ਅੰਮ੍ਰਿਤਸਰ, 28 ਜੁਲਾਈ, 2026 (ਵਿਸ਼ਾਲ ਗੁਪਤਾ): ਅੰਮ੍ਰਿਤਸਰ ਦਾ ਸ਼੍ਰੀ ਗੁਰੂ ਰਾਮਦਾਸ ਜੀ ਅੰਤਰਰਾਸ਼ਟਰੀ ਹਵਾਈ ਅੱਡਾ ਕੇਂਦਰ ਸਰਕਾਰ ਦੇ ਨਵੇਂ ‘ਹੱਬ-ਐਂਡ-ਸਪੋਕ’ (Hub-and-Spoke) ਫਲਾਈਟ ਕਨੈਕਟੀਵਿਟੀ ਮਾਡਲ ਦੀ ਸ਼ੁਰੂਆਤ ਨਾਲ ਉੱਤਰੀ ਭਾਰਤ ਦਾ ਪ੍ਰਮੁੱਖ ਅੰਤਰਰਾਸ਼ਟਰੀ ਏਵੀਏਸ਼ਨ ਹੱਬ ਬਣਨ ਵੱਲ ਵਧ ਗਿਆ ਹੈ। ਕੇਂਦਰੀ ਨਾਗਰਿਕ ਉੱਡਣ ਮੰਤਰੀ ਰਾਮ ਮੋਹਨ ਨਾਇਡੂ ਕਿੰਜਰਾਪੂ ਦੁਆਰਾ ਵਰਚੁਅਲ ਤੌਰ ‘ਤੇ ਉਦਘਾਟਨ ਕੀਤੇ ਗਏ ਇਸ ਮਾਡਲ ਤਹਿਤ ਹੁਣ ਅੰਤਰਰਾਸ਼ਟਰੀ ਯਾਤਰੀ ਦਿੱਲੀ ਰਾਹੀਂ ਜਾਣ ਵਾਲੀਆਂ ਆਪਣੀਆਂ ਕਨੈਕਟਿੰਗ ਫਲਾਈਟਾਂ ਲਈ ਚੈੱਕ-ਇਨ, ਇਮੀਗ੍ਰੇਸ਼ਨ, ਕਸਟਮ ਕਲੀਅਰੈਂਸ ਅਤੇ ਸਾਮਾਨ ਜਮ੍ਹਾਂ (ਬੈਗੇਜ ਡ੍ਰੌਪ) ਕਰਨ ਦੀ ਪ੍ਰਕਿਰਿਆ ਅੰਮ੍ਰਿਤਸਰ ਹਵਾਈ ਅੱਡੇ ‘ਤੇ ਹੀ ਪੂਰੀ ਕਰ ਸਕਣਗੇ, ਜਿਸ ਨਾਲ ਉਨ੍ਹਾਂ ਦਾ ਸਾਮਾਨ ਸਿੱਧਾ ਉਨ੍ਹਾਂ ਦੀ ਅੰਤਿਮ ਅੰਤਰਰਾਸ਼ਟਰੀ ਮੰਜ਼ਿਲ ‘ਤੇ ਹੀ ਮਿਲੇਗਾ ਅਤੇ ਦਿੱਲੀ ਵਿੱਚ ਯਾਤਰੀ ਸਿਰਫ਼ 4 ਘੰਟਿਆਂ ਦੇ ਅੰਦਰ ਆਸਾਨੀ ਨਾਲ ਆਪਣੀ ਅਗਲੀ ਉੱਡਾਣ ਲੈ ਸਕਣਗੇ।
ਕੇਂਦਰੀ ਮੰਤਰੀ ਨਾਇਡੂ ਨੇ ਦੱਸਿਆ ਕਿ ਅੰਮ੍ਰਿਤਸਰ ਅਤੇ ਦਿੱਲੀ ਵਿਚਕਾਰ ਹਰ ਸਾਲ ਲਗਭਗ 3 ਲੱਖ ਅੰਤਰਰਾਸ਼ਟਰੀ ਯਾਤਰੀ ਸਫ਼ਰ ਕਰਦੇ ਹਨ, ਅਤੇ ਇਸ ਪ੍ਰਣਾਲੀ ਨਾਲ ਪੰਜਾਬ, ਜੰਮੂ-ਕਸ਼ਮੀਰ ਅਤੇ ਹਿਮਾਚਲ ਪ੍ਰਦੇਸ਼ ਵਰਗੇ ਰਾਜਾਂ ਨੂੰ ਸਿੱਧਾ ਫ਼ਾਇਦਾ ਹੋਵੇਗਾ, ਨਾਲ ਹੀ ਸੂਬੇ ਦੇ ਸੈਰ-ਸਪਾਟੇ, ਹੋਟਲ ਉਦਯੋਗ, ਕਾਰਗੋ ਅਤੇ ਅਰਥਵਿਵਸਥਾ ਨੂੰ ਵੱਡਾ ਹੁੰਗਾਰਾ ਮਿਲੇਗਾ। ਨਾਗਰਿਕ ਉੱਡਣ ਮੰਤਰਾਲੇ ਦੇ ਸਕੱਤਰ ਸਮੀਰ ਕੁਮਾਰ ਸਿਨਹਾ ਨੇ ਇਸ ਨੂੰ ਇੱਕ ਇਤਿਹਾਸਕ ਦਿਨ ਕਰਾਰ ਦਿੰਦਿਆਂ ਦੱਸਿਆ ਕਿ 25 ਜੂਨ ਨੂੰ ਬਨਾਰਸ ਤੋਂ ਸ਼ੁਰੂ ਕੀਤੀ ਗਈ ਇਸ ਯੋਜਨਾ ਨੂੰ ਹੁਣ ਅੰਮ੍ਰਿਤਸਰ ਵਿੱਚ ਲਾਗੂ ਕੀਤਾ ਗਿਆ ਹੈ, ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਸਰਕਾਰ ਦੀ ਯੋਜਨਾ ਪੂਰੇ ਦੇਸ਼ ਵਿੱਚ 4 ਅਜਿਹੇ ਹੱਬ ਅਤੇ 40 ਸਪੋਕ ਬਣਾ ਕੇ ਯਾਤਰੀਆਂ ਲਈ ਵਿਸ਼ਵ ਪੱਧਰੀ ਹਵਾਈ ਸਫ਼ਰ ਨੂੰ ਸੁਚਾਰੂ ਬਣਾਉਣ ਦੀ ਹੈ।
