ਮੁੰਬਈ, 11 ਸਤੰਬਰ, 2026 (ਹਰਸ਼ਪ੍ਰੀਤ ਕੌਰ) : ਫ਼ਿਲਮ ਆਲੋਚਕ ਅਤੇ ਲੇਖਿਕਾ ਸ਼ੋਭਾ ਡੇ ਨੇ ‘ਮਿਰਜ਼ਾਪੁਰ: ਦ ਮੂਵੀ’ ਬਾਰੇ ਆਪਣੀ ਬੇਬਾਕ ਰਾਏ ਸਾਂਝੀ ਕਰਦਿਆਂ ਫ਼ਿਲਮ ਨੂੰ ਮੁੱਖ ਤੌਰ ’ਤੇ ਪੁਰਸ਼ ਦਰਸ਼ਕਾਂ ਲਈ ਬਣੀ ਹੋਈ ਦੱਸਿਆ ਹੈ। ਉਨ੍ਹਾਂ ਦੀ ਸਮੀਖਿਆ ਵਿੱਚ ਫ਼ਿਲਮ ਦੀ ਕਹਾਣੀ, ਹਿੰਸਾ ਅਤੇ ਪੇਸ਼ਕਾਰੀ ਨੂੰ ਲੈ ਕੇ ਕਈ ਸਵਾਲ ਉਠਾਏ ਗਏ ਹਨ। ਸ਼ੋਭਾ ਡੇ ਨੇ ਦੱਸਿਆ ਕਿ ਫ਼ਿਲਮ ਦੇਖਦੇ ਸਮੇਂ ਉਹ ਲਗਭਗ 15 ਮਿੰਟ ਲਈ ਸੌਂ ਗਈਆਂ। ਉਨ੍ਹਾਂ ਇਹ ਵੀ ਕਿਹਾ ਕਿ ਸਿਨੇਮਾ ਹਾਲ ਵਿੱਚ ਪਿੱਛੇ ਬੈਠੀਆਂ ਦੋ ਔਰਤਾਂ ਦੇ ਖਰਾਟੇ ਸੁਣਾਈ ਦੇ ਰਹੇ ਸਨ। ਹਾਲਾਂਕਿ ਉਨ੍ਹਾਂ ਨੇ ਫ਼ਿਲਮ ਵਿੱਚ ਰਵੀ ਕਿਸ਼ਨ ਅਤੇ ਅਲੀ ਫ਼ਜ਼ਲ ਦੀ ਅਦਾਕਾਰੀ ਦੀ ਖਾਸ ਤੌਰ ’ਤੇ ਸ਼ਲਾਘਾ ਕੀਤੀ। ਉਨ੍ਹਾਂ ਦੇ ਮੁਤਾਬਕ ਫ਼ਿਲਮ ਵਿੱਚ ਕਈ ਹਿੰਸਕ ਦ੍ਰਿਸ਼ ਹਨ, ਪਰ ਇਹ ਹਿੰਸਾ ਕਹਾਣੀ ਨੂੰ ਕਿਸੇ ਸਪੱਸ਼ਟ ਦਿਸ਼ਾ ਵੱਲ ਲੈ ਜਾਂਦੀ ਨਜ਼ਰ ਨਹੀਂ ਆਉਂਦੀ। ਉਨ੍ਹਾਂ ਨੇ ਫ਼ਿਲਮ ਦੇ ਕੁਝ ਅਜੀਬੋ-ਗਰੀਬ ਅਤੇ ਅਣਅਪੇਖਿਤ ਤੱਤਾਂ ਦਾ ਵੀ ਜ਼ਿਕਰ ਕਰਦਿਆਂ ਇਸ ਦੀ ਕਥਾ ਨੂੰ ਲੈ ਕੇ ਆਪਣੀ ਨਿਰਾਸ਼ਾ ਜ਼ਾਹਰ ਕੀਤੀ।
ਖਾਸ ਗੱਲ ਇਹ ਹੈ ਕਿ ਸ਼ੋਭਾ ਡੇ ਨੇ ‘ਮਿਰਜ਼ਾਪੁਰ’ ਦੀ ਪਹਿਲਾਂ ਦੀ ਵੈੱਬ ਸੀਰੀਜ਼ ਨਹੀਂ ਦੇਖੀ। ਇਸ ਕਾਰਨ ਉਨ੍ਹਾਂ ਨੇ ਫ਼ਿਲਮ ਨੂੰ ਇੱਕ standalone ਫ਼ਿਲਮ ਵਜੋਂ ਦੇਖ ਕੇ ਆਪਣੀ ਰਾਏ ਬਣਾਈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਫ਼ਿਲਮ ਦੇ ਕਈ ਹਿੱਸੇ ਆਪਸ ਵਿੱਚ ਪੂਰੀ ਤਰ੍ਹਾਂ ਜੁੜੇ ਹੋਏ ਮਹਿਸੂਸ ਨਹੀਂ ਹੁੰਦੇ। ਸ਼ੋਭਾ ਡੇ ਦੀ ਇਸ ਟਿੱਪਣੀ ਤੋਂ ਬਾਅਦ ‘ਮਿਰਜ਼ਾਪੁਰ: ਦ ਮੂਵੀ’ ਦੀ ਕਹਾਣੀ ਅਤੇ ਪੇਸ਼ਕਾਰੀ ਨੂੰ ਲੈ ਕੇ ਸੋਸ਼ਲ ਮੀਡੀਆ ਅਤੇ ਫ਼ਿਲਮ ਪ੍ਰੇਮੀਆਂ ਵਿਚਾਲੇ ਚਰਚਾ ਤੇਜ਼ ਹੋ ਗਈ ਹੈ।
