ਪਾਕਿਸਤਾਨ ਸ਼ਾਹੀਨਜ਼ ਨੇ 15 ਮੈਂਬਰੀ ਟੀਮ ਦਾ ਕੀਤਾ ਐਲਾਨ, ਅਬਦੁਲ ਸਮਦ ਨੂੰ ਸੌਂਪੀ ਕਪਤਾਨੀ
ਸਪੋਰਟਸ, 3 ਨਵੰਬਰ (ਗੁਰਮੀਤ ਸਿੰਘ ਤੁੰਗ): ਕ੍ਰਿਕਟ ਪ੍ਰੇਮੀਆਂ ਨੂੰ ਇੱਕ ਹੋਰ ਭਾਰਤ-ਪਾਕਿਸਤਾਨ ਮੁਕਾਬਲਾ ਦੇਖਣ ਦਾ ਮੌਕਾ ਮਿਲਣ ਜਾ ਰਿਹਾ ਹੈ। ਏਸ਼ੀਆ ਕੱਪ ਰਾਈਜ਼ਿੰਗ ਸਟਾਰਸ ਵਨਡੇ ਟੂਰਨਾਮੈਂਟ ਵਿੱਚ ਦੋਵਾਂ ਦੇਸ਼ਾਂ ਦੀਆਂ ਟੀਮਾਂ 22 ਨਵੰਬਰ ਨੂੰ ਮੈਦਾਨ ਵਿੱਚ ਆਹਮੋ-ਸਾਹਮਣੇ ਹੋਣਗੀਆਂ। ਇਸ ਮਹੱਤਵਪੂਰਨ ਮੁਕਾਬਲੇ ਨੂੰ ਲੈ ਕੇ ਕ੍ਰਿਕਟ ਪ੍ਰਸ਼ੰਸਕਾਂ ਵਿੱਚ ਹੁਣ ਤੋਂ ਹੀ ਉਤਸ਼ਾਹ ਦੇਖਣ ਨੂੰ ਮਿਲ ਰਿਹਾ ਹੈ। ਟੂਰਨਾਮੈਂਟ ਦੀ ਸ਼ੁਰੂਆਤ 19 ਨਵੰਬਰ ਤੋਂ ਹੋਵੇਗੀ। ਇਸ ਸਬੰਧੀ ਪਾਕਿਸਤਾਨ ਨੇ ਆਪਣੀ 15 ਮੈਂਬਰੀ ਟੀਮ ਦਾ ਐਲਾਨ ਕਰ ਦਿੱਤਾ ਹੈ। ਪਾਕਿਸਤਾਨ ਸ਼ਾਹੀਨਜ਼ ਦੀ ਕਮਾਨ ਅਬਦੁਲ ਸਮਦ ਨੂੰ ਸੌਂਪੀ ਗਈ ਹੈ। ਦੂਜੇ ਪਾਸੇ ਭਾਰਤ ਏ ਦੀ ਟੀਮ ਦਾ ਐਲਾਨ ਵੀ ਪਹਿਲਾਂ ਹੀ ਕੀਤਾ ਜਾ ਚੁੱਕਾ ਹੈ, ਜਿਸ ਦੀ ਅਗਵਾਈ ਤਿਲਕ ਵਰਮਾ ਕਰਨਗੇ।
50 ਓਵਰਾਂ ਦੇ ਫਾਰਮੈਟ ਵਿੱਚ ਹੋਵੇਗਾ ਟੂਰਨਾਮੈਂਟ
ਇਸ ਵਾਰ ਏਸ਼ੀਆ ਕੱਪ ਰਾਈਜ਼ਿੰਗ ਸਟਾਰਸ ਦਾ ਆਯੋਜਨ 50 ਓਵਰਾਂ ਦੇ ਵਨਡੇ ਫਾਰਮੈਟ ਵਿੱਚ ਕੀਤਾ ਜਾ ਰਿਹਾ ਹੈ। ਪਾਕਿਸਤਾਨ ਦੀ ਟੀਮ ਵਿੱਚ ਹਸਨ ਨਵਾਜ਼, ਹੈਦਰ ਅਲੀ, ਮਾਜ਼ ਸਦਾਕਤ, ਸ਼ਮੀਲ ਹੁਸੈਨ ਅਤੇ ਫਰਹਾਨ ਯੂਸਫ਼ ਵਰਗੇ ਖਿਡਾਰੀਆਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਗੇਂਦਬਾਜ਼ੀ ਵਿਭਾਗ ਵਿੱਚ ਮੁਹੰਮਦ ਹਸਨੈਨ, ਅਹਿਮਦ ਦਾਨਿਆਲ, ਆਕਿਫ਼ ਜਾਵੇਦ ਅਤੇ ਸੂਫ਼ਿਆਨ ਮੁਕੀਮ ਅਹਿਮ ਭੂਮਿਕਾ ਨਿਭਾਉਣਗੇ।
ਪਾਕਿਸਤਾਨ ਕੋਲ ਖਿਤਾਬ ਬਚਾਉਣ ਦੀ ਚੁਣੌਤੀ
ਪਾਕਿਸਤਾਨ ਸ਼ਾਹੀਨਜ਼ ਇਸ ਵਾਰ ਮੌਜੂਦਾ ਚੈਂਪੀਅਨ ਵਜੋਂ ਟੂਰਨਾਮੈਂਟ ਵਿੱਚ ਹਿੱਸਾ ਲਵੇਗੀ। ਸਾਲ 2023 ਵਿੱਚ ਵਨਡੇ ਫਾਰਮੈਟ ਵਿੱਚ ਹੋਏ ਮੁਕਾਬਲੇ ਦੌਰਾਨ ਪਾਕਿਸਤਾਨ ਨੇ ਖਿਤਾਬ ਜਿੱਤਿਆ ਸੀ। ਇਸ ਵਾਰ ਵੀ ਟੀਮ ਦੀ ਕੋਸ਼ਿਸ਼ ਆਪਣੀ ਜਿੱਤ ਦੀ ਲੈਅ ਬਰਕਰਾਰ ਰੱਖਣ ਅਤੇ ਖਿਤਾਬ ਬਚਾਉਣ ਦੀ ਹੋਵੇਗੀ। ਪਾਕਿਸਤਾਨ ਨੂੰ ਗਰੁੱਪ ਪੜਾਅ ਵਿੱਚ ਭਾਰਤ ਏ, ਨੇਪਾਲ ਅਤੇ ਯੂਏਈ ਦੇ ਨਾਲ ਰੱਖਿਆ ਗਿਆ ਹੈ। ਦੂਜੇ ਗਰੁੱਪ ਵਿੱਚ ਬੰਗਲਾਦੇਸ਼, ਸ਼੍ਰੀਲੰਕਾ, ਅਫਗਾਨਿਸਤਾਨ, ਹਾਂਗਕਾਂਗ ਅਤੇ ਚੀਨ ਦੀਆਂ ਟੀਮਾਂ ਸ਼ਾਮਲ ਹਨ।
20 ਨਵੰਬਰ ਨੂੰ ਪਾਕਿਸਤਾਨ ਦਾ ਪਹਿਲਾ ਮੈਚ
ਪਾਕਿਸਤਾਨ ਸ਼ਾਹੀਨਜ਼ ਆਪਣੀ ਮੁਹਿੰਮ ਦੀ ਸ਼ੁਰੂਆਤ 20 ਨਵੰਬਰ ਨੂੰ ਯੂਏਈ ਵਿਰੁੱਧ ਕਰੇਗੀ। ਇਸ ਤੋਂ ਬਾਅਦ 22 ਨਵੰਬਰ ਨੂੰ ਭਾਰਤ ਏ ਨਾਲ ਉਸ ਦਾ ਮੁਕਾਬਲਾ ਹੋਵੇਗਾ, ਜਦਕਿ ਲੀਗ ਪੜਾਅ ਦਾ ਆਖਰੀ ਮੈਚ 