਦਾਰੀ ਨੇ ਰਚਿਆ ਜਨ-ਸੰਕਲਪ ਦਾ ਨਵਾਂ ਅਧਿਆਏ

ਫਰੀਦਾਬਾਦ ਨਮੋ ਮੈਰਾਥਨ ਲਈ 1 ਲੱਖ 35 ਹਜ਼ਾਰ ਤੋਂ ਵੱਧ ਲੋਕਾਂ ਦੀ ਰਜਿਸਟ੍ਰੇਸ਼ਨ ਅਤੇ ਲਗਭਗ ਸਾਰੇ ਰਜਿਸਟਰਡ ਭਾਗੀਦਾਰਾਂ ਦਾ ਆਯੋਜਨ ਸਥਾਨ ‘ਤੇ ਪਹੁੰਚਣਾ ਇਸ ਆਯੋਜਨ ਪ੍ਰਤੀ ਲੋਕਾਂ ਦੇ ਉਤਸ਼ਾਹ ਅਤੇ ਵਿਆਪਕ ਜਨ-ਭਾਗੀਦਾਰੀ ਦਾ ਪ੍ਰਮਾਣ ਬਣਿਆ। ਇੱਕ ਹੀ ਉਦੇਸ਼ ਲਈ ਇੰਨੀ ਵੱਡੀ ਗਿਣਤੀ ਵਿੱਚ ਲੋਕਾਂ ਦਾ ਇੱਕੱਠੇ ਅੱਗੇ ਵਧਣਾ ਆਯੋਜਨ ਦੀ ਸਭ ਤੋਂ ਮਹੱਤਵਪੂਰਨ ਵਿਸ਼ੇਸ਼ਤਾ ਰਹੀ। ਮੈਰਾਥਨ ਵਿੱਚ ਸ਼ਾਮਲ ਹਰੇਕ ਭਾਗੀਦਾਰ ਆਪਣੇ ਨਾਲ ਤਿੰਨ ਸਪੱਸ਼ਟ ਸੰਦੇਸ਼ ਲੈ ਕੇ ਅੱਗੇ ਵਧਿਆ—ਨਸ਼ੇ ਤੋਂ ਦੂਰੀ, ਸਿਹਤ ਨਾਲ ਨੇੜਤਾ ਅਤੇ ਰਾਸ਼ਟਰ ਨਿਰਮਾਣ ਵਿੱਚ ਭਾਗੀਦਾਰੀ। ਇਸ ਆਯੋਜਨ ਨੇ ਖੇਡ, ਫਿਟਨੈਸ, ਸਮਾਜਿਕ ਜਾਗਰੂਕਤਾ ਅਤੇ ਜਨ-ਭਾਗੀਦਾਰੀ ਨੂੰ ਇੱਕ ਮੰਚ ‘ਤੇ ਲਿਆ ਕੇ ਨਸ਼ਾਮੁਕਤੀ ਦੇ ਸੰਦੇਸ਼ ਨੂੰ ਵਿਆਪਕ ਪੱਧਰ ‘ਤੇ ਪਹੁੰਚਾਉਣ ਦਾ ਕੰਮ ਕੀਤਾ।

