ਨਵੇਂ ਕੋਬਾਲਟ-60 ਸਰੋਤ ਦੀ ਸਫਲ ਸਥਾਪਨਾ ਨਾਲ ਸੰਗਰੂਰ ਹਸਪਤਾਲ ਦੀਆਂ ਰੇਡੀਓਥੈਰੇਪੀ ਸੇਵਾਵਾਂ ਕਾਫ਼ੀ ਮਜ਼ਬੂਤ ਹੋਣਗੀਆਂ-ਡਾ. ਆਸ਼ੀਸ਼ ਗੁਲੀਆ
ਸੰਗਰੂਰ, 25 ਜੂਨ 2026 (ਛਤਰਪਾਲ ਸਿੰਘ): ਪੰਜਾਬ ਵਿੱਚ ਕੈਂਸਰ ਇਲਾਜ ਸੇਵਾਵਾਂ ਨੂੰ ਵੱਡਾ ਹੁਲਾਰਾ ਮਿਲਿਆ ਹੈ। ਭਾਰਤ ਸਰਕਾਰ ਦੇ ਪਰਮਾਣੂ ਊਰਜਾ ਵਿਭਾਗ ਅਧੀਨ ਟਾਟਾ ਮੈਮੋਰੀਅਲ ਸੈਂਟਰ ਦੀ ਇਕਾਈ ਹੋਮੀ ਭਾਭਾ ਕੈਂਸਰ ਹਸਪਤਾਲ ਅਤੇ ਖੋਜ ਕੇਂਦਰ (HBCHRC), ਪੰਜਾਬ ਨੇ ਆਪਣੇ ਸੰਗਰੂਰ ਕੇਂਦਰ ਵਿੱਚ ਟੈਲੀਥੈਰੇਪੀ ਮਸ਼ੀਨ ਭਾਭਾਟ੍ਰੋਨ (BH-II) ਵਿੱਚ ਨਵਾਂ ਕੋਬਾਲਟ-60 ਸਰੋਤ ਸਫਲਤਾਪੂਰਵਕ ਸਥਾਪਿਤ ਕਰਕੇ ਰੇਡੀਓਥੈਰੇਪੀ ਸੇਵਾਵਾਂ ਨੂੰ ਅਪਗ੍ਰੇਡ ਕੀਤਾ ਹੈ। ਇਸ ਨਾਲ ਇਲਾਜ ਸਮਰੱਥਾ ਵਿੱਚ ਵਾਧਾ ਹੋਵੇਗਾ, ਸੇਵਾਵਾਂ ਹੋਰ ਪ੍ਰਭਾਵਸ਼ਾਲੀ ਬਣਨਗੀਆਂ ਅਤੇ ਕੈਂਸਰ ਮਰੀਜ਼ਾਂ ਲਈ ਉਡੀਕ ਸਮੇਂ ਵਿੱਚ ਵੱਡੀ ਕਮੀ ਆਵੇਗੀ।
ਨਵੇਂ ਅਪਗ੍ਰੇਡ ਤੋਂ ਬਾਅਦ ਹੁਣ ਇਸ ਮਸ਼ੀਨ ਰਾਹੀਂ ਹਰ ਰੋਜ਼ ਲਗਭਗ 65 ਮਰੀਜ਼ਾਂ ਦਾ ਇਲਾਜ ਕੀਤਾ ਜਾ ਸਕੇਗਾ। ਇਸ ਤੋਂ ਪਹਿਲਾਂ ਇਹ ਮਸ਼ੀਨ ਰੋਜ਼ਾਨਾ ਕੇਵਲ 15 ਤੋਂ 20 ਮਰੀਜ਼ਾਂ ਦਾ ਹੀ ਇਲਾਜ ਕਰ ਸਕਦੀ ਸੀ, ਜਿਸ ਕਾਰਨ ਮਰੀਜ਼ਾਂ ਨੂੰ 6 ਤੋਂ 8 ਹਫ਼ਤਿਆਂ ਤੱਕ ਉਡੀਕ ਕਰਨੀ ਪੈਂਦੀ ਸੀ।
