ਸੋਨੀਆ ਵਿਹਾਰ ਤੋਂ ਜਗਤਪੁਰ ਤੱਕ 6 ਕਿਲੋਮੀਟਰ ਦਾ ਸਫ਼ਰ ਕਰੇਗੀ ਇਲੈਕਟ੍ਰਿਕ ਕਰੂਜ਼ ਬੋਟ, ਸੰਗੀਤਮਈ ਫੁਹਾਰਾ, ਫੂਡ ਕੋਰਟ ਅਤੇ ਬੱਚਿਆਂ ਲਈ ਮਨੋਰੰਜਨ ਜ਼ੋਨ ਵੀ ਹੋਣਗੇ ਖਿੱਚ ਦਾ ਕੇਂਦਰ
ਨਵੀਂ ਦਿੱਲੀ, 10 ਨਵੰਬਰ, 2026 (ਚੌਧਰੀ ਪ੍ਰਭਜੀਤ ਸਿੰਘ ) : ਦੇਸ਼ ਦੀ ਰਾਜਧਾਨੀ ਦਿੱਲੀ ਵਿੱਚ ਯਮੁਨਾ ਨਦੀ ਨੂੰ ਸੈਰ-ਸਪਾਟੇ ਦੇ ਨਵੇਂ ਕੇਂਦਰ ਵਜੋਂ ਵਿਕਸਤ ਕਰਨ ਦੀ ਦਿਸ਼ਾ ਵਿੱਚ ਇੱਕ ਅਹਿਮ ਪਹਿਲ ਕੀਤੀ ਜਾ ਰਹੀ ਹੈ। ਦਿੱਲੀ ਸਰਕਾਰ ਵੱਲੋਂ ਮੰਗਲਵਾਰ ਨੂੰ ਸੋਨੀਆ ਵਿਹਾਰ ਵਿਖੇ ਪਹਿਲੀ ਮਨੋਰੰਜਕ ਰਿਵਰ ਕਰੂਜ਼ ਸੇਵਾ ‘ਨਮੋ ਯਮੁਨਾ ਰਿਵਰ ਸਫਾਰੀ’ ਸ਼ੁਰੂ ਕੀਤੀ ਜਾ ਰਹੀ ਹੈ। ਇਸ ਪ੍ਰੋਜੈਕਟ ਨਾਲ ਦਿੱਲੀ ਵਾਸੀਆਂ ਅਤੇ ਸੈਲਾਨੀਆਂ ਨੂੰ ਯਮੁਨਾ ਨਦੀ ਵਿੱਚ ਕਰੂਜ਼ ਦੀ ਸਵਾਰੀ ਦਾ ਨਵਾਂ ਤਜਰਬਾ ਮਿਲੇਗਾ। ਇਸ ਸੇਵਾ ਦਾ ਉਦਘਾਟਨ ਕੇਂਦਰੀ ਬੰਦਰਗਾਹਾਂ, ਜਹਾਜ਼ਰਾਨੀ ਅਤੇ ਜਲ ਮਾਰਗ ਮੰਤਰੀ ਸਰਬਾਨੰਦ ਸੋਨੋਵਾਲ ਵੱਲੋਂ ਕੀਤਾ ਜਾਵੇਗਾ। ਇਸ ਮੌਕੇ ਦਿੱਲੀ ਦੀ ਮੁੱਖ ਮੰਤਰੀ ਰੇਖਾ ਗੁਪਤਾ, ਮੰਤਰੀ ਕਪਿਲ ਮਿਸ਼ਰਾ ਅਤੇ ਹੋਰ ਪ੍ਰਮੁੱਖ ਆਗੂ ਵੀ ਮੌਜੂਦ ਰਹਿਣਗੇ। ਇਹ ਪ੍ਰੋਜੈਕਟ ਕੇਂਦਰ ਸਰਕਾਰ, ਦਿੱਲੀ ਸਰਕਾਰ ਅਤੇ ਦਿੱਲੀ ਵਿਕਾਸ ਅਥਾਰਟੀ (DDA) ਦਾ ਸਾਂਝਾ ਉਪਰਾਲਾ ਹੈ।
6 ਕਿਲੋਮੀਟਰ ਦੀ ਹੋਵੇਗੀ ਕਰੂਜ਼ ਯਾਤਰਾ
