ਬੈਂਗਲੁਰੂ (ਕਰਨਾਟਕ), 22 ਸਤੰਬਰ, 2026 (ਕਾਜਲ) : ਭਾਰਤ ਦੀ ਪ੍ਰਮੁੱਖ ਡਿਜੀਟਲ ਪੇਮੈਂਟ ਕੰਪਨੀ ‘ਫੋਨਪੇ’ (PhonePe) ਨੇ ਅੰਤਰਰਾਸ਼ਟਰੀ ਪੱਧਰ ‘ਤੇ ਵੱਡੀ ਸਫਲਤਾ ਹਾਸਲ ਕੀਤੀ ਹੈ। ਕੰਪਨੀ ਨੂੰ ਸੰਯੁਕਤ ਅਰਬ ਅਮੀਰਾਤ ਦੇ ਸੈਂਟਰਲ ਬੈਂਕ (CBUAE) ਤੋਂ ਦੋ ਅਹਿਮ ਪੇਮੈਂਟ ਲਾਇਸੈਂਸਾਂ ਲਈ ਸਿਧਾਂਤਕ ਮਨਜ਼ੂਰੀ (In-Principle Approval) ਮਿਲ ਗਈ ਹੈ। ਇਹ ਫੋਨਪੇ ਲਈ ਪਹਿਲੀ ਅੰਤਰਰਾਸ਼ਟਰੀ ਰੈਗੂਲੇਟਰੀ ਪ੍ਰਵਾਨਗੀ ਹੈ, ਜਿਸ ਨਾਲ ਯੂ.ਏ.ਈ. (UAE) ਦੇ ਵਿੱਤੀ ਬਾਜ਼ਾਰ ਵਿੱਚ ਇਸ ਦੇ ਪ੍ਰਵੇਸ਼ ਦਾ ਰਸਤਾ ਸਾਫ਼ ਹੋ ਗਿਆ ਹੈ। ਕੰਪਨੀ ਵੱਲੋਂ ਜਾਰੀ ਪ੍ਰੈੱਸ ਨੋਟ ਅਨੁਸਾਰ, CBUAE ਨੇ ‘ਰਿਟੇਲ ਪੇਮੈਂਟ ਸਰਵਿਸਿਜ਼ ਐਂਡ ਕਾਰਡ ਸਕੀਮਜ਼’ (RPSCS) ਅਤੇ ‘ਸਟੋਰਡ ਵੈਲਿਊ ਫੈਸਿਲਿਟੀਜ਼’ (SVF) ਸ਼੍ਰੇਣੀਆਂ ਅਧੀਨ ਇਹ ਪ੍ਰਵਾਨਗੀਆਂ ਦਿੱਤੀਆਂ ਹਨ।
ਸਥਾਨਕ ਬੈਂਕਾਂ ਨਾਲ ਮਿਲ ਕੇ ਕਰੇਗੀ ਕੰਮ : ਲਾਇਸੈਂਸ ਦੀ ਅੰਤਿਮ ਮਨਜ਼ੂਰੀ ਮਿਲਣ ਤੋਂ ਬਾਅਦ, ਫੋਨਪੇ UAE ਦੀ ‘ਕੈਸ਼ਲੈੱਸ ਇਕਾਨਮੀ’ ਨੂੰ ਉਤਸ਼ਾਹਿਤ ਕਰਨ ਲਈ ਖੇਤਰੀ ਬੈਂਕਾਂ, ਲਾਇਸੈਂਸ ਪ੍ਰਾਪਤ ਭੁਗਤਾਨ ਸੇਵਾ ਪ੍ਰਦਾਤਾਵਾਂ ਅਤੇ ਸਥਾਨਕ ਤਕਨਾਲੋਜੀ ਕੰਪਨੀਆਂ ਨਾਲ ਭਾਈਵਾਲੀ ਕਰੇਗੀ। ਇਸ ਤੋਂ ਇਲਾਵਾ, ਕੰਪਨੀ UAE