ਵਾਸ਼ਿੰਗਟਨ ਡੀ.ਸੀ., 21 ਜੁਲਾਈ, 2026 (ਹਰਸ਼ਪ੍ਰੀਤ ਕੌਰ): ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਜੇਡੀ ਵੈਂਸ (JD Vance) ਅਤੇ ਉਨ੍ਹਾਂ ਦੀ ਪਤਨੀ, ਸੈਕਿੰਡ ਲੇਡੀ ਊਸ਼ਾ ਦੇ ਘਰ ਐਤਵਾਰ ਨੂੰ ਚੌਥੇ ਬੱਚੇ ਨੇ ਜਨਮ ਲਿਆ।
ਉਪ ਰਾਸ਼ਟਰਪਤੀ ਨੇ ‘X’ (ਪਹਿਲਾਂ ਟਵਿੱਟਰ) ‘ਤੇ ਇੱਕ ਪੋਸਟ ਰਾਹੀਂ ਇਸ ਦਾ ਐਲਾਨ ਕੀਤਾ।
ਉਨ੍ਹਾਂ ਲਿਖਿਆ, “ਸਾਨੂੰ ਇਹ ਦੱਸਦਿਆਂ ਬਹੁਤ ਖ਼ੁਸ਼ੀ ਹੋ ਰਹੀ ਹੈ ਕਿ ਅੱਜ ਸਵੇਰੇ ਸਾਡੇ ਘਰ ਬੇਟੇ, ਐਲਿਕ ਨੀਲ ਵੈਂਸ (Alec Neel Vance) ਨੇ ਜਨਮ ਲਿਆ ਹੈ। ਊਸ਼ਾ ਅਤੇ ਬੱਚਾ ਦੋਵੇਂ ਠੀਕ-ਠਾਕ ਅਤੇ ਸਿਹਤਮੰਦ ਹਨ, ਅਤੇ ਸਾਡੇ ਬਾਕੀ ਬੱਚੇ ਆਪਣੇ ਛੋਟੇ ਭਰਾ ਨੂੰ ਮਿਲ ਕੇ ਬਹੁਤ ਖ਼ੁਸ਼ ਹਨ।”
ਵੈਂਸ ਨੇ ਆਪਣੀ ਪੋਸਟ ਵਿੱਚ ਵਾਲਟਰ ਰੀਡ ਮੈਡੀਕਲ ਸੈਂਟਰ ਅਤੇ ਵ੍ਹਾਈਟ ਹਾਊਸ ਮੈਡੀਕਲ ਯੂਨਿਟ ਦੇ ਮਿਲਟਰੀ ਡਾਕਟਰਾਂ ਅਤੇ ਸਟਾਫ਼ ਮੈਂਬਰਾਂ ਦਾ ਧੰਨਵਾਦ ਕੀਤਾ।
2014 ਤੋਂ ਵਿਆਹੇ ਇਸ ਜੋੜੇ ਦੇ ਪਹਿਲਾਂ ਤੋਂ ਦੋ ਵੱਡੇ ਬੇਟੇ — ਈਵਾਨ (ਉਮਰ 9 ਸਾਲ) ਅਤੇ ਵਿਵੇਕ (ਉਮਰ 6 ਸਾਲ) ਅਤੇ ਇੱਕ ਬੇਟੀ ਮੀਰਾਬੇਲ (ਉਮਰ 4 ਸਾਲ) ਹਨ।
ਸੀਬੀਐਸ (CBS) ਨਿਊਜ਼ ਦੀ ਰਿਪੋਰਟ ਅਨੁਸਾਰ, ਆਧੁਨਿਕ ਇਤਿਹਾਸ ਵਿੱਚ ਇਹ ਪਹਿਲੀ ਵਾਰ ਹੈ ਜਦੋਂ ਦੇਸ਼ ਦੇ ਉਪ ਰਾਸ਼ਟਰਪਤੀ ਦੇ ਪਰਿਵਾਰ ਵਿੱਚ ਅਹੁਦੇ ‘ਤੇ ਰਹਿੰਦਿਆਂ ਕਿਸੇ ਬੱਚੇ ਦਾ ਜਨਮ ਹੋਇਆ ਹੈ।
ਮੀਡੀਆ ਅਦਾਰੇ ਅਨੁਸਾਰ, ਇਸ ਤੋਂ ਪਹਿਲਾਂ ਅਜਿਹੀ ਘਟਨਾ 156 ਸਾਲ ਪਹਿਲਾਂ 1870 ਵਿੱਚ ਵਾਪਰੀ ਸੀ, ਜਦੋਂ ਯੂਲਿਸਿਸ ਐਸ. ਗ੍ਰਾਂਟ ਦੇ ਉਪ ਰਾਸ਼ਟਰਪਤੀ ਵਜੋਂ ਸੇਵਾ ਨਿਭਾ ਰਹੇ ਸਕਾਈਲਰ ਕੋਲਫੈਕਸ ਜੂਨੀਅਰ ਅਤੇ ਉਨ੍ਹਾਂ ਦੀ ਪਤਨੀ ਐਲਨ ਦੇ ਘਰ ਬੇਟੇ ਸਕਾਈਲਰ ਕੋਲਫੈਕਸ III ਦਾ ਜਨਮ ਹੋਇਆ ਸੀ।
ਇਸ ਦੌਰਾਨ, ਸੀਐਨਐਨ (CNN) ਨੇ ਮਾਮਲੇ ਤੋਂ ਜਾਣੂ ਲੋਕਾਂ ਦੇ ਹਵਾਲੇ ਨਾਲ ਦੱਸਿਆ ਕਿ ਇਹ ਛੇ ਜਣਿਆਂ ਦਾ ਪਰਿਵਾਰ ਹੁਣ ਉੱਤਰੀ ਵਰਜੀਨੀਆ ਦੇ ਪੇਂਡੂ ਖੇਤਰ ਮਿਡਲਬਰਗ ਵਿੱਚ ਇੱਕ ਆਲੀਸ਼ਾਨ, ਕਰੋੜਾਂ ਡਾਲਰ ਦੀ ਜਾਇਦਾਦ ਦਾ ਹਿੱਸਾ ਕਿਰਾਏ ‘ਤੇ ਲੈ ਕੇ ਉੱਥੇ ਜ਼ਿਆਦਾ ਸਮਾਂ ਬਿਤਾਏਗਾ।
ਸੀਐਨਐਨ ਅਨੁਸਾਰ, ਪਰਿਵਾਰ ਦੇ ਕਰੀਬੀਆਂ ਦਾ ਕਹਿਣਾ ਹੈ ਕਿ ਇਹ ਜਗ੍ਹਾ ਸੈਕਿੰਡ ਲੇਡੀ ਅਤੇ ਬੱਚਿਆਂ ਨੂੰ ਆਮ ਅਤੇ ਸ਼ਾਂਤਮਈ ਮਾਹੌਲ ਦੇਣ ਦੇ ਮਕਸਦ ਨਾਲ ਕਿਰਾਏ ‘ਤੇ ਲਈ ਗਈ ਹੈ। ਉਪ ਰਾਸ਼ਟਰਪਤੀ ਦੇ ਵੀ ਕਦੇ-ਕਦਾਈਂ ਉੱਥੇ ਰਹਿਣ ਦੀ ਉਮੀਦ ਹੈ, ਹਾਲਾਂਕਿ ਪਰਿਵਾਰ ਨੇਵਲ ਓਬਜ਼ਰਵੇਟਰੀ (Naval Observatory) ਵਿਖੇ ਆਪਣੀ ਅਧਿਕਾਰਤ ਰਿਹਾਇਸ਼ ਵੀ ਬਣਾਏ ਰੱਖੇਗਾ।
