ਅਸਤਾਨਾ (ਕਜ਼ਾਖਿਸਤਾਨ), 31 ਅਕਤੂਬਰ, 2026 (ਸ਼ਹੀਦ-ਏ-ਆਜ਼ਮ-ਬਿਊਰੋ ) : ਭਾਰਤੀ ਕੁਸ਼ਤੀ ਦੇ ਇਤਿਹਾਸ ਵਿੱਚ ਇੱਕ ਨਵਾਂ ਅਧਿਆਏ ਜੁੜ ਗਿਆ ਹੈ। ਭਾਰਤੀ ਪਹਿਲਵਾਨ ਮਨੀਸ਼ਾ ਭੰਵਾਲਾ ਨੇ ਵਿਸ਼ਵ ਕੁਸ਼ਤੀ ਚੈਂਪੀਅਨਸ਼ਿਪ ਵਿੱਚ ਸੋਨ ਤਮਗਾ ਜਿੱਤ ਕੇ ਦੇਸ਼ ਦਾ ਨਾਂਅ ਰੌਸ਼ਨ ਕੀਤਾ ਹੈ। ਸ਼ੁੱਕਰਵਾਰ ਨੂੰ ਹੋਏ ਮਹਿਲਾਵਾਂ ਦੇ 59 ਕਿਲੋਗ੍ਰਾਮ ਵਰਗ ਦੇ ਫਾਈਨਲ ਮੁਕਾਬਲੇ ਵਿੱਚ ਮਨੀਸ਼ਾ ਨੇ ਅਮਰੀਕਾ ਦੀ ਪਹਿਲਵਾਨ ਅਬੀਗੇਲ ਨੇਟੇ ਨੂੰ 8-6 ਨਾਲ ਹਰਾ ਕੇ ਇਤਿਹਾਸਕ ਜਿੱਤ ਦਰਜ ਕੀਤੀ। ਇਸ ਜਿੱਤ ਨਾਲ ਮਨੀਸ਼ਾ ਵਿਸ਼ਵ ਕੁਸ਼ਤੀ ਚੈਂਪੀਅਨਸ਼ਿਪ ਵਿੱਚ ਸੋਨ ਤਮਗਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਪਹਿਲਵਾਨ ਬਣ ਗਈ ਹੈ। ਖਾਸ ਗੱਲ ਇਹ ਰਹੀ ਕਿ ਫਾਈਨਲ ਮੁਕਾਬਲੇ ਵਿੱਚ ਉਹ ਇੱਕ ਸਮੇਂ 0-6 ਨਾਲ ਪਿੱਛੇ ਚੱਲ ਰਹੀ ਸੀ, ਪਰ ਉਸ ਨੇ ਹੌਸਲਾ ਨਹੀਂ ਹਾਰਿਆ ਅਤੇ ਸ਼ਾਨਦਾਰ ਖੇਡ ਦਿਖਾਉਂਦਿਆਂ ਮੁਕਾਬਲਾ ਆਪਣੇ ਨਾਂਅ ਕਰ ਲਿਆ। ਮਨੀਸ਼ਾ ਇਸ ਵਿਸ਼ਵ ਖਿਤਾਬ ਨੂੰ ਜਿੱਤਣ ਵਾਲੀ ਦੂਜੀ ਭਾਰਤੀ ਪਹਿਲਵਾਨ ਵੀ ਬਣ ਗਈ ਹੈ। ਇਸ ਤੋਂ ਪਹਿਲਾਂ ਮਹਾਨ ਪਹਿਲਵਾਨ ਸੁਸ਼ੀਲ ਕੁਮਾਰ ਨੇ 2010 ਵਿੱਚ 66 ਕਿਲੋਗ੍ਰਾਮ ਵਰਗ ਵਿੱਚ ਵਿਸ਼ਵ ਚੈਂਪੀਅਨ ਬਣਨ ਦਾ ਮਾਣ ਹਾਸਲ ਕੀਤਾ ਸੀ।
6 ਅੰਕਾਂ ਨਾਲ ਪਿੱਛੇ ਰਹਿ ਕੇ ਕੀਤੀ ਸ਼ਾਨਦਾਰ ਵਾਪਸੀ
ਫਾਈਨਲ ਮੁਕਾਬਲੇ ਦੀ ਸ਼ੁਰੂਆਤ ਅਮਰੀਕੀ ਪਹਿਲਵਾਨ ਅਬੀਗੇਲ ਨੇਟੇ ਨੇ ਹਮਲਾਵਰ ਅੰਦਾਜ਼ ਵਿੱਚ ਕੀਤੀ। ਉਸ ਨੇ ਮਨੀਸ਼ਾ ’ਤੇ ਦਬਾਅ ਬਣਾਉਂਦਿਆਂ ਸ਼ੁਰੂਆਤੀ ਦੌਰ ਵਿੱਚ 6-0 ਦੀ ਬੜ੍ਹਤ ਹਾਸਲ ਕਰ ਲਈ। ਇਸ ਤੋਂ ਬਾਅਦ ਮੁਕਾਬਲਾ ਮਨੀਸ਼ਾ ਲਈ ਕਾਫ਼ੀ ਚੁਣੌਤੀਪੂਰਨ ਬਣ ਗਿਆ। ਪਰ ਦੂਜੇ ਦੌਰ ਵਿੱਚ ਮਨੀਸ਼ਾ ਨੇ ਆਪਣੀ ਖੇਡ ਦਾ ਰੁਖ ਬਦਲ ਦਿੱਤਾ। ਉਸ ਨੇ ਵਿਰੋਧੀ ਪਹਿਲਵਾਨ ਦੇ ਹਮਲਿਆਂ ਦਾ ਮਜ਼ਬੂਤੀ ਨਾਲ ਬਚਾਅ ਕੀਤਾ ਅਤੇ ਮੌਕਾ ਮਿਲਦਿਆਂ ਟੇਕਡਾਊਨ ਰਾਹੀਂ ਅੰਕ ਹਾਸਲ ਕੀਤੇ। ਲਗਾਤਾਰ ਸ਼ਾਨਦਾਰ ਦਾਅ ਲਗਾਉਂਦਿਆਂ ਉਸ ਨੇ ਸਕੋਰ 6-6 ਨਾਲ ਬਰਾਬਰ ਕਰ ਦਿੱਤਾ। ਇਸ ਤੋਂ ਬਾਅਦ ਮਨੀਸ਼ਾ ਨੇ ਹੋਰ ਦੋ ਅੰਕ ਹਾਸਲ ਕਰਕੇ 8-6 ਦੀ ਬੜ੍ਹਤ ਬਣਾ ਲਈ। ਮੁਕਾਬਲੇ ਦੇ ਆਖਰੀ 27 ਸਕਿੰਟਾਂ ਵਿੱਚ ਅਬੀਗੇਲ ਨੇ ਸਕੋਰ ਬਰਾਬਰ ਕਰਨ ਦੀ ਪੂਰੀ ਕੋਸ਼ਿਸ਼ ਕੀਤੀ, ਪਰ ਮਨੀਸ਼ਾ ਨੇ ਉਸ ਨੂੰ ਕੋਈ ਮੌਕਾ ਨਹੀਂ ਦਿੱਤਾ। ਜਿਵੇਂ ਹੀ ਫਾਈਨਲ ਦੀ ਸੀਟੀ ਵੱਜੀ, ਮਨੀਸ਼ਾ ਨੇ ਜਿੱਤ ਦੀ ਖੁਸ਼ੀ ਵਿੱਚ ਕੁਸ਼ਤੀ ਦੇ ਮੈਟ ਨੂੰ ਚੁੰਮ ਕੇ ਆਪਣੇ ਇਤਿਹਾਸਕ ਪਲ ਦਾ ਜਸ਼ਨ ਮਨਾਇਆ।
ਭਾਰਤੀ ਮਹਿਲਾ ਕੁਸ਼ਤੀ ਲਈ ਵੀ ਇਤਿਹਾਸਕ ਚੈਂਪੀਅਨਸ਼ਿਪ
ਇਹ ਵਿਸ਼ਵ ਚੈਂਪੀਅਨਸ਼ਿਪ ਭਾਰਤੀ ਮਹਿਲਾ ਕੁਸ਼ਤੀ ਟੀਮ ਲਈ ਵੀ ਖਾਸ ਰਹੀ, ਕਿਉਂਕਿ ਪਹਿਲੀ ਵਾਰ ਭਾਰਤ ਦੀਆਂ ਤਿੰਨ ਮਹਿਲਾ ਪਹਿਲਵਾਨਾਂ ਨੇ ਵਿਸ਼ਵ ਚੈਂਪੀਅਨਸ਼ਿਪ ਦੇ ਫਾਈਨਲ ਵਿੱਚ ਜਗ੍ਹਾ ਬਣਾਈ। ਮਨੀਸ਼ਾ ਭੰਵਾਲਾ ਨੇ ਸੋਨ ਤਮਗਾ ਜਿੱਤਿਆ, ਜਦਕਿ ਵੀਰਵਾਰ ਨੂੰ ਨੀਲਮ ਸਿਰੋਹੀ ਨੇ 50 ਕਿਲੋਗ੍ਰਾਮ ਵਰਗ ਅਤੇ ਕਾਜਲ ਢੋਚਕ ਨੇ 76 ਕਿਲੋਗ੍ਰਾਮ ਵਰਗ ਦੇ ਫਾਈਨਲ ਵਿੱਚ ਹਾਰ ਤੋਂ ਬਾਅਦ ਚਾਂਦੀ ਦੇ ਤਮਗੇ ਹਾਸਲ ਕੀਤੇ। ਮਨੀਸ਼ਾ ਦੀ ਇਹ ਜਿੱਤ ਨਾ ਸਿਰਫ਼ ਭਾਰਤੀ ਕੁਸ਼ਤੀ ਲਈ ਵੱਡੀ ਪ੍ਰਾਪਤੀ ਹੈ, ਸਗੋਂ ਦੇਸ਼ ਦੀਆਂ ਨੌਜਵਾਨ ਮਹਿਲਾ ਖਿਡਾਰਨਾਂ ਲਈ ਵੀ ਪ੍ਰੇਰਣਾ ਬਣੇਗੀ। ਛੇ ਅੰਕਾਂ ਦੀ ਪਿੱਛੜ ਤੋਂ ਵਾਪਸੀ ਕਰਕੇ ਵਿਸ਼ਵ ਚੈਂਪੀਅਨ ਬਣਨ ਵਾਲੀ ਮਨੀਸ਼ਾ ਨੇ ਸਾਬਤ ਕਰ ਦਿੱਤਾ ਕਿ ਹੌਸਲੇ ਅਤੇ ਦ੍ਰਿੜ੍ਹ ਇਰਾਦੇ ਨਾਲ ਵੱਡੀ ਤੋਂ ਵੱਡੀ ਚੁਣੌਤੀ ਨੂੰ ਵੀ ਜਿੱਤ ਵਿੱਚ ਬਦਲਿਆ ਜਾ ਸਕਦਾ ਹੈ।
