ਨਵੀਂ ਦਿੱਲੀ ,15 ਜੁਲਾਈ(ਦੀਪਕ ਦੱਤਾ): ਅੱਜ ਦੇ ਸਮੇਂ ਵਿੱਚ ਸਮਾਰਟਫੋਨ ਸਿਰਫ਼ ਗੱਲਬਾਤ ਦਾ ਸਾਧਨ ਨਹੀਂ ਰਹੇ, ਸਗੋਂ ਇਨ੍ਹਾਂ ਵਿੱਚ ਨਿੱਜੀ ਜਾਣਕਾਰੀ, ਬੈਂਕਿੰਗ ਡੀਟੇਲ, OTP ਅਤੇ ਮਹੱਤਵਪੂਰਨ ਡਾਟਾ ਵੀ ਹੁੰਦਾ ਹੈ। ਇਸ ਲਈ ਨਵਾਂ ਫ਼ੋਨ ਖਰੀਦਣ ਤੋਂ ਤੁਰੰਤ ਬਾਅਦ ਵਰਤੋਂ ਸ਼ੁਰੂ ਕਰਨ ਦੀ ਬਜਾਏ ਕੁਝ ਜ਼ਰੂਰੀ ਸੁਰੱਖਿਆ ਸੈਟਿੰਗਾਂ ਨੂੰ ਚਾਲੂ ਕਰਨਾ ਬਹੁਤ ਮਹੱਤਵਪੂਰਨ ਹੈ।
ਗ੍ਰਹਿ ਮੰਤਰਾਲੇ ਦੇ ਸਾਈਬਰ ਸੁਰੱਖਿਆ ਵਿੰਗ I4C ਨੇ ਲੋਕਾਂ ਨੂੰ ਸਾਵਧਾਨ ਕਰਦਿਆਂ ਕਿਹਾ ਹੈ ਕਿ ਸਿਰਫ਼ ਫ਼ੋਨ ਖਰੀਦਣਾ ਹੀ ਕਾਫ਼ੀ ਨਹੀਂ, ਸਗੋਂ ਉਸ ਦੀ ਸੁਰੱਖਿਆ ਲਈ ਸੈਟਿੰਗਾਂ ਕਰਨਾ ਵੀ ਜ਼ਰੂਰੀ ਹੈ। I4C ਵੱਲੋਂ ਸਾਂਝੀ ਕੀਤੀ ਗਈ ਜਾਣਕਾਰੀ ਮੁਤਾਬਕ ਇਨ੍ਹਾਂ ਸੈਟਿੰਗਾਂ ਨਾਲ ਫ਼ੋਨ ਗੁੰਮ ਜਾਂ ਚੋਰੀ ਹੋਣ ਦੀ ਸਥਿਤੀ ਵਿੱਚ ਡਿਵਾਈਸ ਨੂੰ ਲੱਭਣਾ ਅਤੇ ਨਿੱਜੀ ਡਾਟਾ ਨੂੰ ਸੁਰੱਖਿਅਤ ਰੱਖਣਾ ਆਸਾਨ ਹੋ ਜਾਂਦਾ ਹੈ।
Find My Device/Find Hub ਕਰੋ ਐਕਟਿਵ
ਨਵਾਂ ਫ਼ੋਨ ਸੈਟਅੱਪ ਕਰਦੇ ਸਮੇਂ ਸਭ ਤੋਂ ਪਹਿਲਾਂ Find My Device ਜਾਂ Find Hub ਫੀਚਰ ਨੂੰ ਚਾਲੂ ਕਰੋ। ਇਸ ਨਾਲ ਫ਼ੋਨ ਦੇ ਗੁੰਮ ਜਾਂ ਚੋਰੀ ਹੋਣ ’ਤੇ ਉਸ ਦੀ ਲੋਕੇਸ਼ਨ ਪਤਾ ਕਰਨ ਵਿੱਚ ਮਦਦ ਮਿਲਦੀ ਹੈ। ਇਸ ਦੇ ਨਾਲ ਰਿਮੋਟ ਲਾਕ ਅਤੇ ਆਫਲਾਈਨ ਡਿਵਾਈਸ ਲੱਭਣ ਵਾਲੇ ਵਿਕਲਪ ਵੀ ਚਾਲੂ ਕਰਨੇ ਚਾਹੀਦੇ ਹਨ।