ਰਾਸ਼ਟਰੀ ਪੱਧਰ ‘ਤੇ ਸ਼ਲਾਘਾਯੋਗ ਜਨ-ਭਾਗੀਦਾਰੀ ਵਾਲਾ ਆਯੋਜਨ ਬਣਿਆ ਫਰੀਦਾਬਾਦ ਨਮੋ ਮੈਰਾਥਨ

ਮੁੱਖ ਮੰਤਰੀ ਸ਼੍ਰੀ ਨਾਇਬ ਸਿੰਘ ਸੈਣੀ ਨੇ ਕਿਹਾ ਕਿ ਫਰੀਦਾਬਾਦ ਨਮੋ ਮੈਰਾਥਨ ਵਿੱਚ ਸਮਾਜ ਦੇ ਹਰੇਕ ਵਰਗ ਦੀ ਜਿਸ ਤਰ੍ਹਾਂ ਭਾਗੀਦਾਰੀ ਰਹੀ, ਉਹ ਆਪਣੇ ਆਪ ਵਿੱਚ ਵਿਸ਼ੇਸ਼ ਹੈ। 1.35 ਲੱਖ ਤੋਂ ਵੱਧ ਰਜਿਸਟ੍ਰੇਸ਼ਨ, ਲਗਭਗ ਪੂਰੀ ਸਹਿਭਾਗਤਾ, ਨੌਜਵਾਨਾਂ ਦੀ ਵੱਡੀ ਮੌਜੂਦਗੀ ਅਤੇ ਮਹਿਲਾਵਾਂ ਤੇ ਬਜ਼ੁਰਗਾਂ ਦੀ ਉਤਸ਼ਾਹਪੂਰਨ ਭਾਗੀਦਾਰੀ ਨੇ ਇਸ ਆਯੋਜਨ ਨੂੰ ਵਿਆਪਕ ਜਨ-ਭਾਗੀਦਾਰੀ ਵਾਲੇ ਸ਼ਲਾਘਾਯੋਗ ਆਯੋਜਨਾਂ ਦੀ ਸ਼੍ਰੇਣੀ ਵਿੱਚ ਸਥਾਪਿਤ ਕੀਤਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਇਹ ਮੈਰਾਥਨ ਕੇਵਲ ਇੱਕ ਦਿਨ ਦਾ ਆਯੋਜਨ ਨਹੀਂ ਹੈ, ਸਗੋਂ ਇਸ ਤੋਂ ਨਿਕਲਿਆ ਸੰਦੇਸ਼ ਆਉਣ ਵਾਲੇ ਸਮੇਂ ਵਿੱਚ ਵੀ ਸਮਾਜ ਨੂੰ ਨਸ਼ਿਆਂ ਤੋਂ ਦੂਰ ਰਹਿਣ, ਸਿਹਤਮੰਦ ਜੀਵਨ ਅਪਣਾਉਣ ਅਤੇ ਰਾਸ਼ਟਰ ਨਿਰਮਾਣ ਵਿੱਚ ਯੋਗਦਾਨ ਪਾਉਣ ਲਈ ਪ੍ਰੇਰਿਤ ਕਰਦਾ ਰਹੇਗਾ।

