ਨਿਊਯਾਰਕ, 10 ਅਕਤੂਬਰ, 2026 (ਹਰਸ਼ਪ੍ਰੀਤ ਕੌਰ) : ਦੁਨੀਆ ਦੀ ਪ੍ਰਮੁੱਖ ਸਟ੍ਰੀਮਿੰਗ ਕੰਪਨੀ Netflix ਆਪਣੇ ਲਗਭਗ 5 ਫ਼ੀਸਦੀ ਕਰਮਚਾਰੀਆਂ ਦੀ ਛਾਂਟੀ ਕਰਨ ਦੀ ਤਿਆਰੀ ਕਰ ਰਹੀ ਹੈ। Puck News ਦੀ ਰਿਪੋਰਟ ਮੁਤਾਬਕ, ਕੰਪਨੀ ਅਗਲੇ ਹਫ਼ਤੇ ਇਸ ਬਾਰੇ ਐਲਾਨ ਕਰ ਸਕਦੀ ਹੈ। ਇਸ ਦਾ ਮੁੱਖ ਕਾਰਨ ਵਿਕਾਸ ਦਰ ਵਿੱਚ ਸੁਸਤੀ ਅਤੇ ਖਰਚਿਆਂ ਨੂੰ ਕੰਟਰੋਲ ਕਰਨਾ ਦੱਸਿਆ ਗਿਆ ਹੈ। Netflix ਵਿੱਚ ਦੁਨੀਆ ਭਰ ਵਿੱਚ ਲਗਭਗ 17,000 ਕਰਮਚਾਰੀ ਹਨ, ਜਿਸ ਦੇ ਆਧਾਰ ’ਤੇ ਕਰੀਬ 850 ਨੌਕਰੀਆਂ ਪ੍ਰਭਾਵਿਤ ਹੋ ਸਕਦੀਆਂ ਹਨ। ਹਾਲਾਂਕਿ, ਕੰਪਨੀ ਦੀ ਸਾਲਾਨਾ ਰਿਪੋਰਟ ਮੁਤਾਬਕ 2025 ਦੇ ਅੰਤ ਵਿੱਚ ਇਸ ਦੇ 16,000 ਪੂਰਨ-ਕਾਲੀ ਕਰਮਚਾਰੀ ਸਨ, ਜਿਸ ਨਾਲ ਛਾਂਟੀ ਦਾ ਅੰਦਾਜ਼ਾ ਲਗਭਗ 800 ਬਣਦਾ ਹੈ। ਅਜੇ ਇਹ ਸਪੱਸ਼ਟ ਨਹੀਂ ਹੈ ਕਿ ਕਿਹੜੇ ਵਿਭਾਗਾਂ ’ਤੇ ਇਸ ਦਾ ਅਸਰ ਪਵੇਗਾ। Netflix ਵੱਲੋਂ ਤੀਜੀ ਤਿਮਾਹੀ ਦੇ ਵਿੱਤੀ ਨਤੀਜੇ 20 ਅਕਤੂਬਰ ਨੂੰ ਜਾਰੀ ਕੀਤੇ ਜਾਣੇ ਹਨ। ਕੰਪਨੀ ਨੇ 2022 ਵਿੱਚ ਗਾਹਕਾਂ ਦੀ ਗਿਣਤੀ ਵਿੱਚ ਵੱਡੀ ਗਿਰਾਵਟ ਤੋਂ ਬਾਅਦ ਵੀ ਛਾਂਟੀ ਕੀਤੀ ਸੀ। ਉਸ ਸਾਲ ਮਈ ਵਿੱਚ ਲਗਭਗ 150 ਅਤੇ ਜੂਨ ਵਿੱਚ 300 ਕਰਮਚਾਰੀਆਂ ਦੀਆਂ ਨੌਕਰੀਆਂ ਖ਼ਤਮ ਕੀਤੀਆਂ ਗਈਆਂ ਸਨ। ਵੱਖ-ਵੱਖ ਵਿਭਾਗਾਂ ਵਿੱਚ ਛੋਟੇ ਪੱਧਰ ’ਤੇ ਕਰਮਚਾਰੀਆਂ ਦੀ ਗਿਣਤੀ ਘਟਾਈ ਜਾਂਦੀ ਰਹੀ ਹੈ।
