ਰਿਹਾਇਸ਼ੀ ਇਮਾਰਤਾਂ, ਊਰਜਾ ਢਾਂਚੇ ਅਤੇ ਰੇਲਵੇ ਸਟੇਸ਼ਨ ਨੂੰ ਨੁਕਸਾਨ; ਜ਼ੇਲੇਂਸਕੀ ਨੇ ਨਾਟੋ ਦੀ ਮੈਂਬਰਸ਼ਿਪ ਨੂੰ ਯੂਕਰੇਨ ਦੀ ਸੁਰੱਖਿਆ ਲਈ ਸਭ ਤੋਂ ਮਜ਼ਬੂਤ ਗਾਰੰਟੀ ਦੱਸਿਆ
ਲਵੀਵ, 22 ਨਵੰਬਰ, 2026 (ਚੌਧਰੀ ਪ੍ਰਭਜੀਤ ਸਿੰਘ ) : ਰੂਸ ਵੱਲੋਂ ਯੂਕਰੇਨ ’ਤੇ ਕੀਤੇ ਗਏ ਭਾਰੀ ਮਿਜ਼ਾਈਲ ਅਤੇ ਡਰੋਨ ਹਮਲਿਆਂ ਨੇ ਪੱਛਮੀ ਸ਼ਹਿਰ ਲਵੀਵ ਵਿੱਚ ਭਾਰੀ ਤਬਾਹੀ ਮਚਾਈ ਹੈ। ਹਮਲਿਆਂ ਦੌਰਾਨ ਘੱਟੋ-ਘੱਟ ਦੋ ਲੋਕਾਂ ਦੀ ਮੌਤ ਹੋ ਗਈ, ਜਦਕਿ 10 ਹੋਰ ਜ਼ਖ਼ਮੀ ਹੋ ਗਏ। ਹਮਲੇ ਦੀ ਭਿਆਨਕਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਸੜਕ ’ਤੇ ਜਾ ਰਹੀ ਇੱਕ ਕਾਰ ਦੇ ਸਾਹਮਣੇ ਇਮਾਰਤ ’ਤੇ ਪ੍ਰੋਜੈਕਟਾਈਲ ਡਿੱਗਣ ਦੀ ਘਟਨਾ ਡੈਸ਼ਕੈਮ ਕੈਮਰੇ ਵਿੱਚ ਕੈਦ ਹੋ ਗਈ। ਧਮਾਕੇ ਤੋਂ ਬਾਅਦ ਕਾਰ ਚਾਲਕ ਨੂੰ ਪਿੱਛੇ ਹਟ ਕੇ ਆਪਣੀ ਜਾਨ ਬਚਾਉਣੀ ਪਈ।
ਹਮਲੇ ਦਾ ਮੁੱਖ ਅਸਰ ਲਵੀਵ ਦੇ ਜ਼ਾਲਿਜ਼ਨੀਚਨੀ ਜ਼ਿਲ੍ਹੇ ਵਿੱਚ ਦੇਖਣ ਨੂੰ ਮਿਲਿਆ, ਜਿੱਥੇ ਰਿਹਾਇਸ਼ੀ ਇਮਾਰਤਾਂ ਅਤੇ ਗੈਰਾਜਾਂ ਵਿੱਚ ਅੱਗ ਲੱਗ ਗਈ। ਕਈ ਮਕਾਨਾਂ ਅਤੇ ਵਾਹਨਾਂ ਨੂੰ ਨੁਕਸਾਨ ਪਹੁੰਚਿਆ। ਯੂਕਰੇਨੀ ਅਧਿਕਾਰੀਆਂ ਅਨੁਸਾਰ, ਹਮਲਿਆਂ ਕਾਰਨ ਇੱਕ ਹੋਸਟਲ, ਗੋਦਾਮ, ਮਹੱਤਵਪੂਰਨ ਊਰਜਾ ਢਾਂਚੇ ਅਤੇ ਸਕਨੀਲਿਵ ਰੇਲਵੇ ਸਟੇਸ਼ਨ ਦਾ ਟਿਕਟ ਟਰਮੀਨਲ ਵੀ ਪ੍ਰਭਾਵਿਤ ਹੋਇਆ।ਤਬਾਹੀ ਲਵੀਵ ਤੱਕ ਹੀ ਸੀਮਤ ਨਹੀਂ ਰਹੀ। ਗੁਆਂਢੀ ਜ਼ੋਲੋਚਿਵ ਜ਼ਿਲ੍ਹੇ ਵਿੱਚ ਰੂਸੀ ਡਰੋਨ ਡੇਗੇ ਜਾਣ ਤੋਂ ਬਾਅਦ ਉਸ ਦਾ ਮਲਬਾ ਤਿੰਨ ਘਰਾਂ ਅਤੇ ਇੱਕ ਵਾਹਨ ’ਤੇ ਡਿੱਗਿਆ, ਜਿਸ ਕਾਰਨ ਇੱਕ ਹੋਰ ਵਿਅਕਤੀ ਜ਼ਖ਼ਮੀ ਹੋ ਗਿਆ। ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਦੱਸਿਆ ਕਿ ਰੂਸ ਨੇ ਵਿਆਪਕ ਹਮਲਿਆਂ ਦੌਰਾਨ 400 ਤੋਂ ਵੱਧ ਹਮਲਾਵਰ ਡਰੋਨ ਅਤੇ 110 ਤੋਂ ਵੱਧ ਮਿਜ਼ਾਈਲਾਂ ਦਾਗੀਆਂ, ਜਿਨ੍ਹਾਂ ਵਿੱਚ 27 ਬੈਲਿਸਟਿਕ ਮਿਜ਼ਾਈਲਾਂ ਸ਼ਾਮਲ ਸਨ। ਇਨ੍ਹਾਂ ਹਮਲਿਆਂ ਦਾ ਅਸਰ ਰਾਜਧਾਨੀ ਕੀਵ ਸਮੇਤ ਕਈ ਹੋਰ ਇਲਾਕਿਆਂ ਵਿੱਚ ਵੀ ਪਿਆ।
ਇਸ ਦੌਰਾਨ ਯੂਕਰੇਨ ਦੀ ਸੁਰੱਖਿਆ ਅਤੇ ਨਾਟੋ ਦੀ ਮੈਂਬਰਸ਼ਿਪ ਨੂੰ ਲੈ ਕੇ ਕੂਟਨੀਤਕ ਗੱਲਬਾਤ ਵੀ ਜਾਰੀ ਹੈ। ਜ਼ੇਲੇਂਸਕੀ ਨੇ ਕਿਹਾ ਕਿ ਯੂਕਰੇਨ ਦੀ ਨਾਟੋ ਵਿੱਚ ਸ਼ਮੂਲੀਅਤ ਹੀ ਉਸ ਦੀ ਸੁਰੱਖਿਆ ਦੀ ਸਭ ਤੋਂ ਸਪੱਸ਼ਟ ਗਾਰੰਟੀ ਹੋ ਸਕਦੀ ਹੈ। ਉਨ੍ਹਾਂ ਜ਼ੋਰ ਦਿੱਤਾ ਕਿ ਸੁਰੱਖਿਆ ਸਮਝੌਤੇ ਸਿਰਫ਼ ਬਿਆਨਾਂ ਤੱਕ ਸੀਮਤ ਨਾ ਰਹਿਣ, ਸਗੋਂ ਲਿਖਤੀ ਅਤੇ ਠੋਸ ਵਚਨਬੱਧਤਾਵਾਂ ਦੇ ਰੂਪ ਵਿੱਚ ਹੋਣੇ ਚਾਹੀਦੇ ਹਨ। ਉਨ੍ਹਾਂ ਨੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਕਾਰਜਕਾਲ ਤੋਂ ਬਾਅਦ ਵੀ ਲਾਗੂ ਰਹਿਣ ਵਾਲੀਆਂ ਲੰਬੇ ਸਮੇਂ ਦੀਆਂ ਸੁਰੱਖਿਆ ਗਾਰੰਟੀਆਂ ਦੀ ਮੰਗ ਕਰਦਿਆਂ ਕਿਹਾ ਕਿ ਯੂਕਰੇਨ ਨੂੰ ਦੋ ਸਾਲਾਂ ਲਈ ਨਹੀਂ, ਸਗੋਂ ਸਥਾਈ ਸੁਰੱਖਿਆ ਦੀ ਲੋੜ ਹੈ। ਇਸ ਤੋਂ ਇਲਾਵਾ ਜ਼ੇਲੇਂਸਕੀ ਨੇ ਅਮਰੀਕਾ ਦੀ ਫਰਸਟ ਲੇਡੀ ਮੇਲਾਨੀਆ ਟਰੰਪ ਦਾ ਓਲੇਸ਼ਕੀ ਤੋਂ ਲੋਕਾਂ ਨੂੰ ਸੁਰੱਖਿਅਤ ਕੱਢਣ ਵਿੱਚ ਸਹਾਇਤਾ ਲਈ ਧੰਨਵਾਦ ਕੀਤਾ ਅਤੇ ਖੇਰਸੋਨ ਤੇ ਜ਼ਾਪੋਰੀਜ਼ੀਆ ਖੇਤਰਾਂ ਵਿੱਚ ਹੋਰ ਮਨੁੱਖੀ ਨਿਕਾਸੀ ਕਾਰਜਾਂ ਲਈ ਨਵੀਂ ਸੂਚੀ ਨੂੰ ਮਨਜ਼ੂਰੀ ਦੇਣ ਦੀ ਜਾਣਕਾਰੀ ਵੀ ਸਾਂਝੀ ਕੀਤੀ।






