ਸਿਰਸਾ: 20 ਦਸੰਬਰ: (ਛਤਰਪਾਲ ਸਿੰਘ):ਹਰਿਆਣਾ ਦੇ ਸਿਰਸਾ ਜ਼ਿਲ੍ਹੇ ਵਿੱਚ ਇੱਕ ਚੱਲਦੀ ਰੋਡਵੇਜ਼ ਬੱਸ ਵਿੱਚ ਡਰਾਈਵਰ ਅਤੇ ਕੰਡਕਟਰ ਵਿਚਕਾਰ ਹੋਈ ਝੜਪ ਕਾਰਨ ਵੱਡਾ ਹਾਦਸਾ ਵਾਪਰ ਗਿਆ। ਝਗੜੇ ਦੌਰਾਨ ਡਰਾਈਵਰ ਵੱਲੋਂ ਕੰਟਰੋਲ ਗੁਆ ਲੈਣ ਕਾਰਨ ਬੱਸ ਬੇਕਾਬੂ ਹੋ ਕੇ ਸੜਕ ਤੋਂ ਉਤਰ ਗਈ ਅਤੇ ਇੱਕ ਖੇਤ ਵਿੱਚ ਜਾ ਪਲਟੀ। ਖੁਸ਼ਕਿਸਮਤੀ ਨਾਲ ਕਿਸੇ ਵੀ ਯਾਤਰੀ ਦੇ ਜਾਨੀ ਨੁਕਸਾਨ ਦੀ ਕੋਈ ਸੂਚਨਾ ਨਹੀਂ ਹੈ।
ਸਿਰਸਾ ਡਿਪੂ ਦੇ ਰੋਡਵੇਜ਼ ਟੀ.ਐਮ. ਸੁਧੀਰ ਕੁਮਾਰ ਨੇ ਦੱਸਿਆ ਕਿ ਮਾਮਲਾ ਉਨ੍ਹਾਂ ਦੇ ਧਿਆਨ ਵਿੱਚ ਆਇਆ ਹੈ ਅਤੇ ਜਾਂਚ ਜਾਰੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਹਾਦਸਾ ਡਰਾਈਵਰ ਅਤੇ ਕੰਡਕਟਰ ਵਿਚਕਾਰ ਝਗੜੇ ਕਾਰਨ ਵਾਪਰਿਆ, ਜਿਸ ਦੇ ਚਲਦੇ ਦੋਵਾਂ ਕਰਮਚਾਰੀਆਂ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ।
ਜਾਣਕਾਰੀ ਅਨੁਸਾਰ, ਇਹ ਬੱਸ ਸਿਰਸਾ ਡਿਪੂ ਤੋਂ ਰਾਜਸਥਾਨ ਦੇ ਪੋਖਰਣ ਤੱਕ ਜਾਂਦੀ ਹੈ ਅਤੇ ਸ਼ਾਮ ਨੂੰ ਸਿਰਸਾ ਵਾਪਸ ਆਉਂਦੀ ਹੈ। ਬੱਸ ਨੂੰ ਬਾਲਸਮੰਦ ਦੇ ਰਹਿਣ ਵਾਲੇ ਡਰਾਈਵਰ ਅਸ਼ੋਕ ਕੁਮਾਰ ਅਤੇ ਸਿਰਸਾ ਦੇ ਰਹਿਣ ਵਾਲੇ ਕੰਡਕਟਰ ਸੁਰੇਂਦਰ ਚਲਾ ਰਹੇ ਸਨ। ਦੋਵੇਂ ਵੀਰਵਾਰ ਤੋਂ ਪੋਖਰਣ ਵਿੱਚ ਡਿਊਟੀ ‘ਤੇ ਸਨ।
ਪੋਖਰਣ ਤੋਂ ਵਾਪਸੀ ਦੌਰਾਨ ਬੀਕਾਨੇਰ ਦੇ ਅਰਜੁਨਸਰ ਕਸਬੇ ਨੇੜੇ ਬੱਸ ਸਟੈਂਡ ‘ਤੇ ਬੱਸ ਰੋਕਣ ਅਤੇ ਯਾਤਰੀਆਂ ਨੂੰ ਉਤਾਰਨ ਨੂੰ ਲੈ ਕੇ ਦੋਵਾਂ ਵਿਚਕਾਰ ਤਕਰਾਰ ਹੋ ਗਈ। ਬੱਸ ਵਿੱਚ ਸਵਾਰ ਯਾਤਰੀਆਂ ਨੇ ਦਖ਼ਲ ਦੇ ਕੇ ਦੋਵਾਂ ਨੂੰ ਸਮਝਾਇਆ, ਜਿਸ ਤੋਂ ਬਾਅਦ ਮਾਮਲਾ ਕੁਝ ਸਮੇਂ ਲਈ ਸ਼ਾਂਤ ਹੋ ਗਿਆ। ਡਰਾਈਵਰ ਨੇ ਇਹ ਕਹਿ ਕੇ ਬੱਸ ਛੱਡੀ ਕਿ ਉਹ ਪੁਲਿਸ ਸਟੇਸ਼ਨ ਵਿੱਚ ਸ਼ਿਕਾਇਤ ਦਰਜ ਕਰਵਾਏਗਾ।
ਬੱਸ ਚੌਪਟਾ ਤੋਂ ਸਿਰਸਾ ਜਾਣੀ ਸੀ। ਇਸ ਰੂਟ ਦੇ ਕੁਝ ਯਾਤਰੀ ਬੱਸ ਸਟੈਂਡ ‘ਤੇ ਖੜ੍ਹੇ ਸਨ, ਜਿਨ੍ਹਾਂ ਨੂੰ ਬੱਸ ਸਟੈਂਡ ਇੰਚਾਰਜ ਨੇ ਬੱਸ ਵਿੱਚ ਬਿਠਾ ਦਿੱਤਾ। ਇਸ ਦੌਰਾਨ ਡਰਾਈਵਰ ਮੁੜ ਆ ਗਿਆ ਅਤੇ ਉਸ ਦਾ ਕੰਡਕਟਰ ਨਾਲ ਫਿਰ ਝਗੜਾ ਹੋ ਗਿਆ। ਝਗੜਾ ਦੇਖ ਕੇ ਕੁਝ ਯਾਤਰੀਆਂ ਨੇ ਪਹਿਲਾਂ ਹੀ ਬੱਸ ਤੋਂ ਉਤਰਨਾ ਉਚਿਤ ਸਮਝਿਆ, ਜਦਕਿ ਕੁਝ ਨੂੰ ਇੰਚਾਰਜ ਵੱਲੋਂ ਉਤਾਰ ਦਿੱਤਾ ਗਿਆ।
ਚੌਪਟਾ ਤੋਂ ਸਿਰਸਾ ਵੱਲ ਜਾਂਦੇ ਸਮੇਂ ਰਸਤੇ ਵਿੱਚ ਦੋਵਾਂ ਵਿਚਕਾਰ ਮੁੜ ਤਕਰਾਰ ਹੋ ਗਈ, ਜਿਸ ਕਾਰਨ ਬੱਸ ਬੇਕਾਬੂ ਹੋ ਕੇ ਸੜਕ ਤੋਂ ਉਤਰ ਕੇ ਖੇਤਾਂ ਵਿੱਚ ਜਾ ਡਿੱਗੀ। ਹਾਦਸੇ ਤੋਂ ਬਾਅਦ ਪ੍ਰਸ਼ਾਸਨ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
