ਹਿਮਾਚਲ ਪ੍ਰਦੇਸ਼:11ਜੁਲਾਈ (ਛਤਰਪਾਲ ਸਿੰਘ):ਹਿਮਾਚਲ ਪ੍ਰਦੇਸ਼ ਵਿੱਚ ਸ਼ਨੀਵਾਰ ਨੂੰ ਦਰਮਿਆਨੀ ਤੋਂ ਭਾਰੀ ਮੀਂਹ ਪੈਣ ਕਾਰਨ ਕਈ ਇਲਾਕਿਆਂ ਵਿੱਚ ਨੁਕਸਾਨ ਹੋਇਆ। ਸ਼ਿਮਲਾ ਵਿੱਚ ਭੂ-ਖਿਸਕਣ (ਲੈਂਡਸਲਾਈਡ) ਵਾਪਰੀ, ਸਾਂਗਲਾ ਵਿੱਚ ਪਿਛਲੇ ਸਾਲ ਬਣਿਆ ਬੇਲੀ ਪੁਲ ਢਹਿ ਗਿਆ ਅਤੇ ਕਿੰਨੌਰ ਜ਼ਿਲ੍ਹੇ ਵਿੱਚ ਹੜ੍ਹ ਦੇ ਪਾਣੀ ਨੇ ਇੱਕ ਮੰਜ਼ਿਲਾ ਘਰ ਨੂੰ ਡੁੱਬੋ ਦਿੱਤਾ, ਜਦਕਿ ਕਈ ਹੋਰ ਘਰਾਂ ਉੱਤੇ ਵੀ ਖਤਰਾ ਮੰਡਰਾ ਰਿਹਾ ਹੈ।
ਸ਼ਿਮਲਾ ਸ਼ਹਿਰ ਦੇ ਬੋਥਵੈੱਲ ਇਲਾਕੇ ਵਿੱਚ ਸੰਜੌਲੀ ਕਾਲਜ ਨੇੜੇ ਸੜਕ ਹੇਠਾਂ ਬਣੀ ਰਿਟੇਨਿੰਗ ਵਾਲ (ਸਹਾਰਾ ਕੰਧ) ਸਵੇਰੇ ਤੜਕੇ ਢਹਿ ਗਈ, ਜਿਸ ਕਾਰਨ ਮਲਬਾ ਹੇਠਾਂ ਸਥਿਤ ਘਰਾਂ ਵੱਲ ਖਿਸਕ ਗਿਆ। ਅਧਿਕਾਰੀਆਂ ਮੁਤਾਬਕ ਜ਼ਿਲ੍ਹਾ ਪ੍ਰਸ਼ਾਸਨ ਅਤੇ ਵੱਖ-ਵੱਖ ਵਿਭਾਗਾਂ ਦੇ ਅਧਿਕਾਰੀ ਮੌਕੇ ‘ਤੇ ਪਹੁੰਚ ਕੇ ਸਥਿਤੀ ਦਾ ਜਾਇਜ਼ਾ ਲੈ ਰਹੇ ਹਨ।
ਸਥਾਨਕ ਲੋਕਾਂ ਦਾ ਦੋਸ਼ ਹੈ ਕਿ ਨਗਰ ਨਿਗਮ ਨੇ ਇਲਾਕੇ ਵਿੱਚ ਖੁਦਾਈ ਵਾਲੇ ਨਿਰਮਾਣ ਕੰਮ ਦੀ ਇਜਾਜ਼ਤ ਦਿੱਤੀ ਸੀ। ਲਗਾਤਾਰ ਮੀਂਹ ਕਾਰਨ ਜ਼ਮੀਨ ਕਮਜ਼ੋਰ ਹੋ ਗਈ ਅਤੇ ਭੂ-ਖਿਸਕਣ ਵਾਪਰ ਗਈ। ਵਸਨੀਕਾਂ ਨੇ ਨਿਰਮਾਣ ਕੰਮ ਤੁਰੰਤ ਰੋਕਣ ਅਤੇ ਪੂਰੇ ਇਲਾਕੇ ਦੀ ਭੂ-ਵਿਗਿਆਨਕ ਜਾਂਚ ਕਰਵਾਉਣ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਤਿੰਨ ਤੋਂ ਚਾਰ ਇਮਾਰਤਾਂ ਖਤਰੇ ਹੇਠ ਹਨ ਅਤੇ ਕੁਝ ਘਰਾਂ ਤੱਕ ਜਾਣ ਵਾਲਾ ਰਸਤਾ ਵੀ ਟੁੱਟ ਗਿਆ ਹੈ।
ਜ਼ਿਕਰਯੋਗ ਹੈ ਕਿ ਜੂਨ 2025 ਵਿੱਚ ਵੀ ਇਸੇ ਥਾਂ ‘ਤੇ ਭੂ-ਖਿਸਕਣ ਹੋਈ ਸੀ, ਜਿਸ ਦੌਰਾਨ ਪਹਾੜੀ ਤੋਂ ਮਲਬਾ ਅਤੇ ਵੱਡੀਆਂ ਚੱਟਾਨਾਂ ਹੇਠਾਂ ਸਥਿਤ ਘਰਾਂ ਉੱਤੇ ਆ ਡਿੱਗੀਆਂ ਸਨ।
