ਗੁਰੂਗ੍ਰਾਮ, 23 ਜੁਲਾਈ, 2026 (ਸੰਜੀਵ ਸਿੰਗਲਾ): ਸ਼ਹਿਰ ਦੀ ਜਨਤਕ ਆਵਾਜਾਈ ਨੂੰ ਆਧੁਨਿਕ ਅਤੇ ਵਾਤਾਵਰਣ-ਅਨੁਕੂਲ ਬਣਾਉਣ ਵੱਲ ਇੱਕ ਹੋਰ ਅਹਿਮ ਕਦਮ ਚੁੱਕਦਿਆਂ ਗੁਰੂਗ੍ਰਾਮ ਮੈਟਰੋਪੋਲੀਟਨ ਸਿਟੀ ਬੱਸ ਲਿਮਿਟੇਡ (ਜੀ.ਐਮ.ਸੀ.ਬੀ.ਐਲ.) ਨੇ ਆਪਣੀ ਪਹਿਲੀ ਇਲੈਕਟ੍ਰਿਕ ਸਿਟੀ ਬੱਸ ਸੇਵਾ ਦੀ ਸ਼ੁਰੂਆਤ ਕਰ ਦਿੱਤੀ ਹੈ। ਨਿਯਮਤ ਸੰਚਾਲਨ ਤੋਂ ਪਹਿਲਾਂ ਇਸ ਬੱਸ ਨੂੰ ਵੱਖ-ਵੱਖ ਰੂਟਾਂ ‘ਤੇ ਤਿੰਨ ਦਿਨਾਂ ਲਈ ਟਰਾਇਲ ਰਨ ‘ਤੇ ਚਲਾਇਆ ਜਾਵੇਗਾ, ਤਾਂ ਜੋ ਇਸ ਦੀ ਕਾਰਗੁਜ਼ਾਰੀ ਅਤੇ ਯਾਤਰੀਆਂ ਲਈ ਉਪਲਬਧ ਸਹੂਲਤਾਂ ਦੀ ਜਾਂਚ ਕੀਤੀ ਜਾ ਸਕੇ।
ਇਹ ਏਅਰ ਕੰਡੀਸ਼ਨਡ ਇਲੈਕਟ੍ਰਿਕ ਬੱਸ 25 ਯਾਤਰੀਆਂ ਦੀ ਬੈਠਣ ਸਮਰੱਥਾ ਨਾਲ ਲੈਸ ਹੈ ਅਤੇ ਪ੍ਰਦੂਸ਼ਣ ਰਹਿਤ ਆਵਾਜਾਈ ਨੂੰ ਉਤਸ਼ਾਹਿਤ ਕਰਨ ਦੇ ਉਦੇਸ਼ ਨਾਲ ਤਿਆਰ ਕੀਤੀ ਗਈ ਹੈ। ਟਰਾਇਲ ਦੌਰਾਨ ਬੱਸ ਦੀ ਕਾਰਗੁਜ਼ਾਰੀ, ਚਾਰਜਿੰਗ ਸਮਰੱਥਾ ਅਤੇ ਟ੍ਰੈਫਿਕ ਹਾਲਾਤਾਂ ਵਿੱਚ ਇਸ ਦੇ ਸੰਚਾਲਨ ਦਾ ਮੁਲਾਂਕਣ ਕੀਤਾ ਜਾਵੇਗਾ।
ਜੀਐਮਡੀਏ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਪੀ.ਸੀ. ਮੀਨਾ ਨੇ ਕਿਹਾ ਕਿ ਇਹ ਪਹਿਲ ਗੁਰੂਗ੍ਰਾਮ ਨੂੰ ਗ੍ਰੀਨ ਟਰਾਂਸਪੋਰਟ ਵੱਲ ਲਿਜਾਣ ਦੀ ਯੋਜਨਾ ਦਾ ਮਹੱਤਵਪੂਰਨ ਹਿੱਸਾ ਹੈ। ਉਨ੍ਹਾਂ ਦੱਸਿਆ ਕਿ ਸ਼ਹਿਰ ਵਿੱਚ ਕੁੱਲ 100 ਇਲੈਕਟ੍ਰਿਕ ਬੱਸਾਂ ਸ਼ਾਮਲ ਕਰਨ ਦੀ ਯੋਜਨਾ ਹੈ, ਜਿਸ ਦੇ ਪਹਿਲੇ ਪੜਾਅ ਵਿੱਚ 25 ਬੱਸਾਂ ਸੜਕਾਂ ‘ਤੇ ਉਤਾਰੀਆਂ ਜਾਣਗੀਆਂ।
ਇਸ ਦੇ ਨਾਲ ਹੀ ਜੀ.ਐਮ.ਸੀ.ਬੀ.ਐਲ. ਯਾਤਰੀਆਂ ਲਈ ਡਿਜੀਟਲ ਸਹੂਲਤਾਂ ਦਾ ਵੀ ਵਿਸਥਾਰ ਕਰ ਰਿਹਾ ਹੈ। ਜਲਦ ਹੀ ਨਵਾਂ “ਲੂਪ ਕਾਰਡ” ਲਾਂਚ ਕੀਤਾ ਜਾਵੇਗਾ, ਜਿਸ ਰਾਹੀਂ ਯਾਤਰੀ ਆਸਾਨੀ ਨਾਲ ਬੱਸ ਕਿਰਾਇਆ ਅਦਾ ਕਰ ਸਕਣਗੇ। ਕਾਰਡ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਹਰ ਯਾਤਰਾ ‘ਤੇ 2 ਫੀਸਦੀ ਛੂਟ ਵੀ ਮਿਲੇਗੀ, ਜਦਕਿ ਇਸ ਨੂੰ ਆਨਲਾਈਨ ਰੀਚਾਰਜ ਕਰਨ ਦੀ ਸੁਵਿਧਾ ਵੀ ਉਪਲਬਧ ਹੋਵੇਗੀ।
ਇਸ ਤੋਂ ਇਲਾਵਾ, ਹੁਣ ਜੀ.ਐਮ.ਸੀ.ਬੀ.ਐਲ. ਦੀਆਂ ਬੱਸਾਂ ਵਿੱਚ ਯਾਤਰੀ ਕਿਸੇ ਵੀ UPI ਐਪ ਰਾਹੀਂ ਨਕਦ ਰਹਿਤ ਕਿਰਾਇਆ ਅਦਾ ਕਰ ਸਕਣਗੇ। ਪ੍ਰਸ਼ਾਸਨ ਦਾ ਮੰਨਣਾ ਹੈ ਕਿ ਇਲੈਕਟ੍ਰਿਕ ਬੱਸਾਂ ਅਤੇ ਡਿਜੀਟਲ ਭੁਗਤਾਨ ਪ੍ਰਣਾਲੀ ਦੇ ਮਿਲਾਪ ਨਾਲ ਗੁਰੂਗ੍ਰਾਮ ਦੀ ਜਨਤਕ ਆਵਾਜਾਈ ਹੋਰ ਤੇਜ਼, ਸੁਵਿਧਾਜਨਕ ਅਤੇ ਵਾਤਾਵਰਣ ਪੱਖੋਂ ਬਿਹਤਰ ਬਣੇਗੀ।
