ਖੇਡ:17ਜੁਲਾਈ (ਛਤਰਪਾਲ ਸਿੰਘ):ਅਰਜਨਟੀਨਾ ਦੇ ਸਟਾਰ ਫੁੱਟਬਾਲਰ ਲਿਓਨੇਲ ਮੈਸੀ ਨੇ ਟੀਮ ਨੂੰ ਮਿਲ ਰਹੀ ਆਲੋਚਨਾ ਅਤੇ ਪੱਖਪਾਤ ਦੇ ਦੋਸ਼ਾਂ ‘ਤੇ ਆਪਣੀ ਚੁੱਪੀ ਤੋੜਦਿਆਂ ਕਿਹਾ ਹੈ ਕਿ ਅਰਜਨਟੀਨਾ ਦੀ ਸਫਲਤਾ ਕਿਸੇ ਖਾਸ ਮਦਦ ਦਾ ਨਤੀਜਾ ਨਹੀਂ, ਸਗੋਂ ਟੀਮ ਦੀ ਲਗਾਤਾਰ ਮਿਹਨਤ ਅਤੇ ਜੇਤੂ ਸੋਚ ਦਾ ਪ੍ਰਤੀਕ ਹੈ।
ਇੰਗਲੈਂਡ ਖ਼ਿਲਾਫ਼ ਵਿਸ਼ਵ ਕੱਪ ਸੈਮੀਫਾਈਨਲ ਵਿੱਚ 2-1 ਦੀ ਜਿੱਤ ਤੋਂ ਬਾਅਦ ਮੈਸੀ ਨੇ ਕਿਹਾ ਕਿ ਪਿਛਲੇ ਚਾਰ ਸਾਲਾਂ ਦੌਰਾਨ ਅਰਜਨਟੀਨਾ ਨੇ ਆਪਣੇ ਪ੍ਰਦਰਸ਼ਨ ਨਾਲ ਸਾਬਤ ਕੀਤਾ ਹੈ ਕਿ ਉਹ ਦੁਨੀਆ ਦੀਆਂ ਸਰਵੋਤਮ ਟੀਮਾਂ ਵਿੱਚੋਂ ਇੱਕ ਹੈ। ਉਨ੍ਹਾਂ ਕਿਹਾ ਕਿ ਲਗਾਤਾਰ ਦੂਜੀ ਵਾਰ ਵਿਸ਼ਵ ਕੱਪ ਫਾਈਨਲ ਵਿੱਚ ਪਹੁੰਚਣਾ ਕਿਸੇ ਇਤਫ਼ਾਕ ਜਾਂ ਬਾਹਰੀ ਮਦਦ ਨਾਲ ਸੰਭਵ ਨਹੀਂ ਹੁੰਦਾ।
ਸੈਮੀਫਾਈਨਲ ਮੁਕਾਬਲੇ ਵਿੱਚ ਅਰਜਨਟੀਨਾ 85ਵੇਂ ਮਿੰਟ ਤੱਕ 1-0 ਨਾਲ ਪਿੱਛੇ ਸੀ, ਪਰ ਆਖ਼ਰੀ ਪਲਾਂ ਵਿੱਚ ਸ਼ਾਨਦਾਰ ਵਾਪਸੀ ਕਰਦਿਆਂ ਟੀਮ ਨੇ 2-1 ਨਾਲ ਜਿੱਤ ਦਰਜ ਕੀਤੀ। ਇਸ ਜਿੱਤ ਨਾਲ ਅਰਜਨਟੀਨਾ ਨੇ ਫਾਈਨਲ ਵਿੱਚ ਆਪਣੀ ਜਗ੍ਹਾ ਪੱਕੀ ਕਰ ਲਈ, ਜਿੱਥੇ ਉਸਦਾ ਸਾਹਮਣਾ ਸਪੇਨ ਨਾਲ ਹੋਵੇਗਾ।
