ਮਨੋਰੰਜਨ:18 ਜੁਲਾਈ (ਛਤਰਪਾਲ ਸਿੰਘ):ਕ੍ਰਿਸਟੋਫਰ ਨੋਲਨ ਦੀ ਮਹੱਤਵਾਕਾਂਕਸ਼ੀ ਫਿਲਮ ‘ਦਿ ਓਡਿਸੀ’ ਭਾਰਤੀ ਬਾਕਸ ਆਫਿਸ ’ਤੇ ਸ਼ਾਨਦਾਰ ਪ੍ਰਦਰਸ਼ਨ ਕਰ ਰਹੀ ਹੈ। ਫਿਲਮ ਨੇ ਰਿਲੀਜ਼ ਦੇ ਦੂਜੇ ਦਿਨ ਕਮਾਈ ਵਿੱਚ ਵੱਡਾ ਉਛਾਲ ਦਰਜ ਕਰਦਿਆਂ ਲਗਭਗ 25.50 ਕਰੋੜ ਰੁਪਏ (ਗ੍ਰਾਸ) ਦੀ ਕਮਾਈ ਕੀਤੀ, ਜੋ ਪਹਿਲੇ ਦਿਨ ਦੇ ਮੁਕਾਬਲੇ ਕਰੀਬ 30 ਫੀਸਦੀ ਵੱਧ ਹੈ।
ਫਿਲਮ ਦੀ ਦੋ ਦਿਨਾਂ ਦੀ ਕੁੱਲ ਕਮਾਈ ਹੁਣ 45 ਕਰੋੜ ਰੁਪਏ (ਕਰੀਬ 37 ਕਰੋੜ ਨੈੱਟ) ਤੱਕ ਪਹੁੰਚ ਗਈ ਹੈ। ਮੈਟ ਡੇਮਨ, ਟੌਮ ਹਾਲੈਂਡ, ਐਨ ਹੈਥਵੇ ਅਤੇ ਜ਼ੈਂਡਾਇਆ ਵਰਗੇ ਵੱਡੇ ਸਿਤਾਰਿਆਂ ਨਾਲ ਸਜੀ ਇਸ ਫਿਲਮ ਤੋਂ ਪਹਿਲੇ ਵੀਕੈਂਡ ਵਿੱਚ ਭਾਰਤ ਵਿੱਚ ਲਗਭਗ 70 ਕਰੋੜ ਰੁਪਏ ਦੀ ਕਮਾਈ ਦੀ ਉਮੀਦ ਜਤਾਈ ਜਾ ਰਹੀ ਹੈ।
ਫਿਲਮ ਦੀ ਸਫਲਤਾ ਪਿੱਛੇ ਕ੍ਰਿਸਟੋਫਰ ਨੋਲਨ ਦਾ ਨਾਮ, ਦਰਸ਼ਕਾਂ ਦੀ ਸਕਾਰਾਤਮਕ ਪ੍ਰਤੀਕਿਰਿਆ ਅਤੇ ਸ਼ਾਨਦਾਰ ਵਿਜ਼ੂਅਲ ਅਨੁਭਵ ਨੂੰ ਵੱਡਾ ਕਾਰਨ ਮੰਨਿਆ ਜਾ ਰਿਹਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ‘ਦਿ ਓਡਿਸੀ’ ਭਾਰਤ ਵਿੱਚ ਨੋਲਨ ਦੀ ਪਿਛਲੀ ਹਿੱਟ ਫਿਲਮ ‘ਓਪਨਹਾਈਮਰ’ ਦੀ ਕੁੱਲ ਕਮਾਈ ਨੂੰ ਵੀ ਪਿੱਛੇ ਛੱਡ ਸਕਦੀ ਹੈ।
ਬਾਕਸ ਆਫਿਸ ਅੰਕੜਿਆਂ ਮੁਤਾਬਕ, ਫਿਲਮ ਨੇ ਪਹਿਲੇ ਦਿਨ ਲਗਭਗ 19.50 ਕਰੋੜ ਰੁਪਏ ਅਤੇ ਦੂਜੇ ਦਿਨ 25.50 ਕਰੋੜ ਰੁਪਏ ਕਮਾਏ ਹਨ। ਇਸ ਨਾਲ ਫਿਲਮ ਨੇ ਭਾਰਤੀ ਦਰਸ਼ਕਾਂ ਵਿੱਚ ਆਪਣੀ ਮਜ਼ਬੂਤ ਪਕੜ ਦਿਖਾ ਦਿੱਤੀ ਹੈ।
ਵਿਸ਼ਵ ਪੱਧਰ ’ਤੇ ਵੀ ‘ਦਿ ਓਡਿਸੀ’ ਨੂੰ ਦਰਸ਼ਕਾਂ ਅਤੇ ਸਮੀਖਿਆਕਾਰਾਂ ਵੱਲੋਂ ਚੰਗਾ ਹੁੰਗਾਰਾ ਮਿਲ ਰਿਹਾ ਹੈ। ਫਿਲਮ ਦੀ ਵਧਦੀ ਲੋਕਪ੍ਰਿਯਤਾ ਨੂੰ ਦੇਖਦਿਆਂ ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਇਹ ਗਲੋਬਲ ਬਾਕਸ ਆਫਿਸ ’ਤੇ ਵੱਡਾ ਰਿਕਾਰਡ ਕਾਇਮ ਕਰ ਸਕਦੀ ਹੈ।