ਨਸ਼ਾਮੁਕਤ ਹਰਿਆਣਾ ਤੋਂ ਵਿਕਸਿਤ ਭਾਰਤ ਵੱਲ ਵਧਦਾ ਸੰਕਲਪ

ਮੁੱਖ ਮੰਤਰੀ ਨੇ ਕਿਹਾ ਕਿ ਨਸ਼ਾਮੁਕਤ ਹਰਿਆਣਾ ਦਾ ਸੰਕਲਪ ਸਿਰਫ ਨਸ਼ੇ ਨੂੰ ਛੱਡਣ ਤੱਕ ਸੀਮਤ ਨਹੀਂ ਹੈ। ਇਸ ਦਾ ਵਿਆਪਕ ਉਦੇਸ਼ ਨੌਜਵਾਨਾਂ ਨੂੰ ਸਿਹਤਮੰਦ, ਸਿੱਖਿਅਤ, ਸਮਰੱਥ, ਆਤਮਨਿਰਭਰ ਅਤੇ ਜ਼ਿੰਮੇਵਾਰ ਨਾਗਰਿਕ ਬਣਾਉਣਾ ਹੈ। ਜਦੋਂ ਸੂਬੇ ਦਾ ਨੌਜਵਾਨ ਸਿਹਤਮੰਦ ਰਹੇਗਾ ਅਤੇ ਆਪਣੀ ਊਰਜਾ ਰਚਨਾਤਮਕ ਕੰਮਾਂ ਵਿੱਚ ਲਗਾਏਗਾ, ਉਦੋਂ ਹੀ ਵਿਕਸਿਤ ਭਾਰਤ ਦੇ ਟੀਚੇ ਨੂੰ ਮਜ਼ਬੂਤੀ ਮਿਲੇਗੀ। ਉਨ੍ਹਾਂ ਨੇ ਕਿਹਾ ਕਿ ਯੁਵਾ ਸ਼ਕਤੀ ਨੂੰ ਨਸ਼ੇ ਤੋਂ ਬਚਾ ਕੇ ਖੇਡਾਂ, ਸਿੱਖਿਆ, ਹੁਨਰ, ਰੋਜ਼ਗਾਰ ਅਤੇ ਰਾਸ਼ਟਰ ਨਿਰਮਾਣ ਨਾਲ ਜੋੜਨਾ ਸਰਕਾਰ ਅਤੇ ਸਮਾਜ ਦੋਵਾਂ ਦੀ ਪ੍ਰਾਇਮਰੀ ਜ਼ਿੰਮੇਵਾਰੀ ਹੈ। ਮੁੱਖ ਮੰਤਰੀ ਨੇ ਸਮੂਹਿਕ ਸੰਕਲਪ ਦੀ ਅਪੀਲ ਕਰਦੇ ਹੋਏ ਕਿਹਾ— “ਨਾ ਖੁਦ ਨਸ਼ਾ ਕਰਾਂਗੇ, ਨਾ ਕਿਸੇ ਨੂੰ ਕਰਨ ਦਿਆਂਗੇ। ਯੁਵਾ ਸ਼ਕਤੀ ਨੂੰ ਨਸ਼ੇ ਵਿੱਚ ਨਹੀਂ, ਰਾਸ਼ਟਰ ਨਿਰਮਾਣ ਵਿੱਚ ਲਗਾਵਾਂਗੇ। ਨਸ਼ਾਮੁਕਤ ਹਰਿਆਣਾ ਸਾਡਾ ਸੰਕਲਪ ਹੈ, ਸਿਹਤਮੰਦ ਹਰਿਆਣਾ ਸਾਡੀ ਪਛਾਣ ਹੈ ਅਤੇ ਵਿਕਸਿਤ ਭਾਰਤ ਸਾਡਾ ਟੀਚਾ ਹੈ।” ਉਨ੍ਹਾਂ ਨੇ ਕਿਹਾ ਕਿ ਫਰੀਦਾਬਾਦ ਤੋਂ ਉੱਠੀ ਨਸ਼ਾਮੁਕਤੀ ਦੀ ਇਹ ਆਵਾਜ਼ ਹਰਿਆਣਾ ਦੇ ਹਰ ਜ਼ਿਲ੍ਹੇ, ਹਰ ਪਿੰਡ ਅਤੇ ਹਰ ਘਰ ਤੱਕ ਪਹੁੰਚੇ, ਇਹੋ ਇਸ ਆਯੋਜਨ ਦੀ ਅਸਲ ਸਫ਼ਲਤਾ ਹੋਵੇਗੀ।

“ਨਸ਼ਾ ਨਹੀਂ, ਹੁਣ ਸੁਪਨਿਆਂ ਦਾ ਉਜਾਲਾ ਹੋਵੇਗਾ— ਸਾਡਾ ਹਰਿਆਣਾ, ਨਸ਼ਾਮੁਕਤ ਹਰਿਆਣਾ ਹੋਵੇਗਾ।” ਪ੍ਰੋਗਰਾਮ ਵਿੱਚ ਕੇਂਦਰੀ ਮੰਤਰੀ ਸ਼੍ਰੀ ਕ੍ਰਿਸ਼ਨ ਪਾਲ ਗੁੱਜਰ, ਸੂਬੇ ਦੇ ਮਾਲ ਮੰਤਰੀ ਸ਼੍ਰੀ ਵਿਪੁਲ ਗੋਇਲ, ਖੁਰਾਕ ਅਤੇ ਸਪਲਾਈ ਰਾਜ ਮੰਤਰੀ ਸ਼੍ਰੀ ਰਾਜੇਸ਼ ਨਾਗਰ, ਖੇਡ ਮੰਤਰੀ ਸ਼੍ਰੀ ਗੌਰਵ ਗੌਤਮ, ਬੱਲਭਗੜ੍ਹ ਤੋਂ ਵਿਧਾਇਕ ਮੂਲਚੰਦ ਸ਼ਰਮਾ, ਬੜਖਲ ਤੋਂ ਵਿਧਾਇਕ ਧਨੇਸ਼ ਅਧਲਖਾ, ਐਨ.ਆਈ.ਟੀ. ਤੋਂ ਵਿਧਾਇਕ ਸਤੀਸ਼ ਫਾਗਨਾ, ਮੁੱਖ ਮੰਤਰੀ ਦੇ ਮੀਡੀਆ ਸਲਾਹਕਾਰ ਰਾਜੀਵ ਜੇਤਲੀ ਸਮੇਤ ਅਨੇਕ ਪਤਵੰਤੇ ਸੱਜਣ, ਜਨ-ਪ੍ਰਤੀਨਿਧੀ, ਖਿਡਾਰੀ, ਨੌਜਵਾਨ, ਮਹਿਲਾਵਾਂ, ਬਜ਼ੁਰਗ ਅਤੇ ਵੱਡੀ ਗਿਣਤੀ ਵਿੱਚ ਨਾਗਰਿਕ ਮੌਜੂਦ ਰਹੇ।

