ਫਗਵਾੜਾ: (ਜਗਦੇਵ ਰੰਚਨਾਂ) :ਜਲੰਧਰ-ਫਗਵਾੜਾ ਨੈਸ਼ਨਲ ਹਾਈਵੇ ‘ਤੇ ਬੀਤੀ ਦੇਰ ਰਾਤ ਵਾਪਰੇ ਇੱਕ ਭਿਆਨਕ ਸੜਕ ਹਾਦਸੇ ਨੇ ਇੱਕ ਪਰਿਵਾਰ ਅਤੇ ਦੋ ਨੌਜਵਾਨਾਂ ਦੀ ਜ਼ਿੰਦਗੀ ਹਿਲਾ ਕੇ ਰੱਖ ਦਿੱਤੀ। ਲਵਲੀ ਯੂਨੀਵਰਸਿਟੀ ਨੇੜੇ ਦੋ ਕਾਰਾਂ ਅਤੇ ਇੱਕ ਸਾਈਕਲ ਦੀ ਟੱਕਰ ਵਿਚ ਯੂਨੀਵਰਸਿਟੀ ਦੇ ਇੱਕ ਵਿਦਿਆਰਥੀ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦਕਿ ਕਈ ਲੋਕ ਜ਼ਖ਼ਮੀ ਹੋ ਗਏ।
ਪੁਲਿਸ ਅਨੁਸਾਰ, ਮ੍ਰਿਤਕ ਵਿਦਿਆਰਥੀ ਆਪਣੇ ਦੋਸਤ ਨਾਲ ਬਾਈਕ ‘ਤੇ ਜਲੰਧਰ ਵੱਲ ਜਾ ਰਿਹਾ ਸੀ, ਜਦੋਂ ਹਾਈਵੇ ‘ਤੇ ਪਹਿਲਾਂ ਤੋਂ ਲੱਗੀ ਭੀੜ ਅਤੇ ਹਾਦਸੇ ਕਾਰਨ ਵਾਹਨਾਂ ਵਿੱਚ ਟੱਕਰ ਹੋ ਗਈ। ਟੱਕਰ ਇਤਨੀ ਜ਼ੋਰਦਾਰ ਸੀ ਕਿ ਇੱਕ ਕਾਰ ਨੂੰ ਅੱਗ ਵੀ ਲੱਗ ਗਈ।
ਸੜਕ ਸੁਰੱਖਿਆ ਫੋਰਸ ਦੇ ਏ.ਐਸ.ਆਈ. ਬਲਜੀਤ ਰਾਮ ਨੇ ਦੱਸਿਆ ਕਿ ਉਹ ਰੁਟੀਨ ਗਸ਼ਤ ‘ਤੇ ਸਨ। ਰਸਤੇ ਵਿੱਚ ਉਨ੍ਹਾਂ ਨੇ ਇੱਕ ਪਲਟੀ ਹੋਈ ਕਾਰ ਨੂੰ ਵੇਖਿਆ, ਜਿਸ ਵਿੱਚ ਪਤੀ, ਪਤਨੀ ਤੇ ਬੱਚਾ ਸਵਾਰ ਸਨ। ਤਿੰਨੋਂ ਨੂੰ ਤੁਰੰਤ ਦੂਜੇ ਵਾਹਨ ਰਾਹੀਂ ਜਲੰਧਰ ਭੇਜਿਆ ਗਿਆ। ਹਾਦਸੇ ਕਾਰਨ ਟ੍ਰੈਫਿਕ ਹੌਲੀ ਹੋਈ ਤਾਂ ਪਿੱਛੇ ਤੋਂ ਵਾਹਨ ਸਿੰਕੜੇ ਹੋ ਗਏ ਅਤੇ ਇਸ ਦੌਰਾਨ ਹੋਰ ਟੱਕਰ ਹੋਈ।
ਫਗਵਾੜਾ ਤੋਂ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਬੁਲਾਈ ਗਈਆਂ ਅਤੇ ਅੱਗ ‘ਤੇ ਕਾਬੂ ਪਾਇਆ ਗਿਆ। ਤਿੰਨ ਜ਼ਖ਼ਮੀ ਲੋਕਾਂ ਨੂੰ ਸਿਵਲ ਹਸਪਤਾਲ ਫਗਵਾੜਾ ਭੇਜਿਆ ਗਿਆ, ਜਿੱਥੇ ਇੱਕ ਡਾਕਟਰ ਨੇ ਪੁਸ਼ਟੀ ਕੀਤੀ ਕਿ ਇਲਾਜ ਦੌਰਾਨ ਇੱਕ ਨੌਜਵਾਨ ਦੀ ਮੌਤ ਹੋ ਗਈ, ਜਦਕਿ ਦੂਜਾ ਗੰਭੀਰ ਜ਼ਖ਼ਮੀ ਹੈ।
ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਹਾਦਸੇ ਦੀ ਵਜ੍ਹਾ ਵਧੇ ਟ੍ਰੈਫਿਕ ਅਤੇ ਬੇਤਹਾਸਾ ਰਫ਼ਤਾਰ ਨੂੰ ਮੰਨਿਆ ਜਾ ਰਿਹਾ ਹੈ।
