ਬਠਿੰਡਾ ‘ਚ ਮਾਲੀ ਸਾਲ ਦੇ ਅੰਤ ‘ਤੇ ਸ਼ਰਾਬ ਦੀਆਂ ‘ਸੇਲਾਂ’ ਦਾ ਹੜ੍ਹ; ਅੱਧੀ ਕੀਮਤ ‘ਤੇ ਵਿਕ ਰਹੀ ਹੈ ਦਾਰੂ

ਨਵੇਂ ਠੇਕੇਦਾਰਾਂ ਦੇ ਆਉਣ ਤੋਂ ਪਹਿਲਾਂ ਪੁਰਾਣਾ ਸਟਾਕ ਖਤਮ ਕਰਨ ਲਈ ਲੱਗੀਆਂ ਲੰਬੀਆਂ ਲਾਈਨਾਂ

ਬਠਿੰਡਾ, 29 ਮਾਰਚ 2026 (ਛਤਰਪਾਲ ਸਿੰਘ): ਮਾਲੀ ਸਾਲ 2025-26 ਦੇ ਆਖਰੀ ਦਿਨਾਂ ਵਿੱਚ ਬਠਿੰਡਾ ਪੱਟੀ ਦੇ ਸ਼ਰਾਬ ਠੇਕੇਦਾਰਾਂ ਨੇ ਪਿਆਕੜਾਂ ਲਈ ਛੋਟਾਂ ਦੇ ਗੱਫੇ ਖੋਲ੍ਹ ਦਿੱਤੇ ਹਨ। 31 ਮਾਰਚ ਨੂੰ ਮਾਲੀ ਸਾਲ ਖਤਮ ਹੋਣ ਅਤੇ 1 ਅਪਰੈਲ ਤੋਂ ਨਵੇਂ ਠੇਕੇਦਾਰਾਂ ਵੱਲੋਂ ਕਾਰੋਬਾਰ ਸੰਭਾਲਣ ਤੋਂ ਪਹਿਲਾਂ, ਪੁਰਾਣੇ ਸਟਾਕ ਨੂੰ ਖਤਮ ਕਰਨ ਲਈ ਸ਼ਰਾਬ ਲਗਭਗ ਅੱਧੀ ਕੀਮਤ ‘ਤੇ ਵੇਚੀ ਜਾ ਰਹੀ ਹੈ।

ਵੱਡੀਆਂ ਛੋਟਾਂ ਦਾ ਵੇਰਵਾ:

• ਅੰਗਰੇਜ਼ੀ ਸ਼ਰਾਬ: ਜਿਨ੍ਹਾਂ ਬਰਾਂਡਾਂ ਦਾ ਸਰਕਾਰੀ ਭਾਅ 700 ਰੁਪਏ ਪ੍ਰਤੀ ਬੋਤਲ ਹੈ, ਉਹ ਹੁਣ ਮਹਿਜ਼ 350 ਰੁਪਏ ਵਿੱਚ ਉਪਲਬਧ ਹਨ। ਇਸ ਵਿੱਚ ਫਸਟ ਚੁਆਇਸ, ਰੰਮ ਅਤੇ ਕਲੱਬ ਵਿਸਕੀ ਵਰਗੇ ਬਰਾਂਡ ਸ਼ਾਮਲ ਹਨ।

• ਦੇਸੀ ਸ਼ਰਾਬ: ਖਾਸਾ, ਸੌਂਫੀਆ ਅਤੇ ਵੋਦਕਾ ਵਰਗੇ ਬਰਾਂਡ ਹੁਣ ਸਿਰਫ਼ 130 ਰੁਪਏ ਪ੍ਰਤੀ ਬੋਤਲ ਦੇ ਹਿਸਾਬ ਨਾਲ ਵੇਚੇ ਜਾ ਰਹੇ ਹਨ।

• ਬੀਅਰ: ਠੰਢੀ ਬੀਅਰ ਦੀਆਂ ਬੋਤਲਾਂ ‘ਤੇ ਵੀ ਵਿਸ਼ੇਸ਼ ਛੋਟ ਦਿੱਤੀ ਜਾ ਰਹੀ ਹੈ।

ਭੰਡਾਰ ਕਰਨ ਦੀ ਹੋੜ:

ਲਾਲ ਸਿੰਘ ਬਸਤੀ ਦੇ ਇੱਕ ਸਥਾਨਕ ਨੌਜਵਾਨ ਅਨੁਸਾਰ, ਅੱਜ ਸਵੇਰ ਤੋਂ ਹੀ ਠੇਕਿਆਂ ‘ਤੇ ਭੀੜ ਜੁੜਨੀ ਸ਼ੁਰੂ ਹੋ ਗਈ ਹੈ। ਲੋਕ ਅਗਲੇ ਤਿੰਨ ਦਿਨਾਂ ਦੌਰਾਨ ਵੱਡੀ ਮਾਤਰਾ ਵਿੱਚ ਸ਼ਰਾਬ ਭੰਡਾਰ ਕਰਨ ਦੀ ਵਿਉਂਤਬੰਦੀ ਕਰ ਰਹੇ ਹਨ ਤਾਂ ਜੋ ਅਪਰੈਲ ਦੇ ਪਹਿਲੇ ਹਫ਼ਤੇ ਤੱਕ ਸਸਤੀ ਸ਼ਰਾਬ ਦਾ ਲਾਭ ਉਠਾਇਆ ਜਾ ਸਕੇ।

ਨਵੀਂ ਸ਼ਰਾਬ ਨੀਤੀ ਕਾਰਨ ਵਧ ਸਕਦੇ ਹਨ ਭਾਅ:

ਸੂਤਰਾਂ ਅਨੁਸਾਰ, 1 ਅਪਰੈਲ ਤੋਂ ਲਾਗੂ ਹੋਣ ਵਾਲੀ ਨਵੀਂ ਸ਼ਰਾਬ ਨੀਤੀ ਕਾਰਨ ਕੀਮਤਾਂ ਵਿੱਚ ਵਾਧਾ ਹੋਣਾ ਤੈਅ ਹੈ। ਠੇਕੇਦਾਰਾਂ ਵੱਲੋਂ ਸਾਢੇ ਛੇ ਫੀਸਦੀ ਵਾਧੂ ਫੀਸ ਜਮ੍ਹਾਂ ਕਰਵਾਉਣ ਕਾਰਨ:

• ਦੇਸੀ ਸ਼ਰਾਬ 50 ਰੁਪਏ ਮਹਿੰਗੀ ਹੋ ਸਕਦੀ ਹੈ।

• ਅੰਗਰੇਜ਼ੀ ਸ਼ਰਾਬ ਵਿੱਚ 200 ਰੁਪਏ ਤੱਕ ਦਾ ਵਾਧਾ ਹੋ ਸਕਦਾ ਹੈ।

• ਬੀਅਰ ਦੀ ਕੀਮਤ 20 ਤੋਂ 30 ਰੁਪਏ ਵਧ ਸਕਦੀ ਹੈ।

ਆਬਕਾਰੀ ਨਿਯਮਾਂ ਦੀ ਉਲੰਘਣਾ?

ਪੰਜਾਬ ਸਰਕਾਰ ਵੱਲੋਂ ਨਿਰਧਾਰਿਤ ਘੱਟੋ-ਘੱਟ ਭਾਅ ਤੋਂ ਘੱਟ ‘ਤੇ ਸ਼ਰਾਬ ਵੇਚਣੀ ਆਬਕਾਰੀ ਨਿਯਮਾਂ ਦੀ ਸਿੱਧੀ ਉਲੰਘਣਾ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਇੱਕ ਪਾਸੇ ਸਰਕਾਰ ਨਸ਼ਿਆਂ ਖ਼ਿਲਾਫ਼ ਮੁਹਿੰਮ ਚਲਾ ਰਹੀ ਹੈ, ਦੂਜੇ ਪਾਸੇ ਠੇਕੇਦਾਰਾਂ ਵੱਲੋਂ ਸ਼ਰੇਆਮ ਸਸਤੀ ਸ਼ਰਾਬ ਪਰੋਸੀ ਜਾ ਰਹੀ ਹੈ। ਇਸ ਸਬੰਧੀ ਪੱਖ ਜਾਨਣ ਲਈ ਜਦੋਂ ਆਬਕਾਰੀ ਵਿਭਾਗ ਦੇ ਸਹਾਇਕ ਕਮਿਸ਼ਨਰ ਗੁਲਸ਼ਨ ਹੁਰੀਆ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਤਾਂ ਉਨ੍ਹਾਂ ਨੇ ਫ਼ੋਨ ਨਹੀਂ ਚੁੱਕਿਆ।