ਚੰਡੀਗੜ੍ਹ, 8 ਸਤੰਬਰ, 2026 (ਸੰਜੀਵ ਸ਼ਰਮਾ) : ਹਰਿਆਣਾ ਦੇ ਖੇਤੀਬਾੜੀ ਅਤੇ ਕਿਸਾਨ ਕਲਿਆਣ ਮੰਤਰੀ ਸ਼੍ਰੀ ਸ਼ਿਆਮ ਸਿੰਘ ਰਾਣਾ ਨੇ ਦੱਸਿਆ ਕਿ ਰਾਜ ਸਰਕਾਰ ਬਾਗਬਾਨੀ ਵਿਭਾਗ ਰਾਹੀਂ ਸੂਬੇ ਦੇ ਕਿਸਾਨਾਂ ਦੀ ਆਮਦਨ ਵਧਾਉਣ ਅਤੇ ਉਨ੍ਹਾਂ ਨੂੰ ਆਰਥਿਕ ਤੌਰ ‘ਤੇ ਮਜ਼ਬੂਤ ਕਰਨ ਦੇ ਉਦੇਸ਼ ਨਾਲ ਆਲੂ ਦੀਆਂ ਵੱਖ-ਵੱਖ ਉੱਨਤ ਅਤੇ ਰੋਗ-ਰੋਧਕ ਕਿਸਮਾਂ ਦੇ ਮਿਆਰੀ ਬੀਜ ਉਪਲਬਧ ਕਰਵਾ ਰਹੀ ਹੈ। ਕਰਨਾਲ ਦੇ ਸ਼ਾਮਗੜ੍ਹ ਸਥਿਤ ਆਲੂ ਤਕਨਾਲੋਜੀ ਕੇਂਦਰ ਵੱਲੋਂ ਕੁਫ਼ਰੀ ਪੁਖਰਾਜ, ਕੁਫ਼ਰੀ ਮੋਹਨ, ਕੁਫ਼ਰੀ ਖਿਆਤੀ, ਕੁਫ਼ਰੀ ਚਿਪਸੋਨਾ ਅਤੇ ਕੁਫ਼ਰੀ ਫ੍ਰਾਈਸੋਨਾ ਵਰਗੀਆਂ ਉੱਚ ਉਤਪਾਦਕਤਾ ਵਾਲੀਆਂ ਕਿਸਮਾਂ ਦੇ ਅਰਲੀ ਜਨਰੇਸ਼ਨ ਸੀਡ ਅਤੇ ਮਿਨੀਟਿਊਬਰਜ਼ ਪਾਰਦਰਸ਼ੀ ਵਿਵਸਥਾ ਤਹਿਤ ਕਿਸਾਨਾਂ ਨੂੰ ਦਿੱਤੇ ਜਾ ਰਹੇ ਹਨ।
ਸ਼੍ਰੀ ਰਾਣਾ ਨੇ ਦੱਸਿਆ ਕਿ ਕਿਸਾਨ ਬਾਗਬਾਨੀ ਵਿਭਾਗ ਦੇ ਅਧਿਕਾਰਤ ਪੋਰਟਲ (nursery.hortharyana.gov.in) ਰਾਹੀਂ ਆਸਾਨੀ ਨਾਲ ਘਰ ਬੈਠੇ ਇਨ੍ਹਾਂ ਬੀਜਾਂ ਦੀ ਆਨਲਾਈਨ ਬੁਕਿੰਗ ਕਰ ਸਕਦੇ ਹਨ। ਇਨ੍ਹਾਂ ਪ੍ਰਮָਣਿਤ ਅਤੇ ਵਾਇਰਸ-ਮੁਕਤ ਬੀਜਾਂ ਦੀ ਵਰਤੋਂ ਨਾਲ ਨਾ ਸਿਰਫ਼ ਪ੍ਰਤੀ ਏਕੜ ਆਲੂ ਦੇ ਝਾੜ ਵਿੱਚ ਮਹੱਤਵਪੂਰਨ ਵਾਧਾ ਹੋਵੇਗਾ, ਸਗੋਂ ਫ਼ਸਲ ਦੀ ਬਿਹਤਰ ਗੁਣਵੱਤਾ ਕਾਰਨ ਕਿਸਾਨਾਂ ਨੂੰ ਬਾਜ਼ਾਰ ਵਿੱਚ ਆਪਣੀ ਪੈਦਾਵਾਰ ਦਾ ਪ੍ਰੀਮੀਅਮ ਭਾਵ ਮਿਲੇਗਾ, ਜਿਸ ਨਾਲ ਉਨ੍ਹਾਂ ਦੀ ਸ਼ੁੱਧ ਆਮਦਨ ਵਿੱਚ ਸਿੱਧਾ ਵਾਧਾ ਹੋਵੇਗਾ।