ਲਾਕ ਸਕ੍ਰੀਨ ’ਤੇ OTP ਅਤੇ ਨਿੱਜੀ ਜਾਣਕਾਰੀ ਸੁਰੱਖਿਅਤ ਕਰੋ
ਫ਼ੋਨ ਦੀ ਲਾਕ ਸਕ੍ਰੀਨ ’ਤੇ ਆਉਣ ਵਾਲੀਆਂ ਨੋਟੀਫਿਕੇਸ਼ਨਾਂ ਵਿੱਚ OTP ਜਾਂ ਹੋਰ ਸੰਵੇਦਨਸ਼ੀਲ ਜਾਣਕਾਰੀ ਦਿਖਾਈ ਨਾ ਦੇਵੇ, ਇਸ ਲਈ ਨੋਟੀਫਿਕੇਸ਼ਨ ਸੈਟਿੰਗਾਂ ਵਿੱਚ ਜਾ ਕੇ ਸੰਵੇਦਨਸ਼ੀਲ ਸੂਚਨਾਵਾਂ ਨੂੰ ਬੰਦ ਕਰ ਦਿਓ।
ਪਾਵਰ ਆਫ ਅਤੇ SIM ਲਾਕ ਸੈਟਿੰਗ ਕਰੋ ਚਾਲੂ
ਕਈ Android ਫ਼ੋਨਾਂ ਵਿੱਚ ਪਾਵਰ ਆਫ ਕਰਨ ਲਈ PIN ਜਾਂ ਪਾਸਵਰਡ ਦੀ ਲੋੜ ਵਾਲਾ ਵਿਕਲਪ ਉਪਲਬਧ ਹੁੰਦਾ ਹੈ। ਇਸ ਨੂੰ ਚਾਲੂ ਕਰਨ ਨਾਲ ਚੋਰ ਫ਼ੋਨ ਨੂੰ ਆਸਾਨੀ ਨਾਲ ਬੰਦ ਨਹੀਂ ਕਰ ਸਕਦੇ। ਇਸ ਤੋਂ ਇਲਾਵਾ SIM ਕਾਰਡ ਲਾਕ ਵੀ ਐਕਟਿਵ ਕਰਨਾ ਚਾਹੀਦਾ ਹੈ, ਜਿਸ ਨਾਲ SIM ਸਵੈਪ ਵਰਗੇ ਧੋਖਾਧੜੀ ਵਾਲੇ ਮਾਮਲਿਆਂ ਤੋਂ ਬਚਾਅ ਹੋ ਸਕਦਾ ਹੈ।
ਸਾਈਬਰ ਸੁਰੱਖਿਆ ਮਾਹਿਰਾਂ ਮੁਤਾਬਕ ਨਵੇਂ ਫ਼ੋਨ ਦੀ ਵਰਤੋਂ ਸ਼ੁਰੂ ਕਰਨ ਤੋਂ ਪਹਿਲਾਂ ਇਹ ਸੁਰੱਖਿਆ ਕਦਮ ਚੁੱਕਣ ਨਾਲ ਡਿਵਾਈਸ ਨੂੰ ਲੱਭਣ ਦੀ ਸੰਭਾਵਨਾ ਵਧ ਜਾਂਦੀ ਹੈ ਅਤੇ ਨਿੱਜੀ ਡਾਟਾ ਦੇ ਗਲਤ ਇਸਤੇਮਾਲ ਤੋਂ ਬਚਾਅ ਕੀਤਾ ਜਾ ਸਕਦਾ ਹੈ।
