ਰਾਸ਼ਟਰੀ ਚਿੱਤਰਕਲਾ ਮੁਕਾਬਲੇ ਵਿੱਚ 5ਵੀਂ ਤੋਂ 10ਵੀਂ ਜਮਾਤ ਤੱਕ ਦੇ ਵਿਦਿਆਰਥੀ ਲੈ ਸਕਦੇ ਹਨ ਭਾਗ, ਸੂਬਾ ਅਤੇ ਰਾਸ਼ਟਰੀ ਪੱਧਰ ’ਤੇ ਦਿੱਤੇ ਜਾਣਗੇ ਨਕਦ ਇਨਾਮ; ਮੁਕਾਬਲੇ ਲਈ 15 ਅਕਤੂਬਰ ਤੱਕ ਜਮ੍ਹਾਂ ਕਰਵਾਈ ਜਾ ਸਕਦੀ ਹੈ ਪੇਂਟਿੰਗ
ਕੁਰੂਕਸ਼ੇਤਰ, 5 ਅਕਤੂਬਰ, 2026 (ਸੰਜੀਵ ਸ਼ਰਮਾ): ਡਿਪਟੀ ਕਮਿਸ਼ਨਰ ਵਿਸ਼ਰਾਮ ਕੁਮਾਰ ਮੀਣਾ ਨੇ ਦੱਸਿਆ ਕਿ ਭਾਰਤ ਸਰਕਾਰ ਦੇ ਬਿਜਲੀ ਮੰਤਰਾਲੇ ਵੱਲੋਂ ‘ਆਪਣੀ ਕਲਪਨਾ ਨਾਲ ਭਵਿੱਖ ਨੂੰ ਰੰਗ ਦਿਓ’ ਦੇ ਸੰਦੇਸ਼ ਨਾਲ ਊਰਜਾ ਸੰਭਾਲ ਵਿਸ਼ੇ ’ਤੇ ਰਾਸ਼ਟਰੀ ਚਿੱਤਰਕਲਾ ਮੁਕਾਬਲਾ-2026 ਕਰਵਾਇਆ ਜਾ ਰਿਹਾ ਹੈ। ਸਕੂਲੀ ਬੱਚਿਆਂ ਵਿੱਚ ਊਰਜਾ ਦੀ ਬੱਚਤ ਪ੍ਰਤੀ ਜਾਗਰੂਕਤਾ ਪੈਦਾ ਕਰਨ ਦੇ ਉਦੇਸ਼ ਨਾਲ ਕਰਵਾਏ ਜਾ ਰਹੇ ਇਸ ਮੁਕਾਬਲੇ ਨੂੰ ਦੋ ਸ਼੍ਰੇਣੀਆਂ ਵਿੱਚ ਵੰਡਿਆ ਗਿਆ ਹੈ। ਇਸ ਵਿੱਚ ਸ਼੍ਰੇਣੀ ‘ਏ’ ਦੇ ਤਹਿਤ 5ਵੀਂ, 6ਵੀਂ ਅਤੇ 7ਵੀਂ ਜਮਾਤ ਦੇ ਵਿਦਿਆਰਥੀ ਅਤੇ ਸ਼੍ਰੇਣੀ ‘ਬੀ’ ਦੇ ਤਹਿਤ 8ਵੀਂ, 9ਵੀਂ ਅਤੇ 10ਵੀਂ ਜਮਾਤ ਦੇ ਵਿਦਿਆਰਥੀ ਭਾਗ ਲੈ ਸਕਦੇ ਹਨ। ਦੋਵਾਂ ਸ਼੍ਰੇਣੀਆਂ ਲਈ ਚਿੱਤਰਕਲਾ ਦੇ ਮੁੱਖ ਵਿਸ਼ੇ ‘ਸਕੂਲ ਅਤੇ ਘਰ ਵਿੱਚ ਊਰਜਾ ਬਚਾਓ’ ਅਤੇ ‘ਊਰਜਾ ਸੰਭਾਲ, ਊਰਜਾ ਸੁਰੱਖਿਆ ਦੀ ਕੁੰਜੀ ਹੈ’ ਨਿਰਧਾਰਤ ਕੀਤੇ ਗਏ ਹਨ।
ਡਿਪਟੀ ਕਮਿਸ਼ਨਰ ਵਿਸ਼ਰਾਮ ਕੁਮਾਰ ਮੀਣਾ ਨੇ ਦੱਸਿਆ ਕਿ ਇਸ ਮੁਕਾਬਲੇ ਤਹਿਤ ਸੂਬਾ/ਕੇਂਦਰ ਸ਼ਾਸਿਤ ਪ੍ਰਦੇਸ਼ ਪੱਧਰ ਅਤੇ ਰਾਸ਼ਟਰੀ ਪੱਧਰ ’ਤੇ ਦੋਵਾਂ ਸ਼੍ਰੇਣੀਆਂ ਦੇ ਜੇਤੂਆਂ ਨੂੰ ਆਕਰਸ਼ਕ ਨਕਦ ਇਨਾਮ ਅਤੇ ਮੈਡਲ ਪ੍ਰਦਾਨ ਕੀਤੇ ਜਾਣਗੇ। ਸੂਬਾ ਪੱਧਰੀ ਮੁਕਾਬਲੇ ਵਿੱਚ ਹਰੇਕ ਸ਼੍ਰੇਣੀ ਦੇ ਪਹਿਲੇ ਇਨਾਮ ਦੇ ਜੇਤੂ ਨੂੰ 50 ਹਜ਼ਾਰ ਰੁਪਏ ਅਤੇ ਸੋਨੇ ਦਾ ਮੈਡਲ, ਦੂਜੇ ਇਨਾਮ ਦੇ ਜੇਤੂ ਨੂੰ 30 ਹਜ਼ਾਰ ਰੁਪਏ ਅਤੇ ਚਾਂਦੀ ਦਾ ਮੈਡਲ, ਤੀਜੇ ਇਨਾਮ ਦੇ ਜੇਤੂ ਨੂੰ 20 ਹਜ਼ਾਰ ਰੁਪਏ ਅਤੇ ਕਾਂਸੀ ਦਾ ਮੈਡਲ ਦਿੱਤਾ ਜਾਵੇਗਾ। ਇਸ ਤੋਂ ਇਲਾਵਾ 10 ਪ੍ਰਸ਼ੰਸਾ ਇਨਾਮਾਂ ਦੇ ਜੇਤੂਆਂ ਨੂੰ 7,500-7,500 ਰੁਪਏ ਦੀ ਰਾਸ਼ੀ ਦਿੱਤੀ ਜਾਵੇਗੀ।
ਰਾਸ਼ਟਰੀ ਪੱਧਰ ਦੇ ਮੁਕਾਬਲੇ ਵਿੱਚ ਪਹਿਲਾ ਸਥਾਨ ਹਾਸਲ ਕਰਨ ਵਾਲੇ ਨੂੰ 1 ਲੱਖ ਰੁਪਏ, ਇੱਕ ਲੈਪਟਾਪ ਅਤੇ ਸੋਨੇ ਦਾ ਮੈਡਲ ਦਿੱਤਾ ਜਾਵੇਗਾ। ਇਸੇ ਤਰ੍ਹਾਂ ਦੂਜੇ ਸਥਾਨ ਲਈ 50 ਹਜ਼ਾਰ ਰੁਪਏ, ਇੱਕ ਲੈਪਟਾਪ ਅਤੇ ਚਾਂਦੀ ਦਾ ਮੈਡਲ, ਜਦਕਿ ਤੀਜੇ ਸਥਾਨ ਲਈ 30 ਹਜ਼ਾਰ ਰੁਪਏ, ਇੱਕ ਲੈਪਟਾਪ ਅਤੇ ਕਾਂਸੀ ਦਾ ਮੈਡਲ ਦਿੱਤਾ ਜਾਵੇਗਾ। ਇਸ ਤੋਂ ਇਲਾਵਾ 10 ਪ੍ਰਸ਼ੰਸਾ ਇਨਾਮਾਂ ਦੇ ਜੇਤੂਆਂ ਨੂੰ 15-15 ਹਜ਼ਾਰ ਰੁਪਏ ਅਤੇ ਇੱਕ-ਇੱਕ ਟੈਬਲੇਟ ਪ੍ਰਦਾਨ ਕੀਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਇਸ ਤੋਂ ਇਲਾਵਾ ਰਾਸ਼ਟਰੀ ਪੱਧਰ ਦੇ ਜੇਤੂਆਂ ਨੂੰ ਭਾਰਤ ਵਿੱਚ ਅਧਿਐਨ ਦੌਰੇ ਦਾ ਮੌਕਾ ਵੀ ਦਿੱਤਾ ਜਾਵੇਗਾ। ਮੁਕਾਬਲੇ ਵਿੱਚ ਭਾਗ ਲੈਣ ਲਈ ਪੇਂਟਿੰਗ ਜਮ੍ਹਾਂ ਕਰਵਾਉਣ ਦੀ ਆਖਰੀ ਮਿਤੀ 15 ਅਕਤੂਬਰ 2026 ਨਿਰਧਾਰਤ ਕੀਤੀ ਗਈ ਹੈ। ਪੰਜਾਬ, ਹਰਿਆਣਾ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਚੰਡੀਗੜ੍ਹ ਦੇ ਵਿਦਿਆਰਥੀ ਆਪਣੀਆਂ ਪੇਂਟਿੰਗਾਂ ਨੋਡਲ ਅਧਿਕਾਰੀ ਦੇ ਪਤੇ ਇੰਜੀ. ਰਾਜੀਵ ਸ਼ਾਹੀ, ਡਾਇਰੈਕਟਰ/ਮਾਨਵ ਸੰਸਾਧਨ ਵਿਕਾਸ-ਕਮ-ਨੋਡਲ ਅਧਿਕਾਰੀ, ਬੀਬੀਐੱਮਬੀ, ਪਲਾਟ ਨੰਬਰ 6-ਬੀ, ਮੱਧ ਮਾਰਗ, ਸੈਕਟਰ 19-ਬੀ, ਚੰਡੀਗੜ੍ਹ-160019 ’ਤੇ ਡਾਕ ਰਾਹੀਂ ਭੇਜ ਸਕਦੇ ਹਨ ਜਾਂ ਖੁਦ ਪਹੁੰਚ ਕੇ ਜਮ੍ਹਾਂ ਕਰਵਾ ਸਕਦੇ ਹਨ।
