ਕੁਮਕੁਮ ਮੋਹੋਡ, ਅੰਕਿਤਾ ਭਕਤ ਅਤੇ ਕੀਰਤੀ ਸ਼ਰਮਾ ਦੀ ਤਿਕੜੀ ਨੇ 5-3 ਨਾਲ ਦਰਜ ਕੀਤੀ ਸ਼ਾਨਦਾਰ ਜਿੱਤ
ਆਇਚੀ-ਨਾਗੋਯਾ [ਜਾਪਾਨ], 2 ਅਕਤੂਬਰ, 2026 (ਹਰਸ਼ਪ੍ਰੀਤ ਕੌਰ): ਏਸ਼ੀਆਈ ਖੇਡਾਂ 2026 ਵਿੱਚ ਭਾਰਤ ਨੇ ਮਹਿਲਾ ਰਿਕਰਵ ਤੀਰਅੰਦਾਜ਼ੀ ਵਿੱਚ ਇਤਿਹਾਸ ਰਚ ਦਿੱਤਾ ਹੈ। ਕੁਮਕੁਮ ਮੋਹੋਡ, ਅੰਕਿਤਾ ਭਕਤ ਅਤੇ ਕੀਰਤੀ ਸ਼ਰਮਾ ਦੀ ਭਾਰਤੀ ਟੀਮ ਨੇ ਸ਼ੁੱਕਰਵਾਰ ਨੂੰ ਸੋਨ ਤਮਗੇ ਦੇ ਮੁਕਾਬਲੇ ਵਿੱਚ ਦੱਖਣੀ ਕੋਰੀਆ ਨੂੰ 5-3 ਨਾਲ ਹਰਾ ਕੇ ਸੋਨ ਤਮਗਾ ਆਪਣੇ ਨਾਮ ਕੀਤਾ। ਇਸ ਜਿੱਤ ਨਾਲ ਭਾਰਤ ਨੇ ਏਸ਼ੀਆਈ ਖੇਡਾਂ ਦੇ ਮਹਿਲਾ ਰਿਕਰਵ ਟੀਮ ਮੁਕਾਬਲੇ ਵਿੱਚ ਆਪਣਾ ਪਹਿਲਾ ਤਮਗਾ ਹਾਸਲ ਕੀਤਾ। ਫਾਈਨਲ ਵਿੱਚ 17 ਸਾਲਾ ਕੁਮਕੁਮ ਮੋਹੋਡ ਨੇ ਦਬਾਅ ਭਰੇ ਪਲਾਂ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਅਹਿਮ 10 ਅੰਕ ਹਾਸਲ ਕੀਤੇ ਅਤੇ ਭਾਰਤ ਦੀ ਜਿੱਤ ਵਿੱਚ ਵੱਡੀ ਭੂਮਿਕਾ ਨਿਭਾਈ। ਦੱਖਣੀ ਕੋਰੀਆ ਦੀ ਟੀਮ ਇਸ ਖੇਡ ਵਿੱਚ ਲੰਬੇ ਸਮੇਂ ਤੋਂ ਮਜ਼ਬੂਤ ਮੰਨੀ ਜਾਂਦੀ ਰਹੀ ਹੈ। ਕੁਆਲੀਫਿਕੇਸ਼ਨ ਦੌਰਾਨ ਦੱਖਣੀ ਕੋਰੀਆ ਦੀਆਂ ਤਿੰਨ ਤੀਰਅੰਦਾਜ਼ ਚੋਟੀ ਦੇ ਚਾਰ ਵਿੱਚ ਸਨ, ਜਦਕਿ ਭਾਰਤ ਦੀਆਂ ਤਿੰਨੋਂ ਖਿਡਾਰਨਾਂ 10ਵੇਂ, 20ਵੇਂ ਅਤੇ 25ਵੇਂ ਸਥਾਨ ’ਤੇ ਰਹੀਆਂ ਸਨ। ਇਸ ਦੇ ਬਾਵਜੂਦ ਭਾਰਤੀ ਟੀਮ ਨੇ ਫਾਈਨਲ ਵਿੱਚ ਦ੍ਰਿੜਤਾ ਨਾਲ ਮੁਕਾਬਲਾ ਕੀਤਾ।
ਪਹਿਲੇ ਦੋ ਸੈੱਟ ਰਹੇ ਬਰਾਬਰ
