ਇੰਟਰਨੈਸ਼ਨਲ ਡੈਸਕ, 15 ਸਤੰਬਰ, 2026 ਸ਼ਹੀਦ-ਏ-ਅਜ਼ਾਨ ਬਿਊਰੋ) : ਕੈਨੇਡਾ ਦੇ ਇਮੀਗ੍ਰੇਸ਼ਨ ਵਿਭਾਗ ਨੇ ਵਿਦੇਸ਼ੀ ਵਿਦਿਆਰਥੀਆਂ ਅਤੇ ਕਾਮਿਆਂ ਨੂੰ ਚੇਤਾਵਨੀ ਦਿੱਤੀ ਹੈ ਕਿ ਸਿਰਫ਼ ਵੈਧ ਵਰਕ ਪਰਮਿਟ ਕਾਫ਼ੀ ਨਹੀਂ; ਪਰਮਿਟ ’ਤੇ ਦਰਜ ਹਰ ਸ਼ਰਤ ਦੀ ਪਾਲਣਾ ਲਾਜ਼ਮੀ ਹੈ। ਮਾਲਕ, ਕੰਮ ਦੀ ਕਿਸਮ ਜਾਂ ਕੰਮ ਵਾਲੀ ਥਾਂ ਬਦਲਣ ਤੋਂ ਪਹਿਲਾਂ ਨਿਯਮਾਂ ਦੀ ਜਾਂਚ ਕਰਨੀ ਜ਼ਰੂਰੀ ਹੈ। ਸਮੇਂ ਸਿਰ ਐਕਸਟੈਂਸ਼ਨ ਅਰਜ਼ੀ ਦੇਣ ਨਾਲ ਫ਼ੈਸਲਾ ਆਉਣ ਤੱਕ ਕੈਨੇਡਾ ਵਿੱਚ ਰਹਿਣ ਦੀ ਸਥਿਤੀ ਬਣੀ ਰਹਿੰਦੀ ਹੈ।
ਕੈਨੇਡਾ ਵਿੱਚ ਸਟੱਡੀ ਪਰਮਿਟ ਧਾਰਕਾਂ ਦੀ ਗਿਣਤੀ 2024 ਦੇ 9.3 ਲੱਖ ਤੋਂ ਘਟ ਕੇ 2025 ਵਿੱਚ ਲਗਭਗ 6.9 ਲੱਖ ਰਹਿ ਗਈ। 2026 ਵਿੱਚ ਵੱਧ ਤੋਂ ਵੱਧ 4.1 ਲੱਖ ਸਟੱਡੀ ਪਰਮਿਟ ਜਾਰੀ ਕਰਨ ਦਾ ਟੀਚਾ ਹੈ। ਵਿਦੇਸ਼ੀ ਕਾਮਿਆਂ ਲਈ ਵੀ ਨਿਯੰਤਰਣ ਵਧਿਆ ਹੈ—2024 ਵਿੱਚ ਲਗਭਗ 3.9 ਲੱਖ ਨਵੇਂ ਵਰਕ ਪਰਮਿਟ ਧਾਰਕਾਂ ਦੇ ਮੁਕਾਬਲੇ 2025 ਵਿੱਚ ਕਰੀਬ 2.1 ਲੱਖ ਰਹੇ ਅਤੇ ਜਨਵਰੀ-ਜੂਨ 2026 ਵਿੱਚ ਲਗਭਗ 98 ਹਜ਼ਾਰ ਰਹੇ।
ਸਰਕਾਰ ਦਾ ਟੀਚਾ 2027 ਦੇ ਅੰਤ ਤੱਕ ਅਸਥਾਈ ਨਿਵਾਸੀਆਂ ਦੀ ਗਿਣਤੀ ਕੁੱਲ ਆਬਾਦੀ ਦੇ 5 ਫ਼ੀਸਦੀ ਤੋਂ ਹੇਠਾਂ ਲਿਆਉਣਾ ਹੈ। ਇਸੇ ਦੌਰਾਨ, 1 ਅਪ੍ਰੈਲ 2026 ਤੋਂ ਯੋਗ ਉੱਚ ਸਿੱਖਿਆ ਸੰਸਥਾਵਾਂ ਦੇ ਵਿਦਿਆਰਥੀਆਂ ਨੂੰ ਕੁਝ ਲਾਜ਼ਮੀ ਸਿਖਲਾਈ/ਇੰਡਸਟਰੀਅਲ ਟ੍ਰੇਨਿੰਗ ਲਈ ਵੱਖਰੇ ਟ੍ਰੇਨਿੰਗ ਵਰਕ ਪਰਮਿਟ ਦੀ ਲੋੜ ਨਹੀਂ ਰਹੇਗੀ। ਕੈਨੇਡਾ ਦੀ ਨੀਤੀ ਦਾ ਸਪੱਸ਼ਟ ਸੰਦੇਸ਼ ਹੈ. ਘੱਟ ਗਿਣਤੀ, ਵਧੇਰੇ ਜਾਂਚ ਅਤੇ ਨਿਯਮਾਂ ਦੀ ਸਖ਼ਤ ਪਾਲਣਾ। ਪੰਜਾਬੀ ਵਿਦਿਆਰਥੀਆਂ ਤੇ ਕਾਮਿਆਂ ਨੂੰ ਨੌਕਰੀ ਜਾਂ ਸਟੇਟਸ ਬਦਲਣ ਤੋਂ ਪਹਿਲਾਂ ਸਰਕਾਰੀ ਇਮੀਗ੍ਰੇਸ਼ਨ ਨਿਯਮਾਂ ਦੀ ਪੁਸ਼ਟੀ ਕਰਨੀ ਚਾਹੀਦੀ ਹੈ।
