14 ਜੁਲਾਈ ਸ਼ਹੀਦ-ਏ-ਆਜ਼ਮ:ਸਪੇਨ ਦੇ ਨੌਜਵਾਨ ਸਟਾਰ ਫੁੱਟਬਾਲਰ ਲਾਮਿਨ ਯਾਮਾਲ ਨੇ ਵਿਸ਼ਵ ਕੱਪ ਸੈਮੀਫਾਈਨਲ ਤੋਂ ਪਹਿਲਾਂ ਸਪੱਸ਼ਟ ਕੀਤਾ ਹੈ ਕਿ ਫਰਾਂਸ ਖ਼ਿਲਾਫ਼ ਮੁਕਾਬਲੇ ਨੂੰ ਲੈ ਕੇ ਉਨ੍ਹਾਂ ਦੇ ਮਨ ਵਿੱਚ ਕਿਸੇ ਵੀ ਤਰ੍ਹਾਂ ਦਾ ਡਰ ਨਹੀਂ ਹੈ। 19ਵਾਂ ਜਨਮਦਿਨ ਮਨਾਉਣ ਤੋਂ ਬਾਅਦ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਯਾਮਾਲ ਨੇ ਕਿਹਾ ਕਿ ਸਪੇਨ ਯੂਰਪੀ ਚੈਂਪੀਅਨ ਹੈ ਅਤੇ ਟੀਮ ਪੂਰੇ ਆਤਮਵਿਸ਼ਵਾਸ ਨਾਲ ਮੈਦਾਨ ਵਿੱਚ ਉਤਰੇਗੀ।
ਪਿਛਲੇ ਹਫ਼ਤੇ ਬੈਲਜੀਅਮ ਨੂੰ 2-1 ਨਾਲ ਹਰਾਉਣ ਤੋਂ ਬਾਅਦ ਯਾਮਾਲ ਦੇ ਇਸ ਬਿਆਨ ਨੇ ਕਾਫ਼ੀ ਚਰਚਾ ਬਟੋਰੀ ਸੀ ਕਿ “ਫਰਾਂਸ ਨੂੰ ਸਪੇਨ ਤੋਂ ਡਰਨਾ ਚਾਹੀਦਾ ਹੈ।” ਇਸ ‘ਤੇ ਸਫ਼ਾਈ ਦਿੰਦਿਆਂ ਉਨ੍ਹਾਂ ਕਿਹਾ, “ਮੈਨੂੰ ਪੁੱਛਿਆ ਗਿਆ ਸੀ ਕਿ ਕੀ ਮੈਂ ਫਰਾਂਸ ਤੋਂ ਡਰਦਾ ਹਾਂ। ਮੈਂ ਕਿਹਾ ਸੀ ਕਿ ਨਹੀਂ। ਅਸੀਂ ਯੂਰਪੀ ਚੈਂਪੀਅਨ ਹਾਂ। ਇਹ ਸਿਰਫ਼ ਫੁੱਟਬਾਲ ਹੈ।”
ਯਾਮਾਲ ਨੇ ਦੱਸਿਆ ਕਿ ਆਪਣੇ 19ਵੇਂ ਜਨਮਦਿਨ ‘ਤੇ ਉਨ੍ਹਾਂ ਨੇ ਹੀਰਿਆਂ ਨਾਲ ਜੜਿਆ ਇੱਕ ਹਾਰ ਖਰੀਦਿਆ, ਪਰ ਅਸਲ ਤੋਹਫ਼ਾ ਸਪੇਨ ਨੂੰ ਵਿਸ਼ਵ ਕੱਪ ਦੇ ਫਾਈਨਲ ਵਿੱਚ ਪਹੁੰਚਾਉਣਾ ਹੋਵੇਗਾ।
ਉਨ੍ਹਾਂ ਕਿਹਾ, “ਮੈਨੂੰ ਅਜੇ ਤੱਕ ਬਹੁਤ ਤੋਹਫ਼ੇ ਨਹੀਂ ਮਿਲੇ। ਮੇਰੇ ਲਈ ਸਭ ਤੋਂ ਵਧੀਆ ਤੋਹਫ਼ਾ ਮੰਗਲਵਾਰ ਨੂੰ ਜਿੱਤ ਅਤੇ ਫਾਈਨਲ ਲਈ ਕੁਆਲੀਫਾਈ ਕਰਨਾ ਹੋਵੇਗਾ।”
ਇਸ ਵਿਸ਼ਵ ਕੱਪ ਵਿੱਚ ਯਾਮਾਲ ਹੁਣ ਤੱਕ ਸਿਰਫ਼ ਇੱਕ ਗੋਲ ਹੀ ਕਰ ਸਕੇ ਹਨ, ਪਰ ਉਨ੍ਹਾਂ ਨੂੰ ਭਰੋਸਾ ਹੈ ਕਿ ਫਰਾਂਸ ਖ਼ਿਲਾਫ਼ ਉਹ ਆਪਣਾ ਗੋਲਾਂ ਦਾ ਖਾਤਾ ਹੋਰ ਅੱਗੇ ਵਧਾਉਣਗੇ।
ਉਨ੍ਹਾਂ ਕਿਹਾ, “ਮੈਂ ਗੋਲ ਕਰਨ ਬਾਰੇ ਨਹੀਂ ਸੋਚਦਾ, ਪਰ ਅਜਿਹੇ ਵੱਡੇ ਮੈਚ ਵਿੱਚ ਗੋਲ ਕਰਨਾ ਹਮੇਸ਼ਾ ਖਾਸ ਹੁੰਦਾ ਹੈ। ਮੈਂ ਇਸ ਚੁਣੌਤੀ ਲਈ ਤਿਆਰ ਹਾਂ। ਇਸੇ ਲਈ ਮੈਂ ਇੱਥੇ ਆਇਆ ਹਾਂ।”
ਯਾਮਾਲ ਨੇ ਕਿਹਾ ਕਿ ਫਰਾਂਸ ਅਤੇ ਸਪੇਨ ਵਿਚਾਲੇ ਹੋਣ ਵਾਲਾ ਇਹ ਸੈਮੀਫਾਈਨਲ ਉਹ ਮੈਚ ਹੈ, ਜਿਸ ਦੀ ਦੁਨੀਆ ਭਰ ਦੇ ਫੁੱਟਬਾਲ ਪ੍ਰਸ਼ੰਸਕ ਬੇਸਬਰੀ ਨਾਲ ਉਡੀਕ ਕਰ ਰਹੇ ਹਨ ਅਤੇ ਦਰਸ਼ਕਾਂ ਨੂੰ ਇੱਕ ਸ਼ਾਨਦਾਰ ਮੁਕਾਬਲਾ ਦੇਖਣ ਨੂੰ ਮਿਲੇਗਾ।
