ਵਲਸਾਡ/ਗਾਂਧੀਨਗਰ, 12 ਦਸੰਬਰ, 2025: (ਸ਼.ਅ.ਬਿਓਰੋ): ਗੁਜਰਾਤ ਦੇ ਵਲਸਾਡ ਸ਼ਹਿਰ ਵਿੱਚ ਅੱਜ ਸਵੇਰੇ ਇੱਕ ਗੰਭੀਰ ਹਾਦਸਾ ਵਾਪਰਿਆ, ਜਦੋਂ ਕੈਲਾਸ਼ ਰੋਡ ‘ਤੇ ਔਰੰਗਾ ਨਦੀ ਉੱਤੇ ਬਣ ਰਿਹਾ ਇੱਕ ਉਸਾਰੀ ਅਧੀਨ ਪੁਲ ਅਚਾਨਕ ਢਹਿ ਗਿਆ। ਹਾਦਸਾ ਕਰੀਬ ਸਵੇਰੇ 9 ਵਜੇ ਵਾਪਰਿਆ ਅਤੇ ਇਸ ਨਾਲ ਸਾਈਟ ‘ਤੇ ਭਾਰੀ ਭਗਦੜ ਮਚ ਗਈ।
ਮਿਲੀ ਜਾਣਕਾਰੀ ਅਨੁਸਾਰ, ਨਿਰਮਾਣ ਦੌਰਾਨ ਬਾਂਸ ਨਾਲ ਬਣਿਆ ਅਸਥਾਈ ਢਾਂਚਾ ਅਤੇ ਇੱਕ ਗਰਡਰ ਭਰਭਰਾ ਕੇ ਹੇਠਾਂ ਡਿੱਗ ਪਏ। ਉਸ ਸਮੇਂ ਮੌਕੇ ‘ਤੇ ਕਰੀਬ 105 ਮਜ਼ਦੂਰ ਕੰਮ ਕਰ ਰਹੇ ਸਨ। ਹਾਦਸੇ ਵਿੱਚ 4 ਤੋਂ ਵੱਧ ਮਜ਼ਦੂਰਾਂ ਦੇ ਮਲਬੇ ਹੇਠ ਦੱਬੇ ਜਾਣ ਦੀ ਪੁਸ਼ਟੀ ਹੋਈ ਹੈ। ਉਨ੍ਹਾਂ ਨੂੰ ਰੈਸਕਿਊ ਕਰਕੇ ਤੁਰੰਤ ਹਸਪਤਾਲ ਭੇਜਿਆ ਗਿਆ।
ਤੇਜ਼ ਧਮਾਕੇ ਵਰਗੀ ਆਵਾਜ਼, ਮਚੀ ਹਫੜਾ-ਦਫੜੀ
ਚਸ਼ਮਦੀਦਾਂ ਨੇ ਦੱਸਿਆ ਕਿ ਕੰਮ ਦੌਰਾਨ ਅਚਾਨਕ ਤੇਜ਼ ਆਵਾਜ਼ ਹੋਈ ਅਤੇ ਪੁਲ ਦਾ ਇੱਕ ਵੱਡਾ ਹਿੱਸਾ ਹੇਠਾਂ ਆ ਡਿੱਗਿਆ। ਲੋਹੇ ਦੀਆਂ ਰਾਡਾਂ ਅਤੇ ਭਾਰੀ ਸਲੈਬ ਮਜ਼ਦੂਰਾਂ ‘ਤੇ ਡਿੱਗਣ ਕਾਰਨ ਮੌਕੇ ‘ਤੇ ਚੀਕ-ਚਿਹਾੜਾ ਮਚ ਗਿਆ। ਨਜ਼ਦੀਕੀ ਲੋਕ ਤੁਰੰਤ ਰਾਹਤ ਲਈ ਦੌੜੇ।
ਪ੍ਰਸ਼ਾਸਨ ਤੁਰੰਤ ਸਚੇਤ
ਹਾਦਸੇ ਦੀ ਸੂਚਨਾ ਮਿਲਦਿਆਂ ਹੀ ਪ੍ਰਸ਼ਾਸਨ ਅਤੇ ਰੈਸਕਿਊ ਟੀਮ ਮੌਕੇ ‘ਤੇ ਪਹੁੰਚ ਗਈ। ਵਲਸਾਡ ਦੇ ਐਸਡੀਐਮ ਵਿਮਲ ਪਟੇਲ ਨੇ ਦੱਸਿਆ ਕਿ ਨਿਰਮਾਣ ਦੌਰਾਨ ਇੱਕ ਗਰਡਰ ਨੂੰ ਨੁਕਸਾਨ ਪਹੁੰਚਿਆ, ਜਿਸ ਕਾਰਨ ਇਹ ਹਾਦਸਾ ਵਾਪਰਿਆ। ਉਨ੍ਹਾਂ ਕਿਹਾ ਕਿ ਜ਼ਖਮੀਆਂ ਦੀ ਹਾਲਤ ਸਥਿਰ ਹੈ ਅਤੇ ਕੋਈ ਜਾਨੀ ਨੁਕਸਾਨ ਹੁਣ ਤੱਕ ਸਾਹਮਣੇ ਨਹੀਂ ਆਇਆ।
ਕਾਰਨਾਂ ਦੀ ਜਾਂਚ ਜਾਰੀ
ਪ੍ਰਸ਼ਾਸਨ ਨੇ ਹਾਦਸੇ ਦੇ ਮੂਲ ਕਾਰਨ ਪਤਾ ਕਰਨ ਲਈ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਨਿਰਮਾਣ ਕੰਪਨੀ ਦੀ ਲਾਪਰਵਾਹੀ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ।
ਇਸ ਹਾਦਸੇ ਨੇ ਇੱਕ ਵਾਰ ਫਿਰ ਨਿਰਮਾਣ ਸਾਈਟਾਂ ‘ਤੇ ਸੁਰੱਖਿਆ ਪ੍ਰਬੰਧਾਂ ਨੂੰ ਲੈ ਕੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
