ਚੰਡੀਗੜ੍ਹ, 21 ਅਕਤੂਬਰ, 2026 ( ਗੁਰਮੀਤ ਸਿੰਘ ਤੁੰਗ) : ਕੇਂਦਰ ਸਰਕਾਰ ਵੱਲੋਂ 2026-27 ਦੇ ਸਪਲਾਈ ਵਰ੍ਹੇ ਦੌਰਾਨ ਗੰਨੇ ਦੇ ਰਸ, ਖੰਡ ਦੇ ਘੋਲ ਅਤੇ ‘ਬੀ-ਹੈਵੀ’ ਸ਼ੀਰੇ ਤੋਂ ਇਥੇਨਾਲ ਬਣਾਉਣ ਲਈ ਖ਼ਰੀਦ ’ਤੇ ਲਾਈ ਰੋਕ ਪੰਜਾਬ ਦੇ ਕਿਸਾਨਾਂ, ਖੰਡ ਮਿੱਲਾਂ ਅਤੇ ਖੇਤੀਬਾੜੀ ਨਾਲ ਜੁੜੇ ਉਦਯੋਗਾਂ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ। ਇਹ ਚਿੰਤਾ ਸ਼੍ਰੋਮਣੀ ਪੰਜਾਬ ਮੰਚ ਨੇ ਜ਼ਾਹਰ ਕੀਤੀ ਹੈ। ਮੰਚ ਦੇ ਸੰਸਥਾਪਕ ਅਤੇ ਕਨਵੀਨਰ, ਸਾਬਕਾ ਵਿਸ਼ੇਸ਼ ਮੁੱਖ ਸਕੱਤਰ ਕੇ.ਬੀ.ਐੱਸ. ਸਿੱਧੂ ਨੇ ਇਸ ਸਬੰਧੀ ਵਿਚਾਰ-ਚਰਚਾ ਪੱਤਰ ਜਾਰੀ ਕੀਤਾ ਹੈ। ਉਨ੍ਹਾਂ ਅਨੁਸਾਰ, ਗੰਨੇ ਤੋਂ ਬਾਲਣ ਬਣਾਉਣ ਦੀ ਮੰਗ ਘਟਣ ਨਾਲ ਕਿਸਾਨਾਂ ਨੂੰ ਗੰਨੇ ਦੀ ਅਦਾਇਗੀ ਵਿੱਚ ਦੇਰੀ ਹੋ ਸਕਦੀ ਹੈ ਅਤੇ ਮਿੱਲਾਂ ਵੱਲੋਂ ਪਹਿਲਾਂ ਕੀਤੇ ਨਿਵੇਸ਼ ’ਤੇ ਵੀ ਅਸਰ ਪੈ ਸਕਦਾ ਹੈ। ਮੰਚ ਨੇ ਇਹ ਵੀ ਦਲੀਲ ਦਿੱਤੀ ਕਿ ਝੋਨੇ ਤੋਂ ਇਥੇਨਾਲ ਬਣਾਉਣ ਵਿੱਚ ਪਾਣੀ ਦੀ ਖਪਤ ਗੰਨੇ ਅਤੇ ਮੱਕੀ ਦੇ ਮੁਕਾਬਲੇ ਵੱਧ ਹੈ। ਇਸ ਲਈ ਸਰਕਾਰ ਨੂੰ ਗੰਨੇ ’ਤੇ ਪੂਰਨ ਰੋਕ ਦੀ ਥਾਂ ਖੰਡ ਦੇ ਭੰਡਾਰ ਅਤੇ ਪਾਣੀ ਦੀ ਖਪਤ ਨੂੰ ਧਿਆਨ ਵਿੱਚ ਰੱਖ ਕੇ ਨੀਤੀ ਬਣਾਉਣੀ ਚਾਹੀਦੀ ਹੈ। ਜ਼ਿਕਰਯੋਗ ਹੈ ਕਿ ਇਹ ਰੋਕ ਸ਼ਰਾਬ ਬਣਾਉਣ ’ਤੇ ਨਹੀਂ, ਸਗੋਂ ਪੈਟਰੋਲ ਵਿੱਚ ਮਿਲਾਉਣ ਲਈ ਗੰਨੇ ਤੋਂ ਬਣੇ ਇਥੇਨਾਲ ਦੀ ਸਰਕਾਰੀ ਖ਼ਰੀਦ ’ਤੇ ਹੈ। ਇਸ ਦਾ ਮਕਸਦ ਘਰੇਲੂ ਖੰਡ ਦੀ ਉਪਲਬਧਤਾ ਵਧਾਉਣਾ ਅਤੇ ਕੀਮਤਾਂ ਨੂੰ ਕਾਬੂ ਵਿੱਚ ਰੱਖਣਾ ਹੈ।