‘ਨਮੋ ਯਮੁਨਾ ਰਿਵਰ ਸਫਾਰੀ’ ਤਹਿਤ ਇਲੈਕਟ੍ਰਿਕ ਕਰੂਜ਼ ਬੋਟ ਸੋਨੀਆ ਵਿਹਾਰ ਤੋਂ ਜਗਤਪੁਰ ਤੱਕ ਲਗਭਗ 6 ਕਿਲੋਮੀਟਰ ਦਾ ਆਉਣ-ਜਾਣ ਵਾਲਾ ਸਫ਼ਰ ਤੈਅ ਕਰੇਗੀ। ਇਸ ਦਾ ਮੁੱਖ ਉਦੇਸ਼ ਨਦੀ ਆਧਾਰਿਤ ਸੈਰ-ਸਪਾਟੇ ਨੂੰ ਉਤਸ਼ਾਹਿਤ ਕਰਨਾ ਅਤੇ ਲੋਕਾਂ ਨੂੰ ਯਮੁਨਾ ਦੇ ਕੁਦਰਤੀ ਨਜ਼ਾਰਿਆਂ ਨਾਲ ਜੋੜਨਾ ਹੈ। ਦਿੱਲੀ ਦੇ ਮੰਤਰੀ ਕਪਿਲ ਮਿਸ਼ਰਾ ਨੇ ਦੱਸਿਆ ਕਿ ਕਰੂਜ਼ ਸੇਵਾ ਦੀ ਸ਼ੁਰੂਆਤ ਲਈ ਬੋਟ ਪੂਰੀ ਤਰ੍ਹਾਂ ਤਿਆਰ ਹੈ। ਉਨ੍ਹਾਂ ਕਿਹਾ ਕਿ ਨਦੀ ਦੇ ਕਿਨਾਰੇ ਇੱਕ ਮਨੋਰੰਜਨ ਖੇਤਰ ਵੀ ਤਿਆਰ ਕੀਤਾ ਗਿਆ ਹੈ, ਜਿੱਥੇ ਬੱਚਿਆਂ ਲਈ ਖੇਡਾਂ ਅਤੇ ਹੋਰ ਗਤੀਵਿਧੀਆਂ ਦਾ ਪ੍ਰਬੰਧ ਕੀਤਾ ਗਿਆ ਹੈ।
ਸੰਗੀਤਮਈ ਫੁਹਾਰਾ ਅਤੇ ਫੂਡ ਜ਼ੋਨ ਹੋਣਗੇ ਖਿੱਚ ਦਾ ਕੇਂਦਰ
ਕਰੂਜ਼ ਸੇਵਾ ਦੇ ਨਾਲ ਵਿਕਸਤ ਕੀਤੇ ਗਏ ਮਨੋਰੰਜਨ ਖੇਤਰ ਵਿੱਚ ਸੰਗੀਤਮਈ ਫੁਹਾਰਾ, ਬੱਚਿਆਂ ਲਈ ਪਲੇਅ ਜ਼ੋਨ, ਫੂਡ ਕੋਰਟ, ਖਰੀਦਦਾਰੀ ਦੀਆਂ ਸਹੂਲਤਾਂ ਅਤੇ ਐਡਵੈਂਚਰ ਸਪੋਰਟਸ ਗਤੀਵਿਧੀਆਂ ਵੀ ਸ਼ਾਮਲ ਹੋਣਗੀਆਂ। ਹਰ ਸ਼ਾਮ ਭਗਵਾਨ ਸ੍ਰੀ ਕ੍ਰਿਸ਼ਨ ਅਤੇ ਯਮੁਨਾ ਮਈਆ ਦੀ ਥੀਮ ’ਤੇ ਆਧਾਰਿਤ ਮਿਊਜ਼ੀਕਲ ਫਾਊਂਟੇਨ ਸ਼ੋਅ ਕਰਵਾਇਆ ਜਾਵੇਗਾ। ਸੈਲਾਨੀਆਂ ਦੀ ਸਹੂਲਤ ਲਈ ਆਨਲਾਈਨ ਅਤੇ ਮੌਕੇ ’ਤੇ ਟਿਕਟਾਂ ਖਰੀਦਣ ਦਾ ਪ੍ਰਬੰਧ ਹੋਵੇਗਾ। ਮੰਤਰੀ ਕਪਿਲ ਮਿਸ਼ਰਾ ਅਨੁਸਾਰ ਸਵੇਰੇ 9 ਵਜੇ ਤੋਂ ਐਂਟਰੀ ਸ਼ੁਰੂ ਹੋਵੇਗੀ ਅਤੇ ਰਾਤ ਲਗਭਗ 9 ਵਜੇ ਆਖਰੀ ਟਿਕਟ ਜਾਰੀ ਕੀਤੀ ਜਾਵੇਗੀ। ਭਵਿੱਖ ਵਿੱਚ ਕਰੂਜ਼ ਬੋਟਾਂ ਦੀ ਗਿਣਤੀ ਵਧਾਉਣ ਦੀ ਵੀ ਯੋਜਨਾ ਹੈ।
ਯਮੁਨਾ ਨਾਲ ਲੋਕਾਂ ਦਾ ਰਿਸ਼ਤਾ ਮਜ਼ਬੂਤ ਹੋਵੇਗਾ: ਮੁੱਖ ਮੰਤਰੀ
ਮੁੱਖ ਮੰਤਰੀ ਰੇਖਾ ਗੁਪਤਾ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ ’ਤੇ ਕਿਹਾ ਕਿ ਯਮੁਨਾ ਰਿਵਰ ਕਰੂਜ਼ ਦਿੱਲੀ ਵਾਸੀਆਂ ਨੂੰ ਮਨੋਰੰਜਨ ਦਾ ਇੱਕ ਨਵਾਂ ਤਜਰਬਾ ਦੇਵੇਗੀ। ਉਨ੍ਹਾਂ ਅਨੁਸਾਰ ਇਹ ਪਹਿਲ ਲੋਕਾਂ ਨੂੰ ਮਾਂ ਯਮੁਨਾ ਦੇ ਹੋਰ ਨੇੜੇ ਲਿਆਉਣ ਦੇ ਨਾਲ-ਨਾਲ ਦਿੱਲੀ ਦੇ ਰਿਵਰਫਰੰਟ ਨੂੰ ਨਵੀਂ ਪਛਾਣ ਦੇਣ ਵਿੱਚ ਸਹਾਇਕ ਹੋਵੇਗੀ। ਸਰਕਾਰ ਦਾ ਮੰਨਣਾ ਹੈ ਕਿ ਇਲੈਕਟ੍ਰਿਕ ਬੋਟਾਂ ਰਾਹੀਂ ਵਾਤਾਵਰਣ ਪੱਖੀ ਜਲ ਆਵਾਜਾਈ ਅਤੇ ਸੈਰ-ਸਪਾਟੇ ਨੂੰ ਉਤਸ਼ਾਹਿਤ ਕੀਤਾ ਜਾ ਸਕੇਗਾ। ਇਸ ਪ੍ਰੋਜੈਕਟ ਦਾ ਇੱਕ ਹੋਰ ਉਦੇਸ਼ ਯਮੁਨਾ ਨਦੀ ਨਾਲ ਲੋਕਾਂ ਦੀ ਸਾਂਝ ਵਧਾਉਣਾ ਅਤੇ ਰਾਜਧਾਨੀ ਵਿੱਚ ਇੱਕ ਨਵਾਂ ਜਨਤਕ ਮਨੋਰੰਜਨ ਸਥਾਨ ਵਿਕਸਤ ਕਰਨਾ ਹੈ। ਇਸ ਸਮਾਗਮ ਵਿੱਚ ਕੇਂਦਰੀ ਮੰਤਰੀ ਸ਼ਾਂਤਨੂ ਠਾਕੁਰ ਅਤੇ ਹਰਸ਼ ਮਲਹੋਤਰਾ, ਦਿੱਲੀ ਦੇ ਮੰਤਰੀ ਪਰਵੇਸ਼ ਸਾਹਿਬ ਸਿੰਘ, ਕਪਿਲ ਮਿਸ਼ਰਾ, ਉਪ ਰਾਜਪਾਲ ਤਰਨਜੀਤ ਸਿੰਘ ਸੰਧੂ ਅਤੇ ਭਾਜਪਾ ਸੰਸਦ ਮੈਂਬਰ ਮਨੋਜ ਤਿਵਾੜੀ ਸਮੇਤ ਹੋਰ ਸ਼ਖ਼ਸੀਅਤਾਂ ਦੇ ਸ਼ਾਮਲ ਹੋਣ ਦੀ ਉਮੀਦ ਹੈ। ਸਰਕਾਰ ਇਸ ਪ੍ਰੋਜੈਕਟ ਨੂੰ ਕਰੂਜ਼ ਟੂਰਿਜ਼ਮ ਅਤੇ ਵਿਰਾਸਤੀ ਸੈਰ-ਸਪਾਟੇ ਦੇ ਸੁਮੇਲ ਵਜੋਂ ਪੇਸ਼ ਕਰ ਰਹੀ ਹੈ, ਜਿਸ ਨਾਲ ਦਿੱਲੀ ਵਿੱਚ ਸੈਰ-ਸਪਾਟੇ ਦੀਆਂ ਨਵੀਆਂ ਸੰਭਾਵਨਾਵਾਂ ਖੁੱਲ੍ਹਣ ਦੀ ਉਮੀਦ ਹੈ।