ਟੂਰਨਾਮੈਂਟ ਦੌਰਾਨ ਅਰਜਨਟੀਨਾ ਦੀਆਂ ਕਈ ਜਿੱਤਾਂ ਤੋਂ ਬਾਅਦ ਕੁਝ ਵਿਰੋਧੀ ਟੀਮਾਂ ਅਤੇ ਪ੍ਰਸ਼ੰਸਕਾਂ ਵੱਲੋਂ ਰੈਫਰੀ ਦੇ ਫ਼ੈਸਲਿਆਂ ‘ਤੇ ਸਵਾਲ ਚੁੱਕੇ ਗਏ ਸਨ। ਸਵਿਟਜ਼ਰਲੈਂਡ ਅਤੇ ਮਿਸਰ ਦੇ ਕੋਚਾਂ ਨੇ ਵੀ ਕੁਝ ਫ਼ੈਸਲਿਆਂ ‘ਤੇ ਨਾਰਾਜ਼ਗੀ ਜ਼ਾਹਰ ਕੀਤੀ ਸੀ। ਹਾਲਾਂਕਿ ਅਰਜਨਟੀਨਾ ਦੇ ਖਿਡਾਰੀਆਂ ਅਤੇ ਕੋਚਿੰਗ ਸਟਾਫ਼ ਨੇ ਇਨ੍ਹਾਂ ਦੋਸ਼ਾਂ ਨੂੰ ਖ਼ਾਰਜ ਕਰ ਦਿੱਤਾ ਹੈ।
ਮੈਸੀ ਨੇ ਕਿਹਾ ਕਿ ਟੀਮ ਨੇ ਮੁਸ਼ਕਲ ਹਾਲਾਤਾਂ ਵਿੱਚ ਵੀ ਹੌਸਲਾ ਨਹੀਂ ਹਾਰਿਆ ਅਤੇ ਹਰ ਮੈਚ ਵਿੱਚ ਜਿੱਤ ਲਈ ਅੰਤ ਤੱਕ ਲੜਾਈ ਲੜੀ। ਉਨ੍ਹਾਂ ਕਿਹਾ ਕਿ ਟੀਮ ਦੀਆਂ ਉਪਲਬਧੀਆਂ ਮੈਦਾਨ ਵਿੱਚ ਕੀਤੇ ਪ੍ਰਦਰਸ਼ਨ ਦੀ ਬਦੌਲਤ ਹਨ ਅਤੇ ਉਹ ਆਲੋਚਨਾਵਾਂ ਦੀ ਬਜਾਏ ਆਪਣੇ ਖੇਡ ‘ਤੇ ਧਿਆਨ ਦੇ ਰਹੇ ਹਨ।
ਅਰਜਨਟੀਨਾ ਦੇ ਕੋਚ ਲਿਓਨੇਲ ਸਕਾਲੋਨੀ ਨੇ ਵੀ ਕਿਹਾ ਕਿ ਆਧੁਨਿਕ ਫੁੱਟਬਾਲ ਵਿੱਚ ਵੀਡੀਓ ਅਸਿਸਟੈਂਟ ਰੈਫਰੀ (VAR) ਦੀ ਮੌਜੂਦਗੀ ਕਾਰਨ ਕਿਸੇ ਟੀਮ ਨੂੰ ਗਲਤ ਤਰੀਕੇ ਨਾਲ ਫ਼ਾਇਦਾ ਪਹੁੰਚਾਉਣਾ ਬਹੁਤ ਮੁਸ਼ਕਲ ਹੈ। ਉਨ੍ਹਾਂ ਕਿਹਾ ਕਿ ਟੀਮ ਦਾ ਧਿਆਨ ਹੁਣ ਸਿਰਫ਼ ਫਾਈਨਲ ਮੁਕਾਬਲੇ ‘ਤੇ ਕੇਂਦਰਿਤ ਹੈ।
ਹੁਣ ਦੁਨੀਆ ਭਰ ਦੇ ਫੁੱਟਬਾਲ ਪ੍ਰੇਮੀਆਂ ਦੀਆਂ ਨਜ਼ਰਾਂ ਐਤਵਾਰ ਨੂੰ ਹੋਣ ਵਾਲੇ ਫਾਈਨਲ ‘ਤੇ ਟਿਕੀਆਂ ਹਨ, ਜਿੱਥੇ ਅਰਜਨਟੀਨਾ ਲਗਾਤਾਰ ਦੂਜਾ ਵਿਸ਼ਵ ਕੱਪ ਖਿਤਾਬ ਜਿੱਤਣ ਲਈ ਮੈਦਾਨ ਵਿੱਚ ਉਤਰੇਗੀ।