21.1 ਕਿਲੋਮੀਟਰ ਪੁਰਸ਼ ਵਰਗ ਵਿੱਚ ਪ੍ਰਸ਼ਾਂਤ ਚੌਧਰੀ ਪਹਿਲੇ, ਵਿਕਰਮ ਸਿੰਘ ਪਹਿਲੇ ਰਨਰ-ਅੱਪ

‘ਨਸ਼ਾ-ਮੁਕਤ ਹਰਿਆਣਾ ਫਰੀਦਾਬਾਦ ਨਮੋ ਮੈਰਾਥਨ-2026’ ਦੀਆਂ ਵੱਖ-ਵੱਖ ਮੁਕਾਬਲਿਆਂ ਵਿੱਚ ਭਾਗੀਦਾਰਾਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। 21.1 ਕਿਲੋਮੀਟਰ ਪੁਰਸ਼ ਵਰਗ ਵਿੱਚ ਪ੍ਰਸ਼ਾਂਤ ਚੌਧਰੀ ਜੇਤੂ, ਵਿਕਰਮ ਸਿੰਘ ਪਹਿਲੇ ਰਨਰ-ਅੱਪ ਅਤੇ ਅਨੁਜ ਮੀਣਾ ਨੇ ਦੂਜੇ ਰਨਰ-ਅੱਪ ਸਥਾਨ ਹਾਸਲ ਕੀਤਾ। ਉੱਥੇ ਹੀ 21.1 ਕਿਲੋਮੀਟਰ ਮਹਿਲਾ ਵਰਗ ਵਿੱਚ ਸੋਨਿਕਾ ਜੇਤੂ ਰਹੀ, ਜਦੋਂ ਕਿ ਮਾਨਵ ਰਾਣਾ ਨੇ ਪਹਿਲੇ ਰਨਰ-ਅੱਪ ਅਤੇ ਭੂਮਿਕਾ ਨੇ ਦੂਜੇ ਰਨਰ-ਅੱਪ ਸਥਾਨ ਪ੍ਰਾਪਤ ਕੀਤਾ। 10 ਕਿਲੋਮੀਟਰ ਪੁਰਸ਼ ਵਰਗ ਵਿੱਚ ਰੋਹਿਤ ਕੁਮਾਰ ਜੇਤੂ, ਗੌਰਵ ਪਹਿਲੇ ਰਨਰ-ਅੱਪ ਅਤੇ ਨਿਸ਼ਾਂਤ ਕਰਹਾਨਾ ਦੂਜੇ ਰਨਰ-ਅੱਪ ਰਹੇ। ਇਸੇ ਤਰ੍ਹਾਂ 10 ਕਿਲੋਮੀਟਰ ਮਹਿਲਾ ਵਰਗ ਵਿੱਚ ਨੀਰੂ ਰਾਣੀ ਨੇ ਪਹਿਲਾ ਸਥਾਨ, ਸੋਨੀਆ ਉਪਾਧਿਆਏ ਨੇ ਪਹਿਲੇ ਰਨਰ-ਅੱਪ ਅਤੇ ਰੀਮਾ ਪਟੇਲ ਨੇ ਦੂਜੇ ਰਨਰ-ਅੱਪ ਸਥਾਨ ਹਾਸਲ ਕੀਤਾ।