ਨਿਊਯਾਰਕ:02 ਮਈ 2026:(ਹਰਸ਼ਲੀਨ ਸਿੰਘ)
ਪੰਜਾਬੀ ਅਤੇ ਬਾਲੀਵੁੱਡ ਦੇ ਮਸ਼ਹੂਰ ਗਾਇਕ ਦਿਲਜੀਤ ਦੋਸਾਂਝ ਅੱਜਕਲ੍ਹ ਆਪਣੇ ‘ਔਰਾ ਵਰਲਡ ਟੂਰ’ (Auora World Tour) ਦੇ ਸਿਲਸਿਲੇ ਵਿੱਚ ਅਮਰੀਕਾ ਵਿੱਚ ਹਨ। 30 ਅਪ੍ਰੈਲ ਨੂੰ ਹੋਏ ਇੱਕ ਸ਼ੋਅ ਦੌਰਾਨ ਦਿਲਜੀਤ ਉਸ ਸਮੇਂ ਗੁੱਸੇ ਵਿੱਚ ਨਜ਼ਰ ਆਏ ਜਦੋਂ ਕੁਝ ਗਰਮਖਿਆਲੀ ਸਮਰਥਕਾਂ ਨੇ ਪੋਸਟਰ ਦਿਖਾ ਕੇ ਵਿਰੋਧ ਪ੍ਰਦਰਸ਼ਨ ਕਰਨ ਦੀ ਕੋਸ਼ਿਸ਼ ਕੀਤੀ। ਦਿਲਜੀਤ ਨੇ ਸਟੇਜ ਤੋਂ ਹੀ ਇਨ੍ਹਾਂ ਪ੍ਰਦਰਸ਼ਨਕਾਰੀਆਂ ਨੂੰ ਸਿੱਧੂ ਮੂਸੇਵਾਲਾ ਦੇ ਅੰਦਾਜ਼ ਵਿੱਚ ਪੱਟ ‘ਤੇ ਥੱਪੀ ਮਾਰ ਕੇ ਕਰਾਰਾ ਜਵਾਬ ਦਿੱਤਾ।
“ਵਿਰੋਧ ਕਰਨ ਵਾਲਿਆਂ ਦੀ ਕੋਈ ਪਰਵਾਹ ਨਹੀਂ”
ਸ਼ੋਅ ਦੌਰਾਨ ਦਿਲਜੀਤ ਨੇ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਕਿ ਜੋ ਕੋਈ ਵੀ ਵਿਰੋਧ ਕਰਨਾ ਚਾਹੁੰਦਾ ਹੈ, ਉਹ ਕਰ ਸਕਦਾ ਹੈ, ਉਸ ਨੂੰ ਇਸ ਦੀ ਕੋਈ ਪਰਵਾਹ ਨਹੀਂ ਹੈ। ਉਨ੍ਹਾਂ ਚੇਤਾਵਨੀ ਦਿੰਦਿਆਂ ਕਿਹਾ ਕਿ ਜੇਕਰ ਕੋਈ ਸ਼ੋਅ ਦਾ ਮਾਹੌਲ ਖ਼ਰਾਬ ਕਰੇਗਾ ਜਾਂ ਹੰਗਾਮਾ ਕਰੇਗਾ, ਤਾਂ ਉਸ ਨੂੰ ਚੁੱਕ ਕੇ ਬਾਹਰ ਸੁੱਟ ਦਿੱਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਸੰਗੀਤ ਸਮਾਰੋਹ ਵਿੱਚ ਬਜ਼ੁਰਗ ਅਤੇ ਬੱਚੇ ਸ਼ਾਮਲ ਹੁੰਦੇ ਹਨ, ਇਸ ਲਈ ਉਹ ਕਿਸੇ ਵੀ ਤਰ੍ਹਾਂ ਦਾ ਵਿਰੋਧ ਬਰਦਾਸ਼ਤ ਨਹੀਂ ਕਰਨਗੇ।
ਪੰਜਾਬ ਲਈ ਕੀਤੇ ਕੰਮਾਂ ਦਾ ਦਿੱਤਾ ਹਵਾਲਾ
ਆਪਣੀ ਦੇਸ਼ਭਗਤੀ ਅਤੇ ਪੰਜਾਬ ਨਾਲ ਜੁੜਾਅ ਦਾ ਸਬੂਤ ਦਿੰਦਿਆਂ ਦਿਲਜੀਤ ਨੇ ਕਿਹਾ:
-
ਹੜ੍ਹ ਪੀੜਤਾਂ ਦੀ ਮਦਦ: ਉਨ੍ਹਾਂ ਦੱਸਿਆ ਕਿ ਪੰਜਾਬ ਵਿੱਚ ਹੜ੍ਹਾਂ ਦੌਰਾਨ ਉਨ੍ਹਾਂ ਨੇ ਜ਼ਮੀਨੀ ਪੱਧਰ ‘ਤੇ ਲੋਕਾਂ ਦੀ ਮਦਦ ਕੀਤੀ ਅਤੇ ਉਨ੍ਹਾਂ ਦੇ ਘਰ ਬਣਾਏ।
-
ਟੂਰ ਰੱਦ ਕਰਨਾ: ਪੰਜਾਬ ਦੇ ਮੁੱਦਿਆਂ ਲਈ ਉਨ੍ਹਾਂ ਨੇ ਆਪਣਾ ਆਸਟ੍ਰੇਲੀਆ ਦੌਰਾ ਤੱਕ ਰੱਦ ਕਰ ਦਿੱਤਾ ਸੀ ਅਤੇ ਛੇ ਮਹੀਨੇ ਪੀੜਤਾਂ ਦੀ ਮਦਦ ਵਿੱਚ ਬਿਤਾਏ।
-
ਰਾਸ਼ਟਰੀ ਪੱਧਰ ‘ਤੇ ਆਵਾਜ਼: ਉਨ੍ਹਾਂ ਕਿਹਾ ਕਿ ਉਹ ਰਾਸ਼ਟਰੀ ਮੀਡੀਆ (ਕੇਬੀਸੀ ਦਾ ਇਸ਼ਾਰਾ) ‘ਤੇ ਆਪਣੀ ਫਿਲਮ ਜਾਂ ਗੀਤ ਪ੍ਰਮੋਟ ਕਰਨ ਨਹੀਂ, ਸਗੋਂ ਪੰਜਾਬ ਲਈ ਫੰਡ ਇਕੱਠਾ ਕਰਨ ਅਤੇ ਲੋਕਾਂ ਦੀ ਆਵਾਜ਼ ਉਠਾਉਣ ਗਏ ਸਨ।
ਕੌਮਾਂਤਰੀ ਪਲੇਟਫਾਰਮਾਂ ‘ਤੇ ਪੰਜਾਬ ਦੀ ਗੱਲ
ਦਿਲਜੀਤ ਨੇ ‘ਜਿੰਮੀ ਫੈਲਨ ਸ਼ੋਅ’ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨੂੰ ਉੱਥੇ ਜਾਣ ਦੀ ਨਿੱਜੀ ਲੋੜ ਨਹੀਂ ਸੀ, ਪਰ ਫਿਰ ਵੀ ਉਹ ਗਏ ਤਾਂ ਜੋ ਪੰਜਾਬ ਬਾਰੇ ਗੱਲ ਕੀਤੀ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਕੌਮਾਂਤਰੀ ਪੱਧਰ ‘ਤੇ ‘ਕਾਮਾਗਾਟਾਮਾਰੂ’ ਵਰਗੀ ਇਤਿਹਾਸਕ ਘਟਨਾ ਦਾ ਜ਼ਿਕਰ ਵੀ ਕੀਤਾ ਹੈ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਉਹ ਹਮੇਸ਼ਾ ਹਰ ਵੱਡੇ ਪਲੇਟਫਾਰਮ ‘ਤੇ ਪੰਜਾਬ ਦੇ ਮੁੱਦਿਆਂ ਨੂੰ ਪ੍ਰਮੁੱਖਤਾ ਨਾਲ ਉਠਾਉਂਦੇ ਰਹਿਣਗੇ।
