ਗਾਮਾਗੋਰੀ ਸਿਟੀ, ਜਾਪਾਨ, 2 ਅਕਤੂਬਰ 2026 (ਚੌਧਰੀ ਪ੍ਰਭਜੀਤ ਸਿੰਘ): ਭਾਰਤ ਦੀ ਓਲੰਪੀਅਨ ਨੇਤਰਾ ਕੁਮਾਨਨ ਨੇ ਏਸ਼ੀਆਈ ਖੇਡਾਂ ਦੀ ਸੇਲਿੰਗ ਪ੍ਰਤੀਯੋਗਿਤਾ ਵਿੱਚ ਮਹਿਲਾ ਡਿੰਗੀ ਮੁਕਾਬਲੇ ਦੌਰਾਨ ਕਾਂਸੀ ਦਾ ਤਮਗਾ ਆਪਣੇ ਨਾਮ ਕੀਤਾ ਹੈ। ਚੇਨਈ ਦੀ 29 ਸਾਲਾ ਖਿਡਾਰਨ ਨੇ ਕੁੱਲ 14 ਅੰਕਾਂ ਨਾਲ ਤੀਜਾ ਸਥਾਨ ਹਾਸਲ ਕੀਤਾ। ਨੇਤਰਾ ਨੇ ਕੁਆਲੀਫਿਕੇਸ਼ਨ ਰਾਊਂਡ ਵਿੱਚ 7 ਅੰਕ ਅਤੇ ਫਾਈਨਲ ਰੇਸਾਂ ਵਿੱਚ ਵੀ 7 ਅੰਕ ਹਾਸਲ ਕੀਤੇ। ਦੋ ਫਾਈਨਲ ਰੇਸਾਂ ਵਿੱਚੋਂ ਉਨ੍ਹਾਂ ਨੇ ਇੱਕ ਵਿੱਚ ਪਹਿਲਾ ਸਥਾਨ ਹਾਸਲ ਕੀਤਾ, ਜਦਕਿ ਦੂਜੀ ਰੇਸ ਵਿੱਚ ਉਹ ਛੇਵੇਂ ਸਥਾਨ ’ਤੇ ਰਹੀ। ਮਹਿਲਾ ਡਿੰਗੀ ਮੁਕਾਬਲੇ ਵਿੱਚ ਥਾਈਲੈਂਡ ਦੀ ਸੋਫੀਆ ਮੋਂਟਗੋਮਰੀ ਨੇ 5 ਅੰਕਾਂ ਨਾਲ ਸੋਨ ਤਮਗਾ ਜਿੱਤਿਆ, ਜਦਕਿ ਸਿੰਗਾਪੁਰ ਦੀ ਜਾਨੀਆ ਐਂਗ ਨੇ 13 ਅੰਕਾਂ ਨਾਲ ਚਾਂਦੀ ਦਾ ਤਮਗਾ ਹਾਸਲ ਕੀਤਾ। ਸੇਲਿੰਗ ਮੁਕਾਬਲਿਆਂ ਵਿੱਚ ਖਿਡਾਰੀਆਂ ਨੂੰ ਉਨ੍ਹਾਂ ਦੀ ਰੇਸ ਵਿੱਚ ਪ੍ਰਾਪਤ ਸਥਿਤੀ ਦੇ ਆਧਾਰ ’ਤੇ ਅੰਕ ਦਿੱਤੇ ਜਾਂਦੇ ਹਨ। ਪਹਿਲਾ ਸਥਾਨ ਹਾਸਲ ਕਰਨ ਵਾਲੇ ਖਿਡਾਰੀ ਨੂੰ ਇੱਕ ਅੰਕ ਮਿਲਦਾ ਹੈ ਅਤੇ ਸਭ ਤੋਂ ਘੱਟ ਕੁੱਲ ਅੰਕਾਂ ਵਾਲਾ ਖਿਡਾਰੀ ਮੁਕਾਬਲਾ ਜਿੱਤਦਾ ਹੈ। ਪੁਰਸ਼ਾਂ ਦੇ ਮੁਕਾਬਲੇ ਵਿੱਚ ਭਾਰਤ ਦੇ ਵਿਸ਼ਨੂ ਸਰਵਣਨ ਨੇ ਚੌਥਾ ਸਥਾਨ ਹਾਸਲ ਕੀਤਾ। ਉਨ੍ਹਾਂ ਨੇ ਦੋਵੇਂ ਫਾਈਨਲ ਰੇਸਾਂ ਵਿੱਚ ਦੂਜਾ ਸਥਾਨ ਹਾਸਲ ਕੀਤਾ, ਪਰ ਕੁਆਲੀਫਿਕੇਸ਼ਨ ਵਿੱਚ 17 ਅੰਕ ਹੋਣ ਕਾਰਨ ਉਨ੍ਹਾਂ ਦਾ ਕੁੱਲ ਸਕੋਰ 21 ਰਿਹਾ। ਪੁਰਸ਼ਾਂ ਦੇ ਮੁਕਾਬਲੇ ਵਿੱਚ ਦੱਖਣੀ ਕੋਰੀਆ ਦੇ ਜੀਮੀਨ ਹਾ ਨੇ 9 ਅੰਕਾਂ ਨਾਲ ਸੋਨ ਤਮਗਾ, ਹਾਂਗਕਾਂਗ, ਚੀਨ ਦੇ ਨਿਕੋਲਸ ਹਾਲੀਡੇ ਨੇ 11 ਅੰਕਾਂ ਨਾਲ ਚਾਂਦੀ ਅਤੇ ਮਲੇਸ਼ੀਆ ਦੇ ਮੋਹਦ ਖੈਰੁਲਨਿਜ਼ਾਮ ਨੇ 14 ਅੰਕਾਂ ਨਾਲ ਕਾਂਸੀ ਦਾ ਤਮਗਾ ਜਿੱਤਿਆ। ਇਸ ਤੋਂ ਪਹਿਲਾਂ ਵੀਰਵਾਰ ਨੂੰ ਭਾਰਤ ਨੇ ਸੇਲਿੰਗ ਵਿੱਚ ਦੋ ਹੋਰ ਤਮਗੇ ਜਿੱਤੇ ਸਨ। ਮਨੂ ਫ੍ਰਾਂਸਿਸ ਅਤੇ ਕੁਰਿਸਿੰਕਲ ਨੋਬਲ ਦੀ ਜੋੜੀ ਨੇ ਪੁਰਸ਼ਾਂ ਦੇ ਸਕਿਫ ਮੁਕਾਬਲੇ ਵਿੱਚ ਚਾਂਦੀ ਦਾ ਤਮਗਾ ਜਿੱਤਿਆ, ਜਦਕਿ ਮਹਿਲਾ ਵਰਗ ਵਿੱਚ ਹਰਸ਼ਿਤਾ ਤੋਮਰ ਅਤੇ ਸ਼ੀਤਲ ਵਰਮਾ ਨੇ ਕਾਂਸੀ ਦਾ ਤਮਗਾ ਹਾਸਲ ਕੀਤਾ।