ਪਹਿਲੇ ਸੈੱਟ ਵਿੱਚ ਦੱਖਣੀ ਕੋਰੀਆ ਨੇ 54 ਅੰਕ ਬਣਾਏ। ਭਾਰਤ ਨੇ ਵੀ 54 ਅੰਕਾਂ ਨਾਲ ਸੈੱਟ ਬਰਾਬਰ ਕਰ ਦਿੱਤਾ। ਅੰਕਿਤਾ ਨੇ 9 ਨਾਲ ਸ਼ੁਰੂਆਤ ਕੀਤੀ, ਕੀਰਤੀ ਨੇ 7 ਅੰਕ ਬਣਾਏ ਅਤੇ ਕੁਮਕੁਮ ਨੇ ਦਬਾਅ ਹੇਠ 10 ਅੰਕ ਹਾਸਲ ਕਰਕੇ ਟੀਮ ਨੂੰ ਬਰਾਬਰੀ ’ਤੇ ਰੱਖਿਆ। ਦੂਜੇ ਸੈੱਟ ਵਿੱਚ ਵੀ ਦੋਵੇਂ ਟੀਮਾਂ ਨੇ 56-56 ਅੰਕ ਬਣਾਏ। ਅੰਕਿਤਾ ਨੇ ਦੋ 10 ਅੰਕ ਲਗਾਏ, ਜਦਕਿ ਕੁਮਕੁਮ ਨੇ ਆਖਰੀ ਤੀਰ ’ਤੇ ਮੁੜ 10 ਅੰਕ ਹਾਸਲ ਕਰਕੇ ਭਾਰਤ ਨੂੰ 2-2 ਦੀ ਬਰਾਬਰੀ ’ਤੇ ਰੱਖਿਆ।
ਤੀਜੇ ਸੈੱਟ ਵਿੱਚ ਭਾਰਤ ਨੇ ਬਣਾਈ ਬੜ੍ਹਤ
ਤੀਜੇ ਸੈੱਟ ਵਿੱਚ ਭਾਰਤ ਨੇ ਮੁਕਾਬਲੇ ਦੀ ਦਿਸ਼ਾ ਬਦਲ ਦਿੱਤੀ। ਕੀਰਤੀ ਨੇ 10 ਅੰਕਾਂ ਨਾਲ ਸ਼ੁਰੂਆਤ ਕੀਤੀ, ਅੰਕਿਤਾ ਨੇ 9 ਅਤੇ ਕੁਮਕੁਮ ਨੇ 9 ਅੰਕ ਹਾਸਲ ਕੀਤੇ। ਦੂਜੀ ਰੋਟੇਸ਼ਨ ਵਿੱਚ ਦੱਖਣੀ ਕੋਰੀਆ ਦੇ ਤਿੰਨੋਂ ਤੀਰਅੰਦਾਜ਼ਾਂ ਨੇ 8-8 ਅੰਕ ਬਣਾਏ। ਭਾਰਤ ਨੇ ਇਸ ਮੌਕੇ ਦਾ ਪੂਰਾ ਲਾਭ ਲੈਂਦਿਆਂ 55-51 ਨਾਲ ਸੈੱਟ ਜਿੱਤਿਆ ਅਤੇ ਸਕੋਰ 4-2 ਕਰ ਦਿੱਤਾ।
ਆਖਰੀ ਸੈੱਟ ਵਿੱਚ ਕੁਮਕੁਮ ਦਾ ਫੈਸਲਾਕੁੰਨ 10
ਸੋਨ ਤਮਗਾ ਹਾਸਲ ਕਰਨ ਲਈ ਆਖਰੀ ਸੈੱਟ ਵਿੱਚ ਭਾਰਤ ਨੂੰ ਦਬਾਅ ਦਾ ਸਾਹਮਣਾ ਕਰਨਾ ਪਿਆ। ਦੱਖਣੀ ਕੋਰੀਆ ਨੇ ਸ਼ੁਰੂਆਤੀ ਰੋਟੇਸ਼ਨ ਵਿੱਚ 28 ਅੰਕ ਬਣਾਕੇ ਦੋ ਅੰਕਾਂ ਦੀ ਬੜ੍ਹਤ ਬਣਾਈ। ਭਾਰਤ ਵੱਲੋਂ ਕੀਰਤੀ ਅਤੇ ਅੰਕਿਤਾ ਨੇ 9-9 ਅੰਕ ਹਾਸਲ ਕੀਤੇ। ਇਸ ਤੋਂ ਬਾਅਦ ਭਾਰਤ ਨੂੰ ਸੈੱਟ ਬਰਾਬਰ ਕਰਨ ਅਤੇ ਸੋਨ ਤਮਗਾ ਪੱਕਾ ਕਰਨ ਲਈ ਕੁਮਕੁਮ ਦੇ 10 ਅੰਕਾਂ ਦੀ ਲੋੜ ਸੀ। 