ਮੁੰਬਈ, 16 ਨਵੰਬਰ, 2026 (ਕਾਜਲ) : ਰਣਬੀਰ ਕਪੂਰ ਅਤੇ ਯਸ਼ ਦੀ ਮੁੱਖ ਭੂਮਿਕਾ ਵਾਲੀ ਫ਼ਿਲਮ ‘ਰਾਮਾਇਣ : ਪਾਰਟ-1’ ਬਾਕਸ ਆਫਿਸ ’ਤੇ ਲਗਾਤਾਰ ਨਵੇਂ ਰਿਕਾਰਡ ਕਾਇਮ ਕਰ ਰਹੀ ਹੈ। ਰਿਲੀਜ਼ ਦੇ ਸਿਰਫ਼ 11 ਦਿਨਾਂ ਅੰਦਰ ਹੀ ਫ਼ਿਲਮ ਨੇ ਦੁਨੀਆ ਭਰ ਵਿੱਚ 1,384.50 ਕਰੋੜ ਰੁਪਏ ਦੀ ਕੁੱਲ ਕਮਾਈ ਕਰ ਲਈ ਹੈ। ਦੂਜੇ ਐਤਵਾਰ ਨੂੰ ਫ਼ਿਲਮ ਦੇ ਕਾਰੋਬਾਰ ਵਿੱਚ ਹੋਏ ਵਾਧੇ ਨੇ ਇਸ ਦੀ ਸਫਲਤਾ ਨੂੰ ਹੋਰ ਮਜ਼ਬੂਤ ਕੀਤਾ ਹੈ। ਟ੍ਰੇਡ ਵੈੱਬਸਾਈਟ ਸੈਕਨਿਲਕ ਦੇ ਅੰਕੜਿਆਂ ਅਨੁਸਾਰ ਫ਼ਿਲਮ ਨੇ ਆਪਣੇ ਦੂਜੇ ਐਤਵਾਰ ਨੂੰ ਦੁਨੀਆ ਭਰ ਵਿੱਚ ਲਗਭਗ 75 ਕਰੋੜ ਰੁਪਏ ਦਾ ਕਾਰੋਬਾਰ ਕੀਤਾ। ਇਸ ਤੋਂ ਪਹਿਲਾਂ ਦੂਜੇ ਸ਼ਨੀਵਾਰ ਨੂੰ ਫ਼ਿਲਮ ਨੇ 72.90 ਕਰੋੜ ਰੁਪਏ ਦੀ ਕਮਾਈ ਕੀਤੀ ਸੀ। ਇਸ ਤਰ੍ਹਾਂ ਹਫ਼ਤੇ ਦੇ ਆਖਰੀ ਦਿਨ ਫ਼ਿਲਮ ਦੇ ਕਾਰੋਬਾਰ ਵਿੱਚ ਕਰੀਬ 2.9 ਫ਼ੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ। ਭਾਰਤੀ ਬਾਕਸ ਆਫਿਸ ’ਤੇ ਵੀ ਫ਼ਿਲਮ ਦਾ ਪ੍ਰਦਰਸ਼ਨ ਸ਼ਾਨਦਾਰ ਰਿਹਾ ਹੈ। ਹੁਣ ਤੱਕ ਇਸ ਦੀ ਘਰੇਲੂ ਨੈੱਟ ਕਮਾਈ 760.60 ਕਰੋੜ ਰੁਪਏ ਹੋ ਚੁੱਕੀ ਹੈ, ਜਦਕਿ ਭਾਰਤ ਵਿੱਚ ਗ੍ਰਾਸ ਕਲੈਕਸ਼ਨ 909 ਕਰੋੜ ਰੁਪਏ ਦਰਜ ਕੀਤਾ ਗਿਆ ਹੈ। ਵਿਦੇਸ਼ੀ ਬਾਜ਼ਾਰਾਂ ਤੋਂ ਫ਼ਿਲਮ ਨੇ 475.50 ਕਰੋੜ ਰੁਪਏ ਕਮਾਏ ਹਨ।