ਉਨ੍ਹਾਂ ਦੱਸਿਆ ਕਿ ਇਸ ਕੇਂਦਰ ਵਿੱਚ ਅਰਲੀ ਜਨਰੇਸ਼ਨ ਸੀਡ (ਈਅਰ-3) ਤਹਿਤ ਕੁਫ਼ਰੀ ਪੁਖਰਾਜ ਕਿਸਮ ਦਾ 1276 ਕੁਇੰਟਲ ਸੀਡ ਸਾਈਜ਼, 298.5 ਕੁਇੰਟਲ ਅੰਡਰ ਸਾਈਜ਼ ਅਤੇ 157 ਕੁਇੰਟਲ ਓਵਰ ਸਾਈਜ਼ ਬੀਜ ਉਪਲਬਧ ਹੈ। ਇਸੇ ਤਰ੍ਹਾਂ ਅਰਲੀ ਜਨਰੇਸ਼ਨ ਸੀਡ (ਈਅਰ-4) ਵਿੱਚ ਕੁਫ਼ਰੀ ਮੋਹਨ ਕਿਸਮ ਦਾ 255.5 ਕੁਇੰਟਲ ਸੀਡ ਸਾਈਜ਼, 9 ਕੁਇੰਟਲ ਅੰਡਰ ਸਾਈਜ਼ ਅਤੇ 210 ਕੁਇੰਟਲ ਓਵਰ ਸਾਈਜ਼ ਬੀਜ ਉਪਲਬਧ ਹੈ। ਅਰਲੀ ਜਨਰੇਸ਼ਨ ਸੀਡ (ਈਅਰ-1) ਵਰਗ ਦੇ ਤਹਿਤ ਕੁਫ਼ਰੀ ਚਿਪਸੋਨਾ-1 ਦਾ 1 ਕੁਇੰਟਲ ਅੰਡਰ ਸਾਈਜ਼, ਕੁਫ਼ਰੀ ਖਿਆਤੀ ਦਾ 2.5 ਕੁਇੰਟਲ ਸੀਡ ਸਾਈਜ਼ ਅਤੇ 20.5 ਕੁਇੰਟਲ ਓਵਰ ਸਾਈਜ਼ ਅਤੇ ਕੁਫ਼ਰੀ ਉਦੈ ਦਾ 0.5 ਕੁਇੰਟਲ ਓਵਰ ਸਾਈਜ਼ ਬੀਜ ਕਿਸਾਨਾਂ ਲਈ ਉਪਲਬਧ ਕਰਵਾਇਆ ਗਿਆ ਹੈ।
ਉਨ੍ਹਾਂ ਅੱਗੇ ਦੱਸਿਆ ਕਿ ਪੀ.ਟੀ.ਸੀ.ਐੱਮ.ਟੀ. (PTCMT) ਸ਼੍ਰੇਣੀ ਵਿੱਚ ਵੀ ਆਲੂ ਦੇ ਮਿਨੀਟਿਊਬਰਜ਼ ਦੀ ਲੋੜੀਂਦੀ ਉਪਲਬਧਤਾ ਹੈ, ਜਿਸ ਵਿੱਚ ਕੁਫ਼ਰੀ ਉਦੈ ਦੇ 25,000 ਨਗ, ਕੁਫ਼ਰੀ ਚਿਪਸੋਨਾ-1 ਦੇ 8,000 ਨਗ, ਕੁਫ਼ਰੀ ਹਿਮਾਲਿਨੀ ਦੇ 11,000 ਨਗ ਅਤੇ ਕੁਫ਼ਰੀ ਫ੍ਰਾਈਸੋਨਾ ਦੇ 75,000 ਨਗ ਸ਼ਾਮਲ ਹਨ। ਕਿਸਾਨ ਆਪਣੀ ਲੋੜ ਅਨੁਸਾਰ ਪੋਰਟਲ ਰਾਹੀਂ ਸਮਾਂ ਰਹਿੰਦਿਆਂ ਬੁਕਿੰਗ ਯਕੀਨੀ ਬਣਾ ਸਕਦੇ ਹਨ। ਬੀਜਾਂ ਦੀ ਉਪਲਬਧਤਾ, ਬੁਕਿੰਗ ਪ੍ਰਕਿਰਿਆ ਜਾਂ ਕਿਸੇ ਹੋਰ ਤਕਨੀਕੀ ਸਹਾਇਤਾ ਅਤੇ ਵਧੇਰੇ ਜਾਣਕਾਰੀ ਲਈ ਕਿਸਾਨ ਵਿਭਾਗ ਦੇ ਮੋਬਾਈਲ ਨੰਬਰ 8619199628 ‘ਤੇ ਸਿੱਧਾ ਸੰਪਰਕ ਕਰ ਸਕਦੇ ਹਨ।