17 ਸਾਲਾ ਤੀਰਅੰਦਾਜ਼ ਨੇ ਇੱਕ ਵਾਰ ਫਿਰ ਦਬਾਅ ਵਿੱਚ ਸ਼ਾਨਦਾਰ ਤੀਰ ਚਲਾਉਂਦਿਆਂ 10 ਅੰਕ ਹਾਸਲ ਕੀਤੇ। ਇਸ ਨਾਲ ਸੈੱਟ 54-54 ਨਾਲ ਬਰਾਬਰ ਰਿਹਾ ਅਤੇ ਭਾਰਤ ਨੇ ਮੁਕਾਬਲਾ 5-3 ਨਾਲ ਆਪਣੇ ਨਾਮ ਕਰ ਲਿਆ। ਇਸ ਤੋਂ ਪਹਿਲਾਂ ਭਾਰਤ ਨੇ ਸੈਮੀਫਾਈਨਲ ਵਿੱਚ ਚੀਨ ਨੂੰ 5-1 ਨਾਲ ਹਰਾਇਆ ਸੀ ਅਤੇ ਫਾਈਨਲ ਵਿੱਚ ਦੱਖਣੀ ਕੋਰੀਆ ਖ਼ਿਲਾਫ਼ ਜਗ੍ਹਾ ਬਣਾਈ ਸੀ।
ਇਹ ਏਸ਼ੀਆਈ ਖੇਡਾਂ 2026 ਵਿੱਚ ਭਾਰਤ ਦਾ 11ਵਾਂ ਸੋਨ ਤਮਗਾ ਹੈ। ਇਸ ਜਿੱਤ ਨਾਲ ਭਾਰਤ ਦੇ ਕੁੱਲ ਤਮਗਿਆਂ ਦੀ ਗਿਣਤੀ 67 ਹੋ ਗਈ, ਜਿਸ ਵਿੱਚ 23 ਚਾਂਦੀ ਅਤੇ 33 ਕਾਂਸੀ ਦੇ ਤਮਗੇ ਸ਼ਾਮਲ ਹਨ। ਭਾਰਤੀ ਰਿਕਰਵ ਤੀਰਅੰਦਾਜ਼ਾਂ ਕੋਲ ਇਸੇ ਦਿਨ ਹੋਰ ਤਮਗੇ ਜਿੱਤਣ ਦੇ ਮੌਕੇ ਵੀ ਹਨ। ਕੁਮਕੁਮ ਅਤੇ ਧੀਰਜ ਬੋਮਾਦੇਵਰਾ ਮਿਕਸਡ ਟੀਮ ਸੈਮੀਫਾਈਨਲ ਵਿੱਚ ਜਾਪਾਨ ਦਾ ਸਾਹਮਣਾ ਕਰਨਗੇ, ਜਦਕਿ ਧੀਰਜ, ਨੀਰਜ ਚੌਹਾਨ ਅਤੇ ਯਸ਼ਦੀਪ ਭੋਗੇ ਪੁਰਸ਼ ਟੀਮ ਸੈਮੀਫਾਈਨਲ ਵਿੱਚ ਇਰਾਨ ਨਾਲ ਭਿੜਨਗੇ। ਮਿਕਸਡ ਰਿਕਰਵ ਟੀਮ ਮੁਕਾਬਲੇ ਵਿੱਚ LA 2028 ਓਲੰਪਿਕ ਲਈ ਕੋਟਾ ਹਾਸਲ ਕਰਨ ਦਾ ਮੌਕਾ ਵੀ ਹੈ। ਇਸ ਮੁਕਾਬਲੇ ਦੀ ਜੇਤੂ ਨੈਸ਼ਨਲ ਓਲੰਪਿਕ ਕਮੇਟੀ ਨੂੰ ਪੁਰਸ਼ ਅਤੇ ਮਹਿਲਾ ਵਰਗ ਵਿੱਚ ਇੱਕ-ਇੱਕ ਓਲੰਪਿਕ ਕੋਟਾ ਮਿਲੇਗਾ।