ਖ਼ਾਸ ਗੱਲ ਇਹ ਹੈ ਕਿ ਦੂਜੇ ਐਤਵਾਰ ਨੂੰ ਫ਼ਿਲਮ ਨੇ ਪਹਿਲੇ ਐਤਵਾਰ ਦੇ ਮੁਕਾਬਲੇ ਕਾਫ਼ੀ ਬਿਹਤਰ ਪ੍ਰਦਰਸ਼ਨ ਕੀਤਾ। ਰਿਲੀਜ਼ ਦੇ ਚੌਥੇ ਦਿਨ ਇਸ ਨੇ 56.15 ਕਰੋੜ ਰੁਪਏ ਦੀ ਕਮਾਈ ਕੀਤੀ ਸੀ, ਜਦਕਿ ਦੂਜੇ ਐਤਵਾਰ ਇਹ ਅੰਕੜਾ ਵਧ ਕੇ 75 ਕਰੋੜ ਰੁਪਏ ਤੱਕ ਪਹੁੰਚ ਗਿਆ। ਦੂਜੇ ਵੀਕੈਂਡ ਦੇ ਤਿੰਨ ਦਿਨਾਂ ਦੌਰਾਨ ਭਾਰਤ ਵਿੱਚ ਫ਼ਿਲਮ ਦਾ ਨੈੱਟ ਕਲੈਕਸ਼ਨ ਲਗਭਗ 196 ਕਰੋੜ ਰੁਪਏ ਰਿਹਾ। 11 ਦਿਨਾਂ ਦੀ ਕਮਾਈ ਦੇ ਆਧਾਰ ’ਤੇ ‘ਰਾਮਾਇਣ : ਪਾਰਟ-1’ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀਆਂ ਹਿੰਦੀ ਫ਼ਿਲਮਾਂ ਦੀ ਸੂਚੀ ਵਿੱਚ ਤੀਜੇ ਸਥਾਨ ’ਤੇ ਪਹੁੰਚ ਗਈ ਹੈ। ਇਸ ਨੇ ‘ਜਵਾਨ’ ਅਤੇ ‘ਪਠਾਨ’ ਵਰਗੀਆਂ ਵੱਡੀਆਂ ਫ਼ਿਲਮਾਂ ਦੇ ਕਮਾਈ ਰਿਕਾਰਡ ਪਿੱਛੇ ਛੱਡ ਦਿੱਤੇ ਹਨ। ਹਾਲਾਂਕਿ ‘ਦੰਗਲ’ ਅਤੇ ‘ਧੁਰੰਧਰ-2’ ਦੀ ਕੁੱਲ ਕਮਾਈ ਅਜੇ ਵੀ ਇਸ ਤੋਂ ਵੱਧ ਦੱਸੀ ਜਾ ਰਹੀ ਹੈ। ਫ਼ਿਲਮ ਦੀ ਲਗਾਤਾਰ ਵਧ ਰਹੀ ਕਮਾਈ ਨੇ ਫ਼ਿਲਮ ਉਦਯੋਗ ਵਿੱਚ ਵੀ ਖ਼ਾਸ ਦਿਲਚਸਪੀ ਪੈਦਾ ਕਰ ਦਿੱਤੀ ਹੈ। ਹੁਣ ਦਰਸ਼ਕਾਂ ਅਤੇ ਫ਼ਿਲਮ ਕਾਰੋਬਾਰ ਨਾਲ ਜੁੜੇ ਲੋਕਾਂ ਦੀਆਂ ਨਜ਼ਰਾਂ ਇਸ ਗੱਲ ’ਤੇ ਹਨ ਕਿ ਆਉਣ ਵਾਲੇ ਦਿਨਾਂ ਵਿੱਚ ਇਹ ਫ਼ਿਲਮ ਹੋਰ ਕਿਹੜੇ ਨਵੇਂ ਬਾਕਸ ਆਫਿਸ ਰਿਕਾਰਡ ਆਪਣੇ ਨਾਮ ਕਰਦੀ ਹੈ।