ਦੇ ਘਰੇਲੂ ਭੁਗਤਾਨ ਪ੍ਰਣਾਲੀਆਂ ਜਿਵੇਂ ਕਿ ‘ਆਨੀ’ (Aani) ਅਤੇ ‘ਜੈਵਾਨ’ (Jaywan) ਨੂੰ ਆਪਣੇ ਪਲੇਟਫਾਰਮ ਰਾਹੀਂ ਸਹਾਇਤਾ ਦੇਣ ਦੀਆਂ ਸੰਭਾਵਨਾਵਾਂ ਵੀ ਤਲਾਸ਼ੇਗੀ। ਫੋਨਪੇ ਦੇ ਇੰਟਰਨੈਸ਼ਨਲ ਪੇਮੈਂਟਸ ਦੇ ਸੀ.ਈ.ਓ. ਅਤੇ ਕਾਰਜਕਾਰੀ ਨਿਰਦੇਸ਼ਕ ਰਿਤੇਸ਼ ਪਾਈ ਨੇ ਕਿਹਾ, “ਅਸੀਂ CBUAE ਤੋਂ ਇਹ ਮਨਜ਼ੂਰੀ ਮਿਲਣ ‘ਤੇ ਮਾਣ ਮਹਿਸੂਸ ਕਰ ਰਹੇ ਹਾਂ। UAE ਦਾ ਦੂਰਅੰਦੇਸ਼ੀ ਦ੍ਰਿਸ਼ਟੀਕੋਣ ਅਤੇ ਰੈਗੂਲੇਟਰੀ ਮਾਹੌਲ ਸਾਡੇ ਅੰਤਰਰਾਸ਼ਟਰੀ ਸਫ਼ਰ ਲਈ ਬਹੁਤ ਢੁਕਵਾਂ ਹੈ।”
ਭਾਰਤੀ ਯਾਤਰੀਆਂ ਨੂੰ ਪਹਿਲਾਂ ਹੀ ਮਿਲ ਰਹੀ ਹੈ ਸੁਵਿਧਾ : ਜ਼ਿਕਰਯੋਗ ਹੈ ਕਿ ਫੋਨਪੇ ਪਹਿਲਾਂ ਹੀ ‘ਐੱਨ.ਪੀ.ਸੀ.ਆਈ. ਇੰਟਰਨੈਸ਼ਨਲ ਪੇਮੈਂਟਸ ਲਿਮਟਿਡ’ (NIPL) ਨਾਲ ਮਿਲ ਕੇ UAE ਵਿੱਚ ਭਾਰਤੀ ਯਾਤਰੀਆਂ ਲਈ ਕ੍ਰਾਸ-ਬਾਰਡਰ ਪੇਮੈਂਟ ਦੀ ਸੁਵਿਧਾ ਦੇ ਰਹੀ ਹੈ, ਜਿਸ ਰਾਹੀਂ ਭਾਰਤੀ ਸੈਲਾਨੀ ‘ਨੇਓਪੇ’ (NEOPAY) ਅਤੇ ‘ਨੈੱਟਵਰਕ ਇੰਟਰਨੈਸ਼ਨਲ’ ਟਰਮੀਨਲਾਂ ‘ਤੇ QR ਕੋਡ ਸਕੈਨ ਕਰਕੇ UPI ਰਾਹੀਂ ਭੁਗਤਾਨ ਕਰ ਸਕਦੇ ਹਨ। ਭਾਰਤ ਵਿੱਚ 70 ਕਰੋੜ ਤੋਂ ਵੱਧ ਰਜਿਸਟਰਡ ਵਰਤੋਂਕਾਰਾਂ ਅਤੇ 5 ਕਰੋੜ ਵਪਾਰੀਆਂ ਵਾਲਾ ਇਹ ਪਲੇਟਫਾਰਮ ਹੁਣ UAE ਵਿੱਚ ਆਪਣੀਆਂ ਸੇਵਾਵਾਂ ਦਾ ਵਿਸਥਾਰ ਕਰਨ ਜਾ ਰਿਹਾ ਹੈ।
