ਰੋਹਿਤ ਦੇ ਸੈਂਕੜੇ ‘ਤੇ ਸ਼ਾਸਤਰੀ ਦਾ ਧਮਾਕਾ: ਆਲੋਚਕਾਂ ਨੂੰ ਦੱਸਿਆ ‘ਕਰਾਰਾ ਥੱਪੜ’, ਅਸ਼ਵਿਨ ਨੇ ਵੀ ਠੋਕਿਆ ਦਾਅਵਾ

ਸਪੋਰਟਸ, 22 ਜੁਲਾਈ, 2026 (ਜਗਦੇਵ ਰੰਚਨਾ) : ਭਾਰਤੀ ਕ੍ਰਿਕਟ ਟੀਮ ਦੇ ਕਪਤਾਨ ਰੋਹਿਤ ਸ਼ਰਮਾ ਦੇ ਭਵਿੱਖ ਅਤੇ ਸੰਨਿਆਸ ਨੂੰ ਲੈ ਕੇ ਚੱਲ ਰਹੀਆਂ ਅਟਕਲਾਂ ‘ਤੇ ਹੁਣ ਵਿਰਾਮ ਲੱਗ ਗਿਆ ਹੈ। ਲੌਰਡਸ ਵਿਖੇ ਇੰਗਲੈਂਡ ਵਿਰੁੱਧ ਖੇਡੇ ਗਏ ਵਨਡੇ ਮੈਚ ਵਿੱਚ ਰੋਹਿਤ ਸ਼ਰਮਾ ਦੀ 138 ਦੌੜਾਂ ਦੀ ਧਮਾਕੇਦਾਰ ਪਾਰੀ ਨੇ ਨਾ ਸਿਰਫ਼ ਭਾਰਤ ਨੂੰ ਮਜ਼ਬੂਤ ਸਥਿਤੀ ਵਿੱਚ ਪਹੁੰਚਾਇਆ, ਸਗੋਂ ਉਨ੍ਹਾਂ ਦੇ ਆਲੋਚਕਾਂ ਦੇ ਮੂੰਹ ਵੀ ਬੰਦ ਕਰ ਦਿੱਤੇ ਹਨ।

ਲੰਡਨ ਦੇ ਕੀਆ ਓਵਲ ਵਿਖੇ ‘ਦੀ ਹੰਡ੍ਰੇਡ 2026’ ਦੇ ਉਦਘਾਟਨੀ ਮੈਚ ਦੌਰਾਨ ਰੋਹਿਤ ਸ਼ਰਮਾ ਸਟੈਂਡਸ ‘ਚ ਮੌਜੂਦ ਸਨ। ਇਸ ਮੌਕੇ ਭਾਰਤ ਦੇ ਸਾਬਕਾ ਮੁੱਖ ਕੋਚ ਅਤੇ ਦਿੱਗਜ ਕਮੈਂਟੇਟਰ ਰਵੀ ਸ਼ਾਸਤਰੀ ਨੇ ਕਮੈਂਟਰੀ ਬਾਕਸ ਤੋਂ ਬੋਲਦਿਆਂ ਕਿਹਾ, “ਰੋਹਿਤ ਦੀ ਇਹ 138 ਦੌੜਾਂ ਦੀ ਪਾਰੀ ਆਲੋਚਕਾਂ ਦੇ ਮੂੰਹ ‘ਤੇ ਬੱਲੇ ਨਾਲ ਮਾਰਿਆ ਗਿਆ ਇੱਕ ਕਰਾਰਾ ਥੱਪੜ ਹੈ। ਆਖ਼ਰੀ ਵਨਡੇ ਤੋਂ ਪਹਿਲਾਂ ਕਾਫ਼ੀ ਰੌਲਾ ਪਾਇਆ ਜਾ ਰਿਹਾ ਸੀ, ਪਰ ਰੋਹਿਤ ਨੇ ਆਪਣੇ ਸ਼ਾਨਦਾਰ ਸੈਂਕੜੇ ਨਾਲ ਸਭ ਨੂੰ ਚੁੱਪ ਕਰਵਾ ਦਿੱਤਾ ਹੈ।”

ਰੋਹਿਤ ਅਤੇ ਕੋਹਲੀ ਦੀ ਟੀਮ ‘ਚ ਜਗ੍ਹਾ ‘ਤੇ ਅਸ਼ਵਿਨ ਦਾ ਵੱਡਾ ਬਿਆਨ

ਦੂਜੇ ਪਾਸੇ, ਭਾਰਤੀ ਆਫ-ਸਪਿਨਰ ਰਵੀਚੰਦਰਨ ਅਸ਼ਵਿਨ ਨੇ ਆਪਣੇ ਯੂਟਿਊਬ ਚੈਨਲ ‘ਤੇ ਗੱਲਬਾਤ ਕਰਦਿਆਂ ਕਿਹਾ ਕਿ ਚੋਣਕਾਰ ਜਾਂ ਟੀਮ ਪ੍ਰਬੰਧਕ ਰੋਹਿਤ ਸ਼ਰਮਾ ਅਤੇ ਵਿਰਾਟ ਕੋਹਲੀ ਨੂੰ ਟੀਮ ਤੋਂ ਬਾਹਰ ਕਰਨ ਦੀ ਹਿੰਮਤ ਨਹੀਂ ਕਰ ਸਕਦੇ।

ਅਸ਼ਵਿਨ ਅਨੁਸਾਰ, “ਜੇਕਰ ਰੋਹਿਤ ਅਤੇ ਵਿਰਾਟ ਖੇਡਣਾ ਚਾਹੁੰਦੇ ਹਨ, ਤਾਂ ਉਨ੍ਹਾਂ ਨੂੰ ਕੋਈ ਨਹੀਂ ਹਟਾ ਸਕਦਾ। ਰੋਹਿਤ ਨੇ ਵਨਡੇ ਵਿੱਚ ਲਗਭਗ 12,000 ਦੌੜਾਂ ਬਣਾਈਆਂ ਹਨ। ਉਨ੍ਹਾਂ ਲਈ ਹੁਣ ਕੁਝ ਵੀ ਸਾਬਤ ਕਰਨਾ ਬਾਕੀ ਨਹੀਂ ਹੈ। ਰੋਹਿਤ ਕਿਸੇ ਨੂੰ ਜਵਾਬ ਦੇਣ ਲਈ ਨਹੀਂ, ਸਗੋਂ ਅਗਲਾ ਵਨਡੇ ਵਿਸ਼ਵ ਕੱਪ ਖੇਡਣ ਦੀ ਆਪਣੀ ਅੰਦਰੂਨੀ ਇੱਛਾ ਕਾਰਨ ਮੈਦਾਨ ‘ਚ ਉਤਰ ਰਹੇ ਹਨ।”