ਕੁਰੂਕਸ਼ੇਤਰ, 7 ਸਤੰਬਰ (ਸੰਜੀਵ ਸ਼ਰਮਾ): ਭਾਰਤੀ ਰਿਜ਼ਰਵ ਬੈਂਕ (ਆਰਬੀਆਈ) ਚੰਡੀਗੜ੍ਹ ਵੱਲੋਂ ਕੁਰੂਕਸ਼ੇਤਰ ਵਿੱਚ ਸੂਖਮ, ਲਘੂ ਅਤੇ ਦਰਮਿਆਨੇ ਉਦਯੋਗਾਂ (ਐਮਐਸਐਮਈ) ਲਈ ਬੈਂਕਰਾਂ ਦੀ ਵਿੱਤੀ ਸਮਰੱਥਾ ਨਿਰਮਾਣ ਸਬੰਧੀ ਦੋ ਰੋਜ਼ਾ ਰਾਸ਼ਟਰੀ ਮਿਸ਼ਨ (ਐਨਏਐਮਸੀਏਬੀਐਸ) ਵਰਕਸ਼ਾਪ ਦਾ ਆਯੋਜਨ ਕੀਤਾ ਗਿਆ। ਇਸ ਵਰਕਸ਼ਾਪ ਦਾ ਉਦਘਾਟਨ ਭਾਰਤੀ ਰਿਜ਼ਰਵ ਬੈਂਕ ਚੰਡੀਗੜ੍ਹ ਦੇ ਮਹਾਪ੍ਰਬੰਧਕ ਅਤੇ ਅਫ਼ਸਰ-ਇਨ-ਚਾਰਜ ਪੰਕਜ ਸੇਤੀਆ ਨੇ ਕੀਤਾ।
ਆਰਬੀਆਈ ਚੰਡੀਗੜ੍ਹ ਦੇ ਮਹਾਪ੍ਰਬੰਧਕ ਅਤੇ ਅਫ਼ਸਰ-ਇਨ-ਚਾਰਜ ਪੰਕਜ ਸੇਤੀਆ ਨੇ ਕਿਹਾ ਕਿ ਸੂਖਮ, ਲਘੂ ਅਤੇ ਦਰਮਿਆਨੇ ਉਦਯੋਗਾਂ (ਐਮਐਸਐਮਈ) ਦੇ ਵਿਕਾਸ ਅਤੇ ਰੋਜ਼ਗਾਰ ਸਿਰਜਣ ਵਿੱਚ ਬੈਂਕਾਂ ਅਤੇ ਵਿੱਤੀ ਸੰਸਥਾਵਾਂ ਦੀ ਬਹੁਤ ਮਹੱਤਵਪੂਰਨ ਭੂਮਿਕਾ ਹੈ। ਇਹ ਵਰਕਸ਼ਾਪ ਭਾਗੀਦਾਰਾਂ ਲਈ ਵਧੀਆ ਪੱਧਤੀਆਂ, ਨੀਤੀਗਤ ਦਿਸ਼ਾ-ਨਿਰਦੇਸ਼ਾਂ ਅਤੇ ਐਮਐਸਐਮਈ ਵਿੱਤੀਕਰਨ ਦੇ ਨਵੇਂ ਤਰੀਕਿਆਂ ਸਬੰਧੀ ਆਪਣੀ ਜਾਣਕਾਰੀ ਨੂੰ ਅਪਡੇਟ ਕਰਨ ਦਾ ਇੱਕ ਮਹੱਤਵਪੂਰਨ ਮੌਕਾ ਹੈ। ਉਨ੍ਹਾਂ ਨੇ ਬੈਂਕਰਾਂ ਨੂੰ ਅਪੀਲ ਕੀਤੀ ਕਿ ਉਹ ਹੋਰ ਸੰਵੇਦਨਸ਼ੀਲ ਅਤੇ ਉਦਯੋਗ-ਮਿੱਤਰ ਰਵੱਈਆ ਅਪਣਾਉਣ। ਖਾਸ ਤੌਰ ’ਤੇ ਮੌਜੂਦਾ ਵਿਸ਼ਵ ਪੱਧਰੀ ਮਾਹੌਲ ਵਿੱਚ ਸਥਾਨਕ ਨਿਰਮਾਣ ਨੂੰ ਮਜ਼ਬੂਤ ਕਰਨਾ 2047 ਤੱਕ ਵਿਕਸਿਤ ਭਾਰਤ ਦੇ ਟੀਚੇ ਨੂੰ ਹਾਸਲ ਕਰਨ ਲਈ ਬਹੁਤ ਜ਼ਰੂਰੀ ਹੈ।
ਦੋ ਰੋਜ਼ਾ ਪ੍ਰੋਗਰਾਮ ਦੌਰਾਨ ਕਰਵਾਏ ਗਏ ਤਕਨੀਕੀ ਸੈਸ਼ਨਾਂ ਦਾ ਸੰਚਾਲਨ ਆਰਬੀਆਈ, ਸਿਡਬੀ, ਐਮਐਸਐਮਈ ਡੀਐਫਓ ਅਤੇ ਟ੍ਰਾਂਸਯੂਨੀਅਨ ਸਿਬਿਲ ਦੇ ਵਿਸ਼ਾ-ਮਾਹਿਰਾਂ ਅਤੇ ਵਪਾਰਕ ਬੈਂਕਾਂ ਦੇ ਤਜਰਬੇਕਾਰ ਫੈਕਲਟੀ ਮੈਂਬਰਾਂ ਵੱਲੋਂ ਕੀਤਾ ਗਿਆ। ਇਨ੍ਹਾਂ ਸੈਸ਼ਨਾਂ ਵਿੱਚ ਐਮਐਸਐਮਈ ਕਰਜ਼ਾ ਮੁਲਾਂਕਣ, ਜੋਖਮ ਘਟਾਉਣ, ਫਿਨਟੈਕ ਹੱਲਾਂ ਅਤੇ ਰੈਗੂਲੇਟਰੀ ਪੱਧਰ ’ਤੇ ਹੋਏ ਬਦਲਾਵਾਂ ਦੇ ਵਿਹਾਰਕ ਪੱਖਾਂ ’ਤੇ ਵਿਸ਼ੇਸ਼ ਚਾਨਣਾ ਪਾਇਆ ਗਿਆ।