25 ਨਵੰਬਰ ਨੂੰ ਨੇਪਾਲ ਖ਼ਿਲਾਫ਼ ਖੇਡਿਆ ਜਾਵੇਗਾ। ਦੋਵਾਂ ਗਰੁੱਪਾਂ ਵਿੱਚੋਂ ਅੰਕ ਸੂਚੀ ਦੀਆਂ ਚੋਟੀ ਦੀਆਂ ਦੋ-ਦੋ ਟੀਮਾਂ ਸੈਮੀਫਾਈਨਲ ਵਿੱਚ ਪ੍ਰਵੇਸ਼ ਕਰਨਗੀਆਂ।
ਭਾਰਤ ਏ ਦੀ ਟੀਮ
ਭਾਰਤ ਏ ਦੀ 15 ਮੈਂਬਰੀ ਟੀਮ ਵਿੱਚ ਤਿਲਕ ਵਰਮਾ (ਕਪਤਾਨ), ਅਭਿਸ਼ੇਕ ਸ਼ਰਮਾ, ਵੈਭਵ ਸੂਰਿਆਵੰਸ਼ੀ, ਪ੍ਰਭਸਿਮਰਨ ਸਿੰਘ, ਰਜਤ ਪਾਟੀਦਾਰ, ਰਿੰਕੂ ਸਿੰਘ, ਕੁਮਾਰ ਕੁਸ਼ਾਗ੍ਰ, ਸੂਰਿਆਂਸ਼ ਸ਼ੇਡਗੇ, ਸ਼ਾਹਬਾਜ਼ ਅਹਿਮਦ, ਵਿਪਰਾਜ ਨਿਗਮ, ਹਰਸ਼ ਦੁਬੇ, ਤਨੁਸ਼ ਕੋਟਿਆਨ, ਹਰਸ਼ਿਤ ਰਾਣਾ, ਪ੍ਰਿੰਸ ਯਾਦਵ ਅਤੇ ਅਰਸ਼ਦ ਖਾਨ ਸ਼ਾਮਲ ਹਨ।
ਪਾਕਿਸਤਾਨ ਸ਼ਾਹੀਨਜ਼ ਦੀ ਟੀਮ
ਅਬਦੁਲ ਸਮਦ (ਕਪਤਾਨ), ਅਹਿਮਦ ਦਾਨਿਆਲ, ਆਕਿਫ਼ ਜਾਵੇਦ, ਦਾਨਿਸ਼ ਅਜ਼ੀਜ਼, ਫਰਹਾਨ ਯੂਸਫ਼, ਹੈਦਰ ਅਲੀ, ਹਸਨ ਨਵਾਜ਼, ਮਾਜ਼ ਸਦਾਕਤ, ਮੁਹੰਮਦ ਹਸਨੈਨ, ਮੁਹੰਮਦ ਇਮਰਾਨ, ਰੋਹੇਲ ਨਜ਼ੀਰ, ਸਾਦ ਮਸੂਦ, ਸ਼ਾਹਜ਼ੈਬ ਖਾਨ, ਸ਼ਮੀਲ ਹੁਸੈਨ ਅਤੇ ਸੂਫ਼ਿਆਨ ਮੁਕੀਮ। ਹੁਣ ਸਭ ਦੀਆਂ ਨਜ਼ਰਾਂ 22 ਨਵੰਬਰ ਦੇ ਭਾਰਤ-ਪਾਕਿਸਤਾਨ ਮੁਕਾਬਲੇ ‘ਤੇ ਟਿਕੀਆਂ ਹੋਈਆਂ ਹਨ, ਜਿੱਥੇ ਦੋਵੇਂ ਟੀਮਾਂ ਜਿੱਤ ਹਾਸਲ ਕਰਕੇ ਟੂਰਨਾਮੈਂਟ ਵਿੱਚ ਆਪਣੀ ਸਥਿਤੀ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਕਰਨਗੀਆਂ।
