ਬੈਕੋਨੂਰ, 15 ਜੁਲਾਈ (ਜਗਦੇਵ ਸਿੰਘ ਜੱਗੀ) : ਨਾਸਾ (NASA) ਦੇ ਪੁਲਾੜ ਯਾਤਰੀ ਅਨਿਲ ਮੈਨਨ ਅਤੇ ਰੂਸੀ ਪੁਲਾੜ ਯਾਤਰੀ ਪਿਓਤਰ ਦੁਬਰੋਵ ਅਤੇ ਅੰਨਾ ਕਿਕੀਨਾ ਕਜ਼ਾਕਿਸਤਾਨ ਦੇ ਬੈਕੋਨੂਰ ਕਾਸਮੋਡਰੋਮ ਤੋਂ ਸਫ਼ਲ ਲਾਂਚਿੰਗ ਤੋਂ ਬਾਅਦ ਸੁਰੱਖਿਅਤ ਢੰਗ ਨਾਲ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ (ISS) ਪਹੁੰਚ ਗਏ ਹਨ। ਇਸ ਕਰੂ (ਟੀਮ) ਨੇ 14 ਜੁਲਾਈ 2026 ਨੂੰ ਸੋਯੂਜ਼ MS-29 ਪੁਲਾੜ ਯਾਨ ਰਾਹੀਂ ਉਡਾਣ ਭਰੀ, ਜੋ ਕਿ ਆਰਬਿਟਲ ਲੈਬਾਰਟਰੀ (ਪੁਲਾੜ ਪ੍ਰਯੋਗਸ਼ਾਲਾ) ਲਈ ਅੱਠ ਮਹੀਨਿਆਂ ਦੇ ਮਿਸ਼ਨ ਦੀ ਸ਼ੁਰੂਆਤ ਹੈ।
ਤਿੰਨ ਘੰਟੇ ਅਤੇ ਦੋ ਚੱਕਰਾਂ ਦੀ ਯਾਤਰਾ ਤੋਂ ਬਾਅਦ, ਪੁਲਾੜ ਯਾਨ ਮੰਗਲਵਾਰ ਨੂੰ ਭਾਰਤੀ ਸਮੇਂ ਅਨੁਸਾਰ (IST) ਰਾਤ 11:52 ਵਜੇ ਸਟੇਸ਼ਨ ਦੇ ‘ਪ੍ਰਿਚਲ’ ਮੋਡੀਊਲ ਨਾਲ ਆਪਣੇ ਆਪ ਜੁੜ (ਡੌਕ ਹੋ) ਗਿਆ। ਕਈ ਜ਼ਰੂਰੀ ਤਕਨੀਕੀ ਜਾਂਚਾਂ ਤੋਂ ਬਾਅਦ, ਬੁੱਧਵਾਰ ਤੜਕੇ ਇਸ ਦੇ ਗੇਟ (ਹੈਚ) ਖੋਲ੍ਹੇ ਗਏ, ਜਿੱਥੇ ਸਟੇਸ਼ਨ ‘ਤੇ ਪਹਿਲਾਂ ਤੋਂ ਰਹਿ ਰਹੇ ਅਤੇ ਕੰਮ ਕਰ ਰਹੇ ਮੌਜੂਦਾ ਮੈਂਬਰਾਂ ਦੁਆਰਾ ਟੀਮ ਦਾ ਨਿੱਘਾ ਸਵਾਗਤ ਕੀਤਾ ਗਿਆ।
ਇਹ ਮਿਸ਼ਨ ਇੱਕ ਮਹੱਤਵਪੂਰਨ ਮੀਲ ਪੱਥਰ ਹੈ ਕਿਉਂਕਿ ਇਹ ਸਾਬਕਾ ਐਮਰਜੈਂਸੀ ਮੈਡੀਸਨ ਡਾਕਟਰ ਅਤੇ ਯੂ.ਐੱਸ. ਸਪੇਸ ਫੋਰਸ ਦੇ ਕਰਨਲ ਡਾ. ਮੈਨਨ ਦੀ ਪਹਿਲੀ ਪੁਲਾੜ ਉਡਾਣ ਹੈ। ਇਸ ਦੇ ਉਲਟ, ਦੁਬਰੋਵ ਅਤੇ ਕਿਕੀਨਾ ਦੋਵਾਂ ਲਈ ਇਹ ਦੂਜੀ ਉਡਾਣ ਹੈ। ਇਹ ਕਰੂ ਅਪ੍ਰੈਲ 2027 ਵਿੱਚ ਧਰਤੀ ‘ਤੇ ਵਾਪਸ ਪਰਤਣ ਵਾਲਾ ਹੈ।
ਆਪਣੀ ਰਿਹਾਇਸ਼ ਦੌਰਾਨ, ਡਾ. ਮੈਨਨ ਮੋਹਰੀ ਵਿਗਿਆਨਕ ਖੋਜਾਂ ਕਰਨਗੇ, ਜਿਸ ਵਿੱਚ ਇਹ ਅਧਿਐਨ ਸ਼ਾਮਲ ਹੈ ਕਿ ਮਾਈਕਰੋਗ੍ਰੈਵਿਟੀ (ਘੱਟ ਗੁਰੂਤਾਕਰਸ਼ਣ) ਮਨੁੱਖੀ ਖੂਨ ਦੇ ਦੌਰੇ ਅਤੇ ਨਾੜੀਆਂ ਦੀ ਬਣਤਰ ਨੂੰ ਕਿਵੇਂ ਪ੍ਰਭਾਵਿਤ ਕਰਦੀ ਹੈ। ਉਹ ਏ.ਆਈ. (AI) ਦੀ ਮਦਦ ਵਾਲੇ ਅਲਟਰਾਸਾਊਂਡ ਸਿਸਟਮਾਂ ਦਾ ਪ੍ਰੀਖਣ ਵੀ ਕਰਨਗੇ ਅਤੇ ਉੱਨਤ ਤਕਨੀਕਾਂ ਲਈ ਪੁਲਾੜ ਵਿੱਚ ਸੈਮੀਕੰਡਕਟਰ ਕ੍ਰਿਸਟਲ ਦੇ ਉਤਪਾਦਨ ਨੂੰ ਹੋਰ ਬਿਹਤਰ ਬਣਾਉਣਗੇ।
ਇਨ੍ਹਾਂ ਖੋਜਾਂ ਦਾ ਉਦੇਸ਼ ਮਨੁੱਖੀ ਪੁਲਾੜ ਖੋਜ ਨੂੰ ਅੱਗੇ ਵਧਾਉਣਾ ਹੈ ਅਤੇ ਨਾਲ ਹੀ ਧਰਤੀ ‘ਤੇ ਜੀਵਨ ਲਈ ਲਾਭ ਪਹੁੰਚਾਉਣਾ ਹੈ। ਡਾ. ਮੈਨਨ ਦੇ ਕੰਮ ਤੋਂ ਚੰਦਰਮਾ ਅਤੇ ਮੰਗਲ ਗ੍ਰਹਿ ਦੇ ਭਵਿੱਖ ਦੇ ਮਿਸ਼ਨਾਂ ਲਈ ਮਹੱਤਵਪੂਰਨ ਡੇਟਾ ਮਿਲਣ ਦੀ ਉਮੀਦ ਹੈ।