ਬੈਂਕਰਾਂ ਨੇ ਵਰਕਸ਼ਾਪ ਵਿੱਚ ਉਤਸ਼ਾਹ ਨਾਲ ਹਿੱਸਾ ਲਿਆ ਅਤੇ ਇਸ ਪ੍ਰੋਗਰਾਮ ਦੇ ਆਯੋਜਨ ਲਈ ਰਿਜ਼ਰਵ ਬੈਂਕ ਦੀ ਪਹਿਲਕਦਮੀ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਕਿਹਾ ਕਿ ਵਰਕਸ਼ਾਪ ਦੌਰਾਨ ਪ੍ਰਾਪਤ ਗਿਆਨ ਨਾਲ ਉਨ੍ਹਾਂ ਨੂੰ ਵਿਹਾਰਕ ਪੱਧਰ ’ਤੇ ਲਾਭਕਾਰੀ ਐਮਐਸਐਮਈ ਇਕਾਈਆਂ ਨੂੰ ਹੋਰ ਪ੍ਰਭਾਵਸ਼ਾਲੀ ਢੰਗ ਨਾਲ ਸਹਿਯੋਗ ਦੇਣ ਵਿੱਚ ਮਦਦ ਮਿਲੇਗੀ। ਐਨਏਐਮਸੀਏਬੀਐਸ ਵਰਕਸ਼ਾਪ ਨੂੰ ਬੈਂਕਰਾਂ ਨੂੰ ਉਦਯੋਗਪਤੀਪੁਣੇ ਨੂੰ ਉਤਸ਼ਾਹਿਤ ਕਰਨ, ਰਸਮੀ ਵਿੱਤੀ ਸਹੂਲਤਾਂ ਤੱਕ ਪਹੁੰਚ ਵਧਾਉਣ ਅਤੇ ਐਮਐਸਐਮਈ ਖੇਤਰ ਦੇ ਟਿਕਾਊ ਵਿਕਾਸ ਨੂੰ ਗਤੀ ਦੇਣ ਲਈ ਲੋੜੀਂਦੀ ਵਿਹਾਰਕ ਜਾਣਕਾਰੀ ਅਤੇ ਸਾਧਨਾਂ ਨਾਲ ਲੈਸ ਕਰਨ ਦੀ ਇੱਕ ਮਹੱਤਵਪੂਰਨ ਪਹਿਲਕਦਮੀ ਵਜੋਂ ਦੇਖਿਆ ਜਾ ਰਿਹਾ ਹੈ।
ਇਸ ਮੌਕੇ ’ਤੇ ਪੰਜਾਬ ਨੈਸ਼ਨਲ ਬੈਂਕ ਦੇ ਸੀਜੀਐਮ ਆਸ਼ੀਸ਼ ਕੁਮਾਰ ਚਤੁਰਵੇਦੀ, ਸਟੇਟ ਬੈਂਕ ਆਫ਼ ਇੰਡੀਆ ਦੇ ਜੀਐਮ ਬਿਨੋਦ ਕੁਮਾਰ ਸਿਨਹਾ, ਐਚਡੀਐਫਸੀ ਬੈਂਕ ਦੇ ਜ਼ੋਨਲ ਹੈੱਡ ਧੀਰਜ ਸੇਠੀ ਅਤੇ ਹਰਿਆਣਾ ਗ੍ਰਾਮੀਣ ਬੈਂਕ ਦੇ ਜੀਐਮ ਵੇਦ ਪ੍ਰਕਾਸ਼ ਸਮੇਤ ਹਰਿਆਣਾ ਦੇ ਅੰਬਾਲਾ, ਪੰਚਕੂਲਾ, ਕੁਰੂਕਸ਼ੇਤਰ, ਕਰਨਾਲ ਅਤੇ ਯਮੁਨਾਨਗਰ ਜ਼ਿਲ੍ਹਿਆਂ ਦੇ 21 ਵੱਖ-ਵੱਖ ਬੈਂਕਾਂ ਦੇ ਲਗਭਗ 80 ਬੈਂਕਰ ਸ਼ਾਮਲ ਹੋਏ। ਇਹ ਸਾਰੇ ਬੈਂਕਰ ਐਮਐਸਐਮਈ ਇਕਾਈਆਂ ਨੂੰ ਕਰਜ਼ਾ ਮੁਹੱਈਆ ਕਰਵਾਉਣ ਨਾਲ ਸਬੰਧਤ ਕੰਮ ਦੇਖਦੇ ਹਨ।