ਸ਼ਨੀਵਾਰ ਨੂੰ ਸ਼ਿਮਲਾ ਦੇ ਉਪਨਗਰੀ ਇਲਾਕੇ ਮੋਹਲ ਰਾਜਹਾਣਾ ਵਿੱਚ ਵੀ ਇੱਕ ਹੋਰ ਭੂ-ਖਿਸਕਣ ਹੋਈ, ਜਿਸ ਵਿੱਚ ਵੱਡੀਆਂ ਚੱਟਾਨਾਂ, ਪੱਥਰਾਂ ਅਤੇ ਮਲਬੇ ਹੇਠ ਦੋ ਖੜ੍ਹੀਆਂ ਗੱਡੀਆਂ ਦੱਬ ਗਈਆਂ।
ਕਿੰਨੌਰ ਜ਼ਿਲ੍ਹੇ ਵਿੱਚ ਲਗਾਤਾਰ ਭਾਰੀ ਮੀਂਹ ਕਾਰਨ ਲਿੱਪਾ ਖੱਡ ਵਿੱਚ ਪਾਣੀ ਦਾ ਪੱਧਰ ਕਾਫ਼ੀ ਵੱਧ ਗਿਆ। ਲਿੱਪਾ ਬੱਸ ਅੱਡੇ ਨੇੜੇ ਇੱਕ ਮੰਜ਼ਿਲਾ ਘਰ ਪਾਣੀ ਵਿੱਚ ਡੁੱਬ ਗਿਆ, ਜਦਕਿ ਕਈ ਹੋਰ ਘਰਾਂ ਉੱਤੇ ਹੜ੍ਹ ਦਾ ਖਤਰਾ ਬਣਿਆ ਹੋਇਆ ਹੈ। ਤੇਜ਼ ਵਹਾਅ ਕਾਰਨ ਬੱਸ ਅੱਡੇ ਨੇੜੇ ਮਿੱਟੀ ਦਾ ਕਟਾਅ ਹੋ ਰਿਹਾ ਹੈ, ਜਿਸ ਨਾਲ ਸੜਕ ਨੂੰ ਵੀ ਨੁਕਸਾਨ ਪਹੁੰਚ ਰਿਹਾ ਹੈ।
ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਦਰਿਆਵਾਂ, ਨਦੀਆਂ, ਖੱਡਾਂ ਅਤੇ ਪ੍ਰਭਾਵਿਤ ਇਲਾਕਿਆਂ ਤੋਂ ਦੂਰ ਰਹਿਣ ਅਤੇ ਆਫ਼ਤ ਪ੍ਰਬੰਧਨ ਵਿਭਾਗ ਵੱਲੋਂ ਜਾਰੀ ਹਦਾਇਤਾਂ ਦੀ ਪਾਲਣਾ ਕਰਨ ਦੀ ਅਪੀਲ ਕੀਤੀ ਹੈ।
ਸ਼ਨੀਵਾਰ ਨੂੰ ਵੀ ਹਿਮਾਚਲ ਪ੍ਰਦੇਸ਼ ਦੇ ਕਈ ਹਿੱਸਿਆਂ ਵਿੱਚ ਦਰਮਿਆਨੀ ਤੋਂ ਬਹੁਤ ਭਾਰੀ ਮੀਂਹ ਜਾਰੀ ਰਿਹਾ। ਸਥਾਨਕ ਮੌਸਮ ਵਿਭਾਗ ਅਨੁਸਾਰ ਸ਼ੁੱਕਰਵਾਰ ਸ਼ਾਮ ਤੋਂ ਬਾਅਦ ਸਭ ਤੋਂ ਵੱਧ 158.9 ਮਿਲੀਮੀਟਰ ਮੀਂਹ ਨਾਹਨ ਵਿੱਚ ਦਰਜ ਕੀਤਾ ਗਿਆ। ਇਸ ਤੋਂ ਇਲਾਵਾ ਸੋਲਨ ਵਿੱਚ 80.2 ਮਿਲੀਮੀਟਰ, ਨਗਰੋਟਾ ਸੂਰੀਆਂ ਵਿੱਚ 62.5 ਮਿਲੀਮੀਟਰ, ਗੁਲੇਰ ਵਿੱਚ 56.3 ਮਿਲੀਮੀਟਰ, ਧੌਲਾਕੁਆਂ ਵਿੱਚ 55 ਮਿਲੀਮੀਟਰ, ਨਾਰਕੰਡਾ ਵਿੱਚ 54.5 ਮਿਲੀਮੀਟਰ, ਕੁਫ਼ਰੀ ਵਿੱਚ 48.5 ਮਿਲੀਮੀਟਰ, ਸੈਂਜ ਵਿੱਚ 48 ਮਿਲੀਮੀਟਰ, ਸ਼ਿਮਲਾ ਵਿੱਚ 37.5 ਮਿਲੀਮੀਟਰ, ਮਸ਼ੋਬਰਾ ਵਿੱਚ 36.5 ਮਿਲੀਮੀਟਰ, ਸਰਾਹਨ ਵਿੱਚ 35.3 ਮਿਲੀਮੀਟਰ ਅਤੇ ਭੁੰਤਰ ਵਿੱਚ 23.1 ਮਿਲੀਮੀਟਰ ਮੀਂਹ ਦਰਜ ਕੀਤਾ ਗਿਆ।
