ਮਨੋਰੰਜਨ, 21 ਜੁਲਾਈ, 2026 (ਹਰਸ਼ਪ੍ਰੀਤ ਕੌਰ):ਤਮਿਲਨਾਡੂ ਦੇ ਮੁੱਖ ਮੰਤਰੀ ਵਿਜੇ ਦੀ ਮੁੱਖ ਭੂਮਿਕਾ ਵਾਲੀ ਅਤੇ ਨਿਰਦੇਸ਼ਕ ਐਚ. ਵਿਨੋਦ ਦੀ ਫਿਲਮ ‘ਜਨ ਨਾਇਗਨ’ ਦੀ ਵਿਸ਼ਵ ਵਿਆਪੀ ਰਿਲੀਜ਼ ਵਿੱਚ 48 ਘੰਟਿਆਂ ਤੋਂ ਵੀ ਘੱਟ ਸਮਾਂ ਬਾਕੀ ਹੈ। ਇਸ ਦੇ ਨਾਲ ਹੀ “ਥਲਾਪਤੀ” ਦਾ ਖੁਮਾਰ ਇੱਕ ਵਾਰ ਫਿਰ ਪੂਰੇ ਦੇਸ਼ ‘ਚ ਸਿਰ ਚੜ੍ਹ ਕੇ ਬੋਲ ਰਿਹਾ ਹੈ—ਸ਼ਾਇਦ ਆਖਰੀ ਵਾਰ। ਅਦਾਕਾਰ ਤੋਂ ਰਾਜਨੇਤਾ ਬਣੇ ਵਿਜੇ ਦੀ ਇਹ ਆਖਰੀ ਫਿਲਮ (Swansong) ਮੰਨੀ ਜਾ ਰਹੀ ਹੈ, ਜੋ ਵੀਰਵਾਰ, 23 ਜੁਲਾਈ ਨੂੰ ਸਿਨੇਮਾਘਰਾਂ ‘ਚ ਰਿਲੀਜ਼ ਹੋਵੇਗੀ। ਕਈ ਰਾਜਾਂ ‘ਚ ਇਸ ਦੇ ਪਹਿਲੇ ਸ਼ੋਅ ਸਵੇਰੇ 6 ਵਜੇ ਤੋਂ ਹੀ ਸ਼ੁਰੂ ਹੋ ਜਾਣਗੇ।
‘ਜਨ ਨਾਇਗਨ’ ਦਿਨ 1 ਦੀ ਅਡਵਾਂਸ ਬੁਕਿੰਗ
ਇਸ ਸਿਆਸੀ ਐਕਸ਼ਨ ਡਰਾਮਾ ਫਿਲਮ ਨੂੰ ਜ਼ਬਰਦਸਤ ਅਡਵਾਂਸ ਬੁਕਿੰਗ ਮਿਲ ਰਹੀ ਹੈ ਅਤੇ ਇਸ ਨੇ ਘਰੇਲੂ ਬਾਜ਼ਾਰ ‘ਚ ਆਪਣੇ ਪਹਿਲੇ ਦਿਨ ਲਈ 15 ਕਰੋੜ ਰੁਪਏ ਤੋਂ ਵੱਧ ਦੀ ਕਮਾਈ ਕਰ ਲਈ ਹੈ। ਇੰਡਸਟਰੀ ਟ੍ਰੈਕਰ Sacnilk ਅਨੁਸਾਰ, ਮੰਗਲਵਾਰ, 21 ਜੁਲਾਈ ਦੀ ਸਵੇਰ 9 ਵਜੇ ਤੱਕ, ‘ਜਨ ਨਾਇਗਨ’ ਦੀ ਪਹਿਲੇ ਦਿਨ ਦੀ ਅਡਵਾਂਸ ਬੁਕਿੰਗ (ਬਲਾਕ ਕੀਤੀਆਂ ਸੀਟਾਂ ਸਮੇਤ) 15.09 ਕਰੋੜ ਰੁਪਏ ਤੱਕ ਪਹੁੰਚ ਗਈ ਸੀ।
ਫਿਲਮ ਦੇ ਤਮਿਲ ਵਰਜ਼ਨ ਨੇ 5,091 ਸ਼ੋਅਜ਼ ਰਾਹੀਂ 4,17,636 ਟਿਕਟਾਂ ਵੇਚ ਕੇ ਲਗਭਗ 10.22 ਕਰੋੜ ਰੁਪਏ ਕਮਾਏ ਹਨ, ਜਦੋਂ ਕਿ ਤੇਲਗੂ ਅਤੇ ਹਿੰਦੀ ਵਰਜ਼ਨ ਨੇ ਕ੍ਰਮਵਾਰ 12,02,431 ਰੁਪਏ ਅਤੇ 29,210 ਰੁਪਏ ਦੀ ਆਮ ਜਹੀ ਕਮਾਈ ਕੀਤੀ ਹੈ। ਦਿਲਚਸਪ ਗੱਲ ਇਹ ਹੈ ਕਿ ਫਿਲਮ ਦੀ ਕਮਾਈ ਦਾ ਵੱਡਾ ਹਿੱਸਾ ਤਮਿਲਨਾਡੂ (6.74 ਕਰੋੜ ਰੁਪਏ), ਕਰਨਾਟਕ (4.88 ਕਰੋੜ ਰੁਪਏ) ਅਤੇ ਕੇਰਲ (1.8 ਕਰੋੜ ਰੁਪਏ) ਤੋਂ ਆਇਆ ਹੈ।
‘ਲਿਓ’ ਅਤੇ ‘ਗੋਟ’ ਦੇ ਮੁਕਾਬਲੇ ‘ਜਨ ਨਾਇਗਨ’ ਦਾ ਪ੍ਰਦਰਸ਼ਨ
ਐਤਵਾਰ, 19 ਜੁਲਾਈ ਨੂੰ ਟਿਕਟ ਬੁਕਿੰਗ ਸ਼ੁਰੂ ਹੋਣ ਤੋਂ ਬਾਅਦ ਫਿਲਮ ਨੂੰ ਸ਼ਾਨਦਾਰ ਹੁੰਗਾਰਾ ਮਿਲ ਰਿਹਾ ਹੈ, ਪਰ ਬੁਕਿੰਗ ਦਾ ਰੁਝਾਨ ਕੁਝ ਵਿਸ਼ਲੇਸ਼ਕਾਂ ਦੀਆਂ ਉਮੀਦਾਂ ਤੋਂ ਵੱਖਰਾ ਰਿਹਾ ਹੈ। ਜਿੱਥੇ ਕਈਆਂ ਨੂੰ ਉਮੀਦ ਸੀ ਕਿ ਸਾਰੇ ਸ਼ੋਅ ਰਿਕਾਰਡ ਸਮੇਂ ‘ਚ ਵਿਕ ਜਾਣਗੇ, ਉੱਥੇ ਬੁਕਿੰਗਜ਼ ਬਹੁਤ ਤੇਜ਼ੀ ਦੀ ਬਜਾਏ ਹੌਲੀ-ਹੌਲੀ ਵਧ ਰਹੀਆਂ ਹਨ।
ਦਰਅਸਲ, ‘ਜਨ ਨਾਇਗਨ’ ਅਡਵਾਂਸ ਬੁਕਿੰਗ ਦੇ ਮਾਮਲੇ ‘ਚ ਵਿਜੇ ਦੀਆਂ ਪਿਛਲੀਆਂ ਦੋ ਫਿਲਮਾਂ ਤੋਂ ਪਿੱਛੇ ਚੱਲ ਰਹੀ ਹੈ। ਨਿਰਦੇਸ਼ਕ ਵੈਂਕਟ ਪ੍ਰਭੂ ਦੀ ਫਿਲਮ ‘ਦਿ ਗ੍ਰੇਟੈਸਟ ਆਫ਼ ਆਲ ਟਾਈਮ’ (GOAT – 2024) ਨੇ ਘਰੇਲੂ ਬਾਜ਼ਾਰ ‘ਚ 29.83 ਕਰੋੜ ਰੁਪਏ ਦੀ ਅਡਵਾਂਸ ਬੁਕਿੰਗ ਕੀਤੀ ਸੀ ਅਤੇ ਵਿਸ਼ਵ ਭਰ ‘ਚ ਪਹਿਲੇ ਦਿਨ 126.32 ਕਰੋੜ ਰੁਪਏ ਕਮਾਏ ਸਨ।
ਕੀ ‘ਜਨ ਨਾਇਗਨ’ ਰਜਨੀਕਾਂਤ ਦੀ ‘ਕੂਲੀ’ ਦਾ ਰਿਕਾਰਡ ਤੋੜੇਗੀ?
ਮੌਜੂਦਾ ਰਫ਼ਤਾਰ ਨੂੰ ਦੇਖਦੇ ਹੋਏ Sacnilk ਨੇ ਅੰਦਾਜ਼ਾ ਲਗਾਇਆ ਹੈ ਕਿ ਇਹ ਫਿਲਮ ਭਾਰਤ ‘ਚ ਲਗਭਗ 50-60 ਕਰੋੜ ਰੁਪਏ ਦੀ ਓਪਨਿੰਗ ਕਰ ਸਕਦੀ ਹੈ। ਹਾਲਾਂਕਿ, ਜੇਕਰ ਆਖਰੀ ਸਮੇਂ ‘ਚ ਟਿਕਟਾਂ ਦੀ ਵਿਕਰੀ ‘ਚ ਤੇਜ਼ੀ ਆਉਂਦੀ ਹੈ ਤਾਂ ਇਹ ਅੰਕੜਾ ਬਦਲ ਸਕਦਾ ਹੈ। ਫਿਲਹਾਲ ਇਹ ਦੇਖਣਾ ਬਾਕੀ ਹੈ ਕਿ ਕੀ ‘ਜਨ ਨਾਇਗਨ’ ਨਿਰਦੇਸ਼ਕ ਲੋਕੇਸ਼ ਕਨਗਰਾਜ ਦੀ ਰਜਨੀਕਾਂਤ ਸਟਾਰਰ ਫਿਲਮ ‘ਕੂਲੀ’ (Coolie – 151 ਕਰੋੜ ਰੁਪਏ) ਦਾ ਰਿਕਾਰਡ ਤੋੜ ਕੇ ਤਮਿਲ ਸਿਨੇਮਾ ਦੀ ਸਭ ਤੋਂ ਵੱਡੀ ਓਪਨਿੰਗ ਕਰਨ ਵਾਲੀ ਫਿਲਮ ਬਣ ਸਕਦੀ ਹੈ ਜਾਂ ਨਹੀਂ।
