ਹਰੇਕ ਪ੍ਰਬੰਧ ਲਈ ਵੱਖਰਾ ਅਧਿਕਾਰੀ ਤਾਇਨਾਤ; ਸਮੁੱਚੇ ਪ੍ਰੋਗਰਾਮ ਦੇ ਤਾਲਮੇਲ ਦੀ ਜ਼ਿੰਮੇਵਾਰੀ ਵਧੀਕ ਡਿਪਟੀ ਕਮਿਸ਼ਨਰ ਪੰਕਜ ਸੇਤੀਆ ਨੂੰ ਸੌਂਪੀ
ਕੁਰੂਕਸ਼ੇਤਰ, 28 ਅਕਤੂਬਰ, 2026 (ਸੰਜੀਵ ਸ਼ਰਮਾ): ਡਿਪਟੀ ਕਮਿਸ਼ਨਰ ਵਿਸ਼ਰਾਮ ਕੁਮਾਰ ਮੀਣਾ ਨੇ ਕਿਹਾ ਕਿ ਭਾਰਤ ਦੀ ਮਾਣਯੋਗ ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ ਦੇ ਪ੍ਰਸਤਾਵਿਤ ਕੁਰੂਕਸ਼ੇਤਰ ਦੌਰੇ ਅਤੇ ਹਰਿਆਣਾ ਦਿਵਸ ਦੇ ਸੂਬਾ ਪੱਧਰੀ ਸਮਾਗਮ ਨੂੰ ਸਫ਼ਲਤਾਪੂਰਵਕ ਨੇਪਰੇ ਚਾੜ੍ਹਨ ਲਈ ਵੱਖ-ਵੱਖ ਪ੍ਰਬੰਧਾਂ ਵਾਸਤੇ ਨੋਡਲ ਅਧਿਕਾਰੀ ਨਿਯੁਕਤ ਕਰ ਦਿੱਤੇ ਗਏ ਹਨ। ਸਾਰੇ ਅਧਿਕਾਰੀਆਂ ਨੂੰ ਆਪਣੀਆਂ ਜ਼ਿੰਮੇਵਾਰੀਆਂ ਸਮੇਂ ਸਿਰ ਅਤੇ ਪੂਰੀ ਨਿਸ਼ਠਾ ਨਾਲ ਨਿਭਾਉਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਸਮੁੱਚੇ ਪ੍ਰੋਗਰਾਮ ਦੇ ਤਾਲਮੇਲ ਦੀ ਜ਼ਿੰਮੇਵਾਰੀ ਵਧੀਕ ਡਿਪਟੀ ਕਮਿਸ਼ਨਰ ਪੰਕਜ ਸੇਤੀਆ ਨੂੰ ਸੌਂਪੀ ਗਈ ਹੈ। ਉਹ ਪੂਰੇ ਪ੍ਰੋਗਰਾਮ ਦੇ ਸੰਚਾਲਨ, ਵੱਖ-ਵੱਖ ਵਿਭਾਗਾਂ ਵਿਚਕਾਰ ਤਾਲਮੇਲ ਅਤੇ ਪ੍ਰੋਟੋਕੋਲ ਦੀ ਨਿਗਰਾਨੀ ਕਰਨਗੇ। ਡਿਪਟੀ ਕਮਿਸ਼ਨਰ ਵਿਸ਼ਰਾਮ ਕੁਮਾਰ ਮੀਣਾ ਨੇ ਦੱਸਿਆ ਕਿ ਸੜਕੀ ਰੂਟ ਦੀ ਜ਼ਿੰਮੇਵਾਰੀ ਪੁਲਿਸ ਸੁਪਰਡੈਂਟ ਚੰਦਰ ਮੋਹਨ ਅਤੇ ਐੱਸਡੀਐੱਮ ਅਮਨ ਕੁਮਾਰ ਸਾਂਝੇ ਤੌਰ ’ਤੇ ਸੰਭਾਲਣਗੇ। ਹੈਲੀਪੈਡ ਦੇ ਪ੍ਰਬੰਧਾਂ ਲਈ ਐੱਸਡੀਐੱਮ ਸ਼ਾਹਬਾਦ ਸ਼ੰਭੂ ਰਾਠੀ ਨੂੰ ਨੋਡਲ ਅਧਿਕਾਰੀ ਨਿਯੁਕਤ ਕੀਤਾ ਗਿਆ ਹੈ। ਮੋਟਰਕੇਡ/ਵੀਆਈਪੀ ਰੂਟ ਅਤੇ ਸ਼ਕਤੀਪੀਠ ਮਾਂ ਭਦਰਕਾਲੀ ਮੰਦਰ ਵਿੱਚ ਹੋਣ ਵਾਲੇ ਪ੍ਰੋਗਰਾਮ ਦੀ ਜ਼ਿੰਮੇਵਾਰੀ ਐੱਸਡੀਐੱਮ ਥਾਨੇਸਰ ਅਮਨ ਕੁਮਾਰ ਨੂੰ ਦਿੱਤੀ ਗਈ ਹੈ। ਕੁਰੂਕਸ਼ੇਤਰ ਯੂਨੀਵਰਸਿਟੀ ਦੇ ਆਡੀਟੋਰੀਅਮ ਦੇ ਪ੍ਰਬੰਧਾਂ ਦੀ ਜ਼ਿੰਮੇਵਾਰੀ ਐੱਸਡੀਐੱਮ ਲਾਡਵਾ ਰਾਜੇਸ਼ ਕੁਮਾਰ ਸੋਨੀ ਨੂੰ ਸੌਂਪੀ ਗਈ ਹੈ। ਆਡੀਟੋਰੀਅਮ ਵਿੱਚ ਲਾਈਨ-ਅੱਪ ਦੇ ਪ੍ਰਬੰਧਾਂ ਲਈ ਨਾਇਬ ਤਹਿਸੀਲਦਾਰ ਰਾਹੁਲ ਨੂੰ ਨਿਯੁਕਤ ਕੀਤਾ ਗਿਆ ਹੈ। ਪ੍ਰਦਰਸ਼ਨੀ ਦੇ ਪ੍ਰਬੰਧਾਂ ਦੀ ਜ਼ਿੰਮੇਵਾਰੀ ਐੱਮਡੀ ਸ਼ੂਗਰ ਮਿੱਲ ਆਦਿੱਤਿਆ ਨੂੰ ਦਿੱਤੀ ਗਈ ਹੈ, ਜਦਕਿ ਸੱਭਿਆਚਾਰਕ ਪ੍ਰੋਗਰਾਮਾਂ ਦੇ ਪ੍ਰਬੰਧ ਡੀਆਈਪੀਆਰਓ ਡਾ. ਨਰਿੰਦਰ ਸਿੰਘ ਦੇਖਣਗੇ।
ਗੁਰੁਕੁਲ ਕੁਰੂਕਸ਼ੇਤਰ ਦੇ ਪ੍ਰੋਗਰਾਮ ਲਈ ਵੀ ਅਧਿਕਾਰੀ ਨਿਯੁਕਤ
ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਗੁਰੁਕੁਲ ਕੁਰੂਕਸ਼ੇਤਰ ਵਿੱਚ ਹੋਣ ਵਾਲੇ ਪ੍ਰੋਗਰਾਮ ਦੌਰਾਨ ਲਾਈਨ-ਅੱਪ ਦੇ ਪ੍ਰਬੰਧਾਂ ਲਈ ਐੱਸਡੀਐੱਮ ਪਿਹੋਵਾ ਡਾ. ਰਾਹੁਲ ਕਨਵਾਰੀਆ ਨੋਡਲ ਅਧਿਕਾਰੀ ਹੋਣਗੇ। ਗ੍ਰੀਨ ਰੂਮ ਅਤੇ ਲਾਇਜ਼ਨ ਦੇ ਪ੍ਰਬੰਧਾਂ ਦੀ ਜ਼ਿੰਮੇਵਾਰੀ ਡੀਆਰਓ ਚੇਤਨਾ ਚੌਧਰੀ ਨੂੰ ਸੌਂਪੀ ਗਈ ਹੈ। ਗੁਰੁਕੁਲ ਵਿੱਚ ਆਮ ਲੋਕਾਂ ਦੇ ਬੈਠਣ ਵਾਲੇ ਖੇਤਰ ਦੇ ਪ੍ਰਬੰਧ ਨਾਇਬ ਤਹਿਸੀਲਦਾਰ ਸਾਗਰ ਮਲ, ਬੀਡੀਪੀਓ ਪਿਹੋਵਾ ਵਿਵੇਕ ਅਤੇ ਬੀਡੀਪੀਓ ਇਸਮਾਈਲਾਬਾਦ ਅੰਕਿਤ ਪੁਨੀਆ ਸਾਂਝੇ ਤੌਰ ’ਤੇ ਸੰਭਾਲਣਗੇ। ਆਵਾਜਾਈ ਅਤੇ ਪਾਰਕਿੰਗ ਦੇ ਪ੍ਰਬੰਧਾਂ ਲਈ ਰੋਡਵੇਜ਼ ਦੇ ਜੀਐੱਮ ਸਮਿੰਦਰ ਸਿੰਘ ਅਤੇ ਨਗਰ ਕੌਂਸਲ ਦੇ ਐਕਸੀਅਨ ਰਵੀ ਓਬਰਾਏ ਨੂੰ ਨੋਡਲ ਅਧਿਕਾਰੀ ਨਿਯੁਕਤ ਕੀਤਾ ਗਿਆ ਹੈ। ਪਾਸ, ਸੱਦਾ-ਪੱਤਰਾਂ ਅਤੇ ਵਾਹਨਾਂ ਦੇ ਪ੍ਰਬੰਧਾਂ ਦੀ ਜ਼ਿੰਮੇਵਾਰੀ ਸਿਟੀ ਮੈਜਿਸਟ੍ਰੇਟ ਆਸ਼ੀਸ਼ ਕੁਮਾਰ ਨੂੰ ਦਿੱਤੀ ਗਈ ਹੈ। ਮੈਡੀਕਲ ਪ੍ਰਬੰਧਾਂ ਲਈ ਸੀਐੱਮਓ ਡਾ. ਸੁਖਬੀਰ ਨੋਡਲ ਅਧਿਕਾਰੀ ਹੋਣਗੇ। ਰਿਹਾਇਸ਼ ਦੇ ਪ੍ਰਬੰਧ ਐੱਸਡੀਐੱਮ ਸ਼ੰਭੂ ਰਾਠੀ ਅਤੇ ਸਿਟੀ ਮੈਜਿਸਟ੍ਰੇਟ ਆਸ਼ੀਸ਼ ਕੁਮਾਰ ਸਾਂਝੇ ਤੌਰ ’ਤੇ ਦੇਖਣਗੇ।
ਰਾਸ਼ਟਰਪਤੀ ਲਗਭਗ ਪੰਜ ਘੰਟੇ ਕੁਰੂਕਸ਼ੇਤਰ ਵਿੱਚ ਰਹਿਣਗੇ
ਡਿਪਟੀ ਕਮਿਸ਼ਨਰ ਵਿਸ਼ਰਾਮ ਕੁਮਾਰ ਮੀਣਾ ਨੇ ਕਿਹਾ ਕਿ ਰਾਸ਼ਟਰਪਤੀ ਦਾ ਕੁਰੂਕਸ਼ੇਤਰ ਦੌਰਾ ਲਗਭਗ ਪੰਜ ਘੰਟਿਆਂ ਦਾ ਹੋਵੇਗਾ। ਇਸ ਦੌਰਾਨ ਉਹ ਕੁਰੂਕਸ਼ੇਤਰ ਯੂਨੀਵਰਸਿਟੀ, ਸ਼ਕਤੀਪੀਠ ਮਾਂ ਭਦਰਕਾਲੀ ਮੰਦਰ ਅਤੇ ਗੁਰੁਕੁਲ ਕੁਰੂਕਸ਼ੇਤਰ ਵਿੱਚ ਹੋਣ ਵਾਲੇ ਸਮਾਗਮਾਂ ਵਿੱਚ ਸ਼ਿਰਕਤ ਕਰਨਗੇ। ਸਾਰੇ ਨੋਡਲ ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤੇ ਗਏ ਹਨ ਕਿ ਉਹ ਆਪਣੇ-ਆਪਣੇ ਕਾਰਜ ਖੇਤਰਾਂ ਵਿੱਚ ਸੁਰੱਖਿਆ, ਸਫ਼ਾਈ, ਪ੍ਰੋਟੋਕੋਲ ਅਤੇ ਲੋਕਾਂ ਨੂੰ ਮਿਲਣ ਵਾਲੀਆਂ ਸਹੂਲਤਾਂ ਦਾ ਵਿਸ਼ੇਸ਼ ਧਿਆਨ ਰੱਖਣ, ਤਾਂ ਜੋ ਨਾਗਰਿਕਾਂ ਨੂੰ ਕਿਸੇ ਕਿਸਮ ਦੀ ਅਸੁਵਿਧਾ ਨਾ ਹੋਵੇ ਅਤੇ ਸਾਰੇ ਸਮਾਗਮ ਮਰਿਆਦਾ ਤੇ ਸੁਚੱਜੇ ਪ੍ਰਬੰਧਾਂ ਨਾਲ ਸੰਪੰਨ ਹੋ ਸਕਣ।