HBCHRC ਪੰਜਾਬ ਦੇ ਡਾਇਰੈਕਟਰ ਡਾ. ਆਸ਼ੀਸ਼ ਗੁਲੀਆ ਨੇ ਕਿਹਾ ਕਿ ਇਹ ਵਿਕਾਸ ਖੇਤਰ ਦੇ ਮਰੀਜ਼ਾਂ ਲਈ ਸਮੇਂ ਸਿਰ ਅਤੇ ਸੌਖੀ ਪਹੁੰਚ ਵਾਲਾ ਕੈਂਸਰ ਇਲਾਜ ਯਕੀਨੀ ਬਣਾਉਣ ਵੱਲ ਇੱਕ ਮਹੱਤਵਪੂਰਨ ਕਦਮ ਹੈ।
ਉਨ੍ਹਾਂ ਕਿਹਾ ਕਿ ਨਵੇਂ ਕੋਬਾਲਟ-60 ਸਰੋਤ ਦੀ ਸਫਲ ਸਥਾਪਨਾ ਨਾਲ ਸੰਗਰੂਰ ਹਸਪਤਾਲ ਦੀਆਂ ਰੇਡੀਓਥੈਰੇਪੀ ਸੇਵਾਵਾਂ ਕਾਫ਼ੀ ਮਜ਼ਬੂਤ ਹੋਣਗੀਆਂ। ਅਪਡੇਟ ਕੀਤੀ ਮਸ਼ੀਨ ਨਾਲ ਇਲਾਜ ਹੋਰ ਤੇਜ਼ ਅਤੇ ਪ੍ਰਭਾਵਸ਼ਾਲੀ ਢੰਗ ਨਾਲ ਦਿੱਤਾ ਜਾ ਸਕੇਗਾ, ਜਦਕਿ ਮਰੀਜ਼ਾਂ ਦੇ ਉਡੀਕ ਸਮੇਂ ਵਿੱਚ ਵੀ ਵੱਡੀ ਕਮੀ ਆਵੇਗੀ। ਉਨ੍ਹਾਂ ਦੱਸਿਆ ਕਿ ਪਹਿਲਾਂ ਜਿੱਥੇ ਮਰੀਜ਼ਾਂ ਨੂੰ 6 ਤੋਂ 8 ਹਫ਼ਤੇ ਉਡੀਕ ਕਰਨੀ ਪੈਂਦੀ ਸੀ, ਹੁਣ ਇਹ ਸਮਾਂ ਘਟ ਕੇ ਲਗਭਗ 4 ਹਫ਼ਤੇ ਰਹਿ ਜਾਵੇਗਾ।
ਡਾ. ਗੁਲੀਆ ਨੇ ਕਿਹਾ ਕਿ ਇਸ ਅਪਗ੍ਰੇਡ ਨਾਲ ਮਰੀਜ਼ਾਂ ਨੂੰ ਦੂਰ-ਦੁਰਾਡੇ ਸ਼ਹਿਰਾਂ ਵਿੱਚ ਜਾਣ ਦੀ ਲੋੜ ਨਹੀਂ ਪਵੇਗੀ ਅਤੇ ਉਹ ਆਪਣੇ ਘਰਾਂ ਦੇ ਨੇੜੇ ਹੀ ਗੁਣਵੱਤਾ ਭਰਪੂਰ ਰੇਡੀਏਸ਼ਨ ਇਲਾਜ ਪ੍ਰਾਪਤ ਕਰ ਸਕਣਗੇ।
ਉਨ੍ਹਾਂ ਦੱਸਿਆ ਕਿ ਇਸ ਸਮੇਂ ਸੰਗਰੂਰ ਕੇਂਦਰ ਵਿੱਚ ਦੋ ਮਸ਼ੀਨਾਂ ਰਾਹੀਂ ਹਰ ਰੋਜ਼ ਲਗਭਗ 100 ਕੈਂਸਰ ਮਰੀਜ਼ਾਂ ਦਾ ਰੇਡੀਏਸ਼ਨ ਇਲਾਜ ਕੀਤਾ ਜਾਂਦਾ ਹੈ। ਅਪਗ੍ਰੇਡ ਕੀਤੀ ਟੈਲੀਥੈਰੇਪੀ ਮਸ਼ੀਨ ਦੇ ਸ਼ਾਮਲ ਹੋਣ ਨਾਲ ਇਹ ਸਮਰੱਥਾ ਵੱਧ ਕੇ 