ਆਸਟ੍ਰੇਲੀਆ, 3 ਸਤੰਬਰ 2026 (ਹਰਸ਼ਪ੍ਰੀਤ ਕੌਰ): ਪੰਜਾਬੀ ਗਾਇਕ ਕਰਨ ਔਜਲਾ ਦੀ ਆਸਟ੍ਰੇਲੀਆ ਵਾਪਸੀ ’ਤੇ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਵਿੱਚ ਭਾਰੀ ਉਤਸ਼ਾਹ ਦੇਖਣ ਨੂੰ ਮਿਲਿਆ। ਵੀਜ਼ਾ ਮਨਜ਼ੂਰੀ ਵਿੱਚ ਹੋਈ ਦੇਰੀ ਕਾਰਨ ਉਨ੍ਹਾਂ ਦਾ ਆਸਟ੍ਰੇਲੀਆ ਦੌਰਾ ਕੁਝ ਸਮੇਂ ਲਈ ਅਨਿਸ਼ਚਿਤ ਹੋ ਗਿਆ ਸੀ ਅਤੇ ਪਰਥ ਦਾ ਪਹਿਲਾ ਸ਼ੋਅ ਵੀ ਮੁਲਤਵੀ ਕਰਨਾ ਪਿਆ ਸੀ। ਹੁਣ ਵੀਜ਼ਾ ਮਨਜ਼ੂਰ ਹੋਣ ਤੋਂ ਬਾਅਦ ਕਰਨ ਔਜਲਾ ਦਾ ਪੰਜ ਸ਼ਹਿਰਾਂ ਵਾਲਾ P-Pop Culture World Tour ਮੁੜ ਪਟੜੀ ’ਤੇ ਆ ਗਿਆ ਹੈ। ਨਵੀਂ ਯੋਜਨਾ ਮੁਤਾਬਕ ਟੂਰ ਦੀ ਸ਼ੁਰੂਆਤ ਐਡੀਲੇਡ ਤੋਂ ਹੋਵੇਗੀ, ਜਿਸ ਤੋਂ ਬਾਅਦ ਮੈਲਬਰਨ, ਸਿਡਨੀ ਅਤੇ ਪਰਥ ਵਿੱਚ ਪ੍ਰੋਗਰਾਮ ਹੋਣਗੇ। ਔਜਲਾ ਦੇ ਆਸਟ੍ਰੇਲੀਆ ਪਹੁੰਚਣ ’ਤੇ Assistant Minister for Citizenship, Customs and Multicultural Affairs Julian Hill ਵੱਲੋਂ ਵੀ ਉਨ੍ਹਾਂ ਦਾ ਸਵਾਗਤ ਕੀਤਾ ਗਿਆ। ਵੀਜ਼ਾ ਮਾਮਲੇ ਸਬੰਧੀ ਪ੍ਰਮੋਟਰ Live Nation ਨੇ ਪੁਸ਼ਟੀ ਕੀਤੀ ਕਿ ਕਰਨ ਔਜਲਾ ਦਾ ਆਸਟ੍ਰੇਲੀਆਈ ਵੀਜ਼ਾ ਮਨਜ਼ੂਰ ਹੋ ਗਿਆ ਹੈ। ਇਸ ਤੋਂ ਪਹਿਲਾਂ ਗਾਇਕ ਨੇ ਪਰਥ ਸ਼ੋਅ ਮੁਲਤਵੀ ਹੋਣ ’ਤੇ ਆਪਣੇ ਪ੍ਰਸ਼ੰਸਕਾਂ ਤੋਂ ਮੁਆਫ਼ੀ ਮੰਗੀ ਸੀ। ਰਿਪੋਰਟਾਂ ਮੁਤਾਬਕ ਆਸਟ੍ਰੇਲੀਆਈ ਇਮੀਗ੍ਰੇਸ਼ਨ ਅਧਿਕਾਰੀਆਂ ਵੱਲੋਂ ਔਜਲਾ ਤੋਂ ਵਾਧੂ ਦਸਤਾਵੇਜ਼ ਅਤੇ ਜਾਣਕਾਰੀ ਮੰਗੀ ਗਈ ਸੀ। ਉਨ੍ਹਾਂ ਦੇ ਨੁਮਾਇੰਦਿਆਂ ਨੇ ਦਾਅਵਾ ਕੀਤਾ ਕਿ ਇਹ ਮਾਮਲਾ ਗਲਤ ਪਛਾਣ ਕਾਰਨ ਪੈਦਾ ਹੋਇਆ। ਇਹ ਮਾਮਲਾ ਓਨਟਾਰੀਓ ਵਿੱਚ ਮਈ 2024 ਦੌਰਾਨ ਗ੍ਰਿਫ਼ਤਾਰ ਕੀਤੇ ਗਏ ਇੱਕ ਵਿਅਕਤੀ ਜਸਕਰਨ ਸਿੰਘ ਨਾਲ ਜੋੜਿਆ ਗਿਆ ਸੀ। ਕਰਨ ਔਜਲਾ ਦਾ ਪੂਰਾ ਨਾਮ ਵੀ ਜਸਕਰਨ ਸਿੰਘ ਔਜਲਾ ਹੈ। ਹਾਲਾਂਕਿ, ਗਾਇਕ ਦੇ ਨੁਮਾਇੰਦਿਆਂ ਨੇ ਦੋਵਾਂ ਵਿਅਕਤੀਆਂ ਦੀ ਪਛਾਣ, ਉਮਰ ਅਤੇ ਹਾਲਾਤਾਂ ਵਿੱਚ ਅੰਤਰ ਹੋਣ ਦੀ ਗੱਲ ਕਹੀ। ਔਜਲਾ ਇਸ ਸਮੇਂ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਰਹਿੰਦੇ ਹਨ ਅਤੇ ਇਸ ਤੋਂ ਪਹਿਲਾਂ ਵੀ ਉਨ੍ਹਾਂ ਨੂੰ ਆਸਟ੍ਰੇਲੀਆ ਦਾ ਵੀਜ਼ਾ ਮਿਲ ਚੁੱਕਾ ਹੈ। ਉਹ 2024 ਵਿੱਚ ਵੀ ਆਸਟ੍ਰੇਲੀਆ ਵਿੱਚ ਸਫਲ ਟੂਰ ਕਰ ਚੁੱਕੇ ਹਨ। ਵੀਜ਼ਾ ਮਨਜ਼ੂਰੀ ਤੋਂ ਬਾਅਦ ਹੁਣ ਕਰਨ ਔਜਲਾ ਦੇ ਆਸਟ੍ਰੇਲੀਆਈ ਪ੍ਰਸ਼ੰਸਕ ਉਨ੍ਹਾਂ ਦੇ ਆਉਣ ਵਾਲੇ ਲਾਈਵ ਸ਼ੋਅਜ਼ ਦੀ ਬੇਸਬਰੀ ਨਾਲ ਉਡੀਕ ਕਰ ਰਹੇ ਹਨ।
