ਮੁੰਬਈ, 28 ਅਕਤੂਬਰ, 2026 (ਚੌਧਰੀ ਪ੍ਰਭਜੀਤ ਸਿੰਘ): ਰਿਲਾਇੰਸ ਇੰਡਸਟਰੀਜ਼ ਦੀ ਹਮਾਇਤ ਪ੍ਰਾਪਤ ਡਿਜੀਟਲ ਸੇਵਾ ਕੰਪਨੀ ਜਿਓ ਪਲੇਟਫਾਰਮਜ਼ ਨੇ ਸ਼ੇਅਰ ਬਾਜ਼ਾਰ ਵਿੱਚ ਸ਼ਾਨਦਾਰ ਸ਼ੁਰੂਆਤ ਕੀਤੀ। ਕੰਪਨੀ ਦੇ ਸ਼ੇਅਰ ਬੁੱਧਵਾਰ ਨੂੰ ਆਪਣੇ ਇਸ਼ੂ ਮੁੱਲ 1,119 ਰੁਪਏ ਦੇ ਮੁਕਾਬਲੇ 21.36 ਫ਼ੀਸਦੀ ਦੇ ਪ੍ਰੀਮੀਅਮ ਨਾਲ 1,358 ਰੁਪਏ ’ਤੇ ਸੂਚੀਬੱਧ ਹੋਏ। ਇਸ ਲਿਸਟਿੰਗ ਨਾਲ ਕੰਪਨੀ ਸ਼ੁਰੂਆਤੀ ਕਾਰੋਬਾਰ ਦੌਰਾਨ ਬਾਜ਼ਾਰ ਪੂੰਜੀਕਰਨ ਦੇ ਹਿਸਾਬ ਨਾਲ ਦੇਸ਼ ਦੀ ਦੂਜੀ ਸਭ ਤੋਂ ਕੀਮਤੀ ਕੰਪਨੀ ਬਣ ਗਈ। ਬੰਬਈ ਸਟਾਕ ਐਕਸਚੇਂਜ (BSE) ਅਤੇ ਨੈਸ਼ਨਲ ਸਟਾਕ ਐਕਸਚੇਂਜ (NSE) ਦੋਵਾਂ ’ਤੇ ਜਿਓ ਪਲੇਟਫਾਰਮਜ਼ ਦੇ ਸ਼ੇਅਰ 1,358 ਰੁਪਏ ’ਤੇ ਖੁੱਲ੍ਹੇ। ਸ਼ੁਰੂਆਤੀ ਕਾਰੋਬਾਰ ਦੌਰਾਨ ਕੰਪਨੀ ਦਾ ਬਾਜ਼ਾਰ ਮੁੱਲ ਲਗਭਗ 12.50 ਲੱਖ ਕਰੋੜ ਰੁਪਏ ਦਰਜ ਕੀਤਾ ਗਿਆ। ਬਾਅਦ ਵਿੱਚ ਬੀਐੱਸਈ ’ਤੇ ਸ਼ੇਅਰ 1,357.45 ਰੁਪਏ ਅਤੇ ਐੱਨਐੱਸਈ ’ਤੇ 1,358.10 ਰੁਪਏ ਦੇ ਪੱਧਰ ’ਤੇ ਕਾਰੋਬਾਰ ਕਰਦੇ ਰਹੇ।
30,213 ਕਰੋੜ ਰੁਪਏ ਦਾ ਸੀ ਆਈਪੀਓ
ਜਿਓ ਪਲੇਟਫਾਰਮਜ਼ ਦਾ 30,213 ਕਰੋੜ ਰੁਪਏ ਦਾ ਸ਼ੁਰੂਆਤੀ ਜਨਤਕ ਨਿਰਗਮ (IPO) ਨਿਵੇਸ਼ਕਾਂ ਵਿੱਚ ਕਾਫ਼ੀ ਚਰਚਾ ਦਾ ਵਿਸ਼ਾ ਰਿਹਾ। ਕੰਪਨੀ ਦੇ ਆਈਪੀਓ ਨੂੰ ਕੁੱਲ ਪੇਸ਼ਕਸ਼ ਦੇ ਮੁਕਾਬਲੇ 22.19 ਗੁਣਾ ਬੋਲੀ ਮਿਲੀ। ਆਮ ਨਿਵੇਸ਼ਕਾਂ ਅਤੇ ਵੱਡੇ ਸੰਸਥਾਗਤ ਨਿਵੇਸ਼ਕਾਂ ਦੀ ਮੰਗ ਨੂੰ ਮਿਲਾ ਕੇ ਕੁੱਲ ਬੋਲੀ ਦਾ ਮੁੱਲ ਸੱਤ ਲੱਖ ਕਰੋੜ ਰੁਪਏ ਤੋਂ ਵੱਧ ਦੱਸਿਆ ਗਿਆ। ਇਸ ਦੌਰਾਨ ਅਰਜ਼ੀਆਂ ਦੀ ਗਿਣਤੀ ਲਗਭਗ 1.39 ਕਰੋੜ ਤੱਕ ਪਹੁੰਚ ਗਈ। ਇਸ ਆਈਪੀਓ ਵਿੱਚ 27 ਕਰੋੜ ਨਵੇਂ ਸ਼ੇਅਰ ਜਾਰੀ ਕੀਤੇ ਗਏ ਸਨ। ਕੰਪਨੀ ਨੇ ਪ੍ਰਤੀ ਸ਼ੇਅਰ 1,065 ਰੁਪਏ ਤੋਂ 1,119 ਰੁਪਏ ਦਾ ਮੁੱਲ ਦਾਇਰਾ ਤੈਅ ਕੀਤਾ ਸੀ। ਆਈਪੀਓ ਖੁੱਲ੍ਹਣ ਤੋਂ ਪਹਿਲਾਂ 19 ਅਕਤੂਬਰ ਨੂੰ ਜਿਓ ਪਲੇਟਫਾਰਮਜ਼ ਨੇ 212 ਐਂਕਰ ਨਿਵੇਸ਼ਕਾਂ ਤੋਂ ਲਗਭਗ 8,110 ਕਰੋੜ ਰੁਪਏ ਇਕੱਠੇ ਕੀਤੇ ਸਨ।
ਪਹਿਲੇ ਦਿਨ ਹੀ ਮਿਲਿਆ ਭਰਵਾਂ ਹੁੰਗਾਰਾ
ਰਿਪੋਰਟ ਮੁਤਾਬਕ, ਆਈਪੀਓ 21 ਅਕਤੂਬਰ ਨੂੰ ਖੁੱਲ੍ਹਿਆ ਅਤੇ 23 ਅਕਤੂਬਰ ਨੂੰ ਬੰਦ ਹੋਇਆ। ਪਹਿਲੇ ਹੀ ਦਿਨ ਲਗਭਗ 100 ਮਿੰਟਾਂ ਵਿੱਚ ਇਸ ਨੂੰ ਪੂਰੀ ਤਰ੍ਹਾਂ ਸਬਸਕ੍ਰਾਈਬ ਕਰ ਲਿਆ ਗਿਆ ਸੀ। ਰਿਲਾਇੰਸ ਇੰਡਸਟਰੀਜ਼ ਦੀ ਜਿਓ ਪਲੇਟਫਾਰਮਜ਼ ਵਿੱਚ 66.4 ਫ਼ੀਸਦੀ ਹਿੱਸੇਦਾਰੀ ਦੱਸੀ ਗਈ ਹੈ। ਉੱਧਰ, ਰਿਲਾਇੰਸ ਇੰਡਸਟਰੀਜ਼ ਲਗਭਗ 16 ਲੱਖ ਕਰੋੜ ਰੁਪਏ ਦੇ ਬਾਜ਼ਾਰ ਮੁੱਲ ਨਾਲ ਦੇਸ਼ ਦੀ ਸਭ ਤੋਂ ਕੀਮਤੀ ਕੰਪਨੀ ਬਣੀ ਹੋਈ ਹੈ। ਜਿਓ ਪਲੇਟਫਾਰਮਜ਼ ਦੀ ਮਜ਼ਬੂਤ ਲਿਸਟਿੰਗ ਨੂੰ ਭਾਰਤੀ ਸ਼ੇਅਰ ਬਾਜ਼ਾਰ ਅਤੇ ਡਿਜੀਟਲ ਖੇਤਰ ਲਈ ਇੱਕ ਮਹੱਤਵਪੂਰਨ ਘਟਨਾ ਵਜੋਂ ਦੇਖਿਆ ਜਾ ਰਿਹਾ ਹੈ।