140 ਤੋਂ ਜ਼ਿਆਦਾ ਮਰੀਜ਼ ਪ੍ਰਤੀ ਦਿਨ ਹੋ ਜਾਵੇਗੀ। ਉੱਚ ਡੋਜ਼ ਰੇਟ ਕਾਰਨ ਮਰੀਜ਼ਾਂ ਨੂੰ ਮਸ਼ੀਨ ਉੱਤੇ ਘੱਟ ਸਮਾਂ ਬਿਤਾਉਣਾ ਪਵੇਗਾ, ਜਿਸ ਨਾਲ ਉਨ੍ਹਾਂ ਦਾ ਇਲਾਜੀ ਤਜਰਬਾ ਹੋਰ ਬਿਹਤਰ ਬਣੇਗਾ।
ਉਨ੍ਹਾਂ ਇਹ ਵੀ ਜਾਣਕਾਰੀ ਦਿੱਤੀ ਕਿ ਪਰਮਾਣੂ ਊਰਜਾ ਵਿਭਾਗ ਵੱਲੋਂ BH-II ਮਸ਼ੀਨ ਲਈ ਨਵੇਂ ਸਰੋਤ ਦੀ ਖਰੀਦ, ਆਵਾਜਾਈ ਅਤੇ ਸਥਾਪਨਾ ਲਈ ਕਰੀਬ 1.5 ਕਰੋੜ ਰੁਪਏ ਦੀ ਵਿੱਤੀ ਸਹਾਇਤਾ ਦਿੱਤੀ ਗਈ ਹੈ।
ਜ਼ਿਕਰਯੋਗ ਹੈ ਕਿ ਪੰਜਾਬ ਅਤੇ ਆਸ-ਪਾਸ ਦੇ ਰਾਜਾਂ ਦੇ ਲੋਕਾਂ ਨੂੰ ਵਿਸ਼ਵ ਪੱਧਰੀ ਕੈਂਸਰ ਇਲਾਜ ਸੇਵਾਵਾਂ ਮੁਹੱਈਆ ਕਰਵਾਉਣ ਦੇ ਉਦੇਸ਼ ਨਾਲ ਅਗਸਤ 2022 ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਇਸ ਹਸਪਤਾਲ ਨੂੰ ਰਾਸ਼ਟਰ ਨੂੰ ਸਮਰਪਿਤ ਕੀਤਾ ਗਿਆ ਸੀ। ਟਾਟਾ ਮੈਮੋਰੀਅਲ ਸੈਂਟਰ, ਮੁੰਬਈ ਵੱਲੋਂ ਲਗਭਗ 660 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਾਇਆ ਗਿਆ ਇਹ 300 ਬਿਸਤਰਿਆਂ ਵਾਲਾ ਹਸਪਤਾਲ ਸਰਜਰੀ, ਰੇਡੀਓਥੈਰੇਪੀ, ਕੀਮੋਥੈਰੇਪੀ ਅਤੇ ਬੋਨ ਮੈਰੋ ਟ੍ਰਾਂਸਪਲਾਂਟ ਵਰਗੀਆਂ ਆਧੁਨਿਕ ਸਹੂਲਤਾਂ ਨਾਲ ਲੈਸ ਹੈ। ਸੰਗਰੂਰ ਦਾ 150 ਬਿਸਤਰਿਆਂ ਵਾਲਾ ਹਸਪਤਾਲ ਇਸ ਮੁੱਖ ਕੇਂਦਰ ਦੀ ਸ਼ਾਖਾ ਵਜੋਂ ਮਰੀਜ਼ਾਂ ਦੀ ਸੇਵਾ ਕਰ ਰਿਹਾ ਹੈ।
