ਮੁਜ਼ੱਫਰਪੁਰ, 5 ਸਤੰਬਰ, 2026 (ਅਮਨਦੀਪ ਸਰਾਂ) : ਬਿਹਾਰ ਵਿੱਚ ਸ਼ਰਾਬਬੰਦੀ ਦੇ ਬਾਵਜੂਦ ਤਸਕਰੀ ਦੇ ਨਵੇਂ-ਨਵੇਂ ਤਰੀਕੇ ਸਾਹਮਣੇ ਆ ਰਹੇ ਹਨ। ਮੁਜ਼ੱਫਰਪੁਰ ਵਿੱਚ ਆਬਕਾਰੀ ਵਿਭਾਗ ਨੇ ਇੱਕ ਈ-ਆਟੋ ਤੋਂ 360 ਬੋਤਲਾਂ ਸ਼ਰਾਬ ਬਰਾਮਦ ਕਰਕੇ ਕਥਿਤ ਤਸਕਰੀ ਦੇ ਇੱਕ ਨਵੇਂ ਢੰਗ ਦਾ ਪਰਦਾਫਾਸ਼ ਕੀਤਾ ਹੈ। ਜਾਣਕਾਰੀ ਮੁਤਾਬਕ ਆਬਕਾਰੀ ਵਿਭਾਗ ਨੂੰ ਸੂਚਨਾ ਮਿਲੀ ਸੀ ਕਿ ਇੱਕ ਈ-ਰਿਕਸ਼ਾ ਰਾਹੀਂ ਭੀਖਨਪੁਰ ਇਲਾਕੇ ਵਿੱਚ ਸ਼ਰਾਬ ਦੀ ਖੇਪ ਲਿਜਾਈ ਜਾ ਰਹੀ ਹੈ। ਇਸ ’ਤੇ ਆਬਕਾਰੀ ਇੰਸਪੈਕਟਰ ਪ੍ਰਕਾਸ਼ ਕੁਮਾਰ ਰਾਮ ਨੇ ਸਬ-ਇੰਸਪੈਕਟਰ ਰਾਜਾ ਜਨਮੇਜਯ ਦੀ ਅਗਵਾਈ ਹੇਠ ਟੀਮ ਭੇਜੀ। ਟੀਮ ਨੇ ਸ਼ੱਕੀ ਈ-ਆਟੋ ਨੂੰ ਰੋਕ ਕੇ ਤਲਾਸ਼ੀ ਲਈ ਤਾਂ ਪਿੱਛੇ ਤਿੰਨ ਬੋਰੀਆਂ ਮਿਲੀਆਂ। ਪਹਿਲੀ ਨਜ਼ਰ ਵਿੱਚ ਇਨ੍ਹਾਂ ਵਿੱਚ ਨੋਟਬੁੱਕਾਂ ਦੇ ਬੰਡਲ ਦਿਖਾਈ ਦੇ ਰਹੇ ਸਨ। ਡੂੰਘੀ ਜਾਂਚ ਕਰਨ ’ਤੇ ਪਤਾ ਲੱਗਾ ਕਿ ਕਰੀਬ 18 ਨੋਟਬੁੱਕ ਬੰਡਲਾਂ ਦੇ ਵਿਚਕਾਰੋਂ ਖਾਲੀ ਥਾਂ ਬਣਾਕੇ ਸ਼ਰਾਬ ਦੀਆਂ ਬੋਤਲਾਂ ਲੁਕਾਈਆਂ ਗਈਆਂ ਸਨ। ਅਧਿਕਾਰੀਆਂ ਨੇ ਮੌਕੇ ’ਤੇ ਈ-ਆਟੋ ਕਬਜ਼ੇ ਵਿੱਚ ਲੈ ਲਿਆ ਅਤੇ ਕੁੱਲ 360 ਬੋਤਲਾਂ ਬਰਾਮਦ ਕੀਤੀਆਂ। ਵਾਹਨ ਚਾਲਕ ਦੀ ਪਛਾਣ ਮੁਹੰਮਦ ਸੱਦਾਮ ਅੰਸਾਰੀ ਵਜੋਂ ਹੋਈ, ਜਿਸ ਨੂੰ ਹਿਰਾਸਤ ਵਿੱਚ ਲੈ ਕੇ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਪੁੱਛਗਿੱਛ ਦੌਰਾਨ ਸੱਦਾਮ ਨੇ ਕਥਿਤ ਤੌਰ ’ਤੇ ਦੱਸਿਆ ਕਿ ਇਹ ਖੇਪ ਉਸ ਨੂੰ ਪ੍ਰਿੰਸ ਨਾਮ ਦੇ ਵਿਅਕਤੀ ਨੇ ਦਿੱਤੀ ਸੀ ਅਤੇ ਹਰ ਡਿਲਿਵਰੀ ਲਈ ਉਸ ਨੂੰ 1,000 ਰੁਪਏ ਮਿਲਦੇ ਸਨ। ਉਸ ਨੇ ਆਪਣੇ ਆਪ ਨੂੰ ਇਸ ਨੈੱਟਵਰਕ ਵਿੱਚ ਨਵਾਂ ਦੱਸਦਿਆਂ ਕਿਹਾ ਕਿ ਉਸ ਨੂੰ ਸ਼ਰਾਬ ਦੇ ਸਰੋਤ ਜਾਂ ਅੰਤਿਮ ਖਰੀਦਦਾਰ ਬਾਰੇ ਜਾਣਕਾਰੀ ਨਹੀਂ ਸੀ। ਆਬਕਾਰੀ ਵਿਭਾਗ ਮੁਤਾਬਕ ਤਸਕਰ ਸ਼ਰਾਬ ਨੂੰ ਲੁਕਾ ਕੇ ਲਿਜਾਣ ਲਈ ਲਗਾਤਾਰ ਨਵੇਂ ਤਰੀਕੇ ਅਪਣਾ ਰਹੇ ਹਨ। ਇਸ ਮਾਮਲੇ ਵਿੱਚ ਪਹਿਲਾਂ ਮਿਲੀ ਗੁਪਤ ਸੂਚਨਾ ਕਾਰਨ ਅਧਿਕਾਰੀਆਂ ਨੇ ਬਾਰੀਕੀ ਨਾਲ ਜਾਂਚ ਕੀਤੀ ਅਤੇ ਨੋਟਬੁੱਕਾਂ ਵਿੱਚ ਲੁਕਾਈ ਗਈ ਸ਼ਰਾਬ ਦੀ ਖੇਪ ਫੜ ਲਈ।
